Gauna kei na Vuna me Ubi Kina na Ulu

Na gauna cava soti me ubia kina na uluna na yalewa lotu vaKarisito, ena vuku ni cava? Meda veivosakitaka mada na ka e tukuna na yapositolo o Paula me baleta na tikina qo, ni na dusimaki keda ena vakatulewa donu e vakalagilagi kina na Kalou. (1 Korinica 11:3-16) Tolu na tikina meda vakasamataka: (1) itavi e cakava na yalewa lotu vaKarisito ena vinakati me ubi kina na uluna, (2) ituvaki e dodonu me ubi kina na uluna, kei na (3) vuna me ubi kina na uluna.

iTavi. A cavuta o Paula e rua: masu kei na parofisai. (Tikina e 4, 5) Na masu na noda vosa vei Jiova ena yalovakarokoroko. Nikua, na parofisai e vakaibalebaletaka nona veivakavulici mai na iVolatabu e dua na italatala lotu vaKarisito. E tukuna tiko beka o Paula ni dodonu me ubia na uluna na yalewa ena gauna kece e masu se veivakavulici kina ena iVolatabu? Sega. Ena vakatau ena ituvaki e masu se veivakavulici kina.

Rua na ituvaki e cavuta o Paula—vuvale kei na ivavakoso. E kaya: “E ulu ni yalewa na tagane, . . . na yalewa yadua e masu se parofisai qai sega ni ubia na uluna e sega ni doka na uluna.” (Tikina e 3, 5) Ena vuvale, o Jiova e lesia na tagane vakawati me ulu ni yalewa. Ke raica vakamamada o yalewa na lewa i tagane, ena vakamaduataki watina ke qarava eso na itavi e lesia o Jiova vei tagane. Kaya mada ke vinakati me caka vulivolatabu ni tiko o tagane, ena ubia na uluna me vakaraitaka nona dokai watina. Ke papitaiso o tagane se sega, ena ubia ga na uluna o yalewa ni ulunivale o watina.a Ena ubia tale ga na uluna ke masu se veivakavulici ni tiko o luvena tagane papitaiso. Sega ni kena ibalebale ni ulunivale o luvena, ia e vakasamataki tiko ga na lewa e soli vei ira na tagane papitaiso ena ivavakoso vaKarisito.

Me baleta na ivavakoso, e kaya o Paula: “Ke dua e via veiletitaka me muria eso tale na ivakarau, e sega ni tiko e dua tale na ivakarau, e sega tale mada ga ena ivavakoso ni Kalou.” (Tikina e 16) Ena ivavakoso vaKarisito, e soli na lewa vei ira na tagane era papitaiso. (1 Timoci 2:11-14; Iperiu 13:17) Era lesi ga na tagane mera qase se dauveiqaravi ni ivavakoso qai nodra itavi lesi vakalou mera vakatawana na sipi ni Kalou. (Cakacaka 20:28) Ia ena rairai kerei ena so na gauna na yalewa lotu vaKarisito me qarava e dua na itavi e dau lesi ga vua na tagane papitaiso e rawata na kena ivakatagedegede. De na kerei me liutaka na soqoni ni cakacaka vakavunau ke sega ni tiko e dua na tagane papitaiso. Se vakayacora e dua na vulivolatabu sa loku oti tu qai tiko kina e dua na tagane papitaiso.b Na itavi qori e semati ena ivavakoso vaKarisito, ena ubia gona o yalewa na uluna me vakaraitaka ni itavi e cakava e lesi ga vei ira na tagane.

Ena yasana adua, levu na ituvaki ena sega ni ubia kina o yalewa na uluna. Kena ivakaraitaki, ni vakamacala ena soqoni vaKarisito, cakacaka vakavunau kei watina se dua tale na tagane papitaiso, vulivolatabu se masu kei ratou na luvena bera ni papitaiso. Ena rairai vure eso tale na taro me baleta na tikina qo, ena daumaka gona me vakekeli o yalewa ke sega ni matata vua na ka me cakava.c Ke se lomatarotaro tiko ga qai uqeti koya nona lewaeloma me ubia na uluna, e sega ni cala oya, me vaka e laurai ena iyaloyalo ena tabana e 241.

Vuna. E tukuni ena tikina e 10, e rua na vuna me ubia kina o yalewa lotu vaKarisito na uluna: “Me tiko . . . e ulu i yalewa na ivakatakilakila ni nona vakamalumalumutaki koya ena vukudra na agilosi.” Meda veivosakitaka mada e liu na matavosa “ivakatakilakila ni nona vakamalumalumutaki koya.” Nona ubia na uluna na yalewa lotu vaKarisito e vakaraitaka ni doka na lewa e solia o Jiova vei ira na tagane papitaiso ena ivavakoso. E vakaraitaka tale ga nona lomani Jiova kei na nona yalodina vua na Kalou. Na ikarua ni vuna e vakavotui ena matavosa “ena vukudra na agilosi.” E yaga vakacava vei ira na agilosi na nona ubia na uluna na yalewa?

Era kauai na agilosi ena kena dokai na lewa vakalou ena isoqosoqo i Jiova mai lomalagi se vuravura. Noda vakamalumalumu gona na tamata ivalavala ca e yaga vei ira. E dodonu tale ga mera vakamalumalumu na agilosi ina ituvatuvanaki i Jiova—qori na ka era lekata eso ena veigauna sa oti. (Juta 6) Era na rairai raica na agilosi ni dua na yalewa lotu vaKarisito e matua cake vakayalo, levu na ka e kila, qai rairai vuku cake mai vua e dua na tagane papitaiso ena ivavakoso, ia se vakamalumalumu ga ina nona lewa na tagane. Eso na yalewa lotu vaKarisito era lumuti qai nodra ivotavota mera veiliutaki kei Jisu. Na itavi ena lai qarava e lomalagi e cecere sara mai na nodra itavi na agilosi. Dua na ivakaraitaki totoka mera vuli kina na agilosi ena gauna qo! Io, e ka dokai dina nodra talairawarawa, yalodina kei na nodra vakamalumalumu na yalewa lotu vaKarisito kece e matadra na milioni vakacaca na agilosi yalodina!