November

Awofo, hom nhwɛ mfe a hom mba no edzi na hom mboa hɔn ma wonsua mbuae a wobotum ama wɔ adzesua ase. Ɔtɔ da a, yesusu nsɛm bi a ɔyɛ enyibersɛm tse dɛ ɔhaw a awarfo hyia anaa nsɛm a ɔfa hɛn abrabɔ a yɛbɛma no ho atsew ho. Sɛ ɔtɔ da na yerususu nsɛm bi a ɔyɛ enyibersɛm tse dɛ ɔhaw a awarfo hyia anaa nsɛm a ɔfa hɛn abrabɔ a yɛbɛma no ho atsew ho mpo a, ɔnyɛ dɛn ara a yebenya nkyekyɛmu kor anaa ebien bi wɔ mu a mbofra botum ama ho mbuae. Afei so, ma wo mba no nhu dɛ, ɔnnyɛ aber nyina na sɛ wɔma hɔn nsa do a wɔbɛfrɛ hɔn. Sɛ eboa hɔn ma wɔtse ase dɛm a, ɔremma hɔn abaw mu mmbu aber a wɔammfrɛ hɔn no. (1 Tim. 6:18) Nokwasɛm nye dɛ, hɛn nyina botum ama mbuae a ɔhyɛ Jehovah enyimnyam na ɔhyɛ hɛn nuanom so nkuran. (Mbɛ. 25:11) Ɔtɔ da a yebotum aka suahu bi a yeenya ho asɛm tsiabaa aber a yɛrema mbuae no. Naaso, ɔnnsɛ dɛ yɛtwe afofor adwen ba hɛn do. (Mbɛ. 27:2; 2 Cor. 10:18) Mbom, ɔsɛ dɛ yɛtwe adwen si Jehovah, n’Asɛm no nye n’asomfo do.—Nyi. 4:11. w23.04 24-25 ¶17-18

Sɛ yebotum akɔ do aweɔn na hɛn enyi ada hɔ a, ɔdɔ ho hia paa. (Matt. 22:​37-39) Sɛ yɛreyɛ asɛnka edwuma no na yehyia ɔhaw mpo a, ɔdɔ a yɛwɔ ma Nyankopɔn no boa hɛn ma yɛkɔ do ka asɛm no. (2 Tim. 1:​7, 8) Afei so, osiandɛ yɛdɔ hɔn a wɔnnsom Jehovah no ntsi, yɛkɔ do ka asɛm no kyerɛ hɔn. Ɔyɛ mpo a yɛkyerɛw hɔn nkrataa anaa yɛfrɛ hɔn wɔ fon do dzi hɔn dase. Yɛgye dzi dɛ da kor da kor, hɔn a yɛka asɛm no kyerɛ hɔn no botum asesa na wɔaabɔsom Jehovah. (Ezek. 18:​27, 28) Afei so, yɛdɔ hɛn nuanom a yɛnye hɔn som no. Adze kor a yɛyɛ dze kyerɛ dɛ yɛdɔ hɔn nye dɛ, ‘yɛhyɛ hɛnho nkuran nkorkor, na yɛboa hɛnho nkorkor.’ (1 Thess. 5:11) Sogyafo a woridzi ako no bɔ mbɔdzen dɛ wɔbɛma hɔn enyi eku hɔn mfɛfo ho. Dɛmara na hɛn so yɛhyehyɛ hɛnho nkuran ama yeetum egyina hɛn haw ano. Yɛrennhyɛ da ara dɛ yɛreyɛ biribi dze ahaw hɛn nuanom anaa dze etua bɔn bi a wɔayɛ hɛn no do kaw. (1 Thess. 5:​13, 15) Sɛ yɛda obu edzi kyerɛ enuanom a wodzi ndzɛmba enyim wɔ asafo no mu no a, ɔno so kyerɛ dɛ yɛwɔ ɔdɔ.—1 Thess. 5:12. w23.06 10 ¶6; 11 ¶10-11

Kwan kor a yebotum afa do ahyɛ hɛn gyedzi mu dzen nye dɛ, yɛbɔdwendwen werdam no ho. Werdam no ma yenya awerɛhyɛmu dɛ, Nyankopɔn no bɔhyɛ ahorow no bɛba mu ɔkwan biara do. Ɔsɛ dɛ yɛtɔ hɛn bo adze dwendwen siantsir a Jehovah maa ne Ba no bowui, nye mbrɛ dɛm afɔr no som bo no ho. Sɛ yɛyɛ dɛm a, yɛbɛhyɛ gyedzi a yɛwɔ wɔ Nyankopɔn no bɔhyɛ a ɔnye dɛ ɔbɛma yɛatsena ase daa wɔ wiadze papa bi mu no mu dzen, na yeenya awerɛhyɛmu dɛ ɔbɛba mu kwan biara do. Ebɛnadze ntsi na yɛreka dɛm? Ma yembisa dɛ, ebɛnadze na Jehovah hweree dze tuaa werdam no maa hɛn? Ɔsomaa n’abakan a ɔdɔ no nye ne nyɛnko berɛbo fii sor ma wɔwoo no baa asaase do dɛ nyimpa a bɔn nnyi noho. Aber a Jesus wɔ asaase do no, ohyiaa ɔhaw pii. Afei, ɔfaa atseetsee mu na wokum no yayaayaw. Nokwasɛm nye yi, Jehovah hweer biribi a ɔsom bo paa ana orutua werdam no! Ɔwodze dwen ho hwɛ o, sɛ hɛn Nyankopɔn a ɔdɔ hɛn no pɛ dɛ yɛtsena ase mfe kakraabi wɔ asetsena papa bi mu a, aso nkyɛ ɔbɛma ne Ba no afa atseetsee mu na ɔama woeku no yayaayaw dɛm? (John 3:16; 1 Pet. 1:​18, 19) Sɛ Jehovah etum dze no Dɔba a ɔsom bo dɛm no ama hɛn dze a, nna ɔno kwan biara do no ɔbɔhwɛ ma yeetum atsena ase daa wɔ wiadze fofor no mu. w23.04 27 ¶8-9

