Na Rai ni iVolatabu

E Dodonu Beka Meda Vakayagataka na iCavuti?

NIRA vunautaka tiko ena veisiga na itukutuku vinaka ni Matanitu ni Kalou na lotu vaKarisito ena imatai ni senitiuri, era dau veivosaki kei ira na vakailesilesi vakamatanitu—so era vakaitutu lalai, ia so tale e toka sara e cake. Era sega ni dau vakayagataka na imuri i Jisu na icavuti me kilai kina nodra itutu, cakacaka, se na ka era rawata. Ia sa matau vei ira na veiliutaki tiko ena gauna ya mera kacivi ena kedra icavuti. Me vakataki koya ga na empara ni Roma, e kena icavuti o “Akusito.”​—Cakacaka 25:21.

Nira mai tu gona na tisaipeli i Jisu ena matadra na vakailesilesi vakamatanitu, na cava era dau cakava me baleta na icavuti me dokai kina e dua? Vakacava o keda?

Sega ni Tautauvata Nodra Dokai kei na Nodra Vakadonui

E vakaroti ira na vakabauta vata na yapositolo o Paula mera “solia vei ira kecega na ka e dodonu . . . vakarokorokotaki ira e dodonu me ra vakarokorokotaki.” (Roma 13:7) Okati tiko e ke na nodra kacivi na vakailesilesi ena kedra icavuti. Na kena dau vakaturagataki se ra vakasakasakataki e so na vakailesilesi ni matanitu sa dau ivakarau tu ga ni nodra itovo e so. Ia era na rairai taroga e so, ‘Rawa vakacava niu cavuta qori vua e dua au nanuma ni sega ni vinaka nona itovo se dau veidokai?’

E levu na vakailesilesi ni matanitu era dau qarava vinaka nodra itavi, ia era sega ni nuitaki kece. Na iVolatabu e se uqeti keda tiko ga meda vakamalumalumu vei ira na tui kei na kovana “e na vuku ni Turaga.” (1 Pita 2:13, 14) Koya gona, e se vakadonuya tiko ga na Kalou na noda doka na nona itutu ni veiliutaki e dua na vakailesilesi ni matanitu, ena uqeti keda tale ga qori meda dokai ira ena ka ga e dodonu mera dokai kina.​—Roma 13:1.

E sega ni veivosakitaki tiko e ke na nona itovo e dua na vakailesilesi ni matanitu. E sega ni dodonu me vakatau ina nona itovo na noda dokai koya. Ke da kaciva e dua ena nona icavuti, sega ni kena ibalebale qori nida tokona na nona itovo. A vakavotui qo ena dua na ka a yaco ena bula i Paula.

Nona Vakayagataka o Paula na iCavuti

A vesu na yapositolo o Paula e Jerusalemi ni a beitaki vakailasu, qai kau vei Filikesa, na kovana e Jutia. Sega ni dau ivakaraitaki vinaka na kovana qori ena nona ilesilesi vakamatanitu. A vola na daunitukutuku makawa ni Roma o Tacitus ni o Filikesa “e nanuma ni rawa ni cakava na ka ca ia ena sega ga ni totogitaki kina.” E taleitaka cake na veivaqumi mai na nona tokona na lewadodonu. Ia a doka tiko ga na kovana qori o Paula ena rua na yabaki a vesu voli kina, rau qai dau veitalanoa—nuitaka tiko o Filikesa ni na vaqumi koya ena ilavo, ia a vunau tiko ga vua o Paula ena gauna taucoko qori.—Cakacaka 24:26.

A qai sosomitaki Filikesa o Fesito, lai rogoca kina na kovana vou qo na kisi i Paula mai Sisaria. A vinakata o Fesito mera taleitaki koya na iliuliu vakaJiu, mani vakatututaka me lai veilewai o Paula i Jerusalemi. Ia e kila o Paula ni na sega ni rogoci vinaka na nona kisi ena vanua ya, mani vakatakila kina nona dodonu ni dua na kai Roma: “Au sa cavuti Sisa me lewai au”!​—Cakacaka 25:11.

