Uztaila

Jesusek esandako eta egindako guztiak, bere mirariek barne, bete-betean erakutsi zuten bere Aitak pentsatzen eta sentitzen duena (Joan 14:9). Zer ikasi dezakegu Jesusen mirarietatik? Jehoba eta Jesusek bihotz-bihotzez maite gaituztela. Lurrean egon zen bitartean, Jesusek maitasuna erakutsi zuen bere boterea sufritzen ari zirenen alde erabiltzean. Behin, bi itsu berarengana gerturatu ziren laguntza erregutuz (Mat. 20:30-34). Jesusek, lehenik, barne-barneko «gupida» sentitu zuen; hau da, erabat hunkitu egin zen. Eta ondoren, bi itsuak sendatu zituen. «Erabat hunkitu» bezala itzulitako jatorrizko aditz grekoak barne-barnean sentitzen den errukiz beteriko sentimendu sakona adierazten du. Jesusen maitasunak erruki mota hau erakustera eta jendea elikatu eta sendatzera bultzatu zuen (Mat. 15:32; Mar. 1:41). Ziur egon gaitezke Jehobak, bihotz-bihotzeko errukiz beteriko Jainkoak, eta bere Semeak bihotzez maite gaituztela, eta gure mina sentitzen dutela (Luk. 1:78; 1 Ped. 5:7). Gizakion arazo guztiak ezabatzeko irrikitan daude! w23.04 3 ¶4-5

Neurri praktikoak hartu behar ditugu Satanasen sisteman zabalduta dauden pentsaera eta ideiek gugan ahalik eta eraginik txikiena izateko. Bestalde, gure burua gauza onez bete dezakegu Biblia irakurriz eta aztertuz. Gainera, bileretara joateak eta predikazioan parte hartzeak gure pentsaera babestuko dute. Horrela egiten badugu, guretzat jasatea ezinezkoa den tentaziorik ez dugula izango promesten digu Jehobak (1 Ko. 10:12, 13). Gutako bakoitzak inoiz baino gehiago egin behar du otoitz Jehobari leial izateko azken egun zail hauetan. Jehobak gure bihotza berari zabaltzea nahi du (Sal. 62:9 [62:8, NWT]). Goratu Jehoba eta eman eskerrak egiten duen guztiarengatik. Eskatu laguntza Jehobari predikazioan ausart izateko eta edozein arazo edo tentaziori aurre egiteko. Egin otoitz erregularki, eta ez zaitzala ezerk edo inork geldiarazi. w23.05 7 ¶17-18

Zergatik joaten gara bileretara? Alde batetik, Jehoba goratzeko (Sal. 26:12; 111:1). Bestetik, garai latz hauetan elkar animatzeko (1 Tes. 5:11). Eskua altxatzean eta komentario bat egitean, bi helburu hauek betetzen ditugu. Baina, iruzkinak egitean, zailtasunak izan ditzakegu. Urduri sentitu gaitezke, edo agian ez dizkigute guk nahi bezainbeste komentario ematen. Zerk lagunduko digu zailtasun hauei aurre egiten? Paulo apostoluak elkar adoretu edo animatzearen beharra azpimarratu zuen. Iruzkin sinple eta motz batekin ere besteak animatu ditzakegula gogoratzen badugu, eskua altxatzean ez gara hain urduri sentituko. Eta ez badizkigute nahi bezainbeste komentario ematen, pozik sentitu gaitezke gure anai-arrebek komentatzeko aukera izango dutelako (1 Ped. 3:8). w23.04 20 ¶1-3

Judutarrak Babilonian 70 urte inguru gatibu egon ondoren, erregeak dekretu bat eman du: israeldarrak etxera itzultzeko aske dira (Esd. 1:2-4). Hau Jehobak bakarrik lortu zezakeen, Babiloniak ez zuelako gatibuak askatzeko ohiturarik (Is. 14:4, 17). Baina Babilonia menderatua izan zen, eta agintari berriak judutarrak atera ahal zirela esan zuen. Judutar guztiek, familiaburuek bereziki, erabaki bat hartu behar zuten: Babiloniatik irten edo bertan geratu. Hau ez zen erabaki xamurra. Alde batetik, batzuk nagusiegiak ziren horrelako bidaia luze bat egiteko. Eta, bestetik, judutar gehienak Babilonian jaio zirenez, ez zuten Israel beraien etxea bezala ikusten, arbasoen etxea bezala baizik. Gainera, itxuraz, batzuei bizitza ondo joaten ari zitzaien Babilonian. Horregatik, agian zaila egingo zitzaien beraien etxe erosoak eta negozioak uztea ezezaguna zen lurralde batera joateko. w23.05 14 ¶1-2

