Ra Taroga na iTabagone . . .

Au na Walia Vakacava na Leqa ni Nona Biubiu o Tata?

“E dredre dina na gauna au a tubucake tiko kina ni sega o tamaqu. Au vinakata ga meu bau kauaitaki.”​—Eneri.a

O JOANA e yabaki 13 ena gauna a biuti iratou kina o tamadratou. Ni bobula tu ena alakaolo o tamana, e lailai sara na gauna e veitaratara rawa kina kei iratou na luvena mai na gauna a biubiu kina. E ka ni rarawa, ni sega ni o Joana wale ga; e vuqa tale vei ira na itabagone e sa biuti ira na tamadra.

Kevaka e yacovi iko na ituvaki oqo, ena dredre dina mo na walia. O na vakila ena so na gauna na mosi ni yalomu kei na nomu cudru. Ena so tale na gauna o na rarawa qai lomabibi. E rawa ni o na rawai sara mada ga mo be. Me vaka ga e kaya e dua na dauvolaivola ni iVolatabu, o Solomoni, “na veivakasaurarataki sa vukica na tamata vuku me tamata lialia.”​—Dauvunau 7:7.

‘E Lialia’

E vaka me “lialia” o Jemesa ni biuti iratou vakaveitinani o tamadratou. A kaya o Jemesa: “Au sega ni rogoca e dua na vosa, na vosa sara mada ga i tinaqu. Au dau veivala vakalevu. Au dau lasu, au qai dau lako vuni ena bogi baleta ni sega ni dua e vakavulici au. A saga me tarovi au o tinaqu, ia a dreve ga.” A bau vakavinakataka na bula i Jemesa na nona dau be voli? Dravusakulukulu. A kaya o Jemesa ni a sega ni bera na nona sa “vakayagataka na wainimate gaga, vakalutu vuli, qai sega ni rawata na nona veitarogi e koronivuli.” Sa qai torosobu ga na ca ni nona itovo. “Au butako ena veisitoa,” a tukuna o koya, “au dau butakoci ira tale ga na tamata. Au sa vesu oti vakarua qai bala i valeniveivesu vakalekaleka, ia a sega ga ni tarovi au.”

Ni tarogi na vuna e sa rui dau be kina, a kaya o Jemesa: “Ni yali o tamaqu, e sega ni dua e vakavulici au. Au sega ni bau vakasamataka na levu ni noqu dau vakararawataki tinaqu, o taciqu kei na ganequ, o yau sara tale mada ga. Au a gadreva wale ga na veikauaitaki kei na veivakavulici i tamaqu.”

Na dau be sa qai dau vakacaraka sara ga na ituvaki leqaleqa e sotavi tiko. (Jope 36:18, 21) Me kena ivakaraitaki o Jemesa, a sega ni vakararawataki koya wale ga, ia eratou lai sotava tale ga na ka mosimosi kei na rarawa o tinana kei rau na tacina. O koya e bibi sara, oya na nona dau be e dua e yaco kina me saqata sara tiko ga na Kalou. Baleta ni vakaroti ira na itabagone o Jiova mera talairawarawa vei tinadra.​—Vosa Vakaibalebale 1:8; 30:17.

iWali ni Cudru

O na walia rawa vakacava na nomu cudru kei na nomu yalocataki tamamu? Kena imatai, mo nanuma tiko ni sega ni bale vei iko na nona biubiu o tamamu. Se nona biubiu e kena ibalebale ni o sa sega ni lomani se sega ni kauaitaki. E dau mosimosi dina kevaka e sega ni saga o tama me veitaratara se veisiko mai. Ia e vuqa na tama nira biuta na vale era sega ni dau veitaratara kei ira na luvedra, sega ni baleta nira sega ni lomani ira, ia baleta ga ni ora na lomadra nira cakacala ra qai madua. E so tale, vakataka na tama i Joana, era bobula tu ena wainimate gaga se alakaolo, e vakaleqa kina na nodra ivalavala.