Ana Jehovah wɔ ɔpɛ dɛ obenyan hɔn a woewuwu no? Ekyingye biara nnyi ho dɛ ɔpɛ dɛ ɔyɛ biribi a ɔtse dɛm. Siantsir a yɛreka dɛm nye dɛ, ɔmaa Bible akyerɛwfo binom kaa owusoɛr a ɔbɛba daakye no ho asɛm. (Isa. 26:19; Nyi. 20:​11-13) Jehovah so dze, yenyim dɛ sɛ ɔhyɛ bɔ a odzi do aber nyina. (Josh. 23:14) Nokwasɛm nye dɛ, Jehovah n’enyi gye ho paa dɛ obenyan ewufo. Ɔwodze, ma yensusu asɛm bi a egyapanyin Job kae no ho nhwɛ. Nna ɔgye dzi dɛ sɛ owu mpo a, Jehovah wɔ ɔpɛ dɛ obenyan no aba nkwa mu bio. (Job 14:​14, 15) Dɛmara so na Jehovah pɛ dɛ onyan n’asomfo a woewuwu no nyina. Ɔpɛ dɛ onyan hɔn ba nkwa mu a wɔwɔ apɔwmudzen papa nye enyigye. Nyimpa ɔpepepem pii a woennya hokwan ennsua Jehovah noho nokwasɛm ana woruwu no so ɛ? Hɛn Nyankopɔn a ɔwɔ ɔdɔ no pɛ dɛ onyan hɔn so. (Andw. 24:15) Ɔpɛ dɛ wonya hokwan bɛyɛ n’anyɛnkofo na wɔtsena ase daa wɔ asaase do.—John 3:16. w23.04 9 ¶5-6

Enyidado a ewɔ no, ebɛnadze na ibotum ayɛ dze ahyɛ mu dzen? Dɛ nhwɛdo no, sɛ ewɔ enyidado dɛ ebɛtsena ase daa wɔ asaase do a, ɔyɛ a kenkan mbrɛ Bible no si ka Paradise ho asɛm na dwendwen ho. (Isa. 25:8; 32:​16-18) Ɔyɛ a, twa mbrɛ asetsena bɛyɛ wɔ wiadze fofor no mu ho mfonyin wɔ w’adwen mu. Fa no dɛ ewɔ hɔ. Sɛ yɛtaa gye mber dwendwen wiadze fofor a Nyankopɔn dze ahyɛ hɛn bɔ no ho a, ɔbɔboa hɛn ma yeehu ɔhaw a yerihyia no dɛ ɔyɛ “ahohia harhar” anaa ber tsiabaa bi mu dze. (2 Cor. 4:17) Jehovah nam enyidado a ɔdze ama wo no do bɛhyɛ wo dzen ma eegyina ɔhaw a irihyia no ano. Jehovah dze ndzɛmba a yebehia ama gyedzi a yɛwɔ wɔ no mu no akɔ do ayɛ dzen no ama hɛn dada. Dɛm ntsi sɛ ihia mboa ama eetum ayɛ dwumadzi bi a ɔhyɛ wo nsa, egyina ɔhaw ano, anaa akɔ do enya enyigye wɔ w’asetsena mu a, fi w’akoma mu bɔ Jehovah mpaa na sua adze fa hwehwɛ no hɔ akwankyerɛ. Ma wo nuanom Christianfo mboa wo. Gye mber dwendwen daakye ho enyidado a ewɔ no ho. Sɛ eyɛ dɛm a, Nyankopɔn n’enyimnyam tum no nyina bɛhyɛ wo dzen, ama eetum akɔ do dze abotar nye dɛw egyina ɔhaw ano.—Col. 1:11. w23.10 17 ¶19-20

Yɛwɔ ndzɛmba pii a yebotum ada Jehovah ase wɔ ho aber a yɛrobɔ mpaa no. Adze papa biara a yɛwɔ no, yebotum ada Jehovah ase wɔ ho. Adze yi, ne nkyɛn na akyɛdze pa nyina fi ba. (Jas. 1:17) Dɛ nhwɛdo no, asaase a ɔyɛ fɛw a Jehovah dze ama hɛn kwa nye ndzɛmba ahorow a ɔyɛ nwanwa a ɔabɔ no, yebotum ada no ase wɔ ho. Afei so, yebotum ada Jehovah ase dɛ yɛtse nkwa mu. Ɔnnyɛ ɔno nko, yebotum so ada no ase dɛ ɔama hɛn ebusua, anyɛnkofo nye enyidado papabi. Bio so, yɛpɛ dɛ yɛda Jehovah ase dɛ ɔama yɛnye no enya anyɛnkofa a no mu yɛ dzen. Ndzɛmba ahorow a Jehovah ayɛ ama hɛn no, sɛ yebotum akaa na yaada no ase wɔ ho a, ɔbɛgye mbɔdzembɔ. Siantsir nye dɛ, ndɛ nyimpa pii nnkyerɛ ndzɛmba ho enyisɔ. Mpɛn pii no, nkorɔfo dze hɔn adwen si dza wobenya do. Naaso dza wɔbɛyɛ dze akyerɛ dza woenya no ho enyisɔ dze, wɔnndwen ho koraa. Sɛ yesuasua suban a ɔtse dɛm a, ɔbɛma hɛn so aber biara a yɛbɔbɔ mpaa no, dza yehia nkotsee na yɛbɛka ho asɛm akyerɛ Jehovah. Mbrɛ ɔbɛyɛ a yerunnsuasua su a ɔtse dɛm no, ɔsɛ dɛ yɛkɔ do kyerɛ biribiara a Jehovah yɛ ma hɛn no ho enyisɔ.—Luke 6:45. w23.05 4 ¶8-9

Jehovah yɛ hɛn Egya a ɔdɔ hɛn. Dɛm ntsi sɛ ohu dɛ yeruhu amandze a, ɔyɛ no yaw. (Isa. 63:9) Ɔhaw a yɛfa mu a ɔtse dɛ esutsen na gyaframee no, ɔnnyɛ ne nyina na Jehovah siw ano. (Isa. 43:2) Naaso, ɔahyɛ hɛn bɔ dɛ ɔbɔboa hɛn ma ‘yeetwa’ haw a ɔtsetse dɛm no. Afei so, ɔremma haw no nnsɛɛ yɛnye no ntamu ebusuabɔ no. Ɔno da nkyɛn a, ɔdze no sunsum krɔnkrɔn no boa hɛn ma yetum gyina ɔhaw ano. (Luke 11:13; Phil. 4:13) Iyi ntsi, yɛgye dzi dɛ Jehovah bɛma hɛn dza yehia ama yaakɔ do egyina hɛn haw ano na yeetum akɔ do asom no nokwar mu. Jehovah pɛ dɛ yenya no mu awerɛhyɛmu. (Heb. 11:6) Ɔtɔfabi a, yebotum atse nka dɛ ɔhaw a yerihyia no so ara ma yɛyɛ ho hwee ara a, ɔrennyɛ yie. Iyi botum ama hɛn adwen mu ayɛ hɛn naa dɛ Jehovah bɔboa hɛn anaa ɔrommboa hɛn. Naaso, Bible no ma yenya awerɛhyɛmu dɛ Jehovah bɔboa hɛn ma yeetum ‘ehuruw atra fasu.’ (Ndw. 18:29) Dɛm ntsi ɔnnsɛ dɛ yɛma hɛn adwen mu yɛ hɛn konsee. Mbom ɔsɛ dɛ yɛdze gyedzi bɔ mpaa na yenya awerɛhyɛmu dɛ Jehovah betsie hɛn mpaabɔ.—Jas. 1:​6, 7. w23.11 22 ¶8-9

