Aval ô ne semé Jehôva é môs wa lughan

1-2. Za dzam Jehôva a kômô akal é môs alughane duè ?

YE Ô ban-yang mina môr naa mia lughan ? Nge éñe é ne naa, a ne mbemba dzam ! É ne bo naa, mi nga ta-hang aval mia kômô naa é môs alughane denan ô bo. Jehôva ñe a bira fe bis alughane denan. A kômô naa mi buan é môs alughanea denan, ye naa melu ma zu, mi tobe mevakh nsama (Mink. 5:18 ; Za Sal. 3:11).

² Jehôva a yiène naa mi semé ñe é môs mia lughan. Amu dzé bi ne dzô dzam té ? Aval avé ki bi ne da bo ? Amben ayeghle di da dang kobe é bôr ba kôman akal é môs ba lughan, metsin metsing ba ye fas ayeghle di été, me ne bia vole bia besese. Me ne fe bia vole éyong ba bane bia naa bi ke tobe ésesang alughan ézing, nge ki, nge ba luè bia naa bi ñong ngap ébe ntaane mam wa daghe ésesang alughane té.

AMU DZÉ ÉSESANG ALUGHANE DUÈ DA YIÈNE VE JEHÔVA ÉSEMÉ ?

3. Za dzam é fam ya é minenga ba lughan ba yiène siman éyong ba kôman akal môs ye alughane deba, amu dzé ki ?

³ É fam ya é minenga ba kômane naa be lughan aval da yiène ya bekristen, ba yiène béé metsin metsing Jehôva a ve Éfiè dèñ été. Amu dzé ? Amu Jehôva émién éñe a nga te alukh. A nga bo alughane ôsua éyong a nga lat Adán ba Eva alukh (Atar. 1:28 ; 2:24). Ya dzam té, ôtemgha Nzame éwô wa yiène dang bo éban nfa é fam ya é minenga ba kôman akal é môs alughane deba.

4. Za akalgha é fam ya é minenga ba lughan be bele naa be semé Jehôva é môs alughane deba ?

⁴ Ô bele bura akalgha naa ô baghle ôsiman é dzam Jehôva a tem ébe é môs alughane duè. Jehôva a ne Ésaa wiè a ne a dzôp été, a ne fe é mvuiñ duè (Behéb. 12:9). Kaa bisô, wa kômô naa dzam té é tsini aval té. Waa kômô ki bo é dzam ézing é ne dzughu ñu mvuiñ, é môs alughane duè, nge ki môs ôfe (Bya 25:14). Éyong wa siman é mam mesese Jehôva a bo-hang ya éma a ye bo akal duè, ye waa yebe ki naa a yiène naa ô semé ñe é môs alughane duè ? (Bya 116:12).

AVAL AVÉ Ô NE SEMÉ JEHÔVA ?

5. Aval avé Biblia a ne vole é fam ya é minenga ba kômô lughan éyong ba kôman é môs ésesang alughane deba ?

⁵ Biblia aa ve ki nlong metsing éwi ba yiène dzale é môs ésesang alughan, nge ki é fet be ne bo ôsu vaa. Ya dzam té, é fam ya é minenga ba lughan ba yiène kôman é môs alughane deba bé siman étéñ deba, aval bôr ba bo mam é vôm be too, ya é mam bébién ba kômô bo. Beña bekristen ba yiène bo mewokh ya metsing édjié da ve nfa alukh (Mat. 22:21). Vedaa, kaa bis nkighan é fam ya é minenga ba lughan be ne ñong nfa môs ye alughane deba, éyong ba béé metsin metsing me ye a Biblia, ba semé Jehôva, ba ye fe likh naa a tobe mevakh. Éde, za metsin metsing ba yiène bele ôsiman ?

6. Amu dzé é ne éban naa é fam ya é minenga ba lughan be dzale ya metsing ngoman nfa alukh ?

⁶ A dzale metsing ngoman (Bero. 13:1, 2). Ébe abuiñ mesi, é fam ya é minenga ba lughan ba yiène dzale metsing mézing kaa naa be lughan. É fam ya é minenga ba lughan ba yiène dzeng éma ma tsinane ya é vôm be too. Nge be bele minsili ébe aval be ne da bo, baa yiène ki ko wong naa be ke dzaa bemvene avoleb.