Jainkoaren Hitzak iraupena, errukia eta maitasuna lantzen jarraitzera animatzen gaitu. Lukas 21:19​ak dio: «Iraupenaren iraupenez lortuko duzue bizia». Kolosarrei 3:12, Ke aipuak esaten du: «Jantzi zaiteze bihotzeko errukiz». Eta 1 Tesalonikarrei 4:9, 10​ak dio: «Jainkoak berak irakasten baitizue elkar maitatzen [...]. Hala ere, senideok, saia zaitezte, arren, gero eta maitasun handiagoa izaten». Aipu hauek dagoeneko iraupena, errukia eta maitasuna erakutsi zuten kristauentzat idatzi ziren. Hala ere, ezaugarri horiek lantzen jarraitu behar zuten. Guk ere gauza bera egin behar dugu. Horretarako, oso lagungarria izango zaizu lehen mendeko kristauek ezaugarri hauek nola erakutsi zituzten aztertzea. Ondoren, kristau horiek nola imitatu ditzakezun eta larrialdi handirako prest zauden ala ez ikusiko duzu. Larrialdi handia iristen denerako, jada nola iraun jakingo duzu eta irauten jarraitzeko determinazioa izango duzu. w23.07 3 ¶4, 8

Gantzutuen edo beste ardien parte garen inporta gabe, «Bide santu» honetatik atera gabe jarraitu behar dugu. Bide honetan mantentzeak Jehoba adoratzen laguntzen digu orain. Etorkizunean ere lagunduko digu, Erreinuak lurra bedeinkapenez betetzean (Joan 10:16). 1919​tik, milioika pertsonek Babilonia Handia, erlijio faltsuaren inperioa, utzi dute eta bide figuratibo honetatik ibiltzen hasi dira. Judutarrek Babilonia utzi zutenean, bidean izan zituzten oztopoak kentzeaz arduratu zen Jehoba (Is. 57:14). Zer esan dezakegu gaur egungo «Bide santu» honi buruz? 1919 urtearen aurreko mendeetan, Jehobak berari begirune zioten gizonak erabili zituen beste batzuei Babilonia Handitik ateratzen laguntzeko (Konparatu Isaias 40:3). Gizon hauek beharrezko prestaketa lanak egin zituzten bihotz oneko pertsonak erlijio faltsutik ateratzeko eta Jehoba bere herriarekin batera adoratzeko. w23.05 15-16 ¶8-9

Jehobak bera gogotsu eta pozik zerbitzatzea nahi du (2 Ko. 9:7). Beraz, gogorik izan ez arren, lanean jarraitu behar al dugu helburu espiritual bat lortzeko? Begira zer egiten zuen Paulo apostoluak: «Modu zorrotzean diziplinatzen dut nire gorputza eta nire esklabo bihurtzen dut» (1 Ko. 9:25-27, NWT, oharra). Nahiz eta Paulok Jehobak eskatutakoa egiteko desiorik ez izan, bere burua behartu zuen. Pozik al zegoen Jehoba Paulok bere alde egin zuenagatik? Noski baietz! Gainera, bere esfortzuak saritu zituen (2 Tim. 4:7, 8). Era berean, nahiz eta motibaziorik ez izan, Jehoba asko pozten da gure helburua betetzen saiatzen ari garela ikusten duenean. Jehobak badaki egiten duguna ez zaigula beti gustatzen, baina asko eskertzen du hau bera maite dugulako egiten dugunean. Jehobak Paulo bedeinkatu zuen bezala, gure ahaleginak ere bedeinkatuko ditu. Eta Jehobaren bedeinkapena ikusteak motibazioa izaten lagundu ahal digu. w23.05 29 ¶9-10

Jehobaren egunetik bizirik aterako ez direnak lotan daudenekin konparatu zituen Paulo apostoluak. Ez dira beraien inguruan gertatzen denaz konturatzen, ezta denbora aurrera doanik ere. Horregatik, zerbait inportantea gertatzean, ez dira ohartzen eta ezin dute neurririk hartu. Gaur egun, jende gehiena lotan dago espiritualki (Erm. 11:8). Argi dago «azken garaietan» bizi garela eta larrialdi handia laster iritsiko dela. Baina, ez diete ebidentziei jaramonik egiten. (2 Ped. 3:3, 4). Guk, aldiz, egunetik egunera esna mantentzea gero eta garrantzitsuagoa dela uste dugu (1 Tes. 5:6). Horregatik, kalma mantendu behar dugu eta izuak ez gaitu jo behar. Zergatik? Gaur egungo arazo politiko eta sozialetan murgildu ez gaitezen. Jehobaren eguna gerturatu ahala, arlo hauetan parte hartzeko presioa handitzen joango da. Hala ere, ez dugu kezkatu beharrik. Jainkoaren espirituak izuak jo gabe kalma mantentzen eta erabaki zuhurrak hartzen lagundu gaitzake (Luk. 12:11, 12). w23.06 9-10 ¶6-7