Mbrɛ woesi aka ɔdɔ mapa ho asɛm wɔ kyerɛwsɛm yi mu no ka akoma ae! Dɛm asɛm yi ma awarfo nya awerɛhyɛmu dɛ, wobotum enya ɔdɔ a no mu yɛ dzen ama hɔnho. Sɛ awarfo botum akɔ do ada ɔdɔ edzi akyerɛ hɔnho hɔn nkwa nda nyina a, obegyina hɔnara hɔn do. Ɔwodze ma yɛnyɛ dɛm mfatoho yi. Sɛ ogya bi bɔkɔ do adzɛw a, ɔsɛ dɛ wɔkɔ do kua mu, annyɛ dɛm a nkakrankakra gya no bodum. Dɛmara na awar so tse. Sɛ awarfo botum akɔ do ada ɔdɔ edzi akyerɛ hɔnho a, ɔsɛ dɛ wɔkɔ do ara hyɛ ɔdɔ a wɔwɔ ma hɔnho no mu dzen. Naaso ɔtɔ da a, ɔdɔ a awarfo bi wɔ ma hɔnho no n’ano botum adwe, nkanka aber a hɔn sikasɛm nnkɔ yie, yarba bi retseetsee hɔn, anaa worihyia ɔhaw wɔ hɔn mba ntsetsee mu. Sɛ okun na ɔyer nyina yer hɔnho hyɛ ebusuabɔ a wɔnye Jehovah wɔ no mu dzen a, ɔbɛma ‘Jah ogyaframee’ no akɔ do ara adzɛw wɔ hɔn awar mu. w23.05 20-21 ¶1-3

Sɛ yebotum enya akokodur a, ebɛnadze na ɔsɛ dɛ yɛyɛ? Hɛn awofo botum ahyɛ hɛn nkuran dɛ yennya akokodur, naaso worunntum mmfa mma hɛn tse dɛ mbrɛ ɔyɛ ebusua egyapadze bi a wobotum dze egya hɛn. Naaso wobotum ahyɛ hɛn nkuran dɛ yennya su a ɔtse dɛm. Akokodur a obi benya no tse dɛ biribi fofor a orusua efi obi hɔ. Adze kor a obotum aboa no ma oesua adze no yie nye dɛ, ɔbɛgyen n’enyi ahwɛ obi a ɔrekyerɛ no adze no yie, na oesuasua dza ɔreyɛ no. Hɛn so, sɛ yebotum ada akokodur edzi a, ɔsɛ dɛ yɛhwɛ mbrɛ afofor si da dɛm su yi edzi no na yesuasua hɔn. Ɔsɛ dɛ yesua Nyankopɔn n’Asɛm no yie dɛ mbrɛ Daniel yɛe no. Afei so, ɔsɛ dɛ yɛnye Jehovah nya ebusuabɔ a no mu yɛ dzen. Sɛ yebotum ayɛ dɛm a ɔsɛ dɛ yɛtaa bɔ no mpaa na yefi hɛn akoma mu ka mbrɛ yesi tse nka kyerɛ no. Nkyii so, ɔsɛ dɛ yenya no mu ahotodo na yɛgye dzi dɛ ɔbɔboa hɛn. Sɛ yɛyɛ dɛm a, aber biara a wɔbɔsɔ hɛn gyedzi ahwɛ no, yɛdze akokodur begyina pintsinn. Sɛ obi wɔ akokodur a, mpɛn pii no afofor bu no. Afei so, obotum aboa nyimpa akomapafo ma wɔaabɔsom Jehovah. Iyi ma yehu dɛ no ho hia paa dɛ yɛda akokodur edzi. w23.08 2 ¶2; 4 ¶8-9

Greek kasafua a wɔkyerɛɛ ase ‘hom nsɔ nhwɛ’ no, nna wɔdze dzi dwuma aber a wɔrosɔ sika kɔkɔɔ, dadze nye dza ɔkeka ho ahwɛ dɛ bi a ɔyɛ papa a. Iyi kyerɛ dɛ ɔsɛ dɛ yɛsɔ dza yɛtse na yɛkenkan no hwɛ dɛ ɔyɛ nokwar anaa. Hɛn paa na ɔsɛ dɛ yɛfa dɛm afotu yi enyibersɛm, osiandɛ ahohiahia kɛse no abɛn pɛɛ. Dɛm ntsi, nnyɛ asɛm biara a nkorɔfo bɛka no na ɔsɛ dɛ yɛgye dzi, mbom ɔsɛ dɛ yɛma hɛn adwen mu da hɔ na yɛdze nsɛm a yɛtse anaa yɛkenkan no toto dza Bible no nye Jehovah n’ahyehyɛdze no ka no ho. Sɛ yɛyɛ dɛm a, yɛremma atorsɛm a ofi esunsum fi hɔ no nndaadaa hɛn da. (Mbɛ. 14:15; 1 Tim. 4:1) Yenyim dɛ Jehovah bɛgye no nkorɔfo nkwa wɔ ahohiahia kɛse no mu. Naaso dɛ ankorankor no, yennyim dza ɔbɔto hɛn ɔkyena. (Jas. 4:14) Naaso, dza yenyim nye dɛ, sɛ yewu ansaana ahohiahia kɛse no ahyɛ ase, anaa sɛ yetwa ahohiahia kɛse no na yɛkɔ do dzi Jehovah nokwar a, ɔbɛma hɛn daa nkwa. Hom mma yɛnkɔ do mfa hɛn adwen nsi enyidado a osi pi a yɛwɔ no do na yɛnyɛ krado ntweɔn Jehovah ne da no! w23.06 13 ¶15-16

Yennyim ɔkwan a Bible nkɔnhyɛ ahorow bi bɛfa do aba mu. (Dan. 12:​8, 9) Naaso sɛ yennyim ɔkwan a Bible nkɔnhyɛ bi bɛfa do aba mu mpo a, ɔno nnkyerɛ dɛ nkɔnhyɛ no remmba mu. Yebotum enya awerɛhyɛmu dɛ sɛ ber so dɛ nkɔnhyɛ bi ba mu a, Jehovah bɛma yɛatse ase dɛ mbrɛ ɔyɛe wɔ tsetse mber mu no. Amanaman no bɛpaa mu aka “asomdwee nye ahotɔ” ho asɛm. (1 Thess. 5:3) Afei, wiadze etumfo no bɔtow ahyɛ ator som do na wɔasɛɛ no korakora. (Nyi. 17:​16, 17) Ɔno ekyir no wɔbɔtow ahyɛ Nyankopɔn n’asomfo so do. (Ezek. 38:​18, 19) Dɛm nsɛm a obesisi yi na ɔdze hɛn bɔkɔ ekowie ɔko a otwa tun a ɔno nye Amagedon. (Nyi. 16:​14, 16) Yebotum enya awerɛhyɛmu dɛ ɔrennkyɛr koraa na dɛm nsɛm yi esisi. Kesi dɛ dɛm aber no bɛba no, hom mma Bible mu nkɔnhyɛ ho nhia hɛn na yɛmboa afofor so ma wonhu dɛ Bible mu nkɔnhyɛ ho hia. Hom mma yɛnyɛ dɛm mfa nkyerɛ dɛ hɛn enyi sɔ dza hɛn sor Egya Jehovah ayɛ ama hɛn no. w23.08 13 ¶19-20