7. Ésesang alughan da yiène bo za aval, aval avé ki ésesang alughan é ne bo aval da yiène ?

⁷ Dzenghe naa ésesang té é bo aval da yiène (1 Becor. 10:31, 32). Va mengu’u naa ô bele ésesang alughan da lere é mbemba mefulu ébuma ye nsisim da wum, se ki nsisim ye émo (Begal. 5:19-26). Aval ane tsîn atsing ye a Biblia da daghe éto édjié, é fam da lughan éde é ne nlô ye nféféñ nda-bôt da kômane vaa alé. Ya dzam té, éñe a ne ntôtom ye naa ésesang alughan é bo mevakh, ya aval da yiène. Dzé é ne ñe vole naa a wun do ? Éyong ba ve ntun akal alughane ya édzing, ayông, ya ngang, wa ye vole naa é môr asese a wokh wô, a yen naa alukh é ne é mbemba das da so ébe Jehôva. É bôr besese ba tobe ésesang té be ne buane wô, amu ntun té wa ye lere naa a ne é dzam é ne édedaa éban. Ya dzam té, abuiñ bekristen da top naa ba dzemle ésesang alughane deba a Nda ékôan, nge é ne boban. Nge wa kômô belane Nda ékôan, wa yiène da tare dzaa nsama bemvene wé tsili kalare ya tam.

8. Nge wa kômane fet akal alughane duè, aval avé ô ne tobe ndzi-n’nem naa é semé Jehôva ? (Beromain 13:13).

⁸ (A lang Beromain 13:13). Nge wa top naa wa ye bele fet akal alughane duè, aval avé ô ne saalé naa fet té é taa bele nsisim ye émo ? Éfiè Griego ba konghlane « mefet me ne kaa meniè » da tsinane mefet bôr ba bira fièn, ya éma ba bira wokh mezik a ke kuiñ mezang malu (a daghe fe nota de estudio “fiestas descontroladas” de Romanos 13:13, nge ki note d’étude « fêtes débridées » sur Romains 13:13). Nge wa ñong nkighane naa ba ye ñu meyokh, wa yiène a tobe nkee naa môr ézing a taa ñu élôlôranc. Nge mezik me ne, wa yiène me firi aval da ve naa é bôr be ne ésesang be ne yem lèè minlang. Tugha fe fas, aval mezik ba ye ve, é mam ba dzô mezik meté été, nfa ye naa môr ézing a taa kole ôbakh.

9. Za dzam é bôr ba lughan ba yiène baghle ôsiman nfa é boan mintun nge ki metsap be ne bo é fet alughane deba ?

⁹ Mevôm mézing, éyong ba bo fet alughan, memvuiñ ya memvong me-bôr é minenga nge ki é fam da lughan, be ne tebe naa ba kômô ve boan mintun nfa é bôr ba lughan. Bisesang melughane mézing ba lere fe bingengeng, nge ki befôrô, éba é bôr ba lughan, nge ki faa aval metsap mefe. Mam meté me ne bo mbeng akal môra môs té. Vedaa, wa yiène tobe ndzi-n’nem naa é dzam ba ye lere, é bo édi da long (Beph. 4:8). Silighe wamién naa : “Ye da ye lere é bôr bevoo ngang ? Ye da ye lere ngang nfa élar alukh ?” Ya é dzam da dang édedaa éban, silighe fe wamién naa : “Ye da ye ve Jehôva ésemé ?” Amben a likh naa bôr be wuèñ é ne bo mbeng, ve dzenghe naa ô saalé é mam me ne kaa yiène ane, a kobe mam bizazama (Beéph. 5:3). Tobeghe fe ndzi-n’nem naa bôr be ye é mvong duè, nge ki memvuiñ muè be ne kômô dzô bifiè bizing, be tugha wokh, ye kang minkômane muè.

10. Amu dzé é fam ya é minenga ba lughan ba yiène yem meniè meba éyong ba kôman ésesang alughane deba ? (1 Jean 2:15-17).

