Vakarautaki ni Vunau ena iVavakoso

E VAKARAUTAKI na porokaramu ni Koronivuli ni Vuli Vunau me yaga raraba vei ira na lewe ni ivavakoso. E vakarautaki tale ga e levu na ka yaga ena vo tale ni soqoni, vaka kina na soqo ni tabacakacaka kei na soqo ni tikina. Ke o lesi mo vakaitavi ena dua vei ira na soqoni oqo, o sa lesi ena dua na itavi bibi sara. A uqeti Timoci​—e dua na ivakatawa lotu Vakarisito​—na yapositolo o Paula me qarauna nona veivakavulici. (1 Tim. 4:16) O ira na mai tiko ena soqoni vakarisito era sa vagalalataki ira sara ga mai vakatabakidua​—e so era sasaga sara ga​—mera mai tiko mera vakavulici ena veika e baleta na nodra veiwekani kei na Kalou. O koya gona, e ka dokai dina ke noda na itavi meda veivakavulici ena soqoni! Na cava mo cakava mo vakayacora vinaka kina na itavi dokai oqo?

Veitikina Bibi Mai na Wili iVolatabu

Na itavi ni koronivuli oqo e yavutaki mai na tikinivolatabu e lesi me wiliki ena loma ni macawa. Me vakabibitaki na sala e yaga kina vei keda ena gauna oqo na lewe ni veitikinivolatabu. Me vaka e volai ena Niemaia 8:8 (NW) e wilika vakadomoilevu o Esera kei ira na nona itokani na Vosa ni Kalou, e “bulabula nodra wiliwili,” era vakamacalataka ra qai vakatakila na kena ibalebale. Nomu vakaitavi ena veitikina bibi mai na iVolatabu e gauna vinaka tale ga mo vakayacora kina oqo.

Mo na vakarautaka vakacava na itavi vaka oqo? Ke rawa, wilika na wase ni iVolatabu e lesi vei iko ni vo e dua se vica na macawa. Oti qai vakasamataka na nomu ivavakoso kei na veika e gadrevi kina. Masulaka. Na ivakasala cava, ivakaraitaki cava, kei na ivakavuvuli cava mai na wase ni iVolatabu e lesi vei iko era tara vinaka na veika gadrevi oqo?

E bibi na vakekeli. E tiko beka nomu Watchtower Library ena CD-ROM se nomu Watch Tower Publications Index? Ke vaka kina, vakayagataki ira vinaka sara. Ni o vakekeli ena veika e sa tabaki oti ena vica na tikinivolatabu o digitaka mo vakamacala kina, de dua o na raica na vanua, na gauna, kei na vuna e volai kina na tikinivolatabu oqo. O na kunea tale ga na ivakamacala ni kena vakayacori na parofisai, na digovi ni ka era kaya na veitikina yadudua me baleti Jiova, se na ivakamacala ni so na ivakavuvuli. Me kua ni sivia na tikina o digia mo vakamacala kina. Digia e vica wale ga. E vinaka cake me lailai ga na tikina o vakamacala kina, ia mo vakamacalataka vinaka sara.

Ena vinakati tale beka ga ena nomu itavi mo sureti ira na vakarorogo mera vakamacalataka na sala e yaga kina vei ira na wase ni iVolatabu e lesi me wiliki ena loma ni macawa. Era raica beka e dua na ka ena yaga vei ira ena nodra vuli vakataki ira, nodra vuli vakavuvale, ena cakacaka vakaitalatala, se nodra bula sara ga? Na itovo cava i Jiova e laurai ena nona veitaratara kei ira na tamata yadua, se veimatanitu? Na cava era vulica na vakarorogo e vaqaqacotaka nodra vakabauta, era kilai Jiova vinaka tale ga kina? Kua ni vakamacalataka vakalevu na veika matailalai qai vereverea. Vakabibitaka ga na ibalebale ni veitikinivolatabu o digia kei na kena yaga.

Vosa ni iVakasala

Ena yavutaki oqo mai na dua na ivola, se Na Vale ni Vakatawa, se Yadra! Vakalevu me dau levu tale na itukutuku eda kumuna, lailai eda rawa ni vakayagataka. Mo na cakava vakacava na nomu itavi? Me kua ni nomu inaki me caka ga me oti na itavi e lesi vei iko​—saga mo veivakavulici. Na ivakatawa e dodonu me “kenadau ena veivakavulici.”​—1 Tim. 3:2, NW.

