Jehôva a ne wô vole éyong ô ne éwiñ

1-2. Za dzam Pablo a nga wôrane biyong bizing, amu dzé ki éfônane dèñ é ne bia vole ? (Beromain 7:21-24).

ÉYONG bia simane ntôô Pablo, bi ne simane naa a nga kanghle bôr be ye abuiñ mesi, a nga tsili abuiñ mebakh me ya Biblia, a mbe fe mbemba n’yeghle. Ôwé, a mbe é môr a ne ayokh ya sôsôe. Ve, biyong bizing, Pablo a nga wôrane éwiñ, atakh, nge ki meyep. Ya dzam té, Pablo a mbe é bira fônane bia ému.

² (A lang Beromain 7:21-24). É kalare a nga tsili Beromanos, Pablo a nga kobe bo ébe mam mézing a nga wôran. Abuiñ ye ébe bia, bia wôrane fe aval mam Pablo a nga wôran. Pablo a mbe é kristen a ne sôsôe, ya naa a mbe é kumu bo Nzame mewokh, ve amu a mbe môr a bikop, é mbe ñe ndzukh naa a bo éyong ésese, é dzam Nzame a mbe é kumu. Ya fe naa, éyong Pablo a mbe é siman é mam a nga bo kaa naa a bo moan kristen, dzam té é mbe dé ve ñe édedèè éwiñ. Biyong bizing a mbe fe éwiñ amu a mbe a bele ndzukh ézing éning wéé mbe ki tsen.

3. Za dzam bia ye fas ayeghle di ? (A daghe fe « Ayilgha éfiè »).

³ Amben a mbe a bele alumane n’nem été, Pablo éé dzi ki likh naa é mam a mbe é wôrana me djié aval a nga tem. Ayeghle di, bia ye fas minsili mi : Za dzam Pablo a nga bo éyong a nga wôrane naa a mbe « éngôngoo » ? Aval avé a nga lumane ya mbimbia be-mam a mbe é wôran ? Aval avé bi ne lumane ya wun mbimbia be-mam bia wôran ?

É DZAM É NGA LIKH NAA PABLO A TOBE ÉWIÑ BIYONG BIZING

4. Dzé é mbe dé likh naa Pablo a tobe éwiñ ?

⁴ É mam a nga bo ô mvus. Kaa naa a bo moan kristen, Pablo, be nga tare ñe yem ane Saulo, a nga bo é mam mézing a nga dzôban ôsu. Éfônan, a nga tugha daghe éyong be nga wiñ sôsôe Esteban nge ki Étienne ya mekoa (Bisè mintôl 7:58 ; 8:1). Nfa mboo, Saulo a mbe a tele ôsu éyong be nga bira tsible bekristen (Bisè mintôl 8:3 ; 26:9-11).

5. Aval avé é mam Pablo a nga bo ô mvus me nga name ñe ?

⁵ Niène a nga bo moan kristen, biyong bizing ntôô Pablo a nga yep a n’nem ya é mam a nga bo ô mvus. É mam a nga bo ô mvus ane, é môr a bira tsible bekristen, me nga bera ke ma ndaghle ñe éyong mimbu mi nga ke mia lôt. Éfônan, éyong a nga tsili é kalare ôsua Becorintios étun mbu 55 ye metam mèè, a nga dzô naa : « Maa yiène ki naa be luè me naa ntôô, amu me nga tsible Ékôan Nzame » (1 Becor. 15:9). Mimbu mitan ôsu, é kalare a nga tsili Beéfesios, é kobe émién, a nga dzô naa : « Me ne é môr a dang avitsang ébe minfufup » (Beéph. 3:8). Éyong a nga tsili Timoteo, Pablo a nga tsiè adzô daghe émién ane « é môr a nga ta Nzame, ya é môr a nga tsible bôr a too fe abian » (1 Tim. 1:13). Ye ô ne simane aval Pablo a nga wôran éyong a nga ke fep Ékôan ézing, ye kuane é bôr a nga tsible, nge ki bôr bézing be ye memvong a nga tsible ?

6. Za dzam éfe é nga likh naa Pablo a bele meyep ? (A daghe fe atoan).

⁶ Éyo a nsôn été. Pablo a nga vaghan é dzam é nga likh ñe naa a tobe éwiñ ya « éyo a nsôn été » (2 Becor. 12:7). Ntôô Pablo éé dzi ki dzô é dzam ébién é nga ve ñe naa a wokh édedaa mintéñ. A mbe bo ôkoan, nge ki ndzukh ôfe, éwi ô nga likh ñe naa, a wôrane meyepb.