¹⁰ Yemeghe meniè muè (a lang 1 Jean 2:15-17). Jehôva a yen de mvèñ, éyong bebo-bisèñ bèñ ba dzeng naa be semé ñe, kaa naa ba dzeng naa be dang ve bébién édedaa éban. Ya dzam té, bekristen ba yem menié meba ba saalé naa be taa wiñ édedaa abuiñ mono, nge ki naa ya éngung, be taa « lere é biôm be bele ». Za abuan ô ne bele éyong ésesang alughane duè é ne kaa abuiñ mam ? Tam ézing, aval dzam é nga bo Mike, moadzang ézing ye a Noruega nge ki Norvège, daa é ne fe lôrane wa. A dzô naa : « Bi nga dzeng naa bi taa bele memvôla, aval té éde bi nga tobe nkoghane naa bi ne tsini naa bia sèñ ane bepwaghe-mefan. Ésesang alughane daa déé mbe ki élôlôran, ve é mbe mbeng. Bi ngen fe bia simane do. » Tabitha, kal dzaa ye a India, a dzô naa : « Bi nga saalé naa bi taa dang yep a n’nem. Amu alughane daa é mbe kaa abuiñ mam, bii nga dzeng ki naa bi kôman édedaa abuiñ mam. Ya dzam té, awôghan é mbe ébubu. »

11. Aval avé é kal dzaa ya é moadzang ba lughan be ne lere naa ba yem menié meba éyong ba top aval ba ye boat ye a kôm ñuu ? (A daghe fe bivaghle).

¹¹ Ye mine topbang bitôp mia ye boat ? Kaa bisô naa, mia kômô naa bitôp bité bi bo ébi bia dang mbeng akal denan. A ke kuiñ metam be nga tsili Biblia, é minenga ya é fam be nga lughan be nga bira ve éban ébe aval be nga yene ô mis (Esaïe 61:10). Ôwé, bitôp mi ne boat é môs mia lughan bi ne bo ane bia selane ya ébi mi wôle boat biyong bife, ve biaa yiène ki lere naa mi ne kaa yem meniè menan (1 Tim. 2:9). Mi taa likh naa bitôp mia ye boat ya aval mia ye yene ô mis, éde é dang bo éban akal denan (1 Pierre 3:3, 4).

12. Amu dzé é fam ya é minenga ba lughan ba yiène tobe ndzi-n’nem naa ba tep metum mesese maa vaghane ki ya é dzam Biblia a lere ba bo é vôm be too ?

¹² Tepghe metum mesese maa vaghane ki ya é dzam Biblia a lere (Mel. 18:4). Abuiñ biyong, bisesang melukh me ye émo Satan di, ma bo é mam me bele élat ya évus n’yebe, mbôô, ya é mam ma larane mbôô. Jehôva a bame bia naa bi tebe é mam me ne mvin ôyap (2 Becor. 6:14-17). Nge metum mézing, ya mefulu mézing é vôm ô too, maa vaghane ki ya nkômane Jehôva, boghe mindzeng nfa ye naa ô tugha yem mesumgha meba, ya metsin metsing me ye a Biblia me ne wô vole naa ô ñong mbemba nkighane nfa môs ye alughane duè.

13. Aval avé é fam ya é minenga ba lughan be ne vu Jehôva é môs alughane deba nfa bedas ba ñong ?

¹³ Ye é ne fulu é vôm ô too naa é bôr ba tobe ésesang alughan be so bedas akal é bôr ba lughan ? É môr a ne nkukum a ne ve é das da selane ya édi é môr aa bele ki abuiñ mono. Ôwé, ba saghe bekristen naa be ve, da ve fe bo mevakh éyong ba bo do (Mink. 11:25 ; Bisè mintôl 20:35). Vedaa, biaa kômô ki naa é bôr bi va bane be wôrane naa sibamekom, ba yiène bia ve ; kaa ki kômô naa be wôrane naa boan bedas béé se ki bia éban. Bia vu Jehôva, éyong bia ve mengu’u naa bi yen bedas aval ane Jehôva a yen bo, bi likh fe naa é bôr bevoo be ve, ya abim be bele, ya aval da so be n’nem (2 Becor. 9:7).

