Mbrɛ Jehovah Si Bua Hɛn Mpaabɔ

1-2. Ebɛn adwen na annhwɛ a yebenya wɔ hɛn mpaabɔ ho?

EBISA woho pɛn dɛ, ana Jehovah tsie me mpaabɔ? Sɛ dɛm a, ɔnnyɛ wankotsee na ebisa woho asɛm a ɔtse dɛm. Enuanom pii so ebisa hɔnho asɛm a ɔtse dɛmara, nkanka aber a worihyia ɔhaw a no mu yɛ dzen no. Sɛ yerihyia ɔhaw a, bi a yerunnhu mbrɛ Jehovah rubua hɛn mpaabɔ.

² Hom mma yɛnhwɛ siantsir a yebotum agye edzi dɛ Jehovah bua n’asomfo hɔn mpaabɔ. (1 John 5:15) Afei so, yebosusu dɛm nsɛmbisa ebien yi ho: Ebɛnadze ntsi na ɔtɔ da a yebotum atse nka dɛ Jehovah mmbua hɛn mpaabɔ? Ebɛn akwan na Jehovah fa do bua hɛn mpaabɔ ndɛ?

BI A JEHOVAH RUMMBUA HƐN MPAABƆ DƐ MBRƐ YƐHWƐ KWAN

3. Ebɛnadze ntsi na Jehovah pɛ dɛ yɛbɔ no mpaa?

³ Bible no ma yehu dɛ Jehovah dɔ hɛn paa na yɛsom bo ma no. (Hag. 2:7; 1 John 4:10) Ɔno ntsi na ɔama hɛn hokwan dɛ yɛmbɔ no mpaa mfa nhwehwɛ no hɔ mboa no. (1 Pet. 5:6, 7) Jehovah pɛ dɛ ɔboa hɛn ma yɛkɔ do bɛn no. Afei so, ɔpɛ dɛ ɔboa hɛn ma yegyina ɔhaw ahorow a yerihyia no ano.

4. Ebɛnadze na ɔma yehu dɛ Jehovah bua n’asomfo hɔn mpaabɔ? (Hwɛ mfonyin no so.)

⁴ Sɛ yɛkenkan Bible a, yɛtaa hu dɛ Jehovah buaa n’asomfo hɔn mpaabɔ. Ana ekaa hɔn mu bi? Kor nye Ɔhen David. David no nkwa nda nyina mu no, atamfo a hɔnho yɛ hu tuu hɔn enyi sii no do. Dɛm ntsi, nna ɔtaa bɔ Jehovah mpaa dɛ ɔmboa no. Da kor bi dze, ɔbɔɔ mpaa dɛ: ‘Tsie me mpaabɔ; Ao Jehovah, yɛ aso ma mo nkotoserɛ. Gye me do wɔ wo nokwardzi na wo tsenenee mu.’ (Ndw. 143:1) Jehovah tsiee mpaa a David bɔe no, na ɔgyee no fii n’atamfo nsamu. (1 Sam. 19:10, 18-20; 2 Sam. 5:17-25) Iyi ntsi, David dze ahotodo kaa dɛ: ‘Jehovah bɛn hɔn a wɔfrɛ no nyinara.’ Hɛn so, yebotum enya awerɛhyɛmu kor no ara bi.​—Ndw. 145:18.

5. Sɛ yɛhwɛ Jehovah n’asomfo a wɔtsenaa ase wɔ tsetse mber mu no a, aso nna aber nyina na Jehovah bua hɔn mpaabɔ dɛ mbrɛ wɔhwɛ kwan no? Ma ho nhwɛdo. (Hwɛ mfonyin no so.)

⁵ Sɛ yɛbɔ mpaa a, obotum aba dɛ Jehovah rummbua no dɛ mbrɛ yɛhwɛ kwan no. Asɛm a ɔtoo ɔsomafo Paul no ma yehu dɛ iyi yɛ nokwar. Ɔserɛɛ Nyankopɔn dɛ onyi no “honam mu nsoɛ” no mfi hɔ mma no. Paul bɔɔ dɛm ɔhaw pɔtsee yi ho mpaa mpɛn ebiasa. Ana Jehovah buaa Paul ne mpaabɔ no? Nyew! Naaso, nnyɛ mbuae a nna Paul rohwɛ kwan no na Jehovah dze maa no. Jehovah ennyi ne haw no emmfi hɔ, mbom ɔmaa no ahoɔdzen ma ɔkɔr do dze nokwardzi soom no.​—2 Cor. 12:7-10.

