Siantsir A Jehovah Ne Dzin No Ho Hia Jesus

1-2. (a) Anafua a adze rebɛkye ma woeeku Jesus no, ebɛnadze na ɔyɛe? (b) Ebɛn nsɛmbisa na yebosusu ho wɔ adzesua yi mu?

NNA ɔyɛ Yawda ewimbir, Nisan 14, 33 H.B. Nna ɔrennkyɛr wobeyi Jesus ama, wobobu no kumfɔ, wɔbɛyɛ no ayakayakadze, na woeeku no. Nna ɔnye n’asomafo anokwafo no edzi Ewuradze Ewimbir Edzidzi no ewie wɔ abansor dan bi mu. Aber a wodzidzii wiei no, Jesus kaa nsɛm bi dze hyɛɛ n’asomafo no nkuran osiandɛ nna ɔrennkyɛr ma woeeku. Ansaana Jesus nye n’asomafo no ribefi abansor dan no mu no, ɔbɔɔ mpaa bi a ɔka akoma. Ɔsomafo John kyerɛɛw dɛm mpaabɔ yi too hɔ, na yebohu wɔ John tsir 17.

² Mpaa a Jesus bɔe no, ebɛnadze na ɔma yehu fa dza nna ɔhaw no dɛm aber no ho? Dɛm mpaa no si dɛn boa hɛn ma yehu dza nna ohia no paa aber a nna ɔreyɛ no som edwuma wɔ asaase yi do no? Ma yensusu dɛm nsɛmbisa yi ho mbuae wɔ adzesua yi mu.

“MAMA WOEHU WO DZIN”

3. Ebɛn asɛm na Jesus kae faa Jehovah ne dzin ho, na nna ɔpɛ dɛ ɔkyerɛ dɛn? (John 17:​6, 26)

³ Jesus kae wɔ ne mpaabɔ no mu dɛ: “Mama woehu wo dzin.” Nokwasɛm nye dɛ, ɔkaa no mpɛn ebien wɔ ne mpaabɔ no mu dɛ ɔama n’esuafo no ehu Jehovah ne dzin. (Kenkan John 17:​6, 26.) Nna ɔpɛ dɛ ɔkyerɛ dɛn? Nna ɔpɛ dɛ ɔkyerɛ dɛ ɔama n’esuafo no ehu dɛ Nyankopɔn ne dzin dze Jehovah anaa? Nna Jesus n’esuafo no yɛ Jewfo, ntsi nna wonyim dada dɛ Nyankopɔn ne dzin dze Jehovah. Dɛm dzin no pue wɔ Hebrew Kyerɛwnsɛm no mu mpɛn pii. Ntsi nna ɔnnyɛ dza Jesus repɛ akyerɛ nye dɛ ɔama n’esuafo no ehu dɛ Nyankopɔn ne dzin dze Jehovah. Mbom nna ɔpɛ dɛ ɔkyerɛ dɛ ɔama woehu mbrɛ Jehovah si tse ankasa. Nna Jesus ama woehu Jehovah yie, kyerɛ dɛ, nna ɔama woehu dza Jehovah ayɛ, dza ɔabɔ ne tsirmu dɛ ɔbɛyɛ, nye no suban ahorow. Na iyi nnyɛ nwanwa osiandɛ obiara nnyi hɔ a onyim Jehovah yie kyɛn Jesus.

4-5. (a) Sɛ wɔka dɛ inyim obi yie a, ebɛn mfatoho na ibotum dze akyerɛkyerɛ mu? (b) Ebɛn kwan do na Jesus n’esuafo no hun Jehovah yie?

⁴ Ma yɛnyɛ dɛm mfatoho yi: Fa no dɛ onua bi a wɔfrɛ no David wɔ w’asafo mu. Ɔyɛ asafo mu panyin na ɔsan so yɛ dɔkta. Na iyi na da kor bi yarba bi bɔɔ wo mpofirmu, ntsi ntsɛmara na wɔnye wo kɔr ayarsabea bi. Dɛm ayarsabea hɔ ara so na asafo mu panyin no yɛ edwuma, na ɔnoara so na ɔhwɛɛ wo ma wo ho tɔɔ wo. Ofitsi dɛm aber no rokɔ no, ibohu Onua David dɛn? Ekyingye biara nnyi ho dɛ, irunnhu no dɛ asafo mu panyin bi kɛkɛ, mbom ebɔdɔ no paa, osiandɛ aber a nna igyina owu na nkwa nkwanta no, ɔno na ɔgyee wo nkwa.