A sega ni kila o Fesito me vakamacalataka vakacava vei Sisa na ka e beitaki kina o Paula, qai bulati ga ni mai sikovi Fesito o Tui Akaripa II ena nona via kila na veika me baleta na kisi ya. Na siga e tarava, era ukucavu mai na turaganivalu, kei ira na turaganikoro mera curu ina vale ni veitarogi kei na tui.—Cakacaka 25:13-23.

Ni sureti o Paula me vosa, e a cavuta na icavuti kemuni na “tui” me iucu ni nona vosa, qai vakacaucautaki Akaripa ena nona kila vinaka na nodra bula vakavanua kece na Jiu kei na veika era dau veiletitaka. (Cakacaka 26:2, 3) Ena gauna tale ga ya, a kilai levu tu ni a veibutakoci tiko o Akaripa kei na ganena. Sega ni vakabekataki ni a kila vinaka tu o Paula na lolovira ni nona itovo. Ia e se vakaraitaka tiko ga vua na veidokai e dau caka vua e dua na tui.

E kaya o Fesito ena nona beitaki Paula: “I Paula, o sa lialia”! A sega ni cudru o Paula, e sauma lesu ga vakamalua ena nona kacivi koya na kovana ena icavuti “vakaturaga sara.” (Cakacaka 26:24, 25) A vakaraitaka vua o Paula na veidokai e veiganiti kei na nona itutu. Ena ivakaraitaki qo, e cadra kina na taro, me vakaiyalayala beka na nodra dokai na ivakalesilesi?

Na Veidokai e Vakaiyalayala Ga

E vakaiyalayala ga na veiliutaki vakamatanitu, me vaka e tukuni ena Roma 13:1, (NW): “O ira kece na veiliutaki era veiliutaki tiko ga ena iyalayala e dui vakatara vei ira na Kalou.” Sa vaka kina na nodra dokai na vakailesilesi ni matanitu, ni na vakaiyalayala tale ga. E vakaraitaka o Jisu ni dodonu me vakaiyalayala ga na nodra dokai e so ena nona tukuna vei ira nona tisaipeli: “Dou kakua ni vakatokai mei Vakavuvuli: ni sa dua bauga na nomudoui Vakavuvuli; ia dou sa veiwekani kecega. Dou kakua talega ni vakatoka e dua me tamamudou e vuravura; ni sa dua bauga na Tamamudou, ko koya mai lomalagi. Dou kakua talega ni vakatokai me turaga: ni sa dua bauga na nomudou Turaga, ko koya na Karisito.”​—Maciu 23:8-10.

Era duidui na veiqaravi vakalotu kei ira na vakailesilesi ni matanitu, ena vakatau tale ga kina na veidokai e veiganiti me na caka vei ira. Ke ra mani vakayagataka na vakailesilesi ni matanitu na icavuti vakalotu mera kacivi kina, ena muri ga na ivakasala i Paula me kua ni vakayagataki na icavuti va qori. Dina ni na vakaraitaka nona veidokai o koya e muria na ivakasala vakaivolatabu, ia ena uqeti koya na nona lewaeloma e vakavulici ena iVolatabu me kua ni vakayagataka na icavuti vakalotu qori, ni dodonu meda “solia . . . vei koya tale ga na Kalou na ka sa nona na Kalou.”​—Maciu 22:21.

BAU VAKASAMATAKA?

◼ Era raici ira vakacava na vakailesilesi ni matanitu na imuri i Jisu?​—Roma 13:7.

◼ A vakayagataka beka na yapositolo o Paula na icavuti ni veidokai vei ira na ivakalesilesi ni matanitu? ​—Cakacaka 25:11; 26:2, 25.

◼ Na icavuti cava so e sega ni taleitaka o Jisu?​—Maciu 23:8-10.

[iYaloyalo ena tabana e 11]

E vakacava na itautau ni vosa i Paula vei Akaripa?