Au Vosota na Veivakatovolei ena Kaukaua ni Kalou
TALANOATAKA O VAZIR ASANOV
Au lade mai na noqu loga, vesuka na iVolatabu e toloqu qai vakaisulu sara vakatotolo. Ni bera niu lade i katubaleka, au biuta vata e so na idaba isulu ena dela ni loga qai ubia ena itutuvi me nanumi ga niu moce tu. Oti au sa qai cici yani ina Kingdom Hall, au masuta tale ga na veitokoni ni Kalou. A yaco qori ena 1991 niu se qai yabaki 14.
A U A sucu ena dua na korolevu ena ceva ni vanua sa vakatokai ena gauna qo me Kazakhstan, qo e dua vei ira na 15 na vanua a vakarurugi tu e liu ena lewa vakominisi. Rau Kurdish na noqu na itubutubu. Rau a vakavulici au vaka kina o ira na wekaqu, meu na dua na iliuliu vinaka mera na sereki kina na Kurdish mai na so na ituvaki vakaloloma. E buroro e lomaqu na noqu cati ira na meca ni Kurdish, vakavuna meu tu vakarau meu vala mera kua kina ni vakararawataki.
Ena icavacava ni veiyabaki ni 1980 au tekivu vulica na iVolatabu kei ira na iVakadinadina i Jiova, wili kina o tinaqu kei taciqu. Ia a vakatabuya o tamaqu me keitou veimaliwai kei ira na lotu vaKarisito. Ia, au tomana tiko ga noqu vuli. Ena vuvale vaKurdish e sega ni dua e dau saqata na ulunivuvale. Au lomani tamaqu, ia au taleitaka na ka dina au sa vulica tiko ena iVolatabu.
Veitusaqati e Vale Vaka Kina e Koronivuli
Dua na siga, a raica e dua na qasenivuli na ilavelave ni Watchtower ena noqu kato, mani lai tukuna sara vei rau noqu itubutubu. A mokuti au vakaukaua o tamaqu ena levu ni nona cudru, vakavuna me drodro mai ucuqu na dra. “O se lako tiko ga ina lotu ya?” e karaci au mai.
Ni oti ga ya, sa tukuna sara o tamaqu ni sa na sega ni wiliki au tale meu luvena. A mositi au dina na vosa qori! Ena gauna vata ya, sa ra galuvi au na lewenikalasi, so tale ra dau vosavakacacataki au e matanalevu. Era vakalailaitaka na kequ maka na qasenivuli, ra vakalialia tale ga na noqu vakabauta ena gauna ni kalasi, ra qai saga mera usuraka vei au nodra vakabauta.
Dina niu tusaqati, au se saga ga meu na tiko ena soqoni vaKarisito kece qai tukuna yani na noqu vakabauta vou. A qai kila o tamaqu niu se tomana tiko ga noqu veimaliwai kei ira na iVakadinadina, kei na noqu wili iVolatabu. Au a vaqara iulubale ena dua na Sigatabu me rawa niu lai soqoni kina. Totolo wale ga nona tukuna vei au o tamaqu meu lai moce. E kaya mai vakaukaua, “Tekivu qo lako yani, ena Sigatabu kece mo sa na moce ena gauna qo.” E yalataka ni na totogitaki au vakaukaua keu sega ni muria nona vosa, au sega ni vakabekataka ni na cakava dina.
Au masuta na Kalou dina o Jiova ena tagi me vakamalumalumutaka na lomai tamaqu, ia a sega ni veisau rawa. Au lai vakasamataka na nodra vakararawataki na Isireli mai Ijipita. Na itovo i tamaqu au lai nanumi Fero kina, ena nona sega ni sereki ira na Isireli mera lai sokaloutaki Jiova.—Lako 5:1, 2.
Noqu Vakatulewa
Au vakatulewataka meu lai soqoni ena dua na Sigatabu. Au masu ga vei Jiova ena nuiqawaqawa niu davo koto ena noqu loga. Ni rau curu yani ena rumu noqu itubutubu, au moce sara vakaura. E kaya sara o tamaqu, “Sa gone talairawarawa dina na luvequ.” A reguci au sara mani rau gole yani. Au masu tale vagumatua.
Ni rau tabogo ga yani vakalekaleka noqu itubutubu, me vaka a vakamacalataki ena itekitekivu ni italanoa, au duri mai na loga, dreta mai noqu ivava e ruku ni loga qai lade sara i katubaleka. Totolo wale ga na rua na aua ni soqoni, au qai vakasamataka tiko na cava ena yacovi au niu lesu i vale. Au marautaka ni a sega ni tukuni au o tinaqu. A raica ga niu biuta tu noqu isulu ena dela ni loga, au qai yali mai kina. Ia, a vakasalataki au ni na sega ni vunitaka tale e dua na ka vei tamaqu keu vakaruataka.