⁵ Jesus n’esuafo no so, nna wonyim Jehovah ne dzin dada. Naaso aber a Jesus boaa hɔn ma wohun Jehovah yie no, ɔmaa wɔbɛtsee dza Jehovah ne dzin no kyerɛ ase yie paa. Ebɛnadze ntsi na yɛreka dɛm? Siantsir nye dɛ, Jesus suasuaa n’Egya wɔ ne kasaa na ne ndzeyɛɛ nyina mu. Ntsi aber a Jesus n’asomafo no tsiee ne nkyerɛkyerɛ na wɔhwɛɛ mbrɛ ɔnye nkorɔfo dzii no, ɔmaa ‘wohun’ Jehovah yie.—John 14:9; 17:3.

“WOARA WO DZIN A EDZE AMA ME NO NTSI”

6. Aber a Jesus kaa dɛ Jehovah dze ne dzin ama no no, nna ɔpɛ dɛ ɔkyerɛ dɛn? (John 17:​11, 12)

⁶ Jesus ne mpaabɔ no mu no, ɔserɛɛ Jehovah dɛ: “Hwɛ hɔn do osian woara wo dzin a edze ama me no ntsi.” (Kenkan John 17:​11, 12.) Dɛm asɛm yi kyerɛ dɛ, afei dze nna wɔbɛfrɛ Jesus Jehovah anaa? Oho. Hyɛ no nsew dɛ, Jesus annka no wɔ ne mpaabɔ no mu dɛ dzin Jehovah no yɛ nankasa ne dzin. Mbom ɔkaa dɛ ɔyɛ Nyankopɔn ‘nankasa ne dzin.’ Ntsi nna wɔmmfa dzin Jehovah mmfrɛ Jesus. Sɛ dɛm na asɛm no tse dze a, nna ɔno nna Jesus pɛ dɛ ɔkyerɛ dɛn aber a ɔkaa dɛ wɔdze Nyankopɔn ne dzin ama no no? Odzi kan, nna Jesus nye Jehovah n’ananmusinyi na ne Kasamaafo. Ɔbaa asaase yi do wɔ n’Egya ne dzin mu, na ɔdze dɛm dzin no yɛɛ anwanwadze pii. (John 5:43; 10:25) Afei so, Jesus ne dzin no n’asekyerɛ nye “Jehovah Nye Nkwagye.” Iyi ma yehu dɛ Jehovah ne dzin no mpo wɔ Jesus ne dzin no n’asekyerɛ mu.

7. Ebɛnadze ntsi na yebotum aka dɛ Jesus kasae wɔ Jehovah ne dzin mu? Fa mfatoho kyerɛkyerɛ mu.

⁷ Ma yɛnyɛ dɛm mfatoho yi: Ɔhen bi n’ananmusinyi botum egyina ɔhen no n’ananmu akasa ama no. Ntsi sɛ dɛm ananmusinyi no rekasa a, ɔtse dɛ mbrɛ ɔhen noara na ɔrekasa. Jesus so, ɔyɛ Jehovah n’ananmusinyi, ntsi ɔkasae wɔ Jehovah ne dzin mu.—Matt. 21:9; Luke 13:35.

8. Ansaana Jesus reba asaase yi do no, ebɛnadze ntsi na Jehovah kaa dɛ ne dzin “wɔ” no mu? (Exodus 23:​20, 21)

⁸ Bible no ma yehu dɛ Jesus nye “Asɛm no.” Iyi kyerɛ dɛ Jehovah nam no do dze akwankyerɛ ma abɔfo na nyimpa. (John 1:​1-3) Ɔbɛyɛ dɛ Jesus nye ɔbɔfo a Jehovah somaa no dɛ ondzi Israelfo no enyim aber a nna wɔnam sar no do no. Aber a Jehovah reka akyerɛ Israelfo no dɛ wontsie dɛm ɔbɔfo no, ɔkaa dɛ: “Osiandɛ me dzin wɔ no mu.”a (Kenkan Exodus 23:​20, 21.) Nna Jehovah ne dzin “wɔ” Jesus no mu osiandɛ ɔyɛ Jehovah n’ananmusinyi, na ɔno so nye obi a ɔtsew n’Egya ne dzin ho paa.

