E Kune e Vei na Vuli e Vinaka Duadua?

“Me vaka ga na kena vakayacoka ina irairai ni vatu na kena ceuti vakamaqosa kina e dua na ivakatakarakara totoka, e vakatale ga oya na vakayacoka ni vuli vua na tamata.”​—Joseph Addison, 1711.

O BAU vuli? E vuqa vei keda e rawa ni kaya io​—ia ena sega ga ni o keda kece. Nida sa vavaca yani oqo na ika21 ni senitiuri, e milioni vakamilioni na gone era sega ni vuli. E sa dede na kena yaco tiko na ituvaki oqo, e voleka gona ni duanabilioni na tamata uabula ena gauna oqo era sega ni kila na wilivola kei na volavola.

Ia, na vuli e dua na ka e gadrevi ena noda bula. E vuqa nikua era vakadeitaka ni oqo e nodra dodonu na gone kei ira na uabula, e sega ni nodra ga o ira era rawa ni sauma. Ena rawati vakacava na vuli kevaka e sega na ilavo kei na veika tale e so e gadrevi kina? Vakacava ke sega ni veiraurau na ivola ni vuli, de ra le lailai ga na qasenivuli vakaivola, se lailai na koronivuli?

Ia, e vei sara mada ena rawati kina na vuli e vinaka era uqeti kina na gonevuli yadua mera vakaitavi kina, mera vakarabailevutaka na nodra kilaka e baleta na veika e wavoliti ira, era na vakavulici tale ga kina ena veika vakayalo ena rawa ni veisautaka na nodra bula? Na vuli cava e vakabibitaka na itovo savasava, e bucina na ivakatagedegede ni bula e vinaka cake, qai solia na inuinui dei ni veigauna mai muri? Vakacava na vuli vaka oya, e rawa beka nida vuli kece kina?

Na Yavu ni Vuli e Vinaka Duadua

De na ka ni kurabui ni rawa nida vakaiotaka kece na taro oqori ni vuli e vinaka e rawa nida vuli kece kina. Baleta ni sa tiko rawa e dua na kena iyaya e vakayacoka sara vakalevu me yavutaki kina na vuli. Oqo na “ivola ni vuli” sa dokai tu mai vakadede, e rawa ni tauri taucoko se vakatikina ena sivia na 2,200 na veimataqali vosa ni vuravura. Sa voleka ni o keda yadua e rawa nida wilika e dua na kena ilavelave ena dua na vosa eda kila. Na ivola cava oya?

Oqo na iVolatabu, na ivola e kilai raraba ni ivola yaga duadua e se bau volai. “O koya e kila vinaka na iVolatabu e rawa ni vakatokai ni sa vuli vinaka,” e vola e dua na vuku ena itekivu ni ika20 ni senitiuri, o William Lyon Phelps. “E sega tale ni dua na vuli se itovo vakavanua, se mani vakacava sara na kena rabailevu kei na kena vakacerecerei, me . . . rawa ni sosomitaka.”

E umani ena iVolatabu e vica vata na ivola era volai ena loma ni 1,600 na yabaki. E kuria o Phelps me baleta na umaivola oqo: “Na noda nanuma, na noda vuku, na veika eda vakabauta, na noda ivola, na noda cakacaka ni liga kei na droini eda taleitaka, na ivakarau ni noda rai, e veivakamuai vakalevu duadua kina na iVolatabu ni vakatauvatani kei na ivola kece tale nira kumuni vata mai. . . . Au nanuma ni yaga cake vua e dua na kilaka vakaivolatabu ke sega mada ga ni yacova na vuli torocake, mai na nona yacova na ivakatagedegede ni vuli torocake qai sega ni kila na iVolatabu.”

E dua na ituvatuva ni vuli vakaitamera e yavutaki ena iVolatabu e sa muri tiko e vuravura taucoko ena nodra isoqosoqo lotu Vakarisito na iVakadinadina i Jiova. E rabailevu sara na vuli oqo mai na kena vulici wale ga na wilivola kei na volavola. E vukea na kena taravaki cake na vakasama kei na itovo savasava. E vakavulica na rai dodonu, e tara na bula ni tamata me baleta na veigauna mai muri, e solia e dua na yavu ni inuinui dei ni vinaka cake sara na veika sa tu oqo e matada ni vakatauvatani kei na veika sa sivi.

Yalovinaka mo vuli ena porokaramu ni vuli oqo e rawati kina na bula ena nomu wilika na ulutaga e tarava.