Matthew Asɛmpa

10 Ntsi ɔfrɛɛ n’esuafo 12 no baa ne nkyɛn na ɔmaa hɔn tum dɛ wontu esunsum fi, na wɔnsa hɔn a wɔyar nye hɔn a wɔnntse apɔw nyina yarba.

2 Asomafo 12 no hɔn edzin nye yi: Odzi kan Simon a wɔfrɛ no Peter, nye no nua Andrew; Zebedee ne ba James na no nua John; 3 Philip na Bartholomew; Thomas na Matthew a ɔgyegye tow no; Alphaeus ne ba James; Thaddaeus; 4 Nsiyɛfo Simon; nye Judas Iscariot a ekyir yi oyii no mae no.

5 Dɛm mbarimba 12 yi na Jesus somaa hɔn, na ɔmaa hɔn akwankyerɛ dɛ: “Mma hom mmfa amanaman no hɔn kwan do, na mma hom nnkɔ Samariafo hɔn kurow biara mu; 6 mbom hom nkɔ Israel fie nguan a wɔayew no nkotsee nkyɛn. 7 Sɛ hom kɔ a, hom nka dɛ: ‘Ɔsor Ahendzi no abɛn.’ 8 Hom nsa hɔn a wɔyar no yarba, hom nnyan ewufo, hom nsa akwatafo yarba, hom ntu esunsum fi. Hom nyaa no kwa, hom mfa mma kwa. 9 Mma hom mmfa sika kɔkɔɔ, anaa dwetɛ, anaa kɔɔber nngu hom abɔdo* mu. 10 Na mma hom mmfa edziban kotoku nntu kwan no, anaa ntar ebien,* anaa mpaboa, anaa poma, osiandɛ ɔfata dɛ odwumayɛnyi ne nsa ka n’edziban.

11 “Na kurow anaa ekuraase biara a hom bɔkɔ mu no, hom nhwehwɛ obi a ɔfata wɔ hɔ, na hom ntsena hɔ kesi dɛ hom befi hɔ akɔ. 12 Sɛ hom du fie hɔ a, hom nkyia fie no mufo no. 13 Na sɛ fie no fata a, hom mma hom asomdwee no bi nka hɔn; naaso sɛ ɔmmfata a, hom mma hom asomdwee nsan mbra hom nkyɛn. 14 Beebiara a hom bɔkɔ a obi anngye hom anaa oenntsie hom asɛm no, sɛ hom rifi dɛm fie no anaa dɛm kurow no mu a, hom mporoporow hom ananadze huntuma ngu hɔ. 15 Nokwar mese hom dɛ, dza ɔbɛba dɛm kurow no do wɔ Atsɛmbu Da no, ɔbɛkyɛn Sodom na Gomorrah asaase no koraa.

16 Hwɛ, morosoma hom dɛ nguan akɔ mpataku finimfin; ntsi hom mma hom enyi nda hɔ dɛ nwɔ, na hom nyɛ nyimpa a asɛm biara nnyi homho tse dɛ mbubur. 17 Hom nhwɛ homho yie wɔ nyimpa ho, osiandɛ wɔdze hom bɔkɔ atsɛmbuafo enyim na wɔaabɔ hom mbaa wɔ hɔn nhyiamudan mu. 18 Na wɔdze hom bɔkɔ ambradofo nye ahemfo enyim osian emi ntsi, ama hom eedzi hɔn na amanaman no dase. 19 Naaso, sɛ wɔdze hom kɔ etumfo enyim a, mma hom nndwendwen dza hom bɛka anaa mbrɛ hom besi aka no ho, osiandɛ wɔdze dza hom bɛka no bɛma hom amonmu hɔ ara. 20 Na nnyɛ homara na hom bɛkasa, mbom hom Egya no sunsum no na ɔnam hom do bɛkasa. 21 Bio so, onua beyi no nua ama ma woeeku no, na egya beyi ne ba ama, na mba bɔsoɛr etsia hɔn awofo na wɔbɛma woeku hɔn. 22 Na me dzin ntsi nyimpa nyinara bɛtan hom, naaso obi a obemia n’enyi* egyina mu ekodu ewiei no, ɔno na wɔbɛgye no nkwa. 23 Sɛ wɔtan hom enyi wɔ kurow kor mu a, hom nguan nkɔ fofor mu; na nokwar mese hom dɛ, hom runnwie hom edwuma wɔ Israel nkurow nyinara mu ansaana nyimpa Ba no aba.

