A Vakabulai Koya

Na itabataba ni “Yadra!” 22 Tiseba, 1999, a tabaki kina na iulutaga levu na “Kidnapping​—Why a Global Threat” (Veivesu Vakaukaua​—Na Vuna e Ririkotaki Kina e Vuravura Raraba).E kaya o William Louis Terrell, ni itabataba ni “Yadra!” oya a vakabulai koya.

OTI toka na tini ena vica ga na miniti ena mataka ni siga Vakaraubuka, 10 Maji, 2000, a vesu vakaukaua oTerrell mai nona vale ni dodoka vakadodonu vua na dakai o Joseph C.  Palczynski Jr. E kaya o Terrell na itabataba ni Yadra! oya e nanuma lesu ena gauna a vesu kina vakaukaua, e volai tu kina na nodra ivakasala na kenadau me baleta na ka mo cakava kevaka o vesu vakaukaua. E vaka oqo na nodra ivakasala:

“Mo talairawarawa; kua ni be. E dauvakayacori na ivalavala kaukaua vei ira era dau vorata na nodra kau vakavesu. E levu na gauna e rawa nira lai tini vakamatei sara kina, se qai dau nodra kece na voravora ni veivakatotogani.

“Kua ni o taqaya. Nanuma tiko ni vuqa era vesu vakaukaua era vakabulai.”

“Kevaka e rawa, saga mo drau veitalanoa kei koya e vesuki iko tiko, mo drau veikilai kina. Ke drau mai veikilai vaka oqo ena rawa ni dredre kina vua me vakamavoataki iko se vakamatei iko.

“Tukuna vua [e vesuki iko tiko] na veika o gadreva ena vosa ni veidokai.”

“Na veivosaki e itataqomaki vua e vesu vakaukaua, me vaka e vakamacalataka na ivola na Criminal Behavior: ‘Na levu ni nodrau veivosaki o koya e vesu tu kei koya e veivesu, na levu tale ga ni nodrau na veimaliwai vinaka. Ke yaco oqo ni oti e dua na gauna, ena rawa ni dredre kina vua e veivesu me vakamavoataki koya e vesu tu.’”

E saga ena nona igu taucoko o William Terrell, e yabaki 53, e dua na iVakadinadina i Jiova, me muria na ivakasala oya ena nona vesu tu ni rauta e 14 na aua. Ia, levu na gauna oya a dodoki vakadodonu tu vua na dakai. A sotava o Terrell na ituvaki oqo ena lomanivanua volekata na gaunisala levu ena yasana oya, e Mereke, na Interstate Highway 95, ena gauna e tukia kina nona katuba o Palczynski ni mai oti koso na waiwai ni motoka a butakoca mai.

A vinakata o Terrell me vukea na vulagi ni sa tukuna oti vua na nona leqa. Kerea sara o Palczynski me dua na mena bilo wai qai kerea tale ga me vodo me lako i Baltimore, ena yasana o Maryland. E kaya o Terrell ni na veivosakitaka e dua me vakavodoki koya me yaco ina korolevu o Fredericksburg ena yasana o Virginia, na vanua ena rawa ni vodoka kina na basi me kauti koya ina vanua e lako tiko kina. Ni lesu mai o Terrell kei na bilo wai sa dodoki vakadodonu tu yani vua na dakai. A vakaroti Terrell o Palczynski me kauti koya ina vanua e lako tiko kina.

Muria na iVakasala

Nodrau lako voli e Interstate Highway 95, a vakamuria o Terrell na vosa i Palczynski me baleta na totolo ni cici ni motoka qai kua ni vakauta na motoka ena sala mera kauaitaki rau kina na tamata. E sega ni rere o Terrell ni vakavosaki Palczynski, e yabaki 31, a vakaraitaka vua ni kauaitaki koya dina vakatale ga kina na ituvaki e vakavuna na nodrau mai sota. A talanoataka sara o Palczynski, ena tolu na siga sa oti a lako kina o koya me lai raici nona itau goneyalewa o Tracy, ni a tagutuva na nodrau veikilai na goneyalewa oqo. A vanai rau mate kina e dua na veiwatini erau itokani i yalewa kei na dua eratou veitikivi ni ratou saga me ratou tarova nona kauti Tracy. E muri a qai dro o Tracy.

