Na Rai ni iVolatabu

Nomu Digia e Dua me Watimu

A TAROGI E DUA NA YALEWA DAWAI, “O BAU VAKASAMATAKA TU MO VAKAWATI?” E SEGA NI BERA NA KENA ISAU, “IO. AU DAU LOMALEQATAKA NA TIKINA QORI.”

NA NONA vosa vakadodonu na marama oqo e vakaraitaka sara tu ga na nodra gadreva e so mera lomani, mera vakaitokani tale ga. E levu era vakabauta ni dua vei ira na ka bibi ena bula na nodra qara me dua na watidra. E duri kina e vuqa na tabana ena vuravura me vukei ira na tamata ena nodra vaqara watidra. Ia ena levu na vanua e vuravura sa qai levu ga na kavoro ni vakawati, e lailai na vakawati e toso vinaka.

Ena veivanua vutuniyau e dau kena ivakarau tu mera qara ga na watidra na via vakawati. Ia ena so na vanua mai Esia kei Aferika, e sega ni lewa duadua ga o koya e via vakawati se o cei me watina. E sega ni dodonu me tauri vakamamada na kena icakacaka e rua oqo. Na vaqarai ni watida e dua vei ira na ka ena rawa ni vakatautaki kina na noda marau se rarawa mai muri. Na vakawati e vinaka e veivakalougatataki, e veivakacegui tale ga. Ia na vakawati e dau nodrau cakacaka tu ga na veiba, e dau vakamosiyalo qai vakavu nuiqawaqawa.​—Vosa Vakaibalebale 21:19; 26:21.

Era vinakata na lotu Vakarisito dina mera marautaka, me veivakacegui tale ga nodra bula vakawati me vakataki ira ga na vakawati tale e so. Era vinakata tale ga mera vakamarautaka na Kalou ra qai rokovi koya. (Kolosa 3:23) Ni Kalou dauveibuli, e tauyavutaka tale ga na vakawati, e kila na ka sara ga eda gadreva, kei na ka e vinaka vei keda. (Vakatekivu 2:22-24; Aisea 48:17-19) Kuria oya, e vakaraica tiko mai ena vica na udolu na yabaki sa oti e milioni vakamilioni na vakawati era tini vinaka kei na vakawati era tini vakaca. E kila vinaka sara tu ga se cava e yaga kei na cava e sega ni yaga ena bula vakawati. (Same 32:8) E virikotora ena nona Vosa na iVolatabu na ivakavuvuli dei qai matata me rawa nira vakatulewa kina vakavinaka na lotu Vakarisito. Na cava mada e so na ivakavuvuli oqo?

Kua ni Rai ga Vakayago

Ena so na vanua era digia ga kina vakataki ira na watidra, ena nodra sota beka sega ni nakiti ena dua na vanua, se veikilaitaki rau na dui wekadrau kei na nodrau itokani. Dau vu ni dodomo na irairai vakayago. Sa kena ivakarau ga oqori, e dua tale ga na idre kaukaua, ia e uqeti keda na iVolatabu meda kua ni raica wale ga na kena irairai kevaka eda via vakawati.

“A ka lasu na saweka, ka sega ni yaga na matavinaka: ia na yalewa sa rerevaki Jiova, sa vakacaucautaki,” e kaya na Vosa Vakaibalebale 31:30. E tukuna na yapositolo o Pita, “na yalomalumalumu kei na yalomalua, oqori sa ka talei sara e na mata ni Kalou.” (1 Pita 3:4) Io, e bibi cake sara ena rairai vinaka vakayago na nona ituvaki vakayalo o koya o nanuma tiko me watimu, oya na nona yalodina vua na Kalou, na nona lomani koya, vaka kina na nona itovo vakarisito. E vinaka mo kua ni vakusakusa, me rawa ni o digitaka kina e dua e tautauvata na nomudrau isausau vakayalo, e saga tale tiko ga me vuataka na vua ni yalo tabu. Ena yaga sara vakalevu oqo mo drau na marautaka kina na nomudrau vakawati.​—Vosa Vakaibalebale 19:2; Kalatia 5:22, 23.