24 “Osuanyi nnsen ne kyerɛkyerɛnyi, na akowaa nnsen no wura. 25 Ɔsɛ dɛ osuanyi hwɛ kwan dɛ dza wɔdze ayɛ ne kyerɛkyerɛnyi no, dɛmara so na wɔdze bɛyɛ no. Na ɔwɔ dɛ akowaa so hwɛ kwan dɛ dza wɔdze ayɛ no wura no, wɔbɛyɛ noara so dɛmara.* Sɛ fiewura noara mpo nkorɔfo afrɛ no Beelzebub* a, ɔbɛyɛ dɛn na wɔnnkɛfrɛ hɔn a wɔtse fie hɔ no so dɛmara? 26 Dɛm ntsi mma hom nnsuro hɔn, na biribiara nnyi hɔ a wɔakata do a wɔrennda no edzi, na esumasɛm biara so nnyi hɔ a orummpue. 27 Dza meka kyerɛ hom wɔ sum mu no, hom nka no wɔ kan mu, na dza meka gu hom asomu no, hom mpaa mu nka no wɔ adan etsifi. 28 Mma hom nnsuro hɔn a woku nyimpadua no naaso wonntum nnku ɔkra* no; mbom hom nsuro obi a obotum asɛɛ ɔkra no na nyimpadua no nyinara wɔ Gehenna. 29 Wɔtɔn nkasaanoma ebien gye kapɛrba,* ɔnntse dɛm anaa? Naaso hɔn mu kor mpo nnkɔhwe famu a hom Egya nnkohu. 30 Na hom tsinhwi mpo wɔakan ne nyinara. 31 Dɛm ntsi mma hom nnsuro; hom som bo kyɛn nkasaanoma beberee.

32 “Na obiara a ɔbɔbɔ me dzin wɔ nyimpa enyim no, mara so mobɔbɔ ne dzin wɔ m’Egya a ɔwɔ sor no n’enyim. 33 Naaso obiara a ɔbɔpow me wɔ nyimpa enyim no, mara so mobɔpow no wɔ m’Egya a ɔwɔ sor no n’enyim. 34 Mma hom nnyɛ hom adwen dɛ asomdwee na medze baa asaase yi do. Mammfa asomdwee ammba, mbom sekan na medze bae. 35 Na medze mpaapaamu na medze bae, ma ɔbarimba aasoɛr etsia ne papa, na ɔbabaa aasoɛr etsia ne maame, na ɔbaa warfo aasoɛr etsia n’asew basia. 36 Nokwasɛm nye dɛ, nyimpa ne fiefo na wɔbɛyɛ n’atamfo. 37 Obiara a ɔdɔ ne papa anaa ne maame kyɛn me no, ɔmmfata dɛ ɔyɛ mo suanyi; na obiara a ɔdɔ ne babanyin anaa ne babaa kyɛn me no mmfata dɛ ɔyɛ mo suanyi. 38 Na obiara so a ɔammfa n’asɛndua* enndzi m’ekyir no mmfata dɛ ɔyɛ mo suanyi. 39 Obiara a ɔbɔkora ne kra* do no, obefi ne nsa. Na obiara a osian emi ntsi ɔbɔhwer ne kra* no, ne nsa bɛka.

40 “Obiara a ɔgye hom no, ɔgye emi so, na obiara a ɔgye me no, ɔgye Obi a ɔsomaa me no so. 41 Obiara a ɔgye nkɔnhyɛnyi osiandɛ ɔyɛ nkɔnhyɛnyi ntsi no, obenya nkɔnhyɛnyi n’akatua, na obiara a ɔgye ɔtseneneenyi osiandɛ ɔyɛ ɔtseneneenyi ntsi no, obenya ɔtseneneenyi n’akatua. 42 Na obiara a ɔbɛma nkakraba yi mu kor nsunwin kɔɔpow kor mpo ma ɔaanom osiandɛ ɔyɛ mo suanyi ntsi no, nokwar mese hom dɛ, n’akatua rommbɔ no dabiarada.”