‘Hom Nyi Nyia Hom Bɔsom No’

1. Sɛ hɛn enyi bɛgye ankasa a, ebɛnadze na ɔsɛ dɛ yɛyɛ, na ebɛnadze ntsi a? (Isaiah 48:​17, 18)

HƐN sor Egya no dɔ hɛn papaapa, na ɔpɛ dɛ hɛn enyi gye afebɔɔ. (Ɔsɛnk. 3:​12, 13) Jehovah bɔɔ hɛn no ɔmaa hɛn adomakyɛdze ahorow bi, naaso ɔammbɔ hɛn dɛ hɛnankasa ndzi hɛnho do anaa hɛnankasa nkyerɛ dza yesusu dɛ ɔyɛ papa anaa bɔn. (Ɔsɛnk. 8:9; Jer. 10:23) Jehovah nyim dɛ sɛ hɛn enyi bɛgye ankasa a, ɔsɛ dɛ yɛsom no na yɛdze n’Asɛm bɔ hɛn bra.—Kenkan Isaiah 48:​17, 18.

2. Ebɛn adwen na Satan pɛ dɛ yenya, na ebɛnadze na Jehovah ayɛ afa sombo a Satan abɔ no ho?

² Satan pɛ dɛ yenya adwen dɛ nyimpa ankasa botum edzi hɔnho do ma hɔn enyi aagye, na wonnhia Jehovah no mboa biara. (Gen. 3:​4, 5) Mbrɛ ɔbɛyɛ a obiara bohu nokwar a ɔwɔ asɛm yi mu no, Jehovah ama kwan dɛ nyimpa ankasa ndzi hɔnho do nkesi mber bi. Ebɛnadze na woefi iyi mu aba? Awerɛhosɛm nye dɛ, mbofra nkakraba mpo nyim dɛ ndzɛmba nnkɔ yie koraa. Naaso, Kyerɛwnsɛm no ma yehu dɛ mbarimba na mbaa pii a wɔsoom Jehovah no enyi gyee wɔ hɔn asetsena mu. Naaso enyigye a Jesus Christ nyae no dze, ɔkyɛn hɔndze no. Hom mma yendzi kan nhwɛ siantsir a Jesus sii gyinae dɛ ɔbɔsom Jehovah. Yewie a, yɛbɔhwɛ siantsir a ɔfata dɛ yɛsom hɛn sor Egya no. Afei dza otwa tun no, siantsir a yeesi gyinae dɛ yɛbɔsom Jehovah no, yebosusu no mu bi ho.

SIANTSIR A JESUS SII GYINAE DƐ ƆBƆSOM JEHOVAH

3. Ebɛnadze na Satan kaa kyerɛɛ Jesus dɛ ɔnyɛ, naaso ebɛnadze na Jesus yɛe?

³ Aber a nna Jesus wɔ asaase do no, nna ɔsɛ dɛ osi gyinae dɛ ɔbɔsom Jehovah anaadɛ ɔronnsom no. Wonumaa Jesus no, wɔannkyɛr biara na Satan dze ahendzi a ɔwɔ wiadze nyina kyerɛɛ no, na ɔkaa kyerɛɛ no dɛ sɛ ɔbɔ no mu adze kor pɛ mpo som no a, ɔdze ne nyina bɛma no. Naaso Jesus kaa kyerɛɛ no dɛ: “Fi mo do kɔ, Satan! Na wɔakyerɛw dɛ: ‘Jehovah wo Nyankopɔn na ɔwɔ dɛ ekotow no, na ɔno nkotsee na ɔwɔ dɛ esom no.’” (Matt. 4:​8-10) Ebɛnadze ntsi na Jesus annkotow Satan? Hom mma yensusu siantsir a ɔannyɛ dɛm no mu bi ho.

4-5. Siantsir a Jesus sii gyinae dɛ ɔbɔsom Jehovah no, bi nye dɛn?

⁴ Adze tsitsir a ɔmaa Jesus sii gyinae dɛ ɔbɔsom Jehovah nye dɛ, nna ɔdɔ no. Nna Jesus dɔ n’Egya paa, na nna mframa mpo mmfa hɔn ntamu. (John 14:31) Afei so, nna Jesus nyim dɛ Jehovah nkotsee na ɔfata dɛ ɔsom no. (John 8:​28, 29; Nyi. 4:11) Bio so, nna onyim dɛ Jehovah nye Nkwamafo, ne yamu ye, na obotum dze noho aato no do. (Ndw. 33:4; 36:9; Jas. 1:17) Jehovah anndaadaa Jesus da, na dza nna Jesus wɔ biara so, Jehovah na ɔdze maa no. (John 1:14) Naaso Satan dze, ɔnntse dɛ Jehovah koraa. Ɔno na ɔakɛfa owu abrɛ adasamba. Satan nnka nokwar, n’enyi ber adze na nankotsee noho so na ɔdwen. (John 8:44) Nna Jesus nyim Jehovah na Satan nyina yie, ntsi ɔannda annso ho daa da dɛ obosuasua Satan na ɔaayɛ Jehovah do asoɔdzen.—Phil. 2:​5-8.