Aber a ɔsomafo Paul reka gyedzi, enyidado na ɔdɔ ho asɛm no, ɔdze kaa ho dɛ ‘dɛm suban yi mu dza ɔyɛ kɛse nye ɔdɔ.’ (1 Cor. 13:13) Ebɛnadze ntsi na Paul kaa dɛm? Nyankopɔn n’anohoba a ɔfa wiadze fofor no ho no, no ho rinnhia dɛ yɛkɔ do ara nya mu gyedzi daakye anaa mpo dɛ yɛdze enyidado hwɛ no kwan, osiandɛ dɛm aber no, nna ne nyinara aba mu. Naaso, no ho behia dɛ yɛkɔ do dɔ Jehovah nye hɛn nuanom aber nyina. Nokwasɛm nye dɛ, ɔdɔ a yɛwɔ ma Jehovah nye hɛn nuanom no bɔkɔ do aayɛ kɛse afebɔɔ. Afei so, ɔdɔ na ɔma wohu hɛn dɛ yɛyɛ nokwar Christianfo. Jesus kaa kyerɛɛ n’asomafo no dɛ: “Ɔnam iyi do na nyimpa nyina bohu dɛ hom yɛ m’esuafo, sɛ hom wɔ ɔdɔ ma homho nkorkor a.” (John 13:35) Ɔno da nkyɛn a, sɛ yɛdodɔ hɛnho a, ɔma yɛyɛ kor. Paul kaa ɔdɔ ho asɛm dɛ ɔyɛ “emudzi abɔdo.” (Col. 3:14) Ɔsomafo John kyerɛɛw kɛmaa ne mfɛfo agyedzifo no dɛ: “Nyia ɔdɔ Nyankopɔn no, ɔndɔ no nua so.” (1 John 4:21) Dɛm ntsi sɛ yɛdodɔ hɛn nuanom a, ɔkyerɛ dɛ yɛdɔ Nyankopɔn. w23.11 8 ¶1, 3

Bible no dze Christianfo hɔn abrabɔ toto mbirikatu ho. Hɔn a wobotum etu mbirika no ewie no, wobenya daa nkwa. (2 Tim. 4:​7, 8) Ndɛ paa nye ber a ɔsɛ dɛ yɛyer hɛnho na yɛkɔ do tu mbirika no, osiandɛ ɔrennkyɛr koraa ma yeewie. Ɔsomafo Paul maa yehun ndzɛmba bi a obotum aboa hɛn ma yeetum etu nkwa ho mbirika no ewie. Ɔkaa dɛ ‘yɛmfa dza osiw kwan nyina anaa adzesoa biara nto nkyɛn, na yɛmfa enyimia ntu mbirika a ɔda hɛn enyim no.’ Nna Paul repɛ akyerɛ dɛ adzesoa biara nnyi hɔ a ɔsɛ dɛ Christiannyi soa anaa? Oho, nna ɔnnyɛ dɛm na ɔrepɛ akyerɛ. Mbom, dza nna ɔpɛ dɛ ɔkyerɛ nye dɛ, adzesoa biara a no ho nnhia no, ɔsɛ dɛ yɛtow kyen. Adzesoa a ɔtse dɛm no botum atwe hɛn asan ma yeegyaa mbirika no tu. Sɛ yebotum emia hɛn enyiwa etu mbirika no ewie a, ɔno adzesoa biara a no ho nnhia no, ɔsɛ dɛ yehu no ntsɛm na yeyi fi hɔ. Naaso ndzɛmba a ohia dɛ yɛsoa no dze, ɔnnsɛ dɛ yɛtow gu. Sɛ yenya ara tow gu a, yerunntum nnkɔ do nntu mbirika no.—2 Tim. 2:5. w23.08 26 ¶1-2

Sɛ yɛwɔ ntseasee a, ɔboa hɛn ma yɛkyerɛ obu ma gyinae a afofor si no. Sɛ yɛbɛyɛ nhwɛdo a, hɛn nuanom mbaa binom enyi gye ho dɛ wɔbɛyɛ makeup, naaso bi a na afofor so enyi nngye ho. Afei so, Christianfo binom enyi gye ho dɛ wɔbɔnom nsa kakra, naaso binom so si gyinae dɛ wɔronnom nsa koraa. Bio so, Christianfo nyina pɛ dɛ wonya apɔwmudzen papa, naaso ɔsor ayarsa a obiara n’enyi gye ho. Dɛm ntsi, sɛ yɛtse nka dɛ ayarsa a yɛpɛ no yɛ papa ma ntsi yɛhyɛ enuanom dɛ wɔmpaw ayarsa a ɔtse dɛm a, yebotum ato enuanom fintsidua na yɛdze mpaapaamu bɛba asafo no mu. (1 Cor. 8:9; 10:​23, 24) Dɛ nhwɛdo no, Jehovah mmaa hɛn mbra pɔtsee a ɔfa mbrɛ yensi nsiesie hɛnho ho, mbom ɔama hɛn ho afotu. Ntsi, ɔsɛ dɛ yesiesie hɛnho dɛ mbrɛ ɔfata Nyankopɔn n’asomfo. Sɛ yɛyɛ dɛm a, ɔkyerɛ dɛ yɛwɔ ntseasee, yɛbrɛ hɛnho adze na hɛn ‘enyi da hɔ’ so. (1 Tim. 2:​9, 10) Dɛm ntsi yennsiesie hɛnho wɔ kwan bi do a ɔtwetwe nkorɔfo adwen ba hɛn do. Bible mu afotu a ɔfa ntarhyɛ na kwan a yɛfa do yɛ hɛn tsir anaa yeyi hɛn tsir no bɔboa asafo mu mpanyimfo amma wɔaannhyehyɛ mbra amma enuanom. w23.07 23-24 ¶13-14