A SAALÉ MINDZUKH YE WUN FE MIO

14. Za mindzukh é bôr ba lughane ba tubane mio ?

¹⁴ É ne bo naa wa tubane mindzukh éyong wa dzeng naa ô kôman ésesang alughane duè, naa é ve Jehôva ésemé. Éfônan, a ne bo naa, é ne wô ayèñ naa ô kôman ésesang alughan é ne kaa abuiñ mam. Charlie, éñi a ne môr ye bikôr mang bi ya Salomón a dzô naa : « É mbe édedaa ayèñ naa bi top é bôr bia ye bane ô fet. Bi bele abuiñ mengom, ye naa metum é vôm bi too, môr ase a yane naa be bane ñe ! » Tabitha, éñi bi va tare tu ôyô, a dzô naa : « É vôm me too, bôr ba bira bo bura bisesang akal alughan. É nga ñong bebyèñ baa tam, naa be yebe naa bia bane fave bôr 100. » Sarah, éñi ye a India, ñe a dzô naa : « Bôr bézing ba bira kang é bôr be bele biôm ô mo. É boan ésang wom be nga bele bura bisesang akal alughan. Ya dzam té, éde me nga wôrane naa maa me nga yiène bo ésesang alughan é mbe dé dang é deba. » Dzé é ne wô vole naa ô dang mindzukh mité ya mife ?

15. Amu dzé meyaghlan me ne édedaa éban éyong wa kôman ésesang alughane duè ?

¹⁵ Boghe mban a yaghlane nfa é ngômane wa bo akal ésesang alughane duè. Ô ne dzô Jehôva meyaghlan été, nfa é dzam ése wa tubane do ya é mam mese wa wôran (Beph. 4:6, 7 ya nota de estudio “en cualquier situación”). Ô ne ñe dzaa naa a vole wa naa ô ñong mbemba minkighan, naa ô bele mvoa éyong wa bira yep, ya naa ô lere ayokh éyong wa yi do (1 Pierre 5:7). Mebun muè ébe Jehôva ma ye vem éyong wa ye yen ane a vole wa. Tabitha, éñi bi va tare tu ô mvus a dzô naa : « Ma ya é môr bia ñe bi mbe naa bia lughane, bi nga yep ébe é mam me mbe ve naa bi bo kaa bele awoghan é zang daa, ya fe é zang bia ya memvong me-bôr maa. Ya dzam té, éyong ésese bi nga kôman ésesang alughane daa, bi nga yaghlan. Bebela a ne faa naa, bi nga wôran avole Jehôva. Bi nga buane fe ya mvoa. »

16-17. Aval avé a yem a kobe é ne vole fam ya é minenga ba lughan éyong ba kôman ésesang alughan deba ?

¹⁶ Kobeghane ya memvong me-bôr menan ya ngang, ya aval é ne be ébubu a wokh (Mink. 15:22). É bôr mia lughane, mi bele abuiñ minkighane mia yiène ñong nfa ésesang alughane denan. Dzam té da yili naa mia ban é môs mia ye de bo, abim mono mia ye belane do, é nomo bôr mia ye bane, ya abuiñ mam mefe. Kaa naa mine ñong nkighan, tareghane fas nsama metsin metsing me ya Biblia mi ne dzale, ya fe melepgha mi ne ñong ébe bekristen be ne biwôlô nsisim, ya éba be ning-hang abuiñ mam. Éyong wa kar é mam wa yi, boghe do ya mbemba n’nem, wé bis é bôr bevoo, kaa ki bo ôyemle. Nge bôr be ye memvong me-bôr menan, aval ane bebyèñ benan, ba dzaa mina é mam ma yiène, dzenghane naa mi ve be ngang, amu naa ñe a ne fe mura môs akal deba. Nge mine se ki bo é dzam ba dzaa mina, tughane ba kare besôsôe benan ya ngang (Becol. 4:6). Tughane likh bôr be ye memvong me-bôr menan naa be wokh naa, nsonghane wônan ô ne naa mia kômô naa ésesang é bo tam mevakh, ya naa é semé Jehôva.