Zer datorkizu burura Samson izena entzutean? Agian, izugarrizko indarra izan zuen gizon bat. Eta, hala da. Baina, horretaz gain, ondorio mingarriak eragin zizkion erabaki txar bat hartu zuen. Hala ere, Samsonek gauza asko egin zituen Jainkoaren zerbitzuan, eta Jehoba horretan zentratu zen. Izan ere, guk probetxua atera ahal izateko, Samsonen fede eredua Biblian egoteaz ziurtatu zen Jehoba. Honek Samson erabili zuen Israelen alde gauza harrigarriak egiteko. Mendeak beranduago, inspirazio bidez, Paulo apostoluak fede bikaineko gizonen artean aipatu zuen Samson (Heb. 11:32-34). Bere ereduak asko animatu gaitzake. Berak Jainkoarengan konfiantza izan zuen, baita erronkei aurre egitean ere. Samsonen eredutik beste gauza asko ere ikasi ditzakegu. w23.09 2 ¶1-2

Zer egin dezakegu gure iraupena sendotzeko? Jehobari gure kezkak sarritan eta zintzotasunez azaldu (1 Tes. 5:17). Agian momentu honetan ez duzu zailtasun larririk. Hala ere, bilatzen al duzu Jehobaren gida minduta edo nahastuta sentitzen zaren edo zer egin ez dakizun bakoitzean? Orain dituzun arazo txikiei aurre egitean Jehobari erregularki otoitz egiten badiozu, etorkizunean erronka handiagoei aurre egitean, bitan pentsatu gabe, gauza bera egingo duzu. Ziur egon zaitezke Jehobak badakiela zehazki zu noiz eta nola lagundu (Sal. 27:1, 3). Orain zailtasunak ditugunean Jehobari leial mantentzen bagara, etorkizunean larrialdi handian irauteko aukera gehiago izango ditugu (Erm. 5:3, NWT). Zergatik esan dezakegu hau? Anai-arreba askori zailtasun baten aurrean irauteak hurrengo erronkaren aurrean irauten lagundu die. Izan ere, Jehoba beraiek laguntzeko prest dagoela ikusi dute, beraien fedea sendotuz. Eta fedeak, ondorioz, hurrengo zailtasunaren aurrean irauten lagundu die (St. 1:2-4). w23.07 3 ¶7-8

Jehoba apala eta errukitsua da. Ezaugarri hauek arrazoitsua izatera eramaten diote. Adibidez, Jehobak Sodomako jende gaiztoa suntsitzear zegoenean, bere aingeruen bidez Loti mendira ihes egiteko esan zion. Baina, Lot hara joateko beldur zenez, bera eta bere familia Zoarrera joateko eskatu zuen, nahiz eta Jehobak herri txiki hau suntsitzeko asmoa izan. Jehobak Loti esandakoa zehazki betetzeko agindu ahal zion. Hala ere, Jehobaren apaltasuna argi ikusi zen Loten eskaera onartu eta Zoar suntsitu ez zuenean (Has. 19:18-22). Mendeak beranduago, Jehobak errukia erakutsi zien Niniveko biztanleei. Jonas profeta bidali zuen hiria eta bertako pertsona gaiztoak laster suntsituak izango zirela adierazteko. Baina, ninivetarrak damutu zirenean, Jehobak errukia sentitu zuen eta ez zuen hiria suntsitu (Jns. 3:1,10; 4:10, 11). w23.07 21 ¶5

Zer ikasi dezakegu Joaxen eredutik? Bera makil baten sostengua behar duen eta sustrai txikiak dituen zuhaitz bat bezalakoa zen. Makilak, hau da, Joiadak, hil ondoren, bere aldamenean egoteari utzi zion eta apostasiaren haizea jotzen hasi zen. Ondorioz, Joax erori egin zen, hau da, Jehobari bizkarra eman zion. Zer irakasten digu honek? Jehobari diogun errespetua ez dela anai-arrebek eta familiak gugan duen eragin onean bakarrik oinarritu behar. Espiritualki indartsu mantentzeko, Jehobari diogun maitasuna eta errespetu handia sendotzen jarraitu behar dugu. Hau lortzeko, Biblia aztertu, hausnartu eta otoitz egin behar dugu erregularki (Jer. 17:7, 8; Kol. 2:6, 7). Jehobak ez digu gauza askorik eskatzen. Kohelet 12:13 (EABLB) aipuak ederki laburbiltzen du: «Izan errespetu Jainkoarentzat eta begira haren manamenduak; hori baita jendeak egin behar duen guzia». Jehobari errespetu handia diogunean, etorkizunean zer gertatuko den axola gabe, Jehobari leial mantentzeko gai izango gara. Ezerk ez du Jehobarekin dugun adiskidetasuna kaltetuko. w23.06 18-19 ¶17-19