Me tekivu nomu vakavakarau ena nomu vulica mada na itavi e lesi vei iko. Wilika na veitikinivolatabu. Vakasamataka. Saga mo cakava rawa oqo ni se bera sara na siga mo vakaitavi kina. Kua ni guilecava ni o ira na mataveitacini era dau vakauqeti mera wilika rawa yani na vanua o na lai vosa mai kina. E sega ni nomu itavi mo lai railesuva wale ga, se mo vakalailaitaka me rauta na gauna e lesi vei iko. E nomu itavi mo vakaibalebaletaka, mo vakaraitaka na sala e rawa ni taurivaki kina. Vakayagataka e vica na tikina veiganiti qai vakamacalataka ena sala me na yaga dina kina ina ivavakoso.

E rawa nida vakatauvatana na ivavakoso kei na gone. Era duidui na gone, na ivavakoso tale ga era duidui. Na itubutubu e maqosa ena veivakavulici ena sega ni cavuqaqataka ga vei luvena na ivakaro savasava. Ena vakamacalataka vakavinaka na vuna e tabu kina e so na ka kei na vinaka ena vakila ni cakava e so tale na ka. Ena kauaitaka na itovo i luvena kei na leqa e sotava tiko. E vakatale ga oqo na qasenivuli ena ivavakoso. Ena saga me kila na veika e ganiti ira na lewe ni ivavakoso. Ia, na qasenivuli yalomatua ena qarauna me kua ni vakayagataka na ivakaraitaki ena rawa ni vakavumadua vua e dua e rogoci koya tiko. Ena vakamacalataka na ka vinaka era sa vakila tiko e so ena nodra muria na sala i Jiova, ena vakabibitaka tale ga e so na ivakasala vakaivolatabu ena vukei ira na lewe ni ivavakoso mera walia vinaka kina na leqa era na dui sotava.

Na veivakavulici e vinaka e tara na lomadra na vakarorogo. Na veivakavulici vaka oqo e sega ni vakasavui wale ga kina na itukutuku, e sagai tale ga kina me kilai na ibalebale ni itukutuku kei na kena yaga. Ena rawati ga oqo ke kauaitaki o koya e vakavulici. O ira na ivakatawa vakayalo e dodonu mera kila na qelenisipi. Ke ra nanuma tiko na leqa era dui sotava e so na lewe ni ivavakoso, ena qai rawa ni veivakayaloqaqataki nodra vosa, era na kila na ka mera tukuna me laurai kina nodra veikauaitaki kei na veinanumi.

Era sega ni lecava na dauniveivakavulici ni vunau yadua e dodonu me matata na kena inaki. Me talaucaki na itavi ena kena icakacaka me matata kina na veitikina bibi, me rawarawa ni nanumi. Ni oti na itavi, me rawarawa nodra nanuma na vakarorogo na vakasama yaga ena tara na nodra bula.

Soqoni ni Cakacaka

E duidui toka na vosa e yavutaki ena Noda Cakacaka Vakaitalatala ni Matanitu. Na itavi oqo e sega kina ni nomu na digidigi, o na talaucaka taucoko ga na ka e sa vakarautaki. Vukei ira na vakarorogo mera vakasamataka vakatitobu na tikinivolatabu e yavutaki kina e dua na ivakasala. (Taito 1:9) E lewai na gauna mo vosa kina, levu na ulutaga ena sega ni rawa ni kuri tale ena so na ivakamacala.

So na gauna o na sureti mo vosa ena dua na ulutaga e sega ni tiko ena Noda Cakacaka Vakaitalatala ni Matanitu. O lesi beka mo vosa ena dua na ulutaga ena Vale ni Vakatawa, se vakamacalataki ga vakalekaleka e so na ka mo na vosa kina. Ni o qasenivuli, e nomu itavi mo na raica vata na ka e lesi vei iko kei na ka e gadrevi ena ivavakoso. De yaga mo vakayagataka e dua na vosa vakatautauvata lekaleka, se mo tukuna e dua na vakasavuirogorogo e veiganiti. Nanuma tiko ni sega ni nomu itavi wale ga mo mai vosa ena buturara, mo vukei ira na lewe ni ivavakoso mera vakayacora vinaka na cakacaka e lesia vei keda na Vosa ni Kalou, mera marautaka tale ga nodra vakayacora.​—Caka. 20:20, 21.

Ni o vakarautaka nomu itavi, vakasamataka na kedra ituvaki na lewe ni ivavakoso yadua. Vakacaucautaki ira ena ka era sa rawata. Ena vukei ira vakacava na ka o vakarautaka tiko mera maqosa kina ena cakacaka vakaitalatala, mera marautaka tale ga?

Era na vakatarogi beka e so ena nomu itavi, se na caka na vakatasuasua? Ke vaka kina, e dodonu me vakarautaki ni se vo levu na gauna. Ena rawarawa beka mo lesia ga e dua me vakarautaka vei iko, ia e sega ni vinaka sara. Ena vinaka ga me vakatovotovotaki na vakatasuasua se o ira era na vakatarogi ni bera na siga ni soqoni. Me vakarautaki vinaka sara na tiki ni nomu itavi oqo me rawa ni kuria na vinaka ni nomu veivakavulici.

