Vakatakila e Vola o Joni

2 “Vola vua na agilosi+ ni ivavakoso e Efeso:+ Qo na ka e tukuna o koya e taura tiko e ligana imatau e vitu na kalokalo, o koya e veilakoyaki ena maliwa ni vitu na itutu ni cina koula:+ 2 ‘Au kila na nomu cakacaka, na nomu oga kei na nomu vosota, o qai sega ni taleitaki ira na tamata ca, o vakatovolei ira tale ga era kaya nira yapositolo,+ ia era sega, o qai raica nira lasulasu. 3 O vosota tale tiko ga, o tudei ena vuku ni yacaqu+ o qai sega ni vakacauoca.+ 4 Ia qo na ka au sega ni taleitaka vei iko, ni sa sega vei iko na loloma me vaka e liu.

5 “‘Mo nanuma gona na itutu o sa lutu mai kina, mo veivutuni,+ mo vakayacora tale na cakacaka o cakava e liu. Ke o sega ni veivutuni,+ au na lako yani vei iko, au na kauta laivi na nomu itutu ni cina+ mai na vanua e toka kina. 6 Ia e dua na ka vinaka o cakava tiko: oya ni o cata na nodra ivalavala na ilawalawa i Nikola,+ qori tale ga na ivalavala au cata. 7 O koya e vakadaligana me rogoca sara na ka e tukuna na yalo tabu ina ivavakoso:+ Vei koya e qaqa+ au na vakadonuya me kana ena kau ni bula+ e tiko ena parataisi ni Kalou.’

8 “Vola vua na agilosi ni ivavakoso e Simurina: Qo na ka e tukuna o koya ‘na iMatai kei na iOtioti,’+ o koya a mate qai bula tale:+ 9 ‘Au kila na nomu rarawa kei na nomu dravudravua—ia o vutuniyau+—kei na nodra vosabeci iko o ira na kaya nira Jiu, ia e sega ni dina qori, era ilawalawa* ga i Setani.+ 10 Kua ni rerevaka na ka rarawa o na vakarau sotava.+ Raica! Na Tevoro ena biuta tiko ga eso vei kemuni ina valeniveivesu moni vakatovolei kina vakaca, oni na qai vakararawataki me tini na siga. Mo vakaraitaka ni o yalodina me yacova na mate, au na qai solia vei iko na isala ni bula.+ 11 O koya e vakadaligana me rogoca sara+ na ka e tukuna na yalo tabu ina ivavakoso: O koya e qaqa+ ena sega sara ga ni vakaleqai koya na ikarua ni mate.’+

12 “Vola vua na agilosi ni ivavakoso e Perikamo: Qo na ka e tukuna o koya e tu vua na iseleiwau batirua balavu e gata:+ 13 ‘Au kila na vanua o tiko kina, oya na vanua e tiko kina na idabedabe vakaturaga i Setani. Ia o taura matua tiko ga na yacaqu,+ o sega ni cakitaka nomu vakabauti au+ ena gauna mada ga i Anitipasa, na noqu ivakadinadina yalodina,+ a vakamatei+ e yasamu, na vanua e tiko kina o Setani.

14 “‘Ia e vica na ka au sega ni taleitaki iko kina, oya nira tiko qori o ira na kabita tiko ga na ivakavuvuli i Pelami,+ o koya a vakavulici Pelaki+ me vakatarabetaki ira na luvei Isireli mera kania na ka e cabori ina matakau, mera veiyacovi tawadodonu*+ tale ga. 15 Kena ikuri, era tiko tale ga qori o ira na taura matua tiko na nodra ivakavuvuli na ilawalawa i Nikola.+ 16 Mo veivutuni gona. Ke sega, au na lako totolo yani vei iko, au na valuti ira ena iseleiwau balavu ni gusuqu.+

17 “‘O koya e vakadaligana me rogoca sara na ka e tukuna na yalo tabu ina ivavakoso:+ O koya e qaqa+ au na solia vua na mana vuni,+ au na solia tale ga vua e dua na vatu lailai vulavula, e volai ena vatu lailai e dua na yaca vou, e sega tale ni dua e kila, o koya ga e soli vua.’

18 “Vola vua na agilosi ni ivavakoso e Ceatira:+ Qo na ka e tukuna na Luve ni Kalou, o koya e vaka na yameyame ni bukawaqa na yalokanimatana,+ e vaka na kopa vinaka na yavana:+ 19 ‘Au kila na nomu cakacaka, nomu loloma, nomu vakabauta, nomu cakacaka vakaitalatala, nomu vosota, e vinaka cake tale ga na nomu cakacaka ena gauna qo ni vakatauvatani kei na kena e liu.

20 “‘Ia qo na ka au sega ni taleitaka vei iko, ni o vakalaiva na yalewa ya o Jesepeli,+ e kaya tiko ni parofita yalewa, me vakavulici ira qai vakacalai ira na noqu dauveiqaravi mera veiyacovi tawadodonu,*+ mera kania tale ga na ka e cabori ina matakau. 21 Au a solia vua na gauna me veivutuni, ia e sega ni via veivutunitaka nona veiyacovi tawadodonu.* 22 Raica! Au na vakarau biuti koya ena idavodavo ni tauvimate, au na vakararawataki ira tale ga vakalevu na veibutakoci kei koya, vakavo ke ra veivutunitaka na ivalavala e vakacalai ira kina. 23 Au na vakamatei ira na luvena ena mate rerevaki, mera kila kina na ivavakoso kece niu dau dikeva na vakanananu titobu* kei na uto, au na saumi kemuni yadua tale ga me vaka na nomuni ivalavala.+

24 “‘Ia au tukuna vei kemuni na kena vo oni tiko e Ceatira, o kemuni kece na sega ni muria na ivakavuvuli qo, oni sega ni via kila na ka e vakatokai na “veika titobu i Setani”:+ Au sega ni via vakaicolacolataki kemuni tale. 25 Ia ni taura matua na ka sa tu vei kemuni me yacova niu lako yani.+ 26 O koya ena qaqa, e muria tale ga na noqu cakacaka me yacova na icavacava, au na solia me lewa na veimatanitu,+ 27 ena vakatawai ira na lewenivanua ena ititoko kaukamea+ mera vurumemea kina me vaka na iyaya qele, na lewa vata ga e solia vei au o Tamaqu. 28 Au na qai solia vua na kalokalo ni mataka.+ 29 O koya e vakadaligana me rogoca sara na ka e tukuna na yalo tabu ina ivavakoso.’