Jainkoak sinatutako garantia hitz hauekin hasten da: «Tronuan eserita zegoenak esan zuen» (Ap. 21:5​a, NWT). Hitz hauek aipagarriak dira Apokalipsia liburuan Jehobak berak hiru aldiz bakarrik hitz egiten duelako; eta hau horietako bat da. Beraz, Jehoba da hau ziurtatu duena, eta ez aingeru boteretsu bat, ezta berpiztutako Jesus ere! Honek bertset hauen ondorengo hitzetan konfiantza osoa izan dezakegula erakusten digu. Zergatik? Jehoba «gezurrik ez dioen Jainkoa» delako (Tit. 1:1-2 [1:2, NWT]). Jehobak honakoa esaten du: «Begira!». «Begira!» bezala itzulitako hitz grekoa askotan erabiltzen da Apokalipsia liburuan. Zeintzuk dira ondoren datozen hitzak? Ikusi Jainkoak dioena: «Gauza guztiak berriak egiten ari naiz». Fijatu zaitez Jainkoak «gauza guztiak berriak egiten ari naiz» esaten duela, eta ez «gauza guztiak berriak egingo ditut». Zergatik? Berarentzat promes hau guztiz erreala delako. Beraz, Jehobak aldaketa hauetaz orain gertatzen ariko balira bezala hitz egiten du, nahiz eta aldaketa hauek etorkizunean gertatuko diren (Is. 46:10). w23.11 3-4 ¶7-8

Pedro apostoluak bere ahuleziekin borrokatu behar izan zuen. Azter ditzagun adibide batzuk. Jesusek Bibliako profeziak betetzeko sufritu eta hil behar zuela azaldu zuenean, Pedrok Jesus zuzendu zuen (Mar. 8:31-33). Behin baino gehiagotan, Pedro eta beste apostoluek beraien artean handiena nor ote zen eztabaidatu zuten (Mar. 9:33, 34). Jesus hil aurreko azken gauean, Pedrok gizon baten belarria moztu zuen inpultsiboki (Joan 18:10). Eta gau hartan bertan, beldurrak jota, bere lagun Jesus hiru aldiz ukatu zuen (Mar. 14:66-72). Ondorioz, Pedrok negarrari eman zion saminki. Pedro lur jota zegoen, baina Jesusek ez zuen baztertu. Jesus berpiztua izan ondoren, Pedrok berriro ere berari zion maitasuna erakusteko aukera izan zuen. Jesusek bere arditxoak apalki zaintzera gonbidatu zuen Pedro (Joan 21:15-17). Eta bera Jesusek eskatutakoa betetzeko prest egon zen. Izan ere, Jerusalemen Mendekoste egunean gantzutuak izan ziren lehenengoetakoen artean egon zen Pedro. w23.09 22 ¶6-7

Pedro apostoluak honakoa betetzeko esan zien adindunei: «Larra [edo zaindu] ezazue Jainkoak zuen esku jarri duen artaldea» (1 Ped. 5:1-4). Adinduna bazara, badakigu anai-arrebak maite eta zaindu nahi dituzula. Hala ere, batzuetan, hain lanpetuta edo nekatuta sentitzeagatik eginkizun hau ezin duzula guztiz bete sentitu dezakezu. Orduan, zer egin dezakezu? Zure kezkak eta nola sentitzen zaren Jehobari kontatu. Pedrok honakoa idatzi zuen: «Zerbitzuren bat duenak bete dezala Jainkoak ematen dien indarraz» (1 Ped. 4:11). Anai-arreben zailtasun batzuk ezingo dira sistema honetan guztiz konpondu. Baina, gogoratu «artzain nagusi[a]» den Jesu Kristok inork baino hobeto lagundu ahal diela, bai orain, baita mundu berrian ere. Jainkoak adindunei eskatzen diena anai-arrebak maitatzea, zaintzea eta «artaldearentzat eredu» izatea besterik ez da. w23.09 29-30 ¶13-14

Giza arrazoiketa baztertu behar dugu. Jehobaren arauak errespetatzen ez dituzten pertsonen antzera pentsatzen hasten bagara, gu ere Jehobaren arauak alde batera uzten hasi gaitezke (1 Ko. 3:19). Zergatik da «mundu honetako jakinduria» tranpa bat? Askotan, Jainkoa desobeditzera eramaten dituelako pertsonak. Pergamo eta Tiatirako kristau batzuek hiri hauetan ohikoak ziren ikuspuntu idolatra eta moralgabeak bereganatu zituzten. Jesusek aholku zuzena eman zien kongregazio hauei sexu moralgabekeria onartzen ari zirelako (Ap. 2:14, 20, NWT). Guk ere, gaur egun, ikuspuntu oker hauek onartzeko presioari aurre egin behar diogu. Senideek eta ezagunek, gure emozioekin jolastuz, kontzesioak egitera animatu gaitzakete. Moralki garbi mantentzea garrantzitsua ez dela eta Bibliaren arau moralak zaharkituta daudela esan dezakete. Batzuetan, Jehobak ematen digun gida guztiz argia ez dela pentsatu dezakegu. «Idatzirik dagoena baino harantzago» joateko tentazioa ere izan dezakegu (1 Ko. 4:6). w23.07 16 ¶10-11