7. Aval avé bikop Pablo bi nga name ñe ? (Beromain 7:18, 19).

⁷ Bikop bièñ. Pablo a nga lumane ya bikop bièñ (a lang Beromain 7:18, 19). Amben a nga kumu bo é dzam é ne tetele, nsôn wèñ ô mbe ô bele bikop, ô nga ve fe naa, é bo ñe ndzukh naa a dzale ébangha dèñ naa a bo do. A nga mem naa a mbe a bele alumane mban ébe minkômane mièñ mi ya nsôn, ya nkômane ye a bo é dzam é ne tetele. Vedaa, Pablo a nga sèñ ngu’u naa a songhan (1 Becor. 9:27). Amben a nga bo bikop, bi ne siman atakh a mbe wôran éyong a mbe é dzô nge ki a bo é dzam a ke kuè a sèñ-yang ngu’u, naa a songhane nge ki a tsen !

ZA DZAM PABLO A NGA BO ÉYONG A MBE É WÔRANE NAA A MANEYA SULU

8. Za dzam bekalare Pablo ba lere ébe aval a nga yen bikop bièñ ?

⁸ Aval ane da lereban bekalare bèñ été, Pablo a nga binane nfa aval éñe, ya bobeñang be mbe bebunu be mbe lumane ya bikop bieba, ya avole nsisim Nzame (Bero. 8:13 ; Begal. 5:16, 17). Abuiñ biyong, Pablo a nga kobe nfa mefulu nge ki minkômane mi mbe kaa yiane, bekristen be nga yiane lumane mio (Begal. 5:19-21, 26). Kaa bisô, Pablo a nga binan ébe é mam me mbe ñe atakh, a nga dzeng fe melepgha Mintsili été, é dzeng fe naa a yen bitéñ mebo a nga yiane ñong nfa ye naa, a wun bikop bièñ. Bi ne tobe a ndzi-n’nem naa, a nga dzale melepgha a nga ve é bôr bevoo.

9-10. Dzé é nga vole Pablo naa a lumane ya mbimbia awôran ? (Beéphésien 1:7). (A daghe fe évaghle).

⁹ Amben Pablo a nga wôran atakh abuiñ biyong, a nga baghle mbemba étéñ ya nsisim. Éfônan, a nga dzing a wokh mbemba akobikôrô nfa é bobeñang be nga bo bikena (2 Becor. 7:6, 7). A nga biñ mevakh ya memvuiñ a nga bele, ya é bobeñang be mbe bebunu (2 Tim. 1:4). A nga yem fe naa a mbe a bele ayebe Jehôva. Ôwé, Pablo a mbe mevakh amu a mbe é sèhane Jehôva « ya ôbualé ô ne nfuban » (2 Tim. 1:3). Amben éyong a mbe mbokh a Roma, Pablo a nga simane bobeñang be mbe bebunu naa be « tobe mevakh ngalane Nti » (Beph. 4:4). Bifiè bièñ, biaa fônane ki ébi é môr a mbe ndzalane ya mbimbia mesiman. Ôwé, éyong mbia ôsiman ô nga so ñe ôtemgha, avôô-avôô, Pablo a nga tsen wô é siman é mam me nga ve ñe mevakh.

¹⁰ Pablo a nga kuiñ fe naa a wun mbimbia awôran, amu a mbe a bele mebun naa ntang ô mbe é das be nga kee ñe (Begal. 2:20 ; a lang Beéphésien 1:7). Asughlan, a mbe a bele mebun ébe bidzama Jehôva ngalane Yésu Krist (Bero. 7:24, 25). Amben a nga bo bivus ô mvus ya bikop bièñ émiéñ, Pablo a mbe tsini naa a « sèhane » a Jehôva Nzame, ya mevakh (Behéb. 9:12-14).

11. Amu dzé éfônane Pablo da ve bia ngu’u ?

¹¹ Aval ane Pablo, bia bi ne fe wôrane naa bi bele aluman éyong ase a ñuu été. A ne bo é dzam bia tem, édi bia bo, nge ki édi bia dzô. Bia bi ne fe bele nkômane ya dzô naa : “Me ne éngôngoo môt !” Kal dzaa ézing, éñi a bele mimbu 20 a too éyôla naa Elizac a dzô é dzam di nfa aluman a bele : « Da sili ma n’nem ôsi a tem étéñ Pablo. Da sili ma n’nem, a yem naa se ki ma étam, ma wôrane aval té. Ôsimane té wa, wa lere fe naa, Jehôva a yem mindzukh ayong dèñ da tubane mio. » Za dzam bi ne bo, naa aval ane Pablo, bia bi bele fe ôbualé ô ne nfuban, ya naa bi bele mevakh amben bi bele mbimbia awôran ?