6. Ɔtɔ da a, ebɛnadze ntsi na bi a yɛbɛtse nka dɛ Jehovah mmbua hɛn mpaabɔ?

⁶ Hɛn so, sɛ yɛbɔ mpaa a, bi a ɔnnyɛ aber nyina na hɛn nsa bɛka mbuae a yɛrohwehwɛ no. Naaso, ɔsɛ dɛ yenya awerɛhyɛmu dɛ Jehovah na onyim dza oye ma hɛn. Obotum ayɛ dza yebisa anaa yɛdwen ho no ma wɔabor do koraa. (Eph. 3:20) Ne dɛm ntsi, obotum ebua hɛn mpaabɔ wɔ ber a yɛnnhwɛ kwan anaa wɔ kwan bi a hɛn enyi nnda do.

7. Ebɛnadze ntsi na bi a no ho behia dɛ yɛsesa dza yɛbɔ ho mpaa no? Ma ho nhwɛdo.

⁷ Ɔtɔ da a, bi a no ho behia dɛ yɛsesa dza yɛbɔ ho mpaa no aber a yeehu dza Jehovah pɛ dɛ yɛyɛ ankasa no. Ɔwodze ma yɛmfa Onua Martin Poetzinger n’asɛm no dɛ nhwɛdo. Aber a ɔwaree no, wɔannkyɛr koraa na wɔdze no kɔtoo efiadze wɔ Nazi ndaduadan mu. Ahyɛse no dze, nna ne mpaabɔ ara nye dɛ wobeyi no efi efiadze hɔ na ɔakɔhwɛ ne yer, na ɔakɔtoa asɛnka edwuma no do. Naaso, ndaawɔtwe ebien ekyir no, oennhu biribiara a ɔkyerɛ dɛ Jehovah pɛ dɛ ofi hɔ. Dɛm ntsi, ɔbɔɔ mpaa dɛ: “Jehovah meserɛ wo, ma munhu dza epɛ dɛ meyɛ.” Afei, ɔhyɛɛ ase dwendween ɔhaw a enuanom a ɔnye hɔn wɔ efiadze hɔ no refa mu no ho. Nna enuanom a wɔwɔ hɔ no mu pii so rodwen hɔn yernom na hɔn mba ho. Afei Onua Poetzinger bɔɔ mpaa dɛ: “Jehovah meda wo ase paa dɛ ama mehu edwuma fofor a edze ahyɛ me nsa no. Meserɛ wo boa me ma muntum nhyɛ mo nuanom hɔn gyedzi dzen.” Jehovah tsiee ne mpaabɔ no, na mfe akron a ɔdze daa efiadze no, otumii hyɛɛ no nuanom hɔn gyedzi dzen!

8. Sɛ yɛrobɔ mpaa a, ebɛnadze paa na ɔsɛ dɛ yɛma ɔtsena hɛn adwen mu?

⁸ Ɔnnsɛ dɛ yɛma hɛn werɛ fir dɛ Jehovah wɔ adwen bi ma adasamba, na ɔbɛma dɛm adwen no aba mu wɔ ber a nankasa ɔahyɛ mu. Jehovah abɔ ne tsirmu dɛ obeyi ɔhaw ahorow tse dɛ atoyerɛnkyɛm, yarba, owu nye biribiara a ɔhaw adasamba no efi hɔ korakora. Jehovah nam n’Ahendzi no do na ɔbɛma iyinom nyina aba mu. (Dan. 2:44; Nyi. 21:3, 4) Naaso, seseiara dze, Jehovah ama kwan ma Satan ridzi wiadze yi do tum kesi dɛ ne ber a ɔahyɛ no bɔso.b (John 12:31; Nyi. 12:9) Iyi ntsi, sɛ Jehovah yi ɔhaw a adasamba rihyia no fi hɔ seseiara a, ɔbɛyɛ tse dɛ mbrɛ ndzɛmba rokɔ yie wɔ Satan no tumdzi ase. Naaso aber a yɛrotweɔn dɛ Jehovah no bɔhyɛ ahorow bɛba mu no, onngyaa hɛn kwa, mbom ɔboa hɛn. Hom mma yɛnhwɛ ndzɛmba a Jehovah yɛ dze boa hɛn no bi.

