Kaa Dɛ Jehovah Yɛ “Nyankopɔn Tseasefo”

1. Ɔmmfa ho ɔhaw ahorow a Jehovah n’asomfo hyia nyina ekyir no, ebɛnadze na ɔboa hɔn ma wɔkɔ do som no?

BIBLE no ma yehu dɛ yɛtse ‘mber a no mu yɛ dzen’ mu. (2 Tim. 3:1) Ɔhaw ahorow a nkorɔfo rihyia wɔ Satan no wiadze bɔn yi mu no, Jehovah n’asomfo so hyia bi. Naaso sɛ yɛdze dɛm ɔhaw ahorow yi to nkyɛn a, wɔsan so tan hɛn enyi osiandɛ yɛsom Jehovah ntsi. Ɔmmfa ho ɔhaw ahorow a yehyia nyina ekyir no, ebɛnadze na ɔboa hɛn ma yɛkɔ do som Jehovah? Adze tsitsir a ɔboa hɛn nye dɛ, Jehovah ama yeebohu dɛ ɔyɛ “Nyankopɔn tseasefo.”—Jer. 10:10; 2 Tim. 1:12.

2. Ebɛnadze na ɔkyerɛ dɛ Jehovah yɛ Nyankopɔn tseasefo?

² Jehovah yɛ Obi a ɔwɔ hɔ ankasa. Ɔhaw biara a yɛrefa mu no, n’enyi tua na ɔayɛ krado dɛ ɔbɔboa hɛn aber nyina. (2 Mber. 16:9; Ndw. 23:4) Sɛ yɛma ɔtsena hɛn adwen mu dɛ hɛn Nyame a yɛsom no no tse ase na ɔayɛ krado dɛ ɔbɔboa hɛn aber nyina a, obotum ahyɛ hɛn dzen ma yeegyina ɔhaw biara a yebehyia no ano. Hom mma yɛnhwɛ nsɛm bi a osisii wɔ Ɔhen David n’asetsena mu a ɔma yehu dɛ dɛm asɛm yi yɛ nokwar.

3. Aber a David kaa dɛ ‘Jehovah tse ase’ no, nna ɔrepɛ akyerɛ dɛn?

³ Nna David nyim Jehovah yie ntsi ɔdze noho too no do. Mber ahorow bi a nna Ɔhen Saul na David n’atamfo binom repɛ no eku no no, David bɔɔ Jehovah mpaa na ɔserɛɛ no dɛ ɔmboa no. (Ndw. 18:6) Nyankopɔn tsiee David ne mpaabɔ no na ɔgyee no. Ekyir yi, David kaa dɛ: ‘Jehovah tse ase!’ (Ndw. 18:46) Nna David repɛ akyerɛ dɛn? Bible ho nhwehwɛmu nwoma bi ka dɛ, nna David pɛ dɛ ɔkyerɛ dɛ ɔwɔ Jehovah mu ahotodo dɛ “ɔyɛ nyame a ɔtse ase a otwitwa gye no nkorɔfo aber nyina.” Dza David faa mu wɔ n’asetsena mu no maa ohun dɛ Nyankopɔn tse ase. Iyi maa osii no bo dɛ ɔbɔkɔ do ara asom Jehovah na oeyi no ayɛw.—Ndw. 18:​28, 29, 49.

4. Sɛ yɛgye to mu dɛ Jehovah yɛ Nyankopɔn tseasefo a, ɔbɔboa hɛn dɛn?

⁴ Sɛ yɛgye to mu dɛ Jehovah yɛ Nyankopɔn tseasefo a, ɔbɔboa hɛn ma yɛdze ahokeka aasom no. Afei so, ɔbɔboa hɛn ma yeetum egyina ɔhaw ahorow a yebehyia no ano, na yaakɔ do ara ayer hɛnho wɔ no som mu. Bio so, ɔbɛma yeesi hɛn bo dɛ yɛbɔkɔ do ara abɛn Jehovah.