¹⁷ A kare bebyèñ benan minkighane mienan, é ne bo ayèñ a dang-dang nge béé se ki a bebela été, ve é ne mina kuiñ mbeng. Santhosh, moadzang ézing ye a India a dzô naa : « Memvong me-bôr maa me mbe mé kômô naa bi koghle abuiñ metum, éma Bindués. É nga ñong bia tam, ma ya é minenga bia ñe bi mbe naa bia lughan, naa bi kare bo minkighane miaa. Bi nga tsen mam mézing, éma bi nga tem naa bi mbe bo, kaa naa da ve Jehôva n’nem abé. Éfônan, bi nga tsen bidzi bi nga kômô akal ésesang alughane daa, naa bia ñong ébi ébe be nga kômô. Bi nga ñong fe nkighane naa biaa ye ki furu bya, nge ki a dzem abokh ézing, amu méé mbe ki ngap ye metum meba. »

18. Dzé é ne wô vole naa é môs ye ésesang alughane duè ô lôt kaa bindaghle ? (1 Becorinthien 14:40). (A daghe fe évaghle).

¹⁸ Kômaneghe ya nkee. Éyong mam mese me ntoo nkôman, é ne ébubu naa ô taa dang bele meyep é môs ye alughane duè (a lang 1 Becorinthien 14:40). Wayne, éñi ye a Taiwan, a dzô naa : « Avitsang melu kaa naa bi lughan, bi nga bele ôyôm moan ésulan ya é bôr be nga mem naa ba zu bia vole ésesang. Bi nga fas é mam bi nga ta, éde bi nga yeghe é mam mézing bi mbe naa bia ye bo môs ye ésesang alughan, nfa ye naa bi tobe ya ndzi-n’nem naa asese a ye kuiñ mbeng. » Akal é ngang ô bele ya é bôr wa ye bane, va mengu’u naa mi bo mam mesese ya tam.

19. Aval avé ô ne tobe ya ndzi-n’nem naa mam ma ye boban ésesang alughane duè aval ma yiène ?

¹⁹ Ô ne saalé abuiñ mintsiè nge wa tare tem mindzukh mi ne bobane ésesang alughane duè, ya é dzam ô ne bo (Mink. 22:3). Éfônan, nge ô too é vôm ô ne fulu naa, é bôr béé dzi ki bane ésesang alughan be ne so, fasghe é dzam ô ne bo nfa ye naa dzam té é taa boban. Dzenghe naa ô tobe ya ébangha naa bôr be ye é mvong duè baa sèhane ki Jehôva, be yem é dzam wa yane ébe ébo. Kareghe fe bo aval wa yen mefulu mézing wa yen bisesang melughane mézing. Ô ne kabane ya bo nlô-adzô “¿Cómo son las bodas de los testigos de Jehová?” nge ki « Comment se passe un mariage chez les Témoins de Jéhovah ? » bia kuane a nden jw.org. Nfa ye naa ô tobe ndzi-n’nem naa mam mese me yem lôt ésesang alughane duè, ô ne dzaa é moadzang a ne éwôlô nsisim été avole, éñi a ye sèñ ane « é môr a wulu ya ésesang » (Jean 2:8). Nge ô tugha ñe kare ntaane mam wa kômô akal ésesang alughane duè, a ne wô vole naa ô tobe ya ndzi-n’nem naa ésesang alughane duè é boban aval da yiène, é kuiñ fe aval ô va ta mam.

20. Za dzam é fam ya é minenga ba lughan ba yiène siman nfa é môs alughane deba ?

²⁰ É ne bo naa wa wôran édedaa mvoaran éyong wa fas é dzôm ésese da yili naa wa kôman ésesang alughane. Vedaa, simane naa ésesang alughane duè é ne fave môs ôvoo. A ne é môs ôsua ye é mbemba éning mi ne bele nsama ane bebo-bisèñ Jehôva. Éde, va mengu’u naa ésesang alughane duè é bo kaa abuiñ mam, é bo fe mam aval da yiène. Va mebun muè ébe Jehôva. Ya n’lerane mam wèñ, ô ne kôman ésesang alughane duè nfa ye naa ô simane do ya ayông, ya mevakh, kaa ki dzôban (Bya 37:3, 4).