⁵ Siantsir fofor so ntsi a Jesus sii gyinae dɛ ɔbɔsom Jehovah nye dɛ, nna onyim dɛ sɛ ɔdze nokwardzi som Jehovah a, ndzɛmba pa pii befi mu aba. (Heb. 12:2) Nna onyim dɛ sɛ odzi nokwar kesi ase a, ɔbɛtsew n’Egya ne dzin no ho na ɔbɛma ɔhaw na amandzehu a Abɔnsam akɛfa aba no nyina efi hɔ.

SIANTSIR A ƆFATA DƐ YƐSOM JEHOVAH

6-7. Ndɛ, ebɛnadze ntsi na nkorɔfo pii nnsom Jehovah, naaso ebɛnadze ntsi na ɔfata dɛ yɛsom no?

⁶ Ndɛ, nkorɔfo pii nnsom Jehovah, osiandɛ wonnyim dɛ ɔwɔ suban ahorow a ɔyɛ fɛw. Afei so, wonnyim ndzɛmba pa a ɔayɛ ama hɔn. Wɔtse dɛ nkorɔfo a ɔsomafo Paul kaa asɛmpa no kyerɛɛ hɔn wɔ Athens no.—Andw. 17:​19, 20, 30, 34.

⁷ Paul maa nkorɔfo no hun dɛ, Nyankopɔn na “ɔma nyimpa nyina nkwa na ahom nye ndzɛmba nyinara.” Ɔtoaa n’asɛm no do dɛ: “Ɔno ntsi na yɛwɔ nkwa na yɛkeka hɛnho na yɛwɔ hɔ.” Nyankopɔn na ɔbɔɔ adze nyina, na ɔno na ɔmaa “nyimpa a wɔwɔ aman ahorow nyina mu fii nyimpa kor mu bae,” ntsi ɔno nkotsee na ɔwɔ dɛ yɛsom no.—Andw. 17:​25, 26, 28.

8. Ebɛnadze na Jehovah rennyɛ da? Kyerɛkyerɛ mu.

⁸ Jehovah nye Ɔbɔadze na ɔnoara so nye amansan Hen, ntsi nkyɛ obotum ahyɛ hɛn dɛ yɛnsom no. Naaso, Jehovah rennyɛ dɛm da. Mbom ɔama hɛn adanse pii a ɔma yehu dɛ ɔwɔ hɔ na ɔdɔ hɛn paa. Ne yamu a nkyɛ nkorɔfo pii bɛfa no nyɛnko afebɔɔ. (1 Tim. 2:​3, 4) Dɛm ntsi Jehovah tsetse hɛn mbrɛ ɔbɛyɛ a yebotum akyerɛkyerɛ nkorɔfo ma woeehu ndzɛmba pa a ɔabɔ ne tsirmu dɛ ɔbɛyɛ ama adasamba no. (Matt. 10:​11-13; 28:​19, 20) Ɔama yɛrosom no wɔ asafo ahorow mu na ɔama yeenya ahwɛfo so a wɔdɔ hɛn na wɔdwen hɛnho.—Andw. 20:28.

9. Ebɛnadze na ɔma yehu dɛ Jehovah dɔ obiara?

⁹ Binom wɔ hɔ a, wɔnngye nndzi dɛ Jehovah wɔ hɔ, naaso mbrɛ Jehovah nye dɛm nkorɔfo no dzi no mpo ma yehu dɛ ɔdɔ hɔn. Ɔwodze susu iyi ho hwɛ: Ofi tsetse na nyimpa ɔpepepem pii abɔ hɔn bra dɛ mbrɛ hɔnankasa wɔpɛ. Naaso Jehovah fi n’akoma mu dze ndzɛmba a ɔbɛma wɔakɔ do atsena nkwa mu na hɔn enyi agye no ma hɔn. (Matt. 5:​44, 45; Andw. 14:​16, 17) Jehovah ama woenya anyɛnkofo na ebusuafo a wɔdɔ hɔn. Afei so, ɔma wotum wo mba na ɔma wonya mfaso fi edwumadzen a wɔyɛ no mu. (Ndw. 127:3; Ɔsɛnk. 2:24) Iyi ma ɔda edzi pefee dɛ hɛn sor Egya no dɔ obiara. (Ex. 34:6) Afei, siantsir a yeesi gyinae dɛ yɛbɔsom Jehovah no, hom mma yensusu no mu bi ho. Yewie a, yɛbɔhwɛ nhyira ahorow a Jehovah ma yenya osiandɛ yɛsom no ntsi.