Jehovah ama yeehu dza yɛyɛ a ɔbɛma hɛn enyi agye daakye. Hɔn a wotsie “ɔbaa kwasea” a n’ano yɛ dzen no, ɔbrabɔn “fenemfenem” a wɔbɔ wɔ nsumaa mu no nkotsee na no bɔ yɛ hɔn dɛw. Dɛm suban yi nye hɔn bɔkɔ ekowie ‘adakamaa no bun mu’ tɔnn. (Mbɛ. 9:​13, 17, 18) Hɔn a wotsie “nyansa” afotu no dze, nhyira a wonya no yɛ pii kwa! (Mbɛ. 9:1) Yerusua dɛ hɛn enyi bɛgye ndzɛmba a Jehovah n’enyi gye ho no ho, na yeekyir ndzɛmba a okyir so. (Ndw. 97:10) Afei so, sɛ yɛto nsa frɛ nkorɔfo dɛ wombetsie afotu a “nyansa” dze ma no a, ɔma hɛn akoma tɔ hɛn yamu. Sɛ yɛyɛ dɛm a, ɔtse dɛ mbrɛ ‘yɛretsea mu wɔ kurow no nsorɔnsorɔmmbea no do dɛ, Obiara a ɔyɛ ogyimfo no, ɔmman mbra ha.’ Ɔnnyɛ ndɛ nkotsee na yɛnye hɔn a wotsie hɛn no nya nhyira. Mbom dɛm nhyira no remmba ewiei da; ɔbɛma yɛatsena ase daa na ‘yɛanantsew ntseasee kwan no do’ akɔ hɛn enyim.—Mbɛ. 9:​3, 4, 6. w23.06 24 ¶17-18

Sɛ w’edwumamunyi anaa wo skuulnyi bi bisa wo gyedzi ho asɛm a, etse nka dɛn? Ɔyɛ a, wo yamu hye wo anaa? Sɛ dɛm a, ɔnnyɛ wo nkotsee, ɔyɛ hɛn mu pii so. Naaso asɛmbisa a ɔtse dɛm no botum aboa hɛn ma yeehu adwen a nyimpa no wɔ anaa dza ɔgye dzi. Iyi botum ebue hokwan ma yaaka hɛn gyedzi ho asɛm akyerɛ no. Naaso, ɔtɔ da a nyimpa binom bisa hɛn gyedzi ho nsɛm osiandɛ wɔnye hɛn nnyɛ adwen anaa wɔpɛ dɛ wɔnye hɛn gye kyim ara kɛkɛ. Sɛ ɔba no dɛm a, ɔnnsɛ dɛ ɔyɛ hɛn nwanwa. Adze yi, hɔn mu binom wɔ hɔ a nkorɔfo akeka hɛnho nsɛm a ɔnnyɛ nokwar akyerɛ hɔn. (Andw. 28:22) Afei so, yɛtse “nda a odzi ekyir no” mu, ntsi nyimpa pii wɔ hɔ a wɔnye hɔn nnyɛ apam na wɔyɛ “abɔyafo” so. (2 Tim. 3:​1, 3) Bi a ibebisa woho dɛ, ‘Sɛ obi kasa tsia me gyedzi a, mibesi dɛn edzi no nyi na menye no akasa bɔkɔɔ?’ Ɔdwe botum aboa wo ma aayɛ dɛm. Sɛ obi dwe a, otum hyɛ noho do aber a obi ahyɛ no ebufuw anaa tsebea bi ama onnhu dza ɔnnyɛ mpo no. w23.09 14 ¶1-2

Ɔtɔ da a, wɔma hɛn akwankyerɛ a ɔbɔ hɛnho ban fi honam afamu ndzɛmba a yebedzi ekyir, nye ndzɛmba a obotum ama yaayɛ Nyankopɔn do asoɔdzen no ho. Iyi mu so, sɛ yetsie Jehovah n’akwankyerɛ a, obehyira hɛn. (Isa. 48:​17, 18; 1 Tim. 6:​9, 10) Ɔda edzi pefee dɛ, wɔ ahohiahia kɛse no mu na Christ ne Mfrenhyia Apem Tumdzi n’ase mpo, Jehovah bɔkɔ do afa nyimpa do dze akwankyerɛ ama. Sɛ wɔdze akwankyerɛ bi ma hɛn a, yɛbɔkɔ do dze ayɛ edwuma anaa? Mbrɛ yesi yɛ hɛn adze wɔ akwankyerɛ a Jehovah dze ma hɛn seseiara ho no, ɔno na ɔbɛkyerɛ mbrɛ yebesi ayɛ hɛn adze wɔ dɛm aber no. Dɛm ntsi, akwankyerɛ biara a ofi Jehovah hɔ, nye dza ofi nyimpa a oeyi hɔn dɛ wɔnhwɛ hɛn do no hɔ no, hom mma yɛnkɔ do ndzi ekyir daa. (Isa. 32:​1, 2; Heb. 13:17) Sɛ yɛyɛ dɛm a, yebotum dze hɛnho ato hɛn Kwankyerɛfo Jehovah do. Osiandɛ ɔno na ɔrobɔ hɛnho ban efi esian a ɔwɔ Satan wiadze yi mu no ho na ɔrekyerɛ hɛn kwan akɔ wiadze fofor no mu. w24.02 25 ¶17-18

Nna ɔsomafo Paul n’enyi gye paa wɔ Jehovah no som mu, naaso ohyiaa ɔhaw pii wɔ n’asetsena mu. Nna ɔtaa tutu akwan kɔ ekyir. Dɛm aber no so nna akwantu nnda famu koraa. Ɔtɔ da a, nna ohyia ɔhaw bi tse dɛ “esutsen mu esian” na “edwotwafo nsamu esian” wɔ n’akwantu no mu. Afei so ɔyɛ a, nna hɔn a wɔmmpɛ n’asɛm no bor no. (2 Cor. 11:​23-27) Ɔno da nkyɛn a, nna nnyɛ aber nyina na nankasa no nuanom Christianfo no mpo kyerɛ ndzɛmba a ofi n’akoma mu yɛ dze boa hɔn no ho enyisɔ. (2 Cor. 10:10; Phil. 4:15) Ebɛnadze na ɔboaa Paul ma ɔkɔr do soom Jehovah? Osuaa Jehovah no su ho adze pii fii Bible no mu. Afei so, osuaa pii fii ndzɛmba ahorow a osisii wɔ n’asetsena mu no mu. Dɛm a ɔyɛe no boaa no ma ɔbɛgyee dzii dɛ Jehovah dɔ no paa. (Rom. 8:​38, 39; Eph. 2:​4, 5) Na iyi maa ɔno so bɔdɔɔ Jehovah paa. Paul ‘soom ahotseweefo no, na ɔkɔr do yɛɛ’ dɛm dze kyerɛɛ dɛ ɔdɔ Jehovah.—Heb. 6:10. w23.07 9 ¶5-6

