Veivuke Tawanamaki ni Yadra!

DAUVOLAVOLA NI YADRA! MAI BENIN

◼ Ni vakatulewataka o Noël, e yabaki 23 me sa biu vuli qai cakacaka vakatabakidua me dua na italatala ni iVakadinadina i Jiova, era vakatitiqataka na wekana ni na rawa ni qaravi koya vakailavo. A sega ni kunea rawa e dua na cakacaka vagauna. Koya gona, ni tabaki ena Awake! na ulutaga yaga “Five Keys to Finding a Job,” (Lima na Sala me Kunei Kina na Cakacaka) a wilika vakavica na iulutaga qori o Noël.a A yaga beka vua? Io, ia a sega ni namaka na sala a vakayacori kina qori.

A raici Noël e dua na dairekita ni koronivuli ni vunau tiko e veivale, qai tarogi koya ke iVakadinadina i Jiova. A vinakata na dairekita e dua tale na qasenivuli, ni kila vinaka tu nodra dau veivakavulici vinaka na iVakadinadina i Jiova, mani tarogi Noël ke kila e dua e via cakacaka vaqasenivuli. A kaya o Noël ni sega, a taroga sara o dairekita, “Vakacava ga o iko?”

A se sega vakadua ni bau veivakavulici ena dua na koronivuli o Noël, qai dau tata ena so na gauna. Ena rawa ni leqa kina o koya baleta nira vinakata na vakailesilesi ni vuli mera na veitarogi na qasenivuli me vakadeitaki kina nira na sega ni dau tata. Qai yalataka na dairekita vua: “Rawata mada nomu sitivikiti, qai mai cakacaka.”

E toso vinaka o Noël ena Koronivuli ni Vuli Vunau, na koronivuli e dau vakavinakataka cake na vosa e matanalevu qai dau vakayacori ena veimacawa ena ivavakoso ni iVakadinadina i Jiova. E dau vunau tale ga ena nona ivavakoso. Ia a taqaya ga ni lai veitarogi.

A solia sara vua o koya e caka veitarogi e dua na mekesini qai tukuna me wilika vakadomoilevu na parakaravu e makataki damudamu tu. E kidacala vakadua o Noël ni raica na ulutaga “Lima na Sala me Kunei Kina na Cakacaka.” E wilika taladrodro na parakaravu qori qai soli sara vua na nona sitivikiti.

A qai kaya o koya e caka veitarogi ni dau vakawilika na mekesini ni iVakadinadina i Jiova. E kaya, “E levu na itukutuku yaga ena mekesini qo, au dau vakayagataka ena caka veitarogi.”

Tekivu veivakavulici sara o Noël, qai vinakata na dairekita me cakacaka tale ena yabaki e tarava, ia a nanuma tiko o Noël me cakava e so tale na ka. A sureti me lai veiqaravi ena valenivolavola ni iVakadinadina i Jiova, na vanua e sa veiqaravi tiko kina ena gauna qo.

[iVakamacala e ra]