“EGYA, HYƐ WO DZIN ENYIMNYAM”

9. Ebɛnadze na ɔma yehu dɛ nna Jehovah ne dzin no ho hia Jesus? Kyerɛkyerɛ mu.

⁹ Dɛ mbrɛ yeedzi kan ehu no, ansaana Jesus reba asaase yi do mpo no, nna Jehovah ne dzin no ho hia no kyɛn biribiara. Ntsi aber a nna ɔwɔ asaase yi do no, dza ɔyɛe biara maa ɔdaa edzi dɛ Jehovah ne dzin no ho hia no. Wɔaka kakra ma Jesus eewie no som edwuma no, ɔserɛɛ Jehovah dɛ: “Egya, hyɛ wo dzin enyimnyam.” Hɔ ara na n’Egya dze ndze kɛse kaa dɛ: “Mahyɛ no enyimnyam, na mebɛsan ahyɛ no enyimnyam bio.”—John 12:28.

10-11. (a) Jesus sii dɛn hyɛɛ Jehovah ne dzin enyimnyam? (Ibotum ahwɛ mfonyin no so.) (b) Ebɛnadze ntsi na ɔsɛ dɛ Jehovah ne dzin no ho tsew?

¹⁰ Jesus so hyɛɛ n’Egya ne dzin no enyimnyam. Ɔyɛɛ no dɛn? Kwan kor a ɔfaa do yɛɛ dɛm nye dɛ ɔmaa nkorɔfo hun n’Egya no suban ahorow a ɔyɛ fɛw nye ndzɛmba a ɔyɛ dze boa afofor no. Ɔnnyɛ iyi nkotsee o, ɔsanee yɛɛ biribi fofor so. Nna ohia dɛ Jehovah ne dzin no ho tsew. Mpaa bi a Jesus kyerɛɛ n’ekyirdzifo dɛ wɔmbɔ no ma yehu dɛ nna Jehovah ne dzin a no ho bɛtsew no ho hia no paa. Ɔkaa dɛ: “Hɛn Egya a ewɔ sor, wo dzin ho ntsew.”—Matt. 6:9.

¹¹ Nna ebɛnadze ntsi na ohia dɛ Jehovah ne dzin ho tsew? Osiandɛ wɔ Eden ture no mu no, Satan guu Jehovah Nyankopɔn ne dzin no ho fi. Nna Satan pɛ dɛ ɔkyerɛ dɛ Jehovah yɛ ɔtorfo na ɔdze biribi papabi esie Adam na Eve. (Gen. 3:​1-5) Afei so, nna Satan repɛ akyerɛ dɛ mbrɛ Jehovah si yɛ n’adze no nnyɛ papa. Atorsɛm a Satan kae faa Jehovah ho no maa Jehovah ne dzin no ho guu fi. Ekyir yi, wɔ Job n’aber do no, Satan kaa dɛ dza nyimpa nya fi Nyankopɔn hɔ ntsi na wɔsom no. Ɔsanee so kaa dɛ sɛ nyimpa hyia ɔhaw a wɔronnsom Jehovah bio, osiandɛ wɔnnhyɛ da ara nndɔ no dɛm. (Job 1:​9-11; 2:4) Sɛ Jehovah na ɔyɛ ɔtorfo o, sɛ Satan na ɔyɛ ɔtorfo o, nna ɔbɛgye mber ansaana yeehu.

“MEDZE MO NKWA TO HƆ”