Ena ituvaki cava ga, mo nanuma tiko ni o rau na nomu itubutubu erau tawataucoko. E tukuna na iVolatabu: “Sai valavala ca ko ira kecega na tamata, ka ra sega ni yacova na ka e vakarokorokotaki kina na Kalou.” (Roma 3:23; 5:12) E dina ni oqo e sega ni mai ulubaletaki kina na ivalavala mosimosi kei na sega ni veikauaitaki. Ia nida nanuma dei tiko nida kawa ivalavala ca ena vakarawarawataka vei iko mo biuta tani yani vakamalua na cudru e veivakaleqai kei na yaloca.

E rawa ni vukei iko tale ga na ka e kaya na Dauvunau 7:10 mo walia rawa kina na nomu cudru kei na nomu yalocataki rau na nomu itubutubu. E veivakaroti na tikina oqo me kua ni dau vakasamataki na veika sa yaco oti: “Mo kakua ni kaya, E na vuku ni cava sa vinaka kina na gauna eliu ka ca na gauna oqo? ni sa sega ni vuku na nomu taroga na ka oqo.” O koya gona, mo kua ni vakasamataka tiko ga na veika vinaka dou a donuya vata, ena daumaka cake mo ciqoma ga na ituvaki o sotava tiko qai tovolea mo vakavinakataka.

Mo Vakaliuliu

Me kena ivakaraitaki, e rawa ni o vakaliuliu ena nomu veitaratara kei tamamu. E dina, o na vakasamataka ni a biuti kemudou o koya, sa na dodonu gona kina vua me na vakaliuliu ina nomudou veitaratara. Ia kevaka e sega ni vakayacora rawa o koya qai dau vakavurarawa vei iko na nomudrau sega ni veitaratara rawa, vakacava mo vakaliuliu o iko ena nomudrau veitaratara? Dikeva sara mada na ka a cakava o Jisu Karisito ena gauna eratou vakararawataki koya kina e so na nona itokani. Ena iotioti ni bogi ni nona bula vakatamata, eratou a biuti koya na nona yapositolo. A vosa dokadokataka o Pita ni na tiko dei ga kei Jisu veitalia ga na cava ena yaco. Ia a qai cakitaki Jisu o Pita—sega wale ga ni vakadua, a vakatolu!​—Maciu 26:31-35; Luke 22:54-62.

Ia veitalia ga na malumalumu i Pita a lomani koya tiko ga o Jisu. Ni vakaturi oti o Jisu, a rairai o koya vei Pita ena nona vakaliuliu me vakadeitaka tale na nodrau veiwekani. (1 Korinica 15:5) E vakavure vakasama dina na taro a tarogi Pita kina o Jisu, “Ko sa lomani au?” A sauma o Pita “Io, na Turaga; ko ni sa kila ni’u sa lomani kemuni.” Dina ga ni a vakamadua na nona itovo, a lomani Jisu tiko ga o Pita.​—Joni 21:15.

Ni sa vaka oya na ka erau sotava o Pita kei Jisu, e kena irairai ni rawa ni na vinaka tale ga na ka drau na sotava vakaveitamani. De rawa ni na veitaratara mai kina o tamamu kevaka o vakaliuliu me vaka beka na nomu talevoni vua, vola e dua na ivola, se o sikovi koya. A vakasamataka lesu o Eneri, e cavuti taumada: “Au a volavola ga vakadua vei tamaqu, qai volavola lesu mai ena nona kaya ni dua na ka na nona sakitaki au. Au vakawaqana na ivola oya qai vakayabaki na noqu vakarubeca tu ena lalaga ni noqu rumu. Au se maroroya tiko ga ena gauna oqo.”

O Joana kei rau na tacina eratou a vakaliuliu ena nodratou lai sikovi tamadratou, dina ni bobula tu ena alakaolo. “A sega ni bula vinaka sara o koya,” e kaya o Joana, “ia keitou marau ni raici koya.” De dua na nomu vakaliuliu ena lako vinaka tale ga vei iko. Kevaka e sega ni dua na ka e yaco ena imatai ni gauna, ena vinaka mo cegu mada vakalailai qai tovolea tale.

iWali ni Nomu Sega ni Taleitaki

E vakasalataki keda o Solomoni ni tiko “na siga me rawa kina nai yau, kei na siga me yali kina nai yau.” (Dauvunau 3:6) Ena so na gauna e dodonu me na ciqoma o itabagone ni sega ni vinakata o tamana me rau veikilai. Ke vaka kina, rairai ena dua na siga ena qai rarawataka o koya na ca ni nona a sega ni via kilai iko.