SIANTSIR A YEESI GYINAE DƐ YƐBƆSOM JEHOVAH

10. (a) Ebɛnadze paa na okenyan hɛn ma yɛsom Jehovah? (Matthew 22:37) (b) Ebɛn kwan do na Jehovah enya wo ho abotar? (Ndwom 103:​13, 14)

¹⁰ Jesus dɔ Jehovah paa, ntsi na ɔsom no no. Hɛn so, adze tsitsir ntsi a yɛsom Jehovah nye dɛ yɛdɔ no paa. (Kenkan Matthew 22:37.) Sɛ yesua Jehovah no suban ahorow no ho adze a, ɔma yɛtwe bɛn no. Dɛ mfatoho no, Jehovah wɔ hɛn ho abotar paa. Aber a Israelfo no yɛɛ no do asoɔdzen no, ɔkaa kyerɛɛ hɔn dɛ: “Hom mu biara nsan mfi no mbusu kwan ho.” (Jer. 18:11) Jehovah nyim dɛ bɔn wɔ hɛnho, na ɔkaa dɛ yɛyɛ huntuma. (Kenkan Ndwom 103:​13, 14.) Sɛ yɛdwendwen Jehovah n’abotar nye no suban ahorow a ɔyɛ fɛw no ho a, ɔma hɛn enyi gye ho dɛ yɛbɔsom no afebɔɔ.

11. Siantsir a yeesi gyinae dɛ yɛbɔsom hɛn sor Egya no, bi so nye dɛn?

¹¹ Siantsir fofor so ntsi a yɛsom Jehovah nye dɛ, yɛgye to mu dɛ nankotsee na ɔfata dɛ yɛsom no. (Matt. 4:10) Afei so, yenyim dɛ sɛ yɛdze nokwardzi som no a, ndzɛmba pa pii befi mu aba. Sɛ yedzi Jehovah nokwar a, ɔtsew ne dzin no ho, ɔma obiara hu dɛ Abɔnsam yɛ ɔtorfo na yɛma hɛn sor Egya no enyi gye. Bio so, sɛ yɛsom Jehovah ndɛ a, yebenya hokwan asom no afebɔɔ!—John 17:3.

12-13. Ebɛnadze na yesua fi Jane na Pam hɔn asɛm no mu?

¹² Sɛ yɛyɛ mbofra mpo a, yebotum ama Jehovah ehu dɛ yɛdɔ no paa. Sɛ yɛyɛ dɛm a, yerinyin nyina no nna ɔdɔ a yɛwɔ ma Jehovah no so reyɛ kɛse. Hom mma yensusu Jane na n’ekyirba Pam hɔn asɛm no ho.a Aber a Jane dzii mfe 11 na Pam so dzii mfe 10 no, wɔhyɛɛ ase suaa Bible no. Nna hɔn awofo enyi nngye ho dɛ wobosua Bible no, naaso wɔkaa dɛ sɛ Jane na Pam nye hɔn kɔ asɔr nkotsee dze a, wɔbɛma wɔnye Adasefo no esua adze. Jane kaa dɛ: “Nna m’etsipɛmfo hyɛ me dɛ monnom ndubɔn na mombɔ edwaman. Naaso mannkasa hɔn ho, osiandɛ Adasefo no boaa me ma muhun dɛ Bible no kasa tsia ndzeyɛɛ a ɔtse dɛm.”

¹³ Mfe kakraabi ekyir no, Jane na Pam bɛyɛɛ adawurbɔfo. Ekyir yi, wɔbɛyɛɛ daa kwampaafo aber mpo a nna wɔrohwɛ hɔn awofo a hɔn mfe akɔ enyim no. Aber a nna Jane reka dza Jehovah ayɛ ama hɔn no ho asɛm no, ɔkaa dɛ: “Mebohu dɛ Jehovah yɛ ɔnokwafo a ɔhwɛ n’anyɛnkofo, na asɛm so a ɔwɔ 2 Timothy 2:19 no yɛ nokwar. Hɔ ka dɛ, ‘Jehovah nyim hɔn a wɔyɛ nedze.’” Ɔda edzi pefee dɛ Jehovah hwɛ hɔn a wɔdɔ no na wɔsom no no!