Nyimpa pii gye to mu dɛ ɔsɛ dɛ ɔman biara nya aban bi ma odzi hɔn do, na mbra ahorow a ‘etumfo a wɔkrɔn no’ bɛhyehyɛ no so, annyɛ yie koraa no ɔsɛ dɛ wodzi no mu bi do. Naaso sɛ wɔhyɛ mbra bi na ɔkɔ tsia hɔn anaa ɔbɛma hɔnho akyer hɔn a, ebɔhwɛ no, nna dɛm nkorɔfo kor yi ara mmpɛ dɛ wodzi do. Bible no ma yehu dɛ aban ahorow a ɔwɔ hɔ no ma adasamba hu amandze. Afei so, ɔma yehu dɛ Satan na odzi hɔn do tum, na ɔrennkyɛr koraa Jehovah bɛsɛɛ hɔn nyina. (Ndw. 110:​5, 6; Ɔsɛnk. 8:9; Luke 4:​5, 6) Bible no san so ma yehu dɛ ‘obiara a ɔsoɛr tsia etumfo no, ɔsoɛr tsia nhyehyɛɛ a Nyankopɔn ayɛ no.’ Seseiara dze, Jehovah ama aban ahorow a wɔwɔ hɔ no kwan dɛ wondzi tum kakra mbrɛ ɔbɛyɛ a ndzɛmba bɔkɔ do kamakama. Ntsi Jehovah hwɛ kwan dɛ yebetsie hɔn. Dɛm ntsi, ɔsɛ dɛ ‘yɛdze dza ɔsɛ hɔn no ma hɔn.’ Bi nye dɛ yebotua tow, yɛbɛkyerɛ obu ama hɔn, na yɛayɛ setsie so. (Rom. 13:​1-7) Mbra a aban mpanyimfo ahyehyɛ no, bi a ɔbɛyɛ hɛn dɛ ɔyɛ dzen, wɔdze risisi hɛn, anaa ɔbɛma hɛnho akyer hɛn. Naaso sɛ dɛm mbra no mma yemmbu Jehovah ne mbra do a, ɔno yedzi do osiandɛ Jehovah na ɔaka akyerɛ hɛn dɛ yentsie hɔn.—Andw. 5:29. w23.10 8 ¶9-10

Aber a wɔwoo Samson no, nna Philistiafo no dzi Israelfo no do, na wɔtseetsee hɔn paa. (Atsɛ. 13:1) Atseetsee a wɔdze Israelfo no faa mu no maa wohun amandze. Dɛm ntsi, Jehovah yii Samson dɛ ɔno na obedzi enyim “agye Israel efi Philistiafo nsamu.” (Atsɛ. 13:5) Sɛ nna Samson botum ayɛ edwuma a ɔtse dɛm a, nna ɔsɛ dɛ ɔdze noho to Jehovah do. Ber bi, Philistiafo nsordaafo bi kɔr Lehi a ɔbɛyɛ dɛ ɔwɔ Judah no dɛ wɔrekɛkyer Samson. Ɔbaa no dɛm no, nna Judah mbarimba no suro. Dɛm ntsi wɔyɛɛ dɛ wobeyi Samson ahyɛ atamfo no nsa. Samson nankasa no nkorɔfo no dze ahoma fofor ebien kyekyeer no pampee na wɔdze no kɛhyɛɛ Philistiafo no nsa. (Atsɛ. 15:​9-13) Naaso, ‘Jehovah no sunsum baa’ Samson no do dzendzenndzen na ahoma a ɔkyekeyer ne nsa no fii ne nsa ho gui. Afei ‘ohun asoaso pɔnkɔ n’adadaw fofor bi,’ na oyii dze kunkum Philistiafo mbarimba 1,000!—Atsɛ. 15:​14-16. w23.09 2 ¶3-4

Jehovah dze no nkakrankakra ama yeehu ne ‘daa tsirmpɔw’ anaa no botae wɔ Bible no mu. ‘Jehovah wɔ botae ma biribiara a ɔyɛ,’ dɛm ntsi obotum afa kwan biara do ama no botae aaba mu. (Mbɛ. 16:4) Na dza Jehovah yɛ biara so bɛtsena hɔ daa. Ntsi Jehovah no botae nye dɛn, na ebɛn nsesa na ɔayɛ ama no botae aba mu? Nyankopɔn maa hɛn awofo a wodzi kan no hun botae a ɔwɔ ma hɔn. Nna ɔsɛ dɛ ‘wɔwo, na wɔdɔr, na wɔhyɛ asaase ma, na wonya asaase do mbowa nyinara do tum.’ (Gen. 1:28) Aber a Adam na Eve yɛɛ Jehovah no do asoɔdzen no, wɔnye hɔn asefo nyina bɛyɛɛ nyimpa a bɔn wɔ hɔnho. Naaso eyi amma Jehovah no botae annsesa. Mbom ɔsesaa kwan a ɔbɛfa do ama dɛm botae no aba mu no. Hɔ no ara na ɔyɛɛ nhyehyɛɛ dze Ahendzi bi sii hɔ wɔ sor. Nna dɛm Ahendzi no bɛma no botae ma adasamba na asaase yi aba mu.—Matt. 25:34. w23.10 20 ¶6-7

Jehovah botum aboa hɛn amma yaammpa abaw mbom yeetum akɔ do asom no. Ɔwɔ mu, ɔnnyɛ aber nyina na ɔyɛ mberɛw dɛ yɛbɛyɛ dɛm nkanka aber a yɛabɔ mbɔdzen ber tsentsen bi dɛ yebedzi mberɛwyɛ pɔtsee bi do no. Ɔtɔfabi a, sɛ yɛdze hɛn mberɛwyɛ toto ɔsomafo Peter dze no ho a, bi a yebenya adwen dɛ Peter dze no mmba koraa. Naaso mbrɛ ɔtse biara no, Jehovah botum ama hɛn ahoɔdzen ma yɛdze ako etsia hɛn mberɛwyɛ. (Ndw. 94:​18, 19) Dɛ nhwɛdo no, ansaana ɔbarimba bi rubohu nokwar no, nna ɔdze noho ahyɛ ɔbarimba na ɔbarimba nda mu mfe pii. Naaso ɔsesaa n’abrabɔ koraa na ɔdze Bible no bɔɔ ne bra. Ɔmmfa ho dɛ nna ɔasesa n’abrabɔ no, ɔwɔ mu ara a, nna ɔtse nka dɛ ɔnsan nkɔ ne dadaw mu. Ebɛnadze na ɔboaa no ma odzii ne mberɛwyɛ no do? Ɔkaa dɛ: “Jehovah na ɔhyɛ hɛn dzen.” Ɔdze kaa ho dɛ: “Mebohu dɛ Jehovah no sunsum krɔnkrɔn no botum aboa me ma [maakɔ] do abɔ me bra dɛ mbrɛ ɔsɔ n’enyi . . . Jehovah dze me edzi dwuma wɔ no som mu, na me mberɛwyɛ nyina ekyir no, ɔkɔ do hyɛ me dzen.” w23.09 23 ¶12