Ena gauna mada ga oqo, mo vakadeitaka ni nona sega ni taleitaki iko e sega ni kena ibalebale ni o tawayaga. E cavuta na daunisame o Tevita ena iVolatabu: “Ni sa laivi au na tamaqu kei na tinaqu, ena qai keveti au cake ko Jiova.” (Same 27:10) Io, e vakamareqeti iko na Kalou.​—Luke 12:6, 7.

O koya gona kevaka o yalolailai se lomabibi, masu vua na Kalou. (Same 62:8) Talaucaka vakadodonu vua na lomamu. Mo nuidei ni na rogoci iko qai vakacegui iko. A vola e dua tale na daunisame ena iVolatabu: “Ni sa rui levu na noqu nanuma sa leqa kina na lomaqu, sa vakamarautaka na yaloqu na nomuni dauveivakacegui.”​—Same 94:19.

Nomu dau maliwai ira vakavoleka na tacida lotu Vakarisito ena veivuke ina nomu walia na nomu sega ni taleitaki. E kaya na Vosa Vakaibalebale 17:17: “Sa loloma tiko e na veigauna kece na wekana na tamata, ka sa vaka na tacina e na gauna ni rarawa.” O na kunea na veiwekani dina vaka oqori ena ivavakoso lotu Vakarisito ni iVakadinadina i Jiova. Ena yaga sara tale ga ke o kila e so na qase ni ivavakoso. A solia na ivakasala oqo o Pita na gane i Joana: “Veivosaki kei ira na itabaqase ena ivavakoso, era dau veivuke vakalevu. Kevaka sa biuti iko o tamamu, tukuna na kena vakayacoka vei iko.” Ena rawa tale ga nira na solia na qase ni ivavakoso e so na ivakasala yaga ena nomu vakayacora e so na itavi e dau cakava o tamamu, me vaka na vakavinakataki ni vale.

Ena rawa tale ga ni veitokoni o tinamu. E dina ga ni na momosi tale beka ga na lomana ena levu ni nona rarawa. Ia kevaka o talaucaka ena yalo ni veidokai na lomamu vua, sega ni vakabekataki ni na saga o koya ena nona igu taucoko me na vukei iko.

Tokona na Nomu Vuvale!

Na nona sega ni tiko o tamamudou ena vakayacoka sara ga vakalevu ina nomudou vuvale. Ena gadrevi beka vei tinamu me na cakacaka—rairai ena gadrevi sara me rua na nona cakacaka—me qaravi vinaka kece kina na veika dou na bula kina. Ena gadrevi tale beka ga mo dou veitauriligataka vakaveitacini na nomudou itavi e vale. Ia o na rawa ni vakayacora oqo kevaka o bucina na loloma dina vakarisito. (Kolosa 3:14) Ena vukea me tiko tale ga vei iko na rai dodonu qai kauta tani na yaloca. (1 Korinica 13:4-7) E kaya o Pita: “E dodonu sara ga meu vukea na noqu vuvale, au marautaka tale ga niu kila niu vukei tinaqu tiko kei rau na ganequ.”

Sega ni vakatitiqataki ni nona biuta na vale e dua na tama e ka rarawataki qai mosimosi dina. Ia mo vakadeitaka ni nona veivuke na Kalou kei na nodra veivuke vakayalololoma na itokani kei na vuvale lotu Vakarisito ena rawa kina vei iko kei na nomu vuvale mo dou walia na leqa oqo.b

[iVakamacala e ra]

[iYaloyalo ena tabana e 30]

Era vakaliuliu e so na itabagone mera veitaratara kei tamadra