Mariak, Jesusen amak, Jehobaren nahia betetzeko indarra behar izan zuen. Nahiz eta ezkonduta ez egon, haurdun geratuko zen. Eta bere kabuz haurrak hezteko esperientziarik ez izan arren, Mesias izango zen haurra zaindu behar izango zuen. Gainera, ez zituen inoiz sexu harremanik izan. Orduan, nola azalduko zion Joseri haurdun zegoela? (Luk. 1:26-33). Nola jaso zuen Mariak indarra? Besteen laguntza bilatuz. Adibidez, Gabriel aingeruari bere eginkizunari buruz informazio gehiago eskatu zion (Luk. 1:34). Handik gutxira, Judako «mendialdeko hiri» bateraino joan zen bere senidea zen Elisabet bisitatzera. Elisabetek Maria zoriondu eta, inspirazioz, Mariaren haur jaio gabeari buruzko profezia animagarri bat aipatu zuen (Luk. 1:39-45). Jehobak «Bere indar guztiaz jokatu» zuela esan zuen Mariak (Luk. 1:46-51). Jehobak Gabriel eta Elisabeten bitartez Maria sendotu zuen. w23.10 14-15 ¶10-12

Jesusen jarraitzaileen artean, talde mugatu bat espiritu santuz gantzutua izan da. Hauek Jehobarekin harreman bereziaz gozatzen dute. 144.000 kristau hauek apaiz bezala zerbitzatuko dute zeruan Jesusekin (Ap. 14:1). Tabernakuluko santuak honakoa irudikatzen du: gantzutuek, lurrean dauden bitartean, Jainkoaren seme-alaba espiritual bezala duten egoera (Erm. 8:15-17). Tabernakuluko santu-santuak zerua irudikatzen du, Jehoba bizi den tokia. Santuaeta santu-santua banatzen zituen kortinak Jesusen giza gorputza irudikatzen du. Jesusek gorputz hori izan zuen bitartean, ezin izan zuen zeruan sartu tenplu espiritualeko Apaiz Nagusi handia bezala. Baina, Jesusek bere giza gorputza sakrifizio bezala gizaki guztion alde eman zuenez, kristau gantzutu guztiek zeruan bizitzeko aukera dute. Hauek ere beraien giza gorputza utzi behar dute zeruan sartu ahal izateko (Heb. 10:19, 20; 1 Ko. 15:50). w23.10 28 ¶13

Gedeonek, efraimdarrek kritikatu zutenean, lasaitasunez erantzun zuen (Ep. 8:1-3). Berak ez zuen haserre erantzun. Apaltasunez, beraien kezkak entzun zituen eta tentsioz beteriko egoera hura baretzea lortu zuen. Adindun zuhurrek Gedeon imitatzen dute arretaz entzunez eta kritiken aurrean ez haserretuz (St. 3:13). Era horretara, kongregazioan giro baketsua izaten laguntzen dute. Gedeonek besteen gorespena jaso zuen madiandarrak menderatzean. Baina berak Jehobarengan jarri zuen arreta guztia (Ep. 8:22, 23). Nola imitatu dezakete adindunek Gedeon? Lortzen duten guztiaren gorespena Jehobari emanez (1Ko. 4:6, 7). Adibidez, adindun batek irakasten abila izateagatik gorespena jaso dezake. Baina adindunak Bibliara edo Jehobaren erakundearengandik jasotzen dugun trebakuntzara bideratu dezake arreta osoa. Adindunek honetan ere pentsatu dezakete: euren irakasteko moduarekin Jehoba ohoratzen ari diren edo, kontrara, atentzioa bereganatzen ari diren. w23.06 4 ¶7-8