AKWAN A JEHOVAH FA DO BUA HƐN MPAABƆ

9. Ebɛnadze na Jehovah yɛ dze boa hɛn aber a no ho ebehia dɛ yesisi gyinae no? Fa mfatoho kyerɛkyerɛ mu.

⁹ Jehovah ma hɛn nyansa. Jehovah ahyɛ hɛn bɔ dɛ ɔbɛma hɛn nyansa a yehia no ama yeetum esisi gyinae pa. Yehia Nyankopɔn no hɔ nyansa paa, nkanka aber a yerisisi gyinae a ɔbɛsesa hɛn asetsena no. Dɛm gyinae no bi nye dɛ yɛbɔwar anaa yɛronnwar. (Jas. 1:5) Ɔwodze, ma yensusu hɛn akyerɛbaa bi a ɔnnwaree a wɔfrɛ no Maria ho nhwɛ.c Nna ɔdze enyigye rosom dɛ daa kwampaafo na ohyiaa onua bi. Maria kaa dɛ: “Aber a hɛn anyɛnkofa no mu reyɛ dzen no, nna ɔdɔ a yɛwɔ ma hɛnho no so mu reyɛ dzen. Mubohun dɛ ɔsɛ dɛ misi asɛm no ho gyinae. Ntsi, mobɔɔ ho mpaa mpɛn pii. Nna mihia Jehovah n’akwankyerɛ, naaso nna minyim paa dɛ Jehovah rinnsi gyinae no mma me.” Maria bohun dɛ Jehovah ebua mpaa a ɔbɔe dze serɛɛ no hɔ nyansa no. Ebɛn kwan do? Ɔyɛɛ nhwehwɛmu wɔ asafo nwoma ahorow mu, na iyi boaa no ma onyaa nsɛm pɔtsee bi a ɔfa n’asɛm no ho. Afei so, ɔdze afotu pa a ne maame dze maa no no yɛɛ edwuma. Dɛm afotu no boaa Maria ma ɔyɛɛ noho mu nhwehwɛmu. Ewiei koraa no, Maria tumii sii gyinae pa.

10. Dɛ mbrɛ Philippifo 4:13 ma yehu no, ebɛnadze na Jehovah yɛ dze boa n’asomfo? Ma ho nhwɛdo. (Hwɛ mfonyin no so.)

¹⁰ Jehovah ma hɛn ahoɔdzen ma yɛdze gyina ɔhaw ano. Jehovah bɛma hɛn ahoɔdzen a yehia no ama yeetum egyina ɔhaw ahorow a yehyia no ano dɛ mbrɛ ɔyɛe boaa Paul no. (Kenkan Philippifo 4:13.) Ma yɛnhwɛ dza Jehovah yɛe dze boaa onua bi a wɔfrɛ no Benjamin ma otumii gyinaa ɔhaw ahorow bi a no mu yɛ dzen ano. Benjamin na n’awofo nye no nuanom baanan dze mfe pii tsenaa etukɔfo asoɛe ahorow bi mu wɔ Africa. Ɔkaa dɛ: “Da biara, nna mobɔ mpaa ka kyerɛ Jehovah dɛ, ɔnhyɛ me dzen ma monkɔ do nyɛ dza ɔpɛ. Jehovah tsiee me mpaabɔ no na ɔmaa m’asomu dwee me. Afei so, ɔmaa me akokodur ma mokɔr do dze kaa asɛmpa no. Ɔnnyɛ ɔno nko, ɔmaa me nsa kaa asafo nwoma ahorow mbrɛ ɔbɛyɛ a mobɔkɔ do ara abɛn no.” Ɔtoaa do dɛ: “Aber a mekenkaan enuanom hɔn asetsena mu nsɛm no, muhun mbrɛ Jehovah boaa hɔn ma wogyinaa hɔn haw ano. Na iyi maa misii mo bo dɛ mobɔkɔ do edzi Jehovah nokwar.”

11-12. Ebɛn kwan do na Jehovah botum afa hɛn nuanom do ebua hɛn mpaabɔ? (Hwɛ mfonyin no so.)

¹¹ Jehovah fa hɛn nuanom a yɛnye hɔn som no do boa hɛn. Anafua a adze rebɛkye ma Jesus dze no nkwa abɔ afɔr ama hɛn no, ɔbɔɔ mpaa dzendzenndzen. Ɔserɛɛ Jehovah dɛ, sɛ ɔbɛyɛ yie a mma ɔmma wonngu n’enyim ase dɛ obi a ɔabɔ mbusu. Naaso Jehovah annyɛ dɛm, mbom ɔsomaa ɔbɔfo bi ma ɔkɛhyɛɛ no dzen. (Luke 22:42, 43) Hɛn so, Jehovah botum ama onua bi afrɛ hɛn wɔ fon do anaa ɔabɛsera hɛn na ɔahyɛ hɛn nkuran. Hɛn nyina botum ahwehwɛ hokwan dze aka “asɛmpa” bi dze ahyɛ hɛn nua bi nkuran.​—Mbɛ. 12:25.