14. Yesi dɛn dze hɛn kasaa na hɛn ndzeyɛɛ tsew Jehovah ne dzin ho? (Ibotum ahwɛ mfonyin ahorow no so.)

¹⁴ Yɛpɛ dɛ yɛboa ma Jehovah ne dzin ho tsew. Ɔwodze ma yɛnyɛ dɛm mfatoho yi: Fa no dɛ ewɔ nyɛnko berɛbo bi a ne yamu ye na ɔdze bɔn kyɛ. Naaso ewɔ hɔ ara na etsee dɛ obi rekeka akyerɛ nkorɔfo dɛ wo nyɛnko no ne tsirmu yɛ dzen na onndzi nokwar. Ebɛyɛ dɛn? Ekyingye biara nnyi ho dɛ ebɛma obiara ehu dɛ dza ɔrekeka fa wo nyɛnko no ho no nnyɛ nokwar. Dɛmara na hɛn so, nsɛm a Satan na n’ekyirdzifo no ka dze sɛɛ Jehovah ne dzin no, yɛyɛ dza yebotum biara ma nkorɔfo hu dɛ ɔnnyɛ nokwar. (Ndw. 34:1; Isa. 43:10) Yɛdze hɛn kasaa na hɛn ndzeyɛɛ kyerɛ dɛ yɛpɛ dɛ yefi hɛn akoma nyinara mu som Jehovah.

15. Ebɛn nhyira na ɔsomafo Paul nyae aber a ɔsoom Jehovah no? (Philippifo 3:​7, 8)

¹⁵ Yɛayɛ krado dɛ yɛbɛyɛ nsesa biara a ohia wɔ hɛn abrabɔ mu ama yeetum asɔ Jehovah n’enyi anaa yaayɛ pii wɔ Jehovah no som mu. Nna ɔsomafo Paul wɔ dzibew kɛse wɔ Jewsom mu. Naaso ogyaa ne nyina hɔ kedzii Christ n’ekyir na ɔsoom Jehovah. (Gal. 1:14) Dɛm ntsi n’enyi gyee wɔ n’asetsena mu na onyaa hokwan dɛ ɔnye Christ bɔbɔ mu edzi adze wɔ sor. Oennu noho da dɛ osii gyinae dɛ ɔbɔsom Jehovah. Hɛn so sɛ yɛyɛ dɛm a yerunnu hɛnho da.—Kenkan Philippifo 3:​7, 8.

16. Ebɛnadze na yesua fi Julia n’asɛm no mu? (Ibotum ahwɛ mfonyin ahorow no so.)

¹⁶ Sɛ yɛma Jehovah no som yɛ adze tsitsir wɔ hɛn asetsena mu ndɛ a, yebenya do mfaso ndɛ, na daakye so obehyira hɛn. Hom mma yensusu akyerɛbaa bi a wɔfrɛ no Julia n’asɛm no ho. Julia hyɛɛ ase dɛ ɔrotow ndwom wɔ asɔr aber a nna ɔyɛ abofra. Obi a onyim ndwontow paa hun dɛ Julia ne ndze yɛ dɛw, ntsi ɔfaa no tsetsee no mbrɛ ɔbɛyɛ a obohu ndwontow yie. Wɔannkyɛr biara na Julia gyee dzin, na ɔkɔr mbea ahorow a nna wɔagye dzin kɔtoow ndwom. Julia kɔr skuul bi a wɔagye dzin a nna wɔkyerɛ ndwom. Aber a nna ɔwɔ hɔ no, no skuulnyi bi hyɛɛ ase kaa Nyankopɔn ho asɛm kyerɛɛ no, na ɔmaa ohun dɛ Nyankopɔn ne dzin dze Jehovah. Wɔannkyɛr biara na Julia peen do dɛ wɔnye no nsua Bible no mpɛn ebien dapɛn biara. Ewiei koraa no, osii gyinae dɛ ɔremma ndwontow nnyɛ adze tsitsir wɔ n’asetsena mu, mbom ɔbɛyɛ pii wɔ Jehovah no som mu. Nna ɔnnda famu dɛ obesi gyinae a ɔtse dɛm. Ɔkaa dɛ: “Nkorɔfo pii kaa kyerɛɛ me dɛ, nyansa biara nnyi gyinae a mesi no mu. Naaso nna ɔnnyɛ hɔ na mohwɛ, osiandɛ nna mepɛ dɛ medze me mber nyina som Jehovah.” Julia sii dɛm gyinae yi bɔbor mfe 30 nye yi. Ndɛ ohu gyinae a osii no dɛn? Ɔkaa dɛ: “M’asomu adwe me, na mowɔ awerɛhyɛmu dɛ daakye Jehovah bɛyɛ dza ɔda m’akoma do nyina ama me.”—Ndw. 145:16.