Soqo ni Tabacakacaka kei na Soqo ni Tikina

O ira na tagane matua era dau vunau maqosa e matanalevu, ra qai kenadau ena veivakavulici, ena yaco beka na gauna era na digitaki mera vakaitavi ena porokaramu ni soqo ni tabacakacaka se soqo ni tikina. Era gauna namaki ni veivakavulici vakayalo na gauna oqo. E duidui na vunau ena lesi vei ira, e so era vunau wiliki, e so ena soli vei ira na suinivunau, se soli ga vei ira na ivakamacala lekaleka me yavutaki kina nodra vosa. E so tale era na lesi mera vakarautaka na drama, o ira oqo ena soli ga vei ira na kena ivakamacala. Ke o vakacolati ena dua vei ira na itavi dokai oqo, vulica vinaka na ka e soli vei iko. Vulica me yacova ni sa matata vei iko, o sa kila na kena yaga.

O ira e lesi vei ira na vunau wiliki e dodonu mera wilika sara ga na vosa yadua ena nodra itavi. Era sega ni veisautaka tale na vosa se ituvatuva ni vosa ena tikidua e soli vei ira. Era vulica vinaka me matata vei ira na tikina e vakabibitaki, kei na veitikina lalai era tokona. Era vakatovotovotaka nodra wiliwili i cake me yacova nira sa vakabibitaka donu na vosa me vakabibitaki, e bulabula, ra vosa vakayalololoma, ra kauai, ra vosa ena doudou kei na vakabauta dei, qai veiganiti na voqa ni domo­dra kei na ivavakoso levu era na vosa tiko kina.

O ira na tacida e soli vei ira na suinivunau me yavutaki kina nodra vunau, e nodra itavi mera qai vakarabailevutaka, ia mera muria tiko ga vakavoleka na usutu bibi ni suinivunau. Me kua ni wilika na suinivunau o koya e vunau, me kua tale ga ni vakarautaka nona vunau me vaka na vunau wiliki. Me vu sara ga mai lomana na ka e cauraka ena buturara. E bibi me muria na iwasewase ni gauna e sa vakarautaki ena suinivunau, me rawa kina ni vakamatatataka na tikina bibi kece. O koya e vunau e dodonu me taurivaka vinaka tale ga na ile kei na tikinivolatabu era volai ena ruku ni veitikina bibi yadua. E sega ni dodonu me kuria e so na ka e vinakata ga o koya, me sega ni vakayagataki kina na veitikina e sa vakarautaki ena suinivosa. E macala vakasigalevu ni yavutaki na veivakavulici mai na Vosa ni Kalou. E nodra itavi na qase lotu Vakarisito mera “vunautaka na Vosa.” (2 Tim. 4:1, 2) O koya gona e vunau e dodonu me kauaitaka sara ga na veitikinivolatabu era volai ena suinivunau​—me vu mai kina nona ivakamacala, me vakaibalebaletaki ira tale ga.

Kua ni Lokuyara

O dau vakaitavi wasoma ena nomu ivavakoso? Na cava mo cakava mo vakarautaka vinaka kina na nomu itavi? Me kua ni sa voleka ga nomu vakaitavi mo qai vakarautaka.

Ena yaga ga ina ivavakoso na vunau e vakasamataki vinaka. O koya gona, vakamatauni iko mo dau vakawilika nomu itavi ena gauna ga o taura kina. Ena rawa kina ni o lai vakasamataka ni o qarava tiko na nomu cakacaka ni veisiga. Ni vo e vica na siga se macawa mo vakaitavi, o na rairai rogoca e so na ka ena yaga vei iko ena nomu vakarautaka nomu itavi me ganiti ira na vakarorogo. De na basika e so na ituvaki ena sota donu kei na nomu itavi. Ena taura beka na gauna nomu wilika kei na nomu vakasamataka nomu itavi ni o se qai taura ga, ia ena yaga. Ni o qai dabe mo vakarabailevutaka nomu suinivunau, o na vakila na vinaka ni nomu a vakasamataka yani vakavinaka. Ni o vakarautaka vaka oqo nomu itavi, o na sega soti ni lomaocaoca, ena yaga na ka o na talaucaka, ena tara tale ga na lomadra na lewe ni ivavakoso.

Ena nomu vakayagataka vinaka na isolisoli ni Kalou e solia vei iko me salavata kei na nona porokaramu ni veivakavulici, o na vakarokorokotaki koya, o na vu ni veivakalougatataki tale ga vei ira era lomani koya.​—Aisea 54:13; Roma 12:6-8.