Otoitzean eskatutakoa jaso ez badugu, ondorengo galdera egin ahal diogu geure buruari: «Egokia al da otoitzean eskatzen ari naizena?». Askotan, guretzat onena zer den dakigula uste dugu. Baina eskatu duguna, luzera begira, agian ez zaigu komeni. Arazo bati buruz otoitz egiten ari bagara, baliteke eskatzen ari garena baino hobea den konponbidea egotea. Bestalde, eskatzen ari garen gauzaren bat beharbada ez dator bat Jehobaren nahiarekin (1 Joan 5:14). Azter dezagun guraso batzuen adibidea. Jehobari beraien seme edo alabak egian jarraitzeko eskatu diote otoitzean. Honek eskaera egokia dela dirudi. Hala ere, Jehobak ez du inor bera zerbitzatzera behartzen. Berak gu guztiok, gure seme-alabek barne, bera adoratzea aukeratzea nahi du (Deu. 10:12, 13; 30:19, 20). Beraz, gurasoek beraien seme edo alabaren bihotza ukitzeko laguntza eskatu ahal diote Jehobari otoitzean, Bera maitatzeko eta bere laguna izateko desira izan dezan (Esa. 22:6; Efe. 6:4). w23.11 21 ¶5; 23 ¶12

Zergatik da besteak kontsolatzea maitasuna erakusteko modu garrantzitsu bat? Biblia erreferentzia-lan baten arabera, Paulok erabili zuen «kontsola[tu]» aditzak honakoa esan nahi du: «Proba latz bat sufritzen ari den pertsona baten ondoan egotea animoa emateko». Beraz, sufritzen ari den anaia edo arreba bat kontsolatzen dugunean, Jehoba leialki zerbitzatzen jarraitzen laguntzen dugu. Eta hau egiten dugun bakoitzean, anai-arrebak maite ditugula erakusten dugu (2 Ko. 7:6, 7, 13). Errukia sentitzea eta kontsolamendua ematea oso lotuta daude. Zergatik esan dezakegu hau? Pertsona errukitsuak sufritzen ari dena kontsolatu eta lagundu nahi duelako. Beraz, lehenik, errukia sentitu eta, ondoren, kontsolamendua ematen du. Begira nola lotzen duen Paulok Jehobaren errukia Berak kontsolamendua emateko duen moduarekin: «Aita errukitsu eta kontsolamendu ororen iturri den Jainkoa» bezala deskribatzen du Jehoba (2 Ko. 1:3). w23.11 9-10 ¶8-10

Kristoren jarraitzaile guztiok zailtasunak jasatea espero dezakegu. Azter dezagun Paulo apostoluak bizitakoa. Hauxe esan zien Tesalonikan zeudenei: «Zuekin ginelarik, aldez aurretik esan genizuen atsekabeak [edo zailtasunak] izango genituela, eta badakizue hala gertatu dela» (1 Tes. 3:4). Eta korintoarrei honakoa idatzi zien: «Senideok, jakin behar duzue nolako larrialdiak izan nituen». Paulok bere bizia arriskuan egon zela ere esan zuen (2 Ko. 1:8; 11:23-27). Gaur egungo kristauok ere nolabaiteko zailtasunak jasatea espero dezakegu (2 Tim. 3:12). Jesusengan fedea jarri eta bera jarraitzeagatik, lagun eta senideek beharbada gaizki tratatu zaituzte. Arazoak izan al dituzu lanean gauza guztietan zintzo jokatzeko determinazioa izateagatik? (Heb. 13:18). Oposizioa jasan al duzu agintariengandik besteei zure esperantzari buruz hitz egiteagatik? Zer zailtasun mota jasaten dugun axola gabe, Paulok poztasuna izan beharko genukeela esaten du. w23.12 10-11 ¶9-10

Jakobek arazo asko izan zituen. Simeonek eta Lebik familia eta Jehoba lotsarazi zituzten. Ez hori bakarrik, bere emazte kuttuna Rakel hil egin zen bigarren semea erditzen ari zela. Eta gosete larri baten ondorioz, Jakob Egiptora joatera behartuta egon zen bere zahartzaroan (Has. 35:16-19; 37:28; 45:9-11, 28). Arazo hauek jasatean, Jakobek ez zuen Jehobarengan eta Bere promesetan zuen fedea inoiz galdu. Eta, noski, Jehobak bere alde zegoela erakutsi zion. Adibidez, materialki bedeinkatu zuen. Bestalde, Jose hainbeste urtez hilda zegoela pentsatu eta gero, imajinatu zenbat eskertuko zion Jakobek Jehobari bere semearekin berriro ere elkartzeagatik! Jakobek Jehobarekin adiskidetasun estua izan zuenez, probei aurre egin ahal izan zien (Has. 30:43; 32:10, 11 [32:9, 10, NWT]; 46:28-30). Era berean, guk ere Jehobarekin adiskidetasun estua mantentzen badugu, espero gabeko probei aurre egin ahal izango diegu. w23.04 15 ¶6-7