¹² Hom mma yensusu akyerɛbaa bi a wɔfrɛ no Miriam ho nhwɛ. No kun wui, na adapɛn kakraabi ekyir no, ɔkaa nankotsee wɔ fie. Iyi maa ɔtsee nka dɛ n’enyidado asa na adwendwen so hyɛɛ no do. Osuu araa ma nna ɔyɛ noho hwee a ɔnnyɛ yie, ntsi nna ohia obi a ɔbɛka n’akoma mu nsɛm akyerɛ no. Ɔkaa dɛ: “Nna minnyi ahom mpo a medze bɛfrɛ obiara, ntsi dza meyɛɛ ara nye dɛ mobɔɔ Jehovah mpaa. Mugu do dze enyinsuwa robɔ mpaa no, minyaa kɔɔl. Nna ɔyɛ asafo mu panyin bi a ɔyɛ hɛn nyɛnko na ɔrefrɛ me.” Asafo mu panyin no nye ne yer kyekyee Miriam no werɛ paa. Hɛn akyerɛbaa yi gye dzi paa dɛ Jehovah na ɔmaa onua no frɛɛ no.

13. Ma nhwɛdo a ɔkyerɛ dɛ Jehovah botum afa hɔn a wɔnnsom no no do ebua hɛn mpaabɔ.

¹³ Jehovah botum afa hɔn a wɔnnsom no no do ebua hɛn mpaabɔ. (Mbɛ. 21:1) Ɔtɔ da a, kwan a Jehovah fa do bua n’asomfo hɔn mpaabɔ nye dɛ, ɔka hɔn a wɔnnsom no no hɔn akoma ma wɔboa hɔn. Dɛ nhwɛdo no, aber a noho behiae dɛ Nehemiah kɔboa ma wɔkyekyer Jerusalem kurow no bio no, Jehovah kaa Ɔhen Artaxerxes n’akoma ma ɔmaa Nehemiah kwan ma ɔkɔree. (Neh. 2:3-6) Dɛmara na ndɛ so, sɛ yehia mboa bi a, Jehovah botum aka hɔn a wɔnnsom no no hɔn akoma ma wɔaaboa hɛn.

14. Ebɛn kwan do na Soo Hing n’asɛm no hyɛ wo nkuran? (Hwɛ mfonyin no so.)

¹⁴ Akyerɛbaa bi a wɔfrɛ no Soo Hing hun dɛ Jehovah nam no dɔkta do ebua ne mpaabɔ. Nna ne babanyin wɔ adwen mu yarba ahorow bi. Ber bi, abofra no fi sor bɔhwee famu ma opiraa paa. Ɔbaa no dɛm no, nna ɔsɛ dɛ Soo Hing na no kun gyaa hɔn edwuma na wɔbɛtsena fie hwɛ no. Iyi maa hɔn sikasɛm yɛɛ basaa. Soo Hing kaa dɛ, ɔtsee nka dɛ ɔhaw no atwe no mu araa ma woesi. Ɔkaa ɔhaw a ɔrefa mu no nyinara ho asɛm kyerɛɛ Jehovah, na ɔserɛɛ no dɛ ɔmboa no. Dɔkta no gyee too noho do dɛ ɔbɛyɛ dza obotum biara dze aboa hɔn. Ɔboaa hɔn ma wonyaa mboa fii aban no hɔ, na wonyaa beebi a dan no bo nnyɛ dzen kɛtsenae. Ɔno ekyir no, Soo Hing kaa dɛ: “Yehun dɛ Jehovah roboa hɛn paa. Ɔyɛ ampa dɛ ‘otsie mpaabɔ.’”​—Ndw. 65:2.