NYANKOPƆN TSEASEFO NO BƐHYƐ WO DZEN

5. Sɛ yehyia ɔhaw a, ebɛnadze na ɔbɔboa hɛn ma yɛdze akokodur eegyina ano? (Philippifo 4:13)

⁵ Sɛ yɛkaa dɛ Jehovah tse ase na ɔayɛ krado dɛ ɔbɔboa hɛn a, ɔbɛma yeetum egyina ɔhaw biara a yebehyia no ano. Adze yi ara, ɔhaw a yehyia no mu biara nnyi hɔ a ɔso kyɛn Nyankopɔn. Ɔyɛ adze nyina do Tumfo ntsi obotum ama hɛn ahoɔdzen ma yɛdze eegyina hɛn haw no ano. (Kenkan Philippifo 4:13.) Dɛm asɛm yi hyɛ hɛn dzen paa ma yɛdze akokodur gyina ɔhaw biara a yehyia no ano. Sɛ yehyia ɔhaw ketseketse bi mpo na yehu dɛ Jehovah roboa hɛn a, ɔma yenya awerɛhyɛmu dɛ sɛ daakye bi yehyia ɔhaw akɛse a, orinnyi hɛn baako nnhyɛ hɛn nsa da.

6. Aber a nna David yɛ aberantsɛba no, ebɛn nsɛm na osisii wɔ n’asetsena mu a ɔboaa no ma ɔdze noho too Jehovah do kɛse?

⁶ Hom mma yɛnhwɛ nsɛm bi a osisii wɔ David n’asetsena mu a ɔmaa onyaa Jehovah no mu ahotodo kɛse. Aber a nna David yɛ aberantsɛba a ɔhwɛ ne papa no nguan no, osisi bɛkyer nguan no mu kor kɔree. Da fofor bi so, gyata bɛkyer nguan no mu kor kɔree. No mu biara mu no, David dze akokodur kaa mbowa no do kɛgyee nguan no. Naaso, oennya adwen da dɛ noara n’ahoɔdzen na oetum dze ayɛ dɛm. Mbom no, nna onyim paa dɛ Jehovah na ɔmaa no ahoɔdzen ma otumii dze tsiiw mbowa no kɛgyee nguan no. (1 Sam. 17:​34-37) David amma no werɛ emmfir dɛm nsɛm yi da. Aber a ɔdwendween dza osii no ho no, ɔboaa no ma onyaa awerɛhyɛmu dɛ sɛ ohyia ɔhaw fofor bi daakye a, Nyankopɔn tseasefo no bɔboa no.

7. Adwen a David nyae aber a nna ɔnye Goliath rokɔko no boaa no dɛn?

⁷ Ekyir yi, ɔbɛyɛ dɛ aber a nna David da ho ara yɛ aberantsɛba no, ɔkɔr beebi a nna Israelfo nsordaafo no akyer hɔn nsera no. Aber a odur hɔ no, ohun dɛ nsordaafo no akoma etu osiandɛ nna Philistianyi ɔbran bi a wɔfrɛ no Goliath no ‘rutwa Israel dɔm no mpoa.’ (1 Sam. 17:​10, 11) Osiandɛ nsordaafo no dze hɔn adwen sii ɔbran no nye nsɛm a nna ɔrekeka no do ntsi, ɔmaa hɔn akoma tui. (1 Sam. 17:​24, 25) Naaso David dze, ɔnnyɛ ɔno na ɔdze n’adwen sii do. David emmbu dza nna Goliath reyɛ no dɛ oridzi Israelfo nsordaafo no ho fɛw ara kɛkɛ mbom obuu no dɛ ‘orutwa Nyankopɔn tseasefo no dɔm no mpoa.’ (1 Sam. 17:26) David dze n’adwen sii Jehovah no do. Nna ɔgye dzi dɛ Nyankopɔn a ɔboaa no aber a nna ɔyɛ guanhwɛfo no bɔboa no dɛm aber yi so. Nna ɔgye dzi paa dɛ Nyankopɔn ka noho, ntsi onyaa akokodur nye Goliath kɔkoe, na odzii no do konyim!—1 Sam. 17:​45-51.