23. Salmoa abestian, Dabidek Jehobaren maitasun eta zaintza goxoan izan zuen konfiantza aipatzen da. Bertan, bera eta bere Artzain Jehobaren arteko lotura estua deskribatzen du Dabidek. Jehobak bera gidatzen utziz seguru sentitzen zen; konfiantza osoa zuen Berarengan. Bazekien Jehobak egunero-egunero erakutsiko ziola bere maitasuna. Zerk lagundu zion konfiantza hori izaten? Dabidek ondo zainduta zegoela sentitu zuen, Jehobak beti eman baitzion behar izan zuen guztia. Jehobaren adiskidetasunaz eta onespenaz ere gozatu zuen. Horregatik, etorkizunean zer gertatuko zitzaion inporta gabe, konfiantza hau izan zuen: Jehobak bere behar guztiez arduratzen jarraituko zuela. Ziur zegoen Jehobak maite zuela eta etorkizunean zainduko zuela. Honek kezkak alde batera uzten eta pozik egoten lagundu zion (Sal. 16:11). w24.01 28-29 ¶12-13

Bigarren Mundu Gerraren ondoren, Jehobaren herriak askatasunez predikatu du herrialde askotan. Ondorioz, anai-arrebak mundu osoan zehar predikatzen ari dira, eta gero eta jende gehiago Jehoba ezagutzera iritsi da. Gaur egun, Zuzendari Batzordeko kideek Jesu Kristoren gida bilatzen jarraitzen dute. Anai-arrebei ematen dizkieten argibideek Jehoba eta Jesusen ikuspuntuarekin bat egitea nahi dute. Aldi berean, eskualde arduradunek eta adindunek gida ematen diete kongregazioei. Adindun gantzutuak eta orokorrean adindun guztiak Jesu Kristoren «eskuineko eskuan» daude (Ap. 2:1). Noski, gizon hauek inperfektuak dira eta akatsak egiten dituzte. Moisesek eta Josuek batzuetan huts egin zuten, baita apostoluek ere (Zen. 20:12; Jos. 9:14, 15; Erm. 3:23). Hala ere, Jesu Kristo morroi leiala eta adindunak kontu handiz ari da gidatzen, eta hau egiten jarraituko du. Beraz, aurrea hartzeko izendatuak izan direnen bitartez jasotzen dugun gidan erabateko konfiantza izan dezakegu. w24.02 23-24 ¶13-14

Gaur egun ere, Jehoba goretsi dezakegu berari buruz goxotasunez, esker onez eta maitasunez hitz eginez. Predikatzen dugunean kontuan izan behar dugu hau dela gure helburu nagusia: jendea Jehobarengana gerturatzen laguntzea, hau da, beraiek Jehoba Aita maitekor bat dela ikusten laguntzea (St. 4:8). Asko gustatzen zaigu, Biblia erabiliz, Jehobaren maitasuna, justizia, jakinduria, boterea eta beste ezaugarri erakargarri batzuei buruz hitz egitea jendeari. Jehoba imitatzeko ahal dugun guztia egiten dugunean ere, bera goretsi eta pozten dugu. Hau egitean, mundu gaizto honetatik ezberdintzen gara. Jendea desberdinak garela konturatu daiteke, eta honen arrazoian pentsatu dezake (Mat. 5:14-16). Gure eguneroko bizitzan jendearekin harremantzen garenez, beharbada gure jokabidearen zergatia azaltzeko aukera izango dugu. Ondorioz, bihotz onekoak Jainkoarengana hurbiltzera bultzatuta sentituko dira. Jehoba modu hauetan goresten dugunean, bere bihotza pozten dugu (1 Tim. 2:3, 4). w24.02 10 ¶7

Kristau heldua izatera iristeko, praktikoak diren abileziak garatu beharko dituzu. Honek kongregazioko eginkizunak onartzen, zeure burua edo familia mantentzeko lan bat izaten, eta besteekin harreman osasuntsuak izaten lagunduko dizu. Adibidez, ikasi ondo irakurtzen eta idazten. Bibliaren arabera, zoriontsua eta arrakastatsua den gizonak Biblia irakurtzen eta honetan hausnartzen du egunero-egunero (Sal. 1:1-3). Biblia egunero irakurriz, Jehobaren pentsaera ezagutzera iritsiko da eta irakurritakoa praktikan nola jarri ikasiko du (Esa. 1:3, 4). Irakasteko eta Biblian oinarritutako aholkuak emateko gai diren anaien laguntza behar dute anai-arrebek. Ondo irakurtzen eta idazten baduzu, besteen fedea sendotuko duten hitzaldi eta iruzkin lagungarriak prestatzeko gai izango zara. Gainera, ohar lagungarriak hartu ahal izango dituzu. Ohar hauek zure fedea sendotzen eta besteei animatzen lagunduko dizute. w23.12 26-27 ¶9-11

