Ebɛnadze Nye Nyankopɔn N’Ahendzi No?

Nyankopɔn n’Ahendzi no nye adze tsitsir a Bible no ka ho asɛm. Jehovah nam dɛm Ahendzi no do bɛma siantsir a ɔbɔɔ asaase no aba mu. Naaso, ebɛnadze nye dɛm Ahendzi no? Yesi dɛn hu dɛ wɔahyɛ ase ridzi tum? Ebɛnadze na Ahendzi no etum ayɛ, na ebɛnadze na ɔbɛyɛ daakye so? Adzesua yi, nye adzesua ebien a odzi hɔ no bɛma yeenya dɛm nsɛmbisa yi ho mbuae.

1. Ebɛnadze nye Nyankopɔn n’Ahendzi no, na woana na ɔyɛ no do Hen?

Ahendzi no yɛ aban bi a Jehovah Nyankopɔn nankasa ahyehyɛ wɔ sor, na Jesus Christ na ɔyɛ no do Hen. (Matthew 4:​17; John 18:​36) Bible no ka Jesus ho asɛm dɛ: ‘Obedzi hen daapem.’ (Luke 1:​32, 33) Jesus a ɔyɛ Nyankopɔn n’Ahendzi no do Hen no bedzi nyimpa a wɔwɔ asaase nyina do tum ndaansa yi ara.

2. Woananom na wɔnye Jesus bedzi adze?

Nnyɛ Jesus nankotsee na obedzi adze. Nyimpa bi so a “wofi mbusuakuw nye kasa, nye nkorɔfo, nye aman nyina mu . . . [bedzi] hen wɔ asaase do.” (Nyikyerɛ 5:​9, 10) Nyimpa dodow ahen na wɔnye Christ bedzi adze? Ofitsi ber a Jesus baa asaase do no, nyimpa pii na woedzi n’ekyir. Ntsi, ana hɔn nyina bɔkɔ sor na wɔnye Jesus eekedzi adze? Oho. Hɔn mu 144,000 pɛ na wɔbɔkɔ sor na wɔnye no eekedzi adze. (Kenkan Nyikyerɛ 14:​1-4.) Christianfo a wɔaka no nyina bɛtsena asaase do, na Ahendzi no eedzi hɔn do tum.​—Ndwom 37:29.

3. Ebɛnadze ntsi na Nyankopɔn n’Ahendzi no yɛ papa koraa kyɛn nyimpa n’aban?

Ɔyɛ a nyimpa n’aban bɔ mbɔdzen yɛ ndzɛmba pa bi. Naaso, wonnyi tum a wobotum dze ayɛ ndzɛmba pa a wɔpɛ dɛ wɔyɛ no nyina. Ntsi sɛ ndɛ aban bi ba do a, ɔkyena nko na oefi do. Aban fofor a ɔbɛba abɛhyɛ n’ananmu no so, ebɔhwɛ no, nna dza nankasa pɛ no na ɔyɛ. Naaso, Jesus a ɔyɛ Nyankopɔn n’Ahendzi no do Hen no dze, obiara remmbɛhyɛ n’ananmu da. Nyankopɔn n’Ahendzi a ɔdze esi hɔ no dze, ‘wɔrennsɛɛ no da.’ (Daniel 2:​44) Jesus bedzi hen wɔ asaase nyina do. Ɔrennyɛ nhwehwɛenyim biara, mbom ɔnye obiara bedzi no yie. Jesus dɔ nyimpa, ne tsirmu nnyɛ dzen, na ɔnye obiara dzi no pɛpɛɛpɛr. Ntsi, ɔbɔboa nyimpa nyina ma hɔn so wɔaayɛ dɛmara.​—Kenkan Isaiah 11:9.

4. Aban a ɔwɔ tum paa na obedzi asaase nyina do

Jesus Christ wɔ tum kyɛn otumfo biara a ɔatsena asaase yi do pɛn. Ma yɛnkenkan Matthew 28:​18, na yensusu asɛmbisa yi ho:

• Sɛ edze tum a Jesus wɔ no toto tum a nyimpa etumfo wɔ no ho a, woana na ɔwɔ tum paa?

Nyimpa n’aban nntsena hɔ nnkyɛr, na hɔn nyina so, asaase ne fa kakraabi pɛ na wodzi do tum. Nyankopɔn n’Ahendzi no so ɛ? Ma yɛnkenkan Daniel 7:​14, na yensusu nsɛmbisa yi ho:

• Bible se Nyankopɔn n’Ahendzi no, “wɔrennsɛɛ no.” Ebɛnadze ntsi na iyi yɛ asɛmpa?

• Kyerɛwnsɛm no se Nyankopɔn n’Ahendzi no bedzi asaase nyina do tum. Ebɛnadze ntsi na iyi so yɛ asɛmpa?