Ena 1992, au tukuna vei rau na noqu itubutubu ni sureti au e dua na noqu itokani meu lai tiko ena dua na soqo lavotaki. Ia, qori na nodra soqo ni tabacakacaka na iVakadinadina i Jiova, a caka ena siti o Taraz, voleka ni 100 na kilomita mai na taoni o Karatau na vanua keitou tiko kina. Qori na vanua au lai papitaiso kina meu vakaraitaka na noqu yalayala vei Jiova. Au mani kerea vei tinaqu ke rawa niu kauta mai ena vanua ra dau maroroi kina na manumanu e dua na vokete sore ni sunflower. Au tavuteketaka na sore ni sunflower, qai lai volitaki ena makete, meu sauma kina na noqu ilakolako ena soqo ni tabacakacaka.
Niu lesu mai, a taroga sara o tamaqu keu a marautaka na noqu gole kei na noqu itokani. Au tukuna vua ena yalodei niu a marautaka dina. Au kila ni a tokoni au dina o Jiova, baleta ni a sega tale ni levu na taro i tamaqu. Au taleitaka dina na ka e tukuna na Vosa Vakaibalebale 3:5, 6: “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua: mo vakarogotaka vua na nomu sala kecega, ia ena vakadodonutaka na nomui lakolako ko koya.”
Malumalumu Vakayalo
A sega ni oti rawa nona veitusaqati o tamaqu niu papitaiso oti. Niu tomana tiko ga noqu veimaliwai kei ira na iVakadinadina, e dau mokuti au vakaukaua ena gauna mada ga ra tiko kina e so kei na gauna keirau tiko taurua kina. Voleka ni vakamadualaki au ena veisiga, au sa dau tagi tu ga qai dau vakavuna noqu yalolailai. Rau saga noqu itubutubu kei ira na wekaqu meu sauva na isausau meu daunipolitiki. Qo na gauna e saga tiko kina o Kazakhstan me tugalala mai na veiliutaki ni Rusia. Eratou nanuma niu sa vakuai au tiko mai ena dua na ka vinaka.
E rogo ena qito na tuakaqu qai dau uqeti au o tamaqu meu muria na nona ivakaraitaki. Koya gona, ena icavacava ni 1994, au sa vakaitavi tale ga ena qito. Ni tiko vei au na kena taledi, au dau vakaicocovitaki kina qai vakacaucautaki niu kila vinaka na qito soka kei na qito ni soli vukivuki (gymnastic). Au vulica tale ga na lawa ni matanitu meu rawa ni taqomaka na veika e baleti ira na Kurds. Au lai galeleta sara na veika vakapolitiki qai vakaitavi ena kena tauyavu e dua na isoqosoqo ni itabagone ni Kurdish. Sa qai tekivu vakacaucautaki au o tamaqu.
“Sa Yaco na Lomamu, Ta”
Au sa malumalumu vakayalo, qai sega sara niu dau wili iVolatabu se tiko ena nodra soqoni na iVakadinadina i Jiova. Au lomavakacegu niu vakasamataka niu na qaravi Jiova tale ena gauna au sa na qase kina. Dua na gauna, a tarogi au o tamaqu keu se veimaliwai tiko kei ira na iVakadinadina i Jiova. Au kaya, “Sega. O sa qai marau? Sa yaco na lomamu, Ta.” E marautaka o koya na ka e rogoca qo. E sakitaka, “O sa qai luvequ dina!”
E rua na yabaki na noqu sa sega ni dau tiko ena soqoni, dina niu dau via tiko kina. Ia au sega ni lako baleta niu madua. Au nanuma nira na sega ni kauaitaka na lewe ni ivavakoso na veika sa yacovi au tu.
Ena gauna vata qori, au vakadeitaka kina ni sega tale ni dua na ka e vinaka cake ni vakatauvatani kei na qaravi Jiova. Au dau tukuna lo ga ‘niu a lomani koya dina!’ E uqeti au o tamaqu meu sasagataka na vuli ena univesiti. Au mani muria na ka e tukuna qai yalataka tale ga vua niu na rawata na kena koroi. Ia, au vakadeitaka e lomaqu ni gauna au sa na yaco kina ena univesiti e Almaty, dua na siti levu ena ceva kei Kazakhstan, au na qarai ira na iVakadinadina i Jiova.
