iVakadinadina i Jiova​—Ra Toso Tiko ga ena Lomadei!

Macala ni Bose Vakayabaki

SA TAKALEVU ena gauna oqo na lomalomarua kei na vakatitiqa. Ia, era kilai na lotu Vakarisito iVakadinadina i Jiova nira lomadei tu ga. E matata oqo ena bose vakayabaki ni Watch Tower Bible and Tract Society of Pennsylvania, e vakayacori mai Jersey City, New Jersey, ena Assembly Hall ni iVakadinadina i Jiova ena siga Vakarauwai, 7 Okotova, 2000.a

Ena idola ni nona vosa e kaya kina o John E. Barr, na jeameni, e lewe tale ga ni iLawalawa Dauvakatulewa ni iVakadinadina i Jiova: “Mai na vica vata na bilioni na lewe i vuravura, o keda ga eda kila da qai vakabauta ni o Jisu Karisito na Luve i Jiova lomani, sa veiliutaki tiko vakatui mai lomalagi ena kedra maliwa na kena meca.” Na ivakaraitaki ni lomadei vaka oqo e laurai ena ono na itukutuku vakatubuqoroqoro mai na veiyasa i vuravura.

Valuti na Vakatevoro ena Dina ni iVolatabu Mai Haiti

E takalevu toka e Haiti na vakatevoro. E kaya o John Norman, e liutaka na Komiti ni Tabana, nira “dau vakacuru me taqomaki ira.” E vakatitiqataka oqo e dua e dauvakadraunikau ni yali e dua na yavana ena vakacalaka. ‘E rawa vakacava ni yaco vei au na ka oqo kevaka era taqomaki au tiko na timoni?’ e vakananuma. Me vakataki ira tale e so, e galala rawa mai na vakatevoro na turaga oqo nira vakavulici koya ena ka dina na iVakadinadina i Jiova. E namaki na tubu mai Haiti ni laurai ni vakavataki na kedra iwiliwili na dautukutuku ni Matanitu ni Kalou e kea era a tiko ena iVakananumi ni mate i Karisito ena 19 Epereli, 2000.

Gumatua ena Yalava Vakaitamera Mai Korea

E 40 na pasede ni iVakadinadina i Jiova mai Korea era veiqaravi vakatabakidua. “Na mataivalu levu oqo ni daukacivaka na Matanitu ni Kalou,” e kaya o Milton Hamilton, e liutaka na Komiti ni Tabana, “e tarai rawa kina vakadua ena veivula na neimami yalava era tiko kina e sivia e 47 na milioni.” E laurai votu na tubu ena ivavakoso vosa vagalu. Ena dua na tabacakacaka ni ivavakoso vosa vagalu, e vakayacori kina e 800 na vuli iVolatabu. Oqo e ivakatautauvata ni dua na vuli