‘Vakawati ga Kei Koya e Nona na Turaga’

E rui bibi me tautauvata na nomu isausau vakayalo kei na nomu vakabauta kei koya o via vakawatitaka. E ka ni bolebole na vakawati, ena vinakati sara ga vakalevu me rau veisautaka nodrau itovo kei na ivakarau ni nodrau rai. Ena vakarawarawataka gona na veiveisau oqo ke levu na ka o drau tautauvata kina kei koya o sa nanuma tiko me watimu.

Oqori na vuna e vakasalataki keda kina o Paula meda kua ni “veitokani vata vakatani kei ira era sa sega ni vakabauta.” (2 Korinica 6:14) E kila o Paula ke da vakawatitaka e dua eda sega ni vakabauta vata, e sega tale ga ni kila na ivakavuvuli vakaivolatabu, ena vakavuna na veisaqasaqa kei na duiyaloyalo. E veiganiti gona vakavinaka na ivakasala, mo ‘vakawati ga kei koya e nona na Turaga.’ (1 Korinica 7:39) E vakasama vakalou. O ira era muria na ivakasala vakayalomatua oqori, ena sega ni yacovi ira e levu sara na dredre kei na leqa.​—Vosa Vakaibalebale 2:1, 9.

Na Vakawati e Lewai

Vakacava na mataqali vakawati e dau kena ivakarau me lewai ga mai se o cei me watidra? Ena ceva kei Idia me kena ivakaraitaki, e rauta ni 80 pasede ni vakawati e vakayacori, era veivosakitaka ga na itubutubu. Na kena muri se sega na ivakarau oqo, mera qai vakatulewa ga kina na itubutubu lotu Vakarisito. Na ka ga me nanumi ni na mana ga vakalevu na vakawati vaka oqo ke vakaliuci na veika vakayalo.

O ira era taleitaka na mataqali vakawati vaka oqo, era nanuma nira na vakatulewa vinaka cake o ira e levu na ka era kila, era sa matua tale ga. E kaya e dua na qase ni ivavakoso mai Aferika ni “so na itubutubu era nanuma ni na sega ni rawa mera kila vinaka na gone na nona matua vakayalo o koya e nanuma me watidra, e baleta nira se gone, e sega tale ga ni levu na ka era kila.” E kaya e dua na ivakatawa dauveilakoyaki mai Idia, “ni o ira na gone e lailai sara na ka era kila me baleta na bula, ena rawa nira vakatulewa tu ga vakaveitalia.” Era nanuma na itubutubu ni rawa vei ira mera digia vakayalomatua o cei me wati luvedra ni sega tale ni dua e kilai ira vinaka na luvedra, o ira duadua ga. Ia e vinaka tale ga mera vakasamataka na nodrau rai na cauravou kei na goneyalewa oqori.

Ia nira vakanadakuya na itubutubu na ivakavuvuli vakaivolatabu, ena rawa ni lauti ira tale na sui ni kedra ke tini botoilevu na vakawati. Ni sega na gauna me rau veikilai vinaka kina o rau na via vakawati, ena rawa ni vakavurea na leqa. Me vaka e kaya e dua na tama lotu Vakarisito mai Idia, “e dau kena ivakarau mera beitaki na itubutubu” ni tubu na leqa.

E dodonu tale ga me vakasamataki na rai e tiko mai ena daku ni nodra veivosakitaka ga na itubutubu vakarisito na vakawati. Ena yaco na leqa ke yavutaki na vakawati ena vuku ni kena vinakati wale ga na rogo se na iyau. (1 Timoci 6:9) E dodonu gona mera tarogi ira vakataki ira na veivosakitaka na vakawati, ‘E yavu ni nodrau vakawatitaki o rau oqo e baleta ni rau na marau kina, erau na kaukaua tale ga kina vakayalo? Se caka na vakawati oqo me rogo ga kina na matavuvale, se ena vuku ni qara iyau, se rawailavo?’​—Vosa Vakaibalebale 20:21.

E matata vakaoti, e yaga tale ga na ivakasala e tu ena iVolatabu. E dodonu me laurai ga vakabibi na nona itovo savasava kei na nona bula vakayalo o koya e nanumi tiko me vakawatitaki, se mani sala cava e muri ena qarai ni kena isa e dua e via vakawati. Ni vakayacori oqo, ena dokai kina na Kalou o Jiova ni a vakavuna na vakawati, erau na yavutaki vinaka tale ga kina na veiwatini. (Maciu 7:24, 25) Ena yaco me marautaki, me veivakacegui tale ga vakalevu na bula vakawati.