5. Obeyi nyimpa n’aban nyinara efi hɔ

Ebɛnadze ntsi na ɔsɛ dɛ Nyankopɔn n’Ahendzi no yi nyimpa n’aban nyina fi hɔ? Ma yɛnhwɛ VIDEO yi, na yensusu asɛmbisa a odzi do no ho.

VIDEO: Nyankopɔn N’Ahendzi No, Ɔyɛ Ebɛnadze?​—Ne Fa Bi (1:41)

• Ebɛnadze na nyimpa no tumdzi akɛfa aba?

Ma yɛnkenkan Ɔsɛnkafo 8:​9, na yensusu nsɛmbisa yi ho:

• Ehwɛ a, ɔsɛ dɛ Nyankopɔn n’Ahendzi beyi nyimpa n’aban nyina fi hɔ a? Ebɛnadze ntsi na ereka dɛm?

6. Hɔn a wodzi tum wɔ Nyankopɔn n’Ahendzi no mu no tse nyimpa ase

Hɛn Hen Jesus atsena asaase do dɛ nyimpa pɛn, ntsi ‘ɔtse hɛn mberɛwyɛ ase.’ (Hebrewfo 4:​15) Afei so, mbarimba na mbaa anokwafo 144,000 a Jehovah eyi hɔn dɛ wɔnye Jesus ndzi adze no so, “wofi mbusuakuw nye kasa, nye nkorɔfo, nye aman nyina mu,” ntsi wɔtse nyimpa ase.​—Nyikyerɛ 5:9.

• Jesus nye hɔn a wɔnye no bedzi adze nyina tse nyimpa ase, osiandɛ hɔnara so wɔayɛ nyimpa pɛn. Ehwɛ a, dɛm asɛm yi yɛ awerɛkyekyer a? Ebɛnadze ntsi na ereka dɛm?

7. Nyankopɔn n’Ahendzi no mu mbra yɛ papa kyɛn nyimpa aban biara ne mbra

Aban biara hyehyɛ mbra mbrɛ ɔbɛyɛ a ɔbɔbɔ ne mamfo nyina ho ban, na wɔaaboa hɔn. Nyankopɔn n’Ahendzi no so wɔ mbra ahorow bi a ɔwɔ dɛ ne mamfo nyina dzi do. Ma yɛnkenkan 1 Corinthfo 6:​9-11, na yensusu nsɛmbisa yi ho:

• Sɛ obiara dze Nyankopɔn ne mbra yi reyɛ edwuma a, nkyɛ ehwɛ a wiadze bɛyɛ dɛn?a

• Jehovah hwɛ kwan dɛ hɔn a Ahendzi no bedzi hɔn do tum no nyina dzi dɛm mbra yi do. Ehwɛ a, ntseasee wɔ mu a? Ebɛnadze ntsi na ereka dɛm?

• Ebɛnadze na ɔkyerɛ dɛ hɔn a wonndzi dɛm mbra yi do no botum asesa ma aayɛ yie?​—Hwɛ nyiyimu 11.

DZA ESUA

Nyankopɔn n’Ahendzi no yɛ aban bi a ɔwɔ hɔ ankasa. Ɔwɔ sor, na obedzi asaase nyina do tum ndaansa yi ara.

Mbobɔdo

• Woananom na wobedzi tum wɔ Nyankopɔn n’Ahendzi no mu?

• Ebɛnadze ntsi na Nyankopɔn n’Ahendzi no yɛ papa koraa kyɛn nyimpa n’aban biara?

• Ebɛn bra na Jehovah pɛ dɛ hɔn a Ahendzi no bedzi hɔn do no bɔ?

HWEHWƐ PII KA HO

Hwɛ dza Jesus kae faa beebi a Ahendzi no wɔ no ho.

“Aso Nyankopɔn N’Ahendzi No Wɔ W’akoma Mu?” (Asɛm bi a ɔwɔ wɛbsaet do)

Nyankopɔn n’Ahendzi no ho hia Jehovah Adasefo koraa kyɛn nyimpa n’amambu. Ebɛnadze ntsi a?

Yɛtaa Nyankopɔn N’Ahendzi No Ekyir (1:​43)

Kenkan asɛm yi, na ibohu dza Bible no ka fa nyimpa 144,000 a Jehovah eyi hɔn dɛ wɔnye Jesus nkedzi adze no ho.

“Woananom Na Wɔbɔkɔ Sor?” (Asɛm bi a ɔwɔ wɛbsaet do)

Ebɛnadze na ɔboaa maame bi a nna ɔda efiadze no ma ohun dɛ Nyankopɔn nkotsee na obotum eyi nsisi efi wiadze?

“Mehu Dɛ Nyankopɔn Nkotsee Na Obotum Eyi Nsisi Efi Wiadze” (Nyan!, November 2011)