Ana Inyim?
Aber a Philip twee bɛɛn Ethiopianyi ahemfie panyin no, nna tseaseanam a ɔtsena mu no tse dɛn?
BIBLE mu no, kasafua a wɔkyerɛɛ ase “tseaseanam” no botum akyerɛ ntseaseanam ahorow. (Andw. 8:28, 29, 38) Naaso, ɔbɛyɛ dɛ nna tseaseanam a Ethiopianyi no tsena mu no yɛ kɛse kakra kyɛn ntseaseanam nkakraba a wɔdze kɔ ko anaa wɔdze si akan no. Hom mma yɛnhwɛ siantsir ahorow bi ntsi a yɛreka dɛm no.
Nna Ethiopianyi no yɛ ɔman no mu panyin bi a otuu kwan tsentsen bi. Nna ɔyɛ ‘ɔbarimba otumfo a ɔyɛ Ethiopiafo ɔhembaa Candace n’ahemfie panyin a ɔhwɛ ne sikasɛm nyina do.’ (Andw. 8:27) Ndɛ, beebi a Sudan wɔ nye Egypt n’anaafo afamu nyina, nna ɔka Ethiopia man a nna ɔwɔ hɔ tsetse no ho. Ɔbɛyɛ dɛ ɔnnyɛ tseaseanam kor na ɔbarimba no tsenaa mu dze tuu kwan tsentsen a ɔtse dɛm no. Obotum aba dɛ nna ɔdze ndzɛmba bi so a obehia wɔ n’akwantu yi mu no nam. Nna ntseaseanam a nkorɔfo dze tutu akwan wɔ tsetse Christianfo hɔn aber do no mu binom wɔ nhwiir anan wɔ n’ase, na wɔdze adze so akata do. Buukuu bi a ɔkyerɛkyerɛ Asomafo Ndwuma nwoma no mu kaa dɛ: “Nna kwan wɔ ntseaseanam no mu a wobotum dze hɔn baag nye ndzɛmba afofor a wɔdze rutu kwan no esi mu. Afei so, nna hɔn a wɔtsena mu no nya beebi tsena ma hɔn ahom ka hɔnho, na ɔbɛyɛ dɛ nna wotum so dze tu kwan kɔ ekyir.” (Acts—An Exegetical Commentary)
Aber a Philip bɛɛn Ethiopianyi no, nna ɔrekenkan adze. Kyerɛwtohɔ no ka dɛ: ‘Philip tutuu mbirika kɔr ahemfie panyin no ne nkyɛn, na ɔtsee dɛ ɔrekenkan nkɔnhyɛnyi Isaiah no nwoma no dzen.’ (Andw. 8:30) Mbrɛ nna woesi ayɛ ntseaseanam a wɔdze tutu akwan no, nna onntum nntu mbirika pii. Osiandɛ nna ahemfie panyin no ne tseaseanam no rokɔ bɔkɔɔ ntsi, nna obotum akenkan adze. Afei so, nna Philip so botum etu mbirika akɔto dɛm tseaseanam yi wɔ kwan do.
Ethiopianyi no “[serɛɛ] Philip dɛ ɔmfow mbɛtsena ne nkyɛn.” (Andw. 8:31) Sɛ nna wɔdze tseaseanam bi risi akan a, nna nyimpa a ɔreka no gyina mu na ɔka tseaseanam no. Naaso, tseaseanam wɔdze tu kwan no dze, nna ɔbɛyɛ dɛ kwan wɔ mu a nna ahemfie panyin no nye Philip nyina benya beebi atsena.
Ntsi sɛ yɛdze kyerɛwtohɔ a ɔwɔ Asomafo Ndwuma tsir 8 no toto abakɔsɛm ho a, yehu dɛ tseaseanam a nna Ethiopianyi ahemfie panyin no tsena mu no yɛ kɛse kyɛn dza nna wɔdze kɔ ɔko anaa wɔdze si akan no. Ntsi ndaansa yi dɛm na yɛyɛ Ethiopianyi no ne tseaseanam no ho mfonyin.