8. Ebɛnadze na obotum aboa hɛn ma yeenya Jehovah no mu ahotodo kɛse dɛ ɔbɔboa hɛn aber a yerihyia ɔhaw no? (Hwɛ mfonyin no so.)

⁸ Sɛ hɛn so yɛkaa dɛ Nyankopɔn tseasefo no ayɛ krado dɛ ɔbɔboa hɛn a, ɔbɛma yeetum egyina ɔhaw biara a yebehyia no ano. (Ndw. 118:6) Sɛ yɛdwendwen ndzɛmba ahorow bi a Jehovah ayɛ no dada no ho a, ɔbɔboa hɛn ma yeenya no mu ahotodo kɛse. Ntsi yebotum akenkan Bible mu nsɛm bi a ɔfa mbrɛ Jehovah sii gyee n’asomfo binom no ho. (Isa. 37:​17, 33-37) Afei so, nsɛm nye video ahorow a ɔwɔ jw.org wɛbsaet no do a ɔma yehu mbrɛ Jehovah roboa hɛn nuanom a wɔwɔ hɔ ndɛ no, ibotum akenkan anaa ahwɛ bi. Bio so, ibotum akaakaa mbrɛ Jehovah esi aboa wo mber bi a abɛsen kɔ no. Sɛ Jehovah nnyɛɛ biribi a ɔyɛ nwanwa tse dɛ ɔbɛgye wo efi osisi anaa gyata bi nsamu a, mma ɔnnhaw wo. Ebɛnadze ntsi a? Osiandɛ Jehovah ayɛ ndzɛmba pii dze aboa wo wɔ w’asetsena mu! Bi mpo nye dɛ ɔaboa wo ma abɛyɛ ne nyɛnko. (John 6:44) Seseiara mpo, n’adom ntsi na eda ho ara wɔ nokwar no mu no. Ntsi serɛ Jehovah dɛ ɔmboa wo ma kaa mber bi a otsiee wo mpaabɔ, ɔdze mboa a ihia maa wo ber a nna woho akyer wo paa, anaa otwitwae gyee wo aber a nna irihyia ɔhaw kɛse bi no. Sɛ edwendwen nsɛm ahorow a ɔtsetse dɛm ho a, ɔbɛma enya ahotodo kɛse dɛ Jehovah bɔkɔ do ara aboa wo.

9. Sɛ yehyia ɔhaw a, ebɛnadze na ɔsɛ dɛ yɛma ɔtsena hɛn adwen mu? (Mbɛbusɛm 27:11)

⁹ Sɛ yehu Jehovah dɛ Obi a ɔtse ase a, ɔbɔboa hɛn ma yɛdze hɛn adwen eesi dza ohia paa no do aber a yerihyia ɔhaw no. Abɔnsam se, sɛ yehyia ɔhaw anaa nsɔhwɛ a, yebegyaa Jehovah n’ekyir dzi. Ntsi mbrɛ yebesi ayɛ hɛn adze aber a yerihyia ɔhaw no botum ama Jehovah no werɛ aahow anaa n’enyi agye. (Job 1:​10, 11; kenkan Mbɛbusɛm 27:11.) Ntsi sɛ yerihyia ɔhaw na yɛkɔ do dzi Jehovah nokwar a, ɔkyerɛ dɛ yɛdɔ Jehovah na yɛma ɔda edzi dɛ Abɔnsam yɛ ɔtorfo. Ebɛn ɔhaw na irihyia? Beebi a etse no, aban no retan Jehovah n’asomfo hɔn enyi? Wo sikasɛm ayɛ basaa, nkorɔfo nntsie asɛmpa no, anaa irihyia ɔhaw fofor bi? Iyi yɛ hokwan a ibotum dze ayɛ biribi ma Jehovah n’akoma atɔ ne yamu. Afei so, ma ɔntsena w’adwen mu dɛ Jehovah remma wɔnnsɔ wo nnhwɛ nntra dza w’ahoɔdzen botum da. (1 Cor. 10:13) Ɔbɛhyɛ wo dzen ma eetum egyina ano.

NYANKOPƆN TSEASEFO NO BOTUA WO KAW

10. Ebɛnadze na Nyankopɔn tseasefo no bɛyɛ ama hɔn a wɔsom no no?

¹⁰ Jehovah tua hɔn a wɔsom no no kaw. (Heb. 11:6) Ndɛ, ɔma hɛn asomu dwe hɛn na hɛn akoma tɔ hɛn yamu, na daakye so ɔbɛma yeenya daa nkwa. Yɛgye dzi paa dɛ Jehovah pɛ dɛ otua hɛn kaw na ɔwɔ tum so a ɔdze bɛyɛ dɛm. Dɛm ntsi sɛ yɛdze hɛn werɛ hyɛ no mu a, hɛn nsa rinnsi famu da. Iyi kenyan hɛn ma yɛyer hɛnho yɛ dza yebotum biara wɔ Jehovah no som mu dɛ mbrɛ n’asomfo anokwafo a wɔtsenaa ase tsetse no yɛe no. Dɛmara na Timothy a ɔtsenaa ase wɔ asomafo no hɔn aber do no so yɛe.—Heb. 6:​10-12.

11. Ebɛnadze ntsi na Timothy yeer noho yɛɛ edwumadzen wɔ asafo no mu? (1 Timothy 4:10)

¹¹ Kenkan 1 Timothy 4:10. Nna Timothy wɔ awerɛhyɛmu dɛ Nyankopɔn tseasefo no botua no kaw. Dɛm ntsi ɔyeer noho wɔ Jehovah no som mu na ɔboaa afofor so. Ndzɛmba a ɔyɛe no bi nye dɛn? Ɔsomafo Paul hyɛɛ no nkuran dɛ ɔnyer noho nkyerɛkyerɛ yie wɔ asafo no nye asɛnka edwuma no mu. Afei so, nna ɔsɛ dɛ Timothy yɛ nhwɛdo pa ma no nuanom Christianfo a ɔnye hɔn wɔ asafo no mu no. Bio so, ɔsomafo Paul dze edwumadzen ahorow bi hyehyɛɛ ne nsa. Bi nye dɛ ɔkaa kyerɛɛ no dɛ hɔn a wohia nkaenyim no, ɔsɛ dɛ ɔka hɔn enyim naaso ɔsɛ dɛ ofi ɔdɔ mu yɛ dɛm. (1 Tim. 4:​11-16; 2 Tim. 4:​1-5) Ɔtɔ da a, nna nkorɔfo nnhu edwumadzen a Timothy yɛ no anaa wɔnnkyerɛ dza ɔyɛ no ho enyisɔ. Naaso nna Timothy gye dzi paa dɛ Jehovah dze, ohu na obotua no kaw.—Rom. 2:​6, 7.

12. Ebɛnadze na okenyan asafo mu mpanyimfo ma wɔyer hɔnho yɛ edwumadzen wɔ asafo no mu? (Hwɛ mfonyin no so.)

¹² Ndɛ so, asafo mu mpanyimfo botum enya awerɛhyɛmu dɛ Jehovah hu edwuma pa a wɔreyɛ no na n’enyi sɔ. Asafo mu mpanyimfo serasera enuanom hyɛ hɔn nkuran, wɔkyerɛkyerɛ wɔ asafo no mu, na wɔyɛ asɛnka edwuma no so bi. Iyinom da nkyɛn a, hɔn mu pii boa ma wosisi asafo adan, na sɛ atoyerɛnkyɛm so si a, wɔboa enuanom a hɔn ho aka no. Binom so ka Ayarfo Nserahwɛ Kuw anaa Ayarsabea Ntamu Nkitahodzi Egyinatukuw no ho. Asafo mu mpanyimfo a wotu hɔnho ma yɛ dɛm ndwuma ahorow yi nyim dɛ asafo no yɛ Jehovah dze, na nnyɛ nyimpa biara dze. Dɛm ntsi wofi hɔn akoma nyina mu dzi dwuma ahorow a ɔhyehyɛ hɔn nsa no, na wɔwɔ ahotodo paa dɛ Nyankopɔn botua hɔn kaw.—Col. 3:​23, 24.

13. Jehovah bu mbɔdzen a yɛbɔ wɔ no som mu no dɛn?

¹³ Ɔnnyɛ obiara na obotum abɛyɛ asafo mu panyin. Naaso hɛn nyina wɔ biribi a yebotum dze ama Jehovah. Sɛ yɛyɛ dza yebotum biara dze som Nyankopɔn a, n’enyi sɔ paa. Sɛ ntoboa a yeyi dze boa wiadze nyina som edwuma no suar mpo a, ohu. Bi a osiandɛ yɛfɛr adze ntsi ɔbɛyɛ dzen ama hɛn dɛ yɛbɛma mbuae wɔ asafo nhyiamu ase, naaso sɛ yɛbɔ mbɔdzen yɛ dɛm a, ɔma n’enyi gye. Afei so, sɛ hɛn nua bi yɛ hɛn bɔn na yebu hɛn enyi gu do na yɛdze kyɛ no a, ɔyɛ Jehovah dɛw paa. Sɛ etse nka dɛ dza itum yɛ wɔ Jehovah no som mu no nnyɛ ahen biara mpo a, nya awerɛhyɛmu dɛ Jehovah n’enyi sɔ dza itum yɛ no. Ɔdɔ wo paa na obotua wo kaw.—Luke 21:​1-4.

MMA NNTWE WOHO MMFI NYANKOPƆN TSEASEFO NO HO DA

14. Sɛ yɛma anyɛnkofa a yɛnye Jehovah wɔ no mu yɛ dzen a, obesi dɛn aboa hɛn ma yaakɔ do edzi no nokwar? (Hwɛ mfonyin no so.)

¹⁴ Sɛ yehu Jehovah dɛ hɛn nyɛnko berɛbo a, ɔrennyɛ dzen mma hɛn dɛ yɛbɔkɔ do ara edzi no nokwar. Dza Joseph yɛe no ma yehu dɛ dɛm asɛm yi yɛ nokwar. Osiandɛ nna anyɛnkofa a ɔnye Nyankopɔn wɔ no ho hia no paa na ɔmmpɛ dɛ ɔbɛyɛ biribi a ɔbɛma no werɛ ahow ntsi, ɔammbɔ edwaman. (Gen. 39:9) Sɛ anyɛnkofa a yɛnye Jehovah wɔ no mu bɛyɛ dzen a, ɔsɛ dɛ yɛgye ber dze bɔ mpaa na yesua n’Asɛm Bible no. Sɛ yɛyɛ dɛm a, ɔbɛma yɛnye Jehovah ntamu akɔ do ayɛ papa. Sɛ yesuasua Joseph na yɛma anyɛnkofa a yɛnye Jehovah wɔ no mu yɛ dzen paa a, ɔremma yɛnnyɛ biribiara a Jehovah n’enyi nngye ho.—Jas. 4:8.

15. Dza ɔtoo Israelfo no aber a nna wɔnam sar no do no, ebɛnadze na yebotum esua efi mu? (Hebrewfo 3:12)

¹⁵ Hɔn a wɔma hɔn werɛ fir dɛ Jehovah yɛ Nyankopɔn tseasefo no, ɔnnyɛ dzen koraa dɛ wɔbɔtwe hɔnho efi no ho. Ma yɛnhwɛ dza ɔtoo Israelfo no aber a nna wɔnam sar no do no. Nna wonyim paa dɛ Jehovah wɔ hɔ, naaso odur beebi no, nna wɔnngye nndzi dɛ ɔbɛma hɔn nsa aka dza wohia no. Wobisaa mpo dɛ: ‘Ana Jehovah wɔ hɛn mu, anaa onnyi hɛn mu?’ (Ex. 17:​2, 7) Ekyir yi, wɔtseew Nyankopɔn no do etua. Dza ɔtoo hɔn no yɛ kɔkɔbɔ ma hɛn, ntsi yɛmmpɛ dɛ yesuasua asoɔdzen a wɔyɛe no.—Kenkan Hebrewfo 3:12.

16. Ebɛnadze na obotum asɔ hɛn gyedzi ahwɛ?

¹⁶ Wiadze a yɛtse mu ndɛ no ma ɔyɛ dzen ma hɛn dɛ yɛbɔkɔ do ara abɛn Jehovah. Nyimpa pii nngye nndzi dɛ Nyankopɔn wɔ hɔ. Mpɛn pii no, wɔakɛyɛ dɛ hɔn a wɔmmfa Nyankopɔn ne mbra nnyɛ hwee no mbom na ndzɛmba kɔ yie ma hɔn wɔ asetsena mu. Sɛ yehu biribi a ɔtse dɛm a, obotum asɔ hɛn gyedzi ahwɛ. Ɔwɔ mu dɛ yɛgye dzi dɛ Nyankopɔn wɔ hɔ dze, naaso sɛ yɛannhwɛ no yie a, yebotum enya adwen bi dɛ sɛ yehyia ɔhaw a, Nyankopɔn rommboa hɛn. Odur beebi no, ɔdwontofo a ɔkyerɛɛw Ndwom 73 no nyaa adwen a ɔtse dɛm. Ohun dɛ hɔn a woetwa no ho ehyia no mmfa Nyankopɔn ne mbra nnyɛ hwee naaso nna ndzɛmba kɔ yie ma hɔn. Iyi ntsi, onyaa adwen bi dɛ gyama mfaso mpo nnyi do dɛ ɔbɔsom Nyankopɔn.—Ndw. 73:​11-13.

17. Ebɛnadze na ɔbɔboa hɛn ma yaakɔ do abɛn Jehovah?

¹⁷ Ewiei koraa no, ebɛnadze na ɔboaa ɔdwontofo no ma ɔsesaa n’adwen? Ɔdwendween dza ɔbɔto hɔn a wɔtwe hɔnho fi Jehovah ho no ho. (Ndw. 73:​18, 19, 27) Afei so, ɔdwendween nhyira a hɔn a wɔsom Nyankopɔn nya no ho. (Ndw. 73:24) Hɛn so, yebotum adwendwen nhyira ahorow a Jehovah dze ama hɛn no ho. Sɛ yɛnnsom Jehovah a, nkyɛ hɛn asetsena rennyɛ tse dɛ mbrɛ ɔtse yi! Sɛ yɛdwendwen dɛm ndzɛmba yi ho a, ɔbɔboa hɛn ma yaakɔ do edzi Jehovah nokwar na yaaka asɛm a ɔdwontofo no kae no bi. Ɔkaa dɛ: “Emi dze, oye ma me dɛ motwe pin Nyankopɔn.”—Ndw. 73:28.

18. Ebɛnadze ntsi na ɔnnsɛ dɛ yesuro dza obesi daakye?

¹⁸ Ɔhaw biara a yebehyia wɔ ewiei mber yi mu no, yebotum egyina ano osiandɛ ‘yɛsom Nyame tseasefo nokwafo no.’ (1 Thess. 1:9) Yenyim dɛ hɛn Nyankopɔn a yɛsom no no wɔ hɔ ankasa, ɔdwen hɛn ho, na ɔayɛ krado so dɛ ɔbɔboa hɛn aber biara. Tsetse no, ɔboaa n’asomfo, na ndɛ so ɔbɔboa hɛn. Ɔrennkyɛr koraa yebehyia ahohiahia kɛse bi a bi mmbaa asaase yi do da. Naaso ɔrennka hɛn nko osiandɛ Jehovah bɛka hɛn ho. (Isa. 41:10) Hom mma hɛn mu biara ‘mfa akokodur nka dɛ: Jehovah nye mo boafo; murunnsuro.’—Heb. 13:​5, 6.