Ena bogi e tarava, a lauta na gonetagane yabaki rua e dua na sicini ni dakai a vanataka o Palczynski ena nona saga voli me butakoca e dua na motoka. A mavoa sara kina vakaca na galegale i koya na gonetagane lailai oya. A lauvana tale ga na motoka a kauta tiko o Jennifer Lyn McDonel. E ka ni rarawa ni a lauti koya e dua na sicini ni dakai mani mate kina, qai dua tale e a lauta na nona idabedabe na luvedrau yabaki dua a lala toka. Ena bogi oya, erau lako tiko ina Kingdom Hall ni iVakadinadina i Jiova na veiwatini o Jennifer kei Thomas, ni rau vakaitavi ruarua ena soqoni. E vakamacalataka o Sarah Francis, na tina i Jennifer: “Na bogi duadua ga oya rau a sega ni kauta kina na luvedrau ina Kingdom Hall. Ke sega keitou sa mai vakalolokutaki rau na veitinani.”

Ni tomana vakamalua o Terrell nodrau veivosaki, a kaya kina o Palczynski ni a sega ni nona inaki me vakamavoataka e dua, e vinakata ga me rau tiko vata kei Tracy ni domoni koya dina. A vakamacalataka o Terrell: “Au tukuna vua ni na sega ni rawa me veisautaka na ka sa yaco oti, ia ena rawa ga ni veisautaka na ka e se bera ni yaco. Au qai uqeti koya me lai tukuni koya vei iratou na ovisa. Au tukuna tale ga vua niu na sikovi koya yani i valeniveivesu qai vakavulica vua na iVolatabu.” E muri a qai tukuni ni se qai biu vuli ga o Palczynski ena 1987 sa dau nona vale tu na valeniveivesu kei na nodra vale na leqa na nodra vakasama. Tini ga na vula e bau vakila tu na bula galala.

O Terrell e dua na lotu Vakarisito sa dede nona veiqaravi vaqase ni ivavakoso. A vakayagataka gona na veika e kila kei na ivakaraitaki vakaivolatabu era a yaco dina ni veitalanoa tiko kei Palczynski ena nona saga me vakaceguya na lomana. Me kena ivakaraitaki, a talanoataka na ivakaraitaki ni dua na turaga vinaka, o Tevita nodra tui na Isireli, e a lomabibitaka tu na nona domoni wati Uraia, e dua na sotia ni mataivalu i Tevita. Ni sa bukete o yalewa a qai nakita o Tevita me vakamatei o Uraia ena gauna ni ivalu. Ni tukuni vakavinaka vei Tevita na nona ivalavala ca, a yaco me veivutuni dina qai vakadonui koya tale o Jiova.​—2 Samuela 11:2–12:14.

Ni rau sa veikilai, sa kacivi koya e dro voli oqo o Terrell ena yacana buli o Joby. Rau kele ena sitoa qai talai o Terrell me lai voli kakana kei na dua na retioyaloyalo dauveikauyaki. A tukuna vua o Palczynski ni na vakamatea e so tale kevaka ena vakatukutuku. A muria o Terrell na vosa nei koya e dro voli oqo ni kila vinaka tu na ituvaki veilecayaki e sotava tiko. Ni oti ga na nodrau sarava ena 11 na kaloko na itukutuku kaburaki me baleta na ivakarau kaukaua a cakava o Palczynski, sa qai mokoti Terrell o Palczynski qai vakalutu lo yani ina dua na itikotiko ena saula ni koro o Baltimore.

Ni oti tale e dua na macawa, a sega ni dro rawa o Palczynski ni a vesu mai na vale e vesuki ira tu kina e so. A kerei o Terrell me mai veivuke ena veivosaki baleta ni a cavuti koya o Palczynski. E ka ni rarawa ni a dreve na sasaga oya baleta ena 22 Maji era curu botea na vale oya na ovisa ra qai vanai Palczynski mate kina. Sega tale ni dua a mavoa.

E muri a taura kina o Terrell e rauta ni 600 na ilavelave ni Awake! e a vakavuna nona vakabulai. E veisoliyaka e drau na ilavelave vei ira na so tale. E vakavinavinakataka o Terrell ni sa vakamatautaka me dau wilika na itukutuku yaga ena Awake!, e nuitaki ni na vakatale ga kina vei iko.

[iYaloyalo ena tabana e 30]

William Terrell