Enuanom mberantsɛ, hom nkaa dɛ sɛ hom botum abɛyɛ Christianfo a homho akokwaa a, ɔno dze ɔmmba ara kwa. Mbom ɔsɛ dɛ hom hwehwɛ hɔn a wɔyɛ nhwɛdo pa, na hom suasua hɔn. Afei so, ɔsɛ dɛ hom ma hom enyi da hɔ, hom yɛ ndzɛmba a ɔbɛma afofor etum dze hɔnho ato hom do, hom sua ndzɛmba bi a obotum aboa hom wɔ asetsena mu, na hom siesie homho ma dza ɔda hom enyim daakye no. Ɔtɔ da na edwendwen dza ɔda w’enyim dɛ aberantsɛ no ho a, ibotum enya adwen dɛ ɔnnda famu. Naaso ibotum ayɛ. Kaa dɛ, Jehovah ayɛ krado paa dɛ ɔbɔboa wo. (Isa. 41:​10, 13) Enuanom a wɔwɔ asafo no mu so ayɛ krado paa dɛ wɔbɔboa wo. Sɛ eyer woho bɛyɛ Christiannyi a noho akokwaa a, w’enyi bɛgye wɔ abrabɔ mu, na w’akoma so bɔtɔ wo yamu. Enuanom mberantsɛ, yɛdɔ hom paa! Yɛserɛ dɛ Jehovah nhyira hom kɛsenara dɛ hom robɔ mbɔdzen abɛyɛ Christianfo mbarimba a homho akokwaa. w23.12 29 ¶19-20

Fa no dɛ enye enuanom bi agye hom enyi paa wɔ aponto bi ase, na hom bɔɔ mu twaa mfonyin. Yɛreka yi, bi a ɔnnyɛ mfonyin kor pɛ na hom twae, osiandɛ sɛ itwa kor pɛ a, bi a nna wɔannyɛ fɛw. Ntsi itwaa nkorkor ebiasa. Naaso, ihun dɛ onua kor bi emuna n’enyim wɔ mfonyin no mu kor mu. Ntsi iyii dɛm mfonyin no fii mu. Osiandɛ annyɛ hwee koraa no, ewɔ mfonyin ebien bi a ɔno dze obiara sereew kama wɔ mu. Mpɛn pii no, ɔyɛ a yetum kaakaa enyigyesɛm bi a ɔkɔr do wɔ yɛnye hɛn nuanom ntamu. Naaso fa no dɛ wɔ dɛm enyigyesɛm no mu kor mu no, onua anaa akyerɛbaa bi kaa asɛm bi a wɔannyɛ wo dɛw anaa ɔyɛɛ biribi a w’enyi anngye ho. Sɛ ekaa asɛm bi a ɔtse dɛm a, ebɛnadze na ɔsɛ dɛ eyɛ wɔ ho? Dɛ mbrɛ nkyɛ ibeyi mfonyin a wɔannyɛ fɛw no efi wo fon do no, ɔbɛyɛ a nkyɛ bɔ mbɔdzen ara so yi dza osii no fi w’adwen mu. (Eph. 4:32) Enyigyesɛm a wɔakɔ do wɔ yɛnye hɛn nuanom ntamu dze, pii kwa. Dɛm enyigyesɛm no na ohia hɛn, na ɔno na yɛpɛ dɛ ɔka hɛn tsirmu. w23.11 12-13 ¶16-17

Greek nkasafua a wɔdze dzii dwuma wɔ ha no kyerɛ dɛ, ɔsɛ dɛ Christianfo mbaa dze hɔn ntarhyɛ kyerɛ dɛ wobu adze na wɔdwen afofor so ho. Enuanom mbaa a hom yɛ dɛm, hɛn enyi sɔ hom! Nhumu yɛ suban fofor a ɔsɛ dɛ Christianfo mbaa a hɔnho akokwaa nyina da no edzi. Sɛ wɔka dɛ obi wɔ nhumu a, ɔkyerɛ dɛn? Sɛ obi tum hu nsonsonee a ɔwɔ dza ɔtsen nye dza ɔnntsen mu na ɔyɛ dza ɔtsen a, ɔkyerɛ dɛ ɔwɔ nhumu. Dɛm na Abigail yɛe, na ma yensusu dza ɔyɛe no ho. No kun sii gyinae bɔn bi a nna ɔbɔkɔ akɛfa ɔhaw kɛse bi abrɛ ne fiefo nyina, naaso aber a Abigail tsee gyinae a no kun esi no, otuu ho anamɔn ntsɛmara. Osiandɛ ohun anamɔn pa a ɔsɛ dɛ otu na otui ntsi ɔgyee ne fiefo nkwa. (1 Sam. 25:​14-23, 32-35) Sɛ yɛwɔ nhumu a, ɔbɔboa hɛn ma yeehu ber a ɔsɛ dɛ yɛkasa nye ber a ɔsɛ dɛ yɛyɛ komm. Afei so sɛ yɛroboa afofor a, dɛm suban yi bɔboa hɛn ma yaannyɛ biribi a ɔbɛhaw hɔn.—1 Thess. 4:11. w23.12 20 ¶8-9

Ɔsomafo Paul kyerɛɛw dɛm nsɛm yi kɛmaa Rome asafo no. Nna enuanom a wɔwɔ hɔ no ebosua Jehovah na Jesus ho adze, woebenya hɔn mu gyedzi, na wɔabɛyɛ Christianfo. Ntsi nna Nyankopɔn ‘nam gyedzi do ebu hɔn atseneneefo’ na ɔdze sunsum krɔnkrɔn asera hɔn. (Rom. 5:1) Nokwasɛm nye dɛ, nna wɔrohwɛ enyidado papabi kwan na wobotum enya awerɛhyɛmu dɛ dɛm enyidado no bɛba mu. Ekyir yi, Paul kyerɛɛw krataa kɛmaa Christianfo a nna wɔasera hɔn a wɔwɔ Ephesus no, na ɔkaa enyidado a Nyankopɔn dze ama hɔn no ho asɛm. Ɔkaa dɛ hɔn nsa bɛka ‘egyapadze a wɔdze ahyɛ ahotsewfo bɔ no.’ (Eph. 1:18) Afei so, wɔ krataa a Paul kyerɛwee kɛmaa Colossaefo no mu no, ɔkyerɛɛ hɔn beebi a nna hɔn nsa bɛka dɛm enyidado yi. Ɔkaa iyi ho asɛm dɛ ɔyɛ “enyidado a ɔda hɔ ma hom wɔ sor.” (Col. 1:​4, 5) Ntsi, enyidado a Christianfo a wɔasera hɔn no wɔ nye dɛ wobenyan hɔn ma wɔaakɛtsena sor afebɔɔ, na wɔnye Christ abɔ mu edzi adze.—1 Thess. 4:​13-17; Nyi. 20:6. w23.12 9 ¶4-5