Marautaki na Veisau ni iTuvaki
Sega ni dede noqu vuli ena univesiti, au sotava sara e rua na iVakadinadina ni rau vunau tiko ena dua na gaunisala e Almaty. Rau mani tarogi au, “O cei oni nanuma ni liutaka tiko na vuravura?”
“O Setani na Tevoro,” au sauma yani, “na meca i Jiova kei na kawatamata.” (2 Korinica 4:3, 4) Au vakamacalataka vei rau niu sa papitaiso oti, ia au malumalumu tu vakayalo.
Ena icavacava ni 1996, au sa tekivu vulica tale na iVolatabu kei ira na iVakadinadina. Ni oti e vica vata na vuli, sa gu na yaloqu meu qaravi Jiova tale, au qai tekivu vakaitavi tale ga ena cakacaka kece ra qarava na iVakadinadina i Jiova e Almaty. Au tekivu painia ena Sepiteba 1997.
A mai sikovi au o tamaqu ni oti e dua na yabaki. Keirau veimarautaki sara. A kerea na noqu veivosoti ena vuku ni veika e dau cakava vei au ena veiyabaki sa oti. E kaya ni taura cala na veika me baleti au kei na noqu vakabauta. Au mani tukuna, “Au lomani iko vakalevu Ta.”
Dua na ka na levu ni noqu marau ni taura o tamaqu na ivola vakaivolatabu qai kerea me dua nona iVolatabu, e kaya ni via wilika tasevu! Ni oti e dua tale na yabaki, rau qai mai sikovi au kei tinaqu. Ena Kingdom Hall, era gole yani vei rau na duikaikai mera lai vakabula ra qai vakamacalataki ira. E kurabui sara ga o tamaqu ena itovo ra vakaraitaka, qai vakavuna me taleitaka vakalevu na wilika na ivola era tabaka na iVakadinadina.
Veivakalougatataki Levu
Ena Sepiteba 2001, au vakamautaka e dua na goneyalewa totoka ni Rusia o Yelena. A papitaiso ena 1997 qai tekivu painia ena vula o Me 2003. E ikuri ni neirau marau, na nodrau sa vuli iVolatabu tiko kei ira na iVakadinadina na noqu itubutubu, rau qai toso vinaka vakayalo. Ia, au sega vakadua ni vakabauta na itukutuku qori me yacova ni sa tukuna sara ga vei au o tamaqu. E tukuna vei au ena talevoni, ni Kalou dina ga o Jiova!
Au marautaka dina niu rawa ni caka vuli iVolatabu e Almaty vei ira na gole mai ena veivanua me vakataki Jaina, Irani, Pakistan, Siria, kei Taki. Dua na gauna tiko ga qo, a kerei au e dua na bete ni Iran me keirau vuli iVolatabu ena vosa vakaPerisia. A taleitaka e dua na jenerali vakacegu mai Afghanistan na veika e vulica me baleti Jiova. Au marautaka dina niu vakavulica e dua mai Siria ena noqu vosa ga, vaka kina noqu vakavulica e so ena vosa vaKazakh kei na vosa vakaRusia, qori e so tale na vosa au vulica niu se gone.
Keirau se tomana tiko ga ena gauna qo kei Yelena na neirau veiqaravi ena ivavakoso vaKazakh, e dua vei ira na sivia na 35 na ivavakoso ni iVakadinadina i Jiova e Almaty. Ia, ena yabaki sa oti, keirau marau ni keirau bau veiqaravi vakalekaleka ena valenivolavola ni tabana vou ni iVakadinadina i Jiova e toka volekati Almaty.
Au a vakavulici ena dua na gauna meu cati ira na meca, ia e qai vakavulici au o Jiova meu lomani ira kece. Au vakadeitaka qo meda kua vakadua ni biuta na noda veiqaravi vei Jiova kevaka mada ga era saga vakaukaua na wekada kei ira na noda itokani mera cakava vaka kina. (Kalatia 6:9) Ena gauna qo keirau marau vakaveiwatini ni keirau ‘oga tiko ga ena cakacaka ni Turaga.’—1 Korinica 15:58, VV.
[Tikina bibi ena tabana e 23]
A vakasalataki au o tinaqu ni na sega ni vunitaka tale vei tamaqu na ka au dau cakava
[iYaloyalo ena tabana e 25]
Na Kingdom Hall e Karatau, au gole kina niu se itabagone
[iYaloyalo ena tabana e 25]
Rau na noqu itubutubu, rau sa taleitaka tiko ena gauna qo na noda cakacaka
[iYaloyalo ena tabana e 25]
Neirau siga ni vakamau
[iYaloyalo ena tabana e 25]
Kei Yelena, ena valenitabana vou volekati Almaty