SƐ YEBOTUM EHU MBRƐ JEHOVAH ESI EBUA HƐN MPAABƆ NA YAAGYE ATO MU A, YEHIA GYEDZI

15. Ebɛnadze na akyerɛbaa bi yɛe a ɔmaa ohun dɛ Jehovah tsie ne mpaabɔ?

¹⁵ Ɔnntaa nnsi dɛ Jehovah bɛfa anwanwa kwan bi do ebua hɛn mpaabɔ. Naaso aber biara, dza Jehovah yɛ wɔ hɛn mpaabɔ ho no, ebɔhwɛ no nna ɔno ara na yehia ama yeetum edzi no nokwar. Dɛm ntsi, ɔyɛ a fa w’enyi to famu na hwɛ mbrɛ Jehovah si bua wo mpaabɔ atse. Ma yɛnhwɛ dza osii wɔ akyerɛbaa bi a wɔfrɛ no Yoko n’afamu. Nna ɔyɛ no dɛ Jehovah nntsie ne mpaabɔ, naaso ekyir yi ɔhyɛɛ ase kyerɛɛw ndzɛmba a ɔbɔ ho mpaa no guu no buukuu bi mu. Mber bi ekyir no, ɔhwɛɛ no buukuu no mu, na ohun dɛ Jehovah ebua ne mpaabɔ no mu pii. Bi wɔ hɔ a nna noara mpo ɔnnkaa. No ho hia dɛ yɛtaa gye ber na yɛdwendwen ndzɛmba a Jehovah ayɛ ama hɛn dze akyerɛ dɛ otsie hɛn mpaabɔ no ho.​—Ndw. 66:19, 20.

16. Sɛ yɛbɔ mpaa a, ebɛnadze na yebotum ayɛ dze akyerɛ dɛ yɛwɔ gyedzi? (Hebrewfo 11:6)

¹⁶ Sɛ yɛbɔ mpaa a, yɛkyerɛ dɛ yɛwɔ gyedzi. Naaso ɔnnyɛ ɔno nko, adze fofor so a yɛyɛ dze kyerɛ dɛ yɛwɔ gyedzi nye dɛ, yɛbɛgye kwan biara a Jehovah bɛfa do ebua hɛn mpaabɔ no ato mu. (Kenkan Hebrewfo 11:6.) Ɔwodze, ma yensusu dza Mike nye ne yer Chrissy yɛe no ho nhwɛ. Nna dza osi hɔn enyi do ara nye dɛ wɔbɔkɔ akɔsom wɔ Bethel. Mike kaa dɛ: “Menye me yer hyehyɛɛ Bethel fɔɔm mpɛn pii, na yɛkɔr do kaa ho asɛm kyerɛɛ Jehovah, naaso wɔammfrɛ hɛn da.” Nna dɛm awarfo yi gye dzi paa dɛ Jehovah na onyim kwan a ɔfata a ɔdze hɔn bedzi dwuma wɔ no som mu. Wɔkɔr do yɛɛ dza wobotum biara wɔ Jehovah no som mu. Wɔsoom dɛ daa akwampaafo wɔ beebi a mboa ho hia na wɔboae ma wosisii asafo adan ahorow so. Seseiara a yɛrekasa yi, wɔrosom wɔ ɔmansin edwuma no mu. Mike toaa do dɛ: “Ɔnnyɛ aber nyina na Jehovah bua hɛn mpaabɔ dɛ mbrɛ yɛhwɛ kwan no. Naaso, yeehu dɛ mbrɛ ɔtse biara no obua, na ɔyɛ no wɔ kwan a ɔbor hɛn adwen na hɛn ntseasee do.”

17-18. Dɛ mbrɛ Ndwom 86:6, 7 ma yehu no, ebɛn awerɛhyɛmu na yebotum enya?

¹⁷ Kenkan Ndwom 86:6, 7. Nna ɔdwontofo David gye dzi paa dɛ Jehovah tsie ne mpaabɔ na ɔyɛ n’ebisadze so ma no. Woara so botum enya awerɛhyɛmu kor no ara bi. Nhwɛdo ahorow a yeesusu ho wɔ adzesua yi mu no ma yenya awerɛhyɛmu dɛ, Jehovah bɛma hɛn nyansa nye ahoɔdzen ma yɛdze egyina ɔhaw a yehyia no ano. Obotum afa hɛn nuanom a yɛnye hɔn som anaa hɔn a sesei wɔnnsom no no mpo do aboa hɛn wɔ kwan bi do.

¹⁸ Ɔwɔ mu, ɔnnyɛ aber nyina na Jehovah bua hɛn mpaabɔ dɛ mbrɛ yɛhwɛ kwan, naaso yenyim dɛ mbrɛ ɔtse biara obobua. Ɔbɛma hɛn nsa aka dza yehia no, na ɔbɛyɛ dɛm wɔ ber a ɔsɛ fata mu. Dɛm ntsi, kɔ do fa gyedzi bɔ mpaa na nya awerɛhyɛmu dɛ Jehovah bɛma wo nsa aka dza ihia no. Afei so, nya awerɛhyɛmu dɛ ‘ɔbɛma atseasefo nyina enya’ dza wɔpɛ wɔ wiadze fofor no mu.​—Ndw. 145:16.