KƆ DO ARA SOM JEHOVAH

17. Osiandɛ ɔrennkyɛr na dɛm wiadze bɔn yi aba n’ewiei ntsi, ebɛnadze na ɔsɛ dɛ hɔn a wɔsom Nyankopɔn nye hɔn a wonnyae mmbɔsoom no no nyina yɛ?

¹⁷ Ɔrennkyɛr koraa na dɛm wiadze bɔn yi aba n’ewiei. Ɔsomafo Paul kyerɛɛw dɛ: “Aka kakraabi dɛm na nyia ɔreba no aba, na ɔrennkyɛr.” (Heb. 10:37) Ebɛnadze na iyi ma yehu? Ɔma yehu dɛ mber a wɔaka dɛ nkorɔfo dze besi gyinae dɛ wɔbɔsom Jehovah no suar. (1 Cor. 7:29) Afei so, ɔma yehu dɛ yɛrosom Nyankopɔn ara yi dze, yebehyia ɔhaw ahorow, naaso wɔaka “kakraabi” ma dɛm ɔhaw ahorow no eefi hɔ.

18. Ebɛnadze na Jesus na Jehovah nyina pɛ dɛ yɛyɛ?

¹⁸ Jesus hyɛɛ nkorɔfo nkuran dɛ wɔmbɛyɛ n’esuafo na wɔnkɔ do ara ndzi n’ekyir. (Matt. 16:24) Sɛ yɛdze mfe pii asom Jehovah mpo a, ɔsɛ dɛ yesi hɛn bo dɛ yɛbɔkɔ do ara ayɛ dɛm. Ɔsɛ dɛ yɛyer hɛnho na yɛkɔ do ara som Jehovah. Nokwasɛm nye dɛ, iyi ne yɛ nnda famu. Naaso sɛ yemia hɛn enyi yɛ dɛm a, Jehovah behyira hɛn na hɛn enyi so bɛgye!—Ndw. 35:27.

19. Ebɛnadze na yesua fi Gene n’asɛm no mu?

¹⁹ Binom hɔn adwen yɛ hɔn dɛ Jehovah no som yɛ dzen dodow; ɔsɛ dɛ edze ndzɛmba pii bɔ afɔr. Sɛ eyɛ ɔbabun a, ɔyɛ a w’adwen yɛ wo dɛ sɛ esom Jehovah a w’enyi renngye anaa? Aberantsɛ bi a wɔfrɛ no Gene kaa dɛ: “Nna metse nka dɛ osiandɛ meyɛ Jehovah Dasefo ntsi, enyigye a wɔfrɛ no enyigye dze, mirinnya bi da. Nna ɔyɛ me dɛ m’etsipɛmfo dze hɔn enyi gye, osiandɛ wotum kɔ aponto, wotum fa boy anaa girl, na wɔbɔ video game so a ewudzisɛm wɔ mu, naaso emi dze, da biara asafo nhyiamu na asɛnka yi ara.” Adwen a Gene nyae no maa ɔyɛɛ dɛn? Ɔkaa dɛ: “Ndzɛmba bɔn a nna m’etsipɛmfo yɛ no, mehyɛɛ ase yɛɛ bi wɔ sumase. Ahyɛse no dze, m’enyi gyee, naaso ɔbra a nna morobɔ no amma mennya enyigye a nna morohwehwɛ no. Ntsi mehyɛɛ ase dwendween mfaso a ɔwɔ do dɛ medze dza Bible no ka no bɔbɔ me bra no ho, na misii gyinae dɛ mibefi m’akoma nyina mu asom Jehovah. Ofitsi dɛm aber no, muhu dɛ Jehovah tsie me mpaabɔ nyina.”

20. Ebɛnadze na ɔsɛ dɛ yesi hɛn bo dɛ yɛbɛyɛ?

²⁰ Ɔdwontofo bi toow ndwom maa Jehovah, na ɔkaa dɛ: ‘Enyigye nye nyimpa a ɔwo esan mu yi no, na ema ɔbɛn wo nkyɛn ma ɔbɛtsena w’abangua do.’ (Ndw. 65:4) Hom mma yensi hɛn bo dɛ yɛbɔkɔ do ara asom Jehovah. Sɛ yɛyɛ dɛm a, nna ɔkyerɛ dɛ yɛnye Joshua yɛ adwen wɔ asɛm bi a ɔkae ho. Ɔkaa dɛ: ‘Emi nye me fiefo dze, yɛbɔsom Jehovah.’—Josh. 24:15.