Beldurra sentitzen duzunean, hausnartu Jehobak etorkizunean egingo dituen gauzetan, Satanas egongo ez denean. 2014​ko lurralde biltzarreko antzezpen batean, aita batek bere familiarekin 2 Timoteori 3:1-5​ko pasartea aztertu zuen. Berak bertako hitzei buelta eman zien paradisua nolakoa izango den deskribatuz: «Mundu berria inoiz izan den garairik zoriontsuena izango da. Izan ere, gizakiek batak bestea eta egia maitatuko dute, modesto, apal, Jainkoaren adoratzaile, gurasoen esaneko, esker oneko eta leialak izango dira, familiari berezko maitasuna izango diote, adostasunetara iristeko prest egongo dira, besteei buruz beti ondo hitz egin eta autokontrola izango dute, lasaiak izango dira, ona dena maitatuko dute, fidagarri eta malguak izango dira, ez dute euren burua handietsiko, Jainkoa maitatuko dute eta ez gozamenak, eta Jainkoari benetako debozioa izango diote; eta hauengandik gertu mantendu». Hitz egiten al duzu zure familia eta anai-arreba maiteekin mundu berriko bizitzari buruz? w24.01 6 ¶13-14

Zein lasaigarria den Jehoba bere herriarekin oso pozik dagoela jakitea! Bibliak honakoa dio: «Jaunak bere herria maite» du (Sal. 149:4). Hala ere, batzuk, noizbehinka, desanimatuta sentitu daitezke, honakoa galdetuz: «Pozik egongo ote da Jehoba nirekin?». Hau zure kasua bada, ez zara bakarra. Iraganean, Jainkoaren zerbitzari askori zaila egin zitzaien Jehoba beraiekin oso pozik zegoela sinestea (1 Sam. 1:6-10; Job 29:2, 4; Sal. 51:11). Bibliak argi erakusten du Jehoba oso pozik egon daitekeela gizaki inperfektuekin. Nola lortu dezakegu Jehoba gurekin oso pozik egotea? Jesusengan fedea erakutsiz eta bataiatuz (Joan 3:16). Honela, gure bekatuez damutu garela eta Jehobari bere nahia egitea promestu diogula erakusten dugu besteen aurrean (Eg. 2:38; 3:19). Jehoba asko pozten da bere lagunak izateko pauso hauek ematen ditugunean. Beraz, berari egin diogun promesa mantentzeko gure onena ematen badugu, Jehoba oso pozik egongo da gurekin eta bere lagun minak bezala ikusiko gaitu (Sal. 25:14). w24.03 26 ¶1-2

Nahiz eta agintariek predikatzea debekatu, hau egiten jarraitzen dugu Jesusen jarraitzaileak imitatuz. Ziur egon gaitezke Jehobak predikazioan lagunduko gaituela. Beraz, eskatu otoitzean ausardia eta jakinduria. Arazoei aurre egiteko laguntza ere eskatu. Gutako askok arazo hauei egiten diegu aurre: gaixotasunen bat, arazo emozionalak, maite dugun norbaiten heriotza, familian egon daitezkeen egoera zailak edo pertsekuzioa, besteak beste. Gainera, pandemiek eta gerrek arazo hauek oraindik gehiago zaildu dituzte. Beraz, kontatu Jehobari nola sentitzen zaren. Hitz egin berarekin zure egoeraz, lagun min batekin hitz egiten egongo bazina bezala. Ziur egon Jehobak lagunduko zaituela (Sal. 37:3, 5). Etengabe otoitz egiteak zailtasunen aurrean irauten lagundu gaitzake (Erm. 12:12). Jehobak bere zerbitzari leialek dituzten zailtasunak ezagutzen ditu eta «haien oihuak entzun [...] egiten ditu» (Sal. 145:18, 19). w23.05 5-6 ¶12-15

Erabaki inportanteak hartu behar ditugunean, «Jaunaren nahia zein den» bereizi eta honen arabera jokatu behar dugu (Efe. 5:17). Hartu behar dugun erabakiarekin lotuta dauden Biblia printzipioak identifikatu behar ditugu. Era honetara, gai horren inguruan Jainkoak zer pentsatzen duen jakingo dugu. Bestalde, Biblia printzipioak praktikan jartzen baditugu, erabaki onak hartzeko aukera gehiago izango ditugu. Gure etsai Satanasek gu mundu honetako gauzekin okupatuta egotea nahi du eta, ondorioz, Jehobarentzat denborarik ez izatea (1 Joan 5:19). Kristau batek bere arreta Jehobaren zerbitzuan jarri beharrean, diruari, ikasketei edo lanari garrantzi gehiegi eman ahal dio. Hala bada, mundu honen pentsaera berarengan eragina izaten ari den seinale izan daiteke. Noski, gauza hauek berez ez dira txarrak, baina ez genituzke inoiz gure bizitzan lehen postuan jarri beharko. w24.03 24 ¶16-17