iMatai ni Samuela
21 Oti e lako i Nopi o Tevita+ vei Eimeleki na bete. E sautaninini sara ga o Eimeleki ni sotavi Tevita, e kaya vua: “Na cava o lako duadua mai kina, e sega ni dua drau lako vata mai?”+ 2 E kaya o Tevita vei Eimeleki na bete: “E vakaroti au na tui meu cakava e dua na ka, ia e kaya, ‘Me kua sara ni dua e kila na ka au talai iko tiko kina kei na ka au vakaroti iko kina.’ Au sa lokuca tu vei ira na noqu cauravou na vanua me keimami sota kina. 3 Ke tiko qori vei iko e lima na ibuli madrai, mo solia mai vei au, se ka ga e tu qori.” 4 Ia e kaya na bete vei Tevita: “E sega ni tiko na madrai wale, e tiko ga na madrai tabu,+ ena soli ga ke ra tabuyalewa na cauravou.”*+ 5 E kaya vua na bete o Tevita: “Keimami tabuyalewa dina me vaka ga e liu niu dau lako ena ivalu.+ Ke savasava tiko na yagodra na tagane ena dua na ilesilesi wale, sa qai wacava na nodra savasava nikua!” 6 E mani solia vua na bete na madrai tabu+ ni sega ni dua na madrai e tiko e kea, na madrai dauraici ga e kau tani mai na mata i Jiova me biu yani na madrai katakata ena siga e kau tani kina.
7 Ia ena siga oya e tiko e kea e dua na tamata nei Saula, e wawa tiko ena mata i Jiova. Na yacana o Toeki+ na kai Itomi,+ e nodra turaga na ivakatawanisipi nei Saula.
8 E qai tukuna o Tevita vei Eimeleki: “E tu qori e dua na moto se iseleiwau? Au sega ni kauta mai na noqu moto se dua na noqu iyaragi, ni vakatotolotaki na ka e vinakata na tui.” 9 E kaya sara na bete: “E tiko qo na iseleiwau nei Koliaci+ na kai Filisitia o vakamatea ena Buca o Ela,+ e olo tiko ena isulu ena daku ni efoti.+ Ke o via kauta, mo kauta ni qori ga na ka e tiko eke.” E kaya o Tevita: “E sega tale ni dua na iseleiwau e va qo. Solia mai vei au.”
10 Ena siga oya e tu o Tevita me tomana nona drovaki+ Saula, mani yaco yani vei Tui Akisi e Kaca.+ 11 Era kaya vei Akisi na nona tamata: “Sega ni o Tevita ga qo na tui ni vanua? Sega ni o koya ga qo era lagata nira meke, era kaya,
‘E vakamatea o Saula e vica na udolu,
Ia o Tevita e oba vakaoba?”+
12 E tugana sara e lomana o Tevita na vosa qori, e rerevaki+ Tui Akisi vakalevu e Kaca. 13 E vunitaka vei ira ni tu vinaka na nona vakasama,+ e vaka na tamata lialia na nona ivalavala ni tiko vata kei ira. E tosilaka na katuba ni matamata qai vakaturuma na nona weli e kumina. 14 E kaya sara o Akisi vei ira na nona tamata: “Oni raica ni sa lialia tu na tagane qo! Na cava oni kauta mai kina vei au? 15 E lailai na tamata lialia era tu qo vei au, me mai valavala vakalialia kina e mataqu o ka qo? Me curu ina noqu vale na tamata qo?”