12. Osiandɛ nna Jehovah ne dzin no da Jesus n’akoma do ntsi, nna ebɛnadze na ɔayɛ krado dɛ ɔbɛyɛ?

¹² Nna Jesus dɔ Jehovah, ntsi nna ɔpɛ dɛ ɔyɛ dza obotum biara dze tsew Jehovah ne dzin ho. Jesus kaa dɛ: “Medze mo nkwa to hɔ.” (John 10:​17, 18) Nokwasɛm nye dɛ, nna Jesus ayɛ krado mpo dɛ obowu dze atsew Jehovah ne dzin no ho.b Aber a Jehovah bɔɔ Adam na Eve no, nna bɔn biara nnyi hɔnho. Naaso ekyir yi, wɔyɛɛ Jehovah do asoɔdzen, na wokedzii Satan n’ekyir. Naaso Jesus dze, nna ɔayɛ krado dɛ ɔbɛba asaase yi do na ɔaama obiara ehu dɛ ɔdɔ Jehovah. Aber a nna Jesus wɔ asaase yi do no, otsiee Jehovah wɔ biribiara mu. (Heb. 4:15; 5:​7-10) Jesus dzii Jehovah nokwar kesii dɛ owuu yayaayaw wɔ asɛndua do. (Heb. 12:2) Dza ɔyɛe yi maa ɔdaa edzi dɛ ɔdɔ Jehovah papaapa na Ne dzin no so da n’akoma do.

13. Ebɛnadze ntsi na Jesus nye obi a ɔfata paa dɛ ɔma obiara hu dɛ Satan yɛ ɔtorfo? (Ibotum ahwɛ mfonyin no so.)

¹³ Mbrɛ Jesus bɔɔ ne bra no maa ɔdaa edzi pefee dɛ Satan mbom na ɔyɛ ɔtorfo, na ɔnnyɛ Jehovah. (John 8:44) Nyimpa biara nnyi hɔ a ɔatsena ase pɛn a onyim Jehovah yie kyɛn Jesus. Ntsi sombo a nna Satan dze abɔ Jehovah no, sɛ nna nokwar bi wɔ mu a, nkyɛ Jesus bohu. Naaso Jesus yɛɛ dza obotum biara dze tseew Jehovah ne dzin ho. Aber mpo a nna ɔreyɛ ayɛ tse dɛ mbrɛ Jehovah eyi n’enyi ama no no, nna ɔayɛ krado dɛ obowu kyɛn dɛ ɔbɛdan n’ekyir ama n’Egya a ɔdɔ no no.—Matt. 27:46.c

“EDWUMA A EDZE AMA ME DƐ MENYƐ NO, MAYƐ EWIE”

14. Osiandɛ Jesus dzii Jehovah nokwar ntsi, ebɛn nhyira na onyae?

¹⁴ Mpaa a Jesus bɔe anafua a adze rebɛkye ma oeewu no mu no, ɔkaa dɛ: “Edwuma a edze ama me dɛ menyɛ no, mayɛ ewie.” Nna ɔwɔ Jehovah mu ahotodo dɛ, osiandɛ oedzi no nokwar ntsi obehyira no. (John 17:​4, 5) Na n’Egya so amma ne nsa ennsi famu. Jehovah amma ne Ba no annka adakamona mu. (Andw. 2:​23, 24) Onyaan no fii ewufo mu, na ɔmaa no dzibew kɛse bi wɔ sor. (Phil. 2:​8, 9) Ekyir yi, Jesus bɛyɛɛ Nyankopɔn n’Ahendzi no do Hen. Ebɛnadze na dɛm Ahendzi no bɛyɛ? Mpaa a Jesus kyerɛɛ n’esuafo no dɛ wɔmbɔ no ma yehu dza Ahendzi no bɛyɛ. Ɔkaa dɛ: “W’Ahendzi mbra. Ma w’apɛdze [Jehovah n’apɛdze] nyɛ hɔ wɔ asaase yi do, dɛ mbrɛ ɔtse wɔ sor.”—Matt. 6:10.

15. Ebɛnadze na Jesus bɛyɛ?

¹⁵ Ɔrennkyɛr Jesus nye Nyankopɔn n’atamfo bɔko, na ɔbɛsɛɛ hɔn nyina wɔ Amagedon ko no mu. (Nyi. 16:​14, 16; 19:​11-16) Iyi ekyir ber tsiabaa bi no, Jesus dze Satan bɔto “bun no” mu. Ɔbɛyɛ tse dɛ mbrɛ wɔnye Satan ato efiadze, ntsi orunntum nnyɛ hwee. (Nyi. 20:​1-3) Jesus ne Mfrenhyia Apem Tumdzi no mu no, ɔbɛsan ama asomdwee aba asaase yi do, na obeyi bɔn na sintɔ efi hɔ. Obenyan ewufo, na ɔbɛma asaase nyina adan Paradise. Iyi bɛma dza Jehovah abɔ ne tsirmu dɛ ɔbɛyɛ ama adasamba no aaba mu!—Nyi. 21:​1-4.