Kasafua ankasa a wɔkyerɛɛ ase ‘weɔn’ no, nna nsordaafo na wɔtaa dze dzi dwuma. Nna wɔdze ka nsordaafo a wɔweɔn kurow bi na wɔbɔ ho ban amma atamfo ammbɔto annhyɛ hɔn do ho asɛm. Osiandɛ nna dɛm kurow no mufo nyim dɛ nsordaafo gyina kurow no n’apon ano robɔ ho ban ntsi, nna wɔda a na wɔada. Hɛn so, sɛ Nyankopɔn n’asomdwee bɔ hɛn adwen nye hɛn akoma ho ban a, ɔma hɛn akoma tɔ hɛn yamu na yɛtse nka dɛ yɛwɔ bambɔ. (Ndw. 4:8) Dɛ mbrɛ yenyim fa Hannah ho no, sɛ ɔhaw a yerihyia no emmfi hɔ amonmu hɔ ara mpo a, yebotum enya asomdwee na hɛn akoma so atɔ hɛn yamu. (1 Sam. 1:​16-18) Sɛ hɛn akoma tɔ hɛn yamu so a, mpɛn pii no, ɔma yetum susu ndzɛmba ho yie na yesisi gyinae pa. Ebɛnadze na yebotum ayɛ? Sɛ dadwen hyɛ wo do a, hwehwɛ mboa fi Jehovah hɔ. Ibesi dɛn ayɛ dɛm? Bɔ mpaa kesi dɛ ebɛtse nka dɛ enya Nyankopɔn n’asomdwee. (Luke 11:9; 1 Thess. 5:17) Sɛ irihyia ɔhaw a, kɔ do bɔ mpaa na ibenya Jehovah n’asomdwee, na ɔbɔbɔ w’akoma na w’adwen ho ban.—Rom. 12:12. w24.01 21 ¶5-6

Mbrɛ ɔbɛyɛ a Jesus bɛtsew n’Egya ne dzin ho ntsi, omiaa n’enyi gyinaa ayakayakadze a wɔdze yɛɛ no, ahorba a wɔhyehyɛɛ no nye atorsɛm a wɔkaa faa no ho no nyina ano. Nna onyim dɛ oetsie n’Egya wɔ adze nyina mu, ntsi ɔmmfa ho enyiwudze a wɔdze yɛɛ no nyina ekyir no, n’enyi annto. (Heb. 12:2) Afei so, nna onyim dɛ Satan nankasa na ɔdze ɔhaw a ɔtse dɛm reba no do wɔ mber a no mu yɛ dzen ma no no mu. (Luke 22:​2-4; 23:​33, 34) Nna dza Satan pɛ ara nye dɛ ɔbɛma Jesus egyaa dɛ obedzi Jehovah nokwar. Dza Jesus yɛe no maa Satan n’enyi too pɔtɔɔ. Ɔmaa ɔdaa edzi pefee dɛ Satan yɛ ɔtorfo a no ho yɛ hu. Afei so, ɔmaa ɔdaa edzi dɛ Jehovah wɔ nokwar asomfo a sɛ wohyia ɔhaw a no mu yɛ dzen dɛ dɛn ara mpo a, wɔbɔkɔ do edzi no nokwar! Epɛ dɛ ema Jesus a ɔyɛ hɛn Hen no n’enyi gye anaa? Sɛ dɛm a, nna ɔno kɔ do yi Jehovah ne dzin no ayɛw na boa afofor ma wonhu mbrɛ hɛn Nyankopɔn no si tse ankasa. Sɛ eyɛ dɛm a, ɔkyerɛ dɛ iridzi Jesus n’anamɔn kyir. (1 Pet. 2:21) Dɛ mbrɛ Jesus yɛe no, ɔwo so ebɛma Jehovah n’enyi agye na ama wɔada edzi dɛ ne tamfo Satan yɛ ɔtorfo dabrabanyi! w24.02 11-12 ¶11-13

Mfe enum a abɛsen kɔ no, nyimpa bɔbor ɔpepem kor na wonumaa hɔn ma wɔbɛyɛɛ Jehovah Adasefo. Sɛ ihyira woho do ma Jehovah a, nna esi gyinae dɛ ebɛyɛ Jesus Christ no suanyi, na ebɛma Nyankopɔn n’apɛdze a ebɛyɛ no ho ehia wo paa wɔ w’asetsena mu. Sɛ ihyira woho do dɛ Christiannyi a, ɔno bɔhwehwɛ dɛ eyɛ dɛn? Jesus kaa dɛ: ‘Sɛ obi pɛ dɛ odzi m’ekyir a, ma ɔmpa noho ekyir.’ (Matt. 16:24) Greek asɛmfua a wɔkyerɛɛ ase ‘ma ɔmpa noho ekyir’ no, wobotum so akyerɛ ase dɛ “ɔnnsɛ dɛ ɔyɛ dza noara pɛ.” Iyi hwehwɛ dɛ, dɛ Jehovah no somfo a ehyira woho do ama no no, ɔsɛ dɛ etwe woho fi biribiara a Jehovah n’enyi nngye ho no ho. (2 Cor. 5:​14, 15) Ndzɛmba ahorow a ɔsɛ dɛ etwe woho fi ho no, bi nye “honam ndwuma” tse dɛ ndwamanyɛ. (Gal. 5:​19-21; 1 Cor. 6:18) Sɛ etwe woho fi ndzɛmba a ɔtsetse dɛm ho a, ɔbɛma woho akyer wo anaa? Sɛ edɔ Jehovah na egye dzi paa dɛ ne mbra bɛma woho atɔ wo a, ɔrennyɛ dzen mma wo dɛ ebɛyɛ dɛm.—Ndw. 119:97; Isa. 48:​17, 18. w24.03 2 ¶1; 3 ¶4

Jehovah dze no sunsum krɔnkrɔn no ma hɔn a ɔgye hɔn to mu no. (Matt. 12:18) Yebotum ebisa hɛnho dɛ, ‘Nyankopɔn no sunsum aba no, metum ada bi edzi wɔ m’asetsena mu anaa?’ Sesei, ihu dɛ ewɔ abotar paa kyɛn aber a ibohun Jehovah no anaa? Mbrɛ ɔtse nye dɛ, sɛ eda Nyankopɔn no sunsum aba no edzi paa a, ɔno bɛma ehu dɛ Jehovah gye wo to mu! Hɔn a Jehovah gye hɔn to mu no na ɔma wonya werdam no no do mfaso. (1 Tim. 2:​5, 6) Naaso, sɛ yɛwɔ gyedzi wɔ werdam no mu na woenuma hɛn, na yɛda ho ara tse nka dɛ Jehovah nngye hɛn nnto mu so ɛ? Kaa dɛ, ɔtɔ da a mbrɛ yesi tse nka no botum adaadaa hɛn. Naaso Jehovah dze, yebotum agye no edzi aber biara. Obu hɔn a wɔgye werdam no dzi no dɛ wɔtsen, na ɔahyɛ bɔ dɛ obehyira hɔn.—Ndw. 5:12; Rom. 3:26. w24.03 30 ¶15; 31 ¶17