AVAL BI NE LUMANE YA MBIMBIA AWÔRAN

12. Aval avé da vole bia a bele mbemba ntaane mam ya nsisim ébe alumane daa ya mbimbia awôran ?

¹² Beleghe mbemba ntaane mam ya nsisim. Éyong bia tugha yem a ta mam ya nsisim, bi ne bembe ébe é mam me ne mbeng. Bi ne vaghane ntaane mam ya nsisim waa, ya éyong môr a bele mbemba ntaane mam wa likh ñe naa a tobe mvoa a nsôn. Éyong bia dzi mvèñ, bia bo deporte nge ki sport mban, ya ke ôyô abim da yiane, dzam té da likh naa bi wôrane mbeng. Aval té daa-daa, bia besese bi wôraneyang fe mbeng ô ne éyong bia lang Éfiè Nzame mban ; éyong bia kômane naa bi ke, ya ñong ngap bisulan ; ya ke fe minkanghle. Mam meté ma long bia, ma vole bia naa bi lumane ya mbimbia mesiman (Bero. 12:11, 12).

13-14. Aval avé besôsôe bekristen bézing be nga buane ya mbemba ntaane mam ya nsisim ?

¹³ N’yeneghan éfônane John, éñi be nga biñ ôkoan Cáncer a bele mimbu 39. Mesumgha, a nga lumane ya mbimbia awôran. A nga sili émién naa : “Aval avé me ne koan n’miè mong me ne va wi ?” Tam té, ndôma dzèñ a mbe a bele fave mimbu milal. Dzé é nga vole John naa a lumane ya mbimbia awôrane dèñ ? A dzô naa : « Amben me mbe mvoaran, me nga bembe naa é nda-bôr dzam é ke bisulan bisese, é ke minkanghle, é bele fe ayeghle ya nda-bôr besono besese. Bi nga bo mam meté amben éyong é mbe édedaa ndzukh naa me dzale ntaane mam té. » É daghe ô mvus, John a dzô fe naa : « Éyong ésese bi tele étéñ é ne ndzukh, bi ne tare wôrane bura meyep. Vedèè, me va yeghe naa, bia ye dzigha wôrane nté mbé Jehôva a ve bia é ngu’u bia yi, ya nté mbé a dzing bia. Jehôva a ye mina vole, aval fe a nga vole ma. »

¹⁴ Eliza, éñi bi va tare tu ô mvus, a dzô naa : « Éyong ése ma ke bisulan, ma bo fe ayeghle môr émién, ma simane naa Jehôva a wokh ma, ye naa a dzing ma. Dzam té da likh naa me tobe mevakh. » Nolan, ndeghe bikôan ya Africa, a kobe é dzam da vole, éñe ya ngal Diane, éyong a dzô naa : « Bia tsini naa bia yaghlan, bia yeghe Biblia, a ke bisulan ya kanghle, amben éyong bia wôrane atakh. Aval té, Jehôva a vole bia mban naa bi tobe mevakh. Bia dzeng naa bi simane naa Jehôva a ye bia vole, a ye fe borane bia ; biaa yem ki aval a ye da bo, ve bia yem naa a ye da bo. »

15. Za dzam bia yiane bo naa bi wun mbimbia awôran ? Vakh éfônan.

¹⁵ É ne bo naa bia yiane bera bo abuiñ, nfa ye naa bi ne wun mbimbia mesiman. Naa bi ve éfônan, tame simane naa wa wokh mvus mintéñ. Nfa ye naa ô mane ya mintèñ mité, é ne bo naa wa yiane bera bo mam mefe, se fave naa wa wulu môs misese. Naa ô yem é vôm mintéñ mia so, é ne bo naa, wa yiane fas nge ki a kobe ya dokira. Aval té daa-daa, é ne bo naa, bia yiane fas Biblia ya mebakh maa, nge ki faa a kobe ya é kristen a ne éwôlô, nfa ye naa bi yeghe aval bi ne lumane ya mbimbia awôran. Fasghe mesimane mézing me ne wa vole.

16. Dzé é ne wô vole a yem é mam ma ve naa ô bele mbimbia mesiman ? (Bya 139:1-4, 23, 24).

¹⁶ Tugha fas meyaghlan été é mam wa yi. Kéza David a mbe é yem naa Jehôva a tugha ñe yem. Ya dzam té, David a nga dzaa Jehôva naa a vole ñe, naa a ñu tang é dzôm é mbe dé ve naa a bele « mesiman ma ve meyep » (a lang Bya 139:1-4, 23, 24). Wa ô ne fe dzaa Jehôva naa a vole wa naa, ô ñu tang é dzôm da likh wô naa ô bele mbimbia mesiman, ya tugha wokh aval ô ne da wun. Ô ne fe bo wamién minsili mizing, ane : “Dzé é ne tsîn ye mesimane ma likh ma naa me yep a n’nem ? Ye dzam ézing da tsini ma naa me bele mbimbia mesiman ? Ye ma bembe ya mbimbia mesiman mam, ndaane naa ma dzeng naa me tsirane mo ?”

17. Za minlô-medzô mi ye ayeghle duè wamién mi ne wa vole naa ô ban asimane da long ôtemgha wiè ? (A daghe fe évaghle).

¹⁷ Dzenghe naa ayeghle duè wamién é vaghane ya é mam wa yi. Biyong bizing, é ne wa bo éban a yeghe mingura minfa mi ye é fulu Jehôva. Éfônan, ntôô Pablo a nga buan abuiñ éyong a nga binan nfa ntang ya bidzama Jehôva. Wa ô ne fe bo aval daa. Belaneye Guía de estudio para los testigos de Jehová nge ki Guide de recherche pour les Témoins de Jéhovah, ya fe Índice de las publicaciones watch tower nge ki Index des publications des témoins de Jéhovah. Ô ne fe belane mebakh mefe éyong wa bo ayeghe ya Biblia duè, éma me ne nkobe wiè nfa ye naa ô tugha bera yem mam ane, n’nem éngôngoo, bidzama, ya édzing é ne sôsôe Nzame. Niène ô kuaneyang minlô-medzô mi ne bo a wa éban, tsilighe mio vôm ézing, éyong té ô furu é dzam ô va yeghe é vôm ô ne bo wé yen do. Yeghe fe minlô-medzô ô va tsili, éyong wa sum naa wa wôran éwiñ. Dzenghe naa ô dzale é mam ô va lang ma tsinane bitéñ ô tele (Beph. 4:8).

18. Za minlô-medzô bekristen bézing be yegheyang ?

¹⁸ Eliza, éñi bi va tare tu ô mvus, a nga bo mindzeng ayeghe dèñ émién nfa nlang ya Biblia Job. A dzô naa : « Ma yen naa, ma bira fônane Job. A nga bele abuiñ meveghle. Vedaa, éyong Job a mbe naa a manang bira sulu, aa dzi ki likh naa, a daghe Jehôva, amben aa nga yem ki amu dzé a nga tubane mindzukh mité » (Job 42:1-6). Diane, éñi bi va tare tu ô mvus, a dzô naa : « Bia n’nôm wom bi va bo mindzeng ayeghe daa, bi belan abakh Acerquémonos a Jehová nge ki Approchez-​vous de Jéhovah. Bia bira ve akiba naa, Jehôva a kôm bia ane é môr a bo ésèñ ya mboargha. Ndaane naa bi bembe ébe abé bia wokh ya bia bebién, bia yiane dzeng naa bi simane naa Jehôva a songhane bia, a dzeng fe naa bi bo mbemba be-bôt. Dzam té da ve naa bi yir ñe bébéñ » (Esaïe 64:8).

DAGHEYE ÔSU YA MEBUN

19. Za dzam bi ne yane ?

¹⁹ Amben bi bele mbemba ntaane mam ya nsisim, ye naa bia dzeng naa aval bia yeghe é vaghane ya é mam bia yi, bii se ki yane naa é mam bia wôrane ya mbia mesiman maa, me sia mane dzang. É ne bo naa melu mézing bia ye wôrane naa bi ne édedèè nsulan ! Vedaa, ya avole Jehôva, bi ne seghe mbimbia awôrane daa éyong ma so. Bi ne tobe ya ndzi-n’nem naa bia ye buane abuiñ melu ya ôbualé ô ne nfuban, ya naa bia ye bele mekalgha mesese naa, bi tobe mevakh éning daa ya ésèñ bia bo Jehôva.

20. Za dzam ô ne nkoghane naa wa ye bo ?

²⁰ N’ñonghane nkighane naa, bi taa likh naa mbimbia awôrane nfa é mam bi nga bo ô mvus, mindzukh bi bele éndagha, nge ki bikop bia, ébie bi djié bia. Éyong bia bira yep a n’nem, Jehôva a ne bia vole naa bi wôrane mvoa (Bya 143:10). Bia yane é môs waa ye ki fe bera bo aluman, naa bi bele mbemba mesiman. Vedaa, bia ye véé mekiri mesese, kaa fe naa bia bele mesimane ma ve bia meyep, bi too fe mevakh naa bia sèhane ndzidzing Nzame waa, Jehôva !