16. Sɛ Mfrenhyia Apem Tumdzi no ba ewiei a, ehwɛ a asetsena bɛyɛ dɛn?

¹⁶ Sɛ Mfrenhyia Apem Tumdzi no ba ewiei a, ehwɛ a asetsena bɛyɛ dɛn? Bɔn na sintɔ befi hɔ. No ho rinnhia dɛ yegyina werdam afɔrbɔ no do serɛ bɔnfakyɛ. Afei so, yerinnhia ntamugyinafo, na asɔfodzi nhyehyɛɛ no so bɛba ewiei. Na ‘ɔtamfo a odzi ekyir a ɔno nye owu,’ kyerɛ dɛ, owu a Adam kɛfae bae no, dɛm aber no nna woetu ase. Dɛm aber no, nna woenyan ewufo, na iyi bɛma adakamona ada mpan. Nyimpa a bɔn nnyi hɔnho nkotsee na wɔbɛtsena asaase do dɛm aber no.—1 Cor. 15:​25, 26.

17-18. (a) Sɛ Mfrenhyia Apem Tumdzi no ba n’ewiei a, ebɛnadze na obiara bohu? (b) Sɛ Jesus dzi adze wie a, ebɛnadze na ɔbɛyɛ? (1 Corinthfo 15:​24, 28) (Ibotum ahwɛ mfonyin no so.)

¹⁷ Sɛ Mfrenhyia Apem Tumdzi no ba ewiei a, ebɛnadze bio na obesi? Biribi tsitsir bi besi. Dɛm aber no, obiara nnyi hɔ a obotum aka dɛ Jehovah ne dzin ho egu fi. Ebɛnadze ntsi a? Asɛm a Satan kae wɔ Eden ture no mu no, nna ɔpɛ dɛ ɔkyerɛ dɛ Jehovah nnka nokwar, na kwan a ɔfa do dzi nyimpa do no so nnyɛ papa. Ofitsi dɛm aber no reba no, Jehovah n’asomfo a wɔdɔ no na wodzi no nyi no ama wɔada edzi dɛ dɛm asɛm yi nnyɛ nokwar. Sɛ Mfrenhyia Apem Tumdzi no ba n’ewiei a, Jehovah ne dzin no ho bɛtsew korakora. Obodu dɛm aber no, nna hɛn sor Egya no ama ada edzi pefee dɛ ɔdɔ nyimpa paa.

¹⁸ Mfrenhyia Apem Tumdzi no ba n’ewiei a, obiara bohu dɛ nsɛm a Satan kae faa Jehovah ho no nyina yɛ ator. Sɛ Jesus dzi adze wie a, ebɛnadze na ɔbɛyɛ? Obosuasua Satan na ɔaatsew Jehovah do etua anaa? Oho! (Kenkan 1 Corinthfo 15:​24, 28.) Jesus bɛsan dze Ahendzi no ama n’Egya. Afei, ɔbɛbrɛ noho adze ahyɛ Jehovah no tumdzi ase. Jesus nntse dɛ Satan koraa. Jesus dze ɔdɔ Jehovah, ntsi obefi ne pɛ mu dze tum a Jehovah dze ama no no nyina asan ama no.

19. Ebɛnadze na ɔma yehu dɛ Jehovah ne dzin no ho hia Jesus?

¹⁹ Ɔnnyɛ nwanwa dɛ Jehovah dze ne dzin maa Jesus. Jesus ama wɔada edzi pefee dɛ ɔyɛ n’Egya n’ananmusinyi ampa. Ntsi yembisa o, ebɛnadze na ɔma yehu dɛ Jehovah ne dzin no ho hia Jesus? Dza Jesus yɛe biara ma yehu dɛ nna Jehovah ne dzin no ho hia no kyɛn biribiara. Nna Jesus ayɛ krado dɛ obowu ama Jehovah ne dzin no. Afei so, sɛ Mfrenhyia Apem Tumdzi no ba ewiei a, obefi ne pɛ mu dze Ahendzi no asan ama Jehovah. Yebesi dɛn esuasua Jesus? Ma yensusu dɛm asɛmbisa yi ho wɔ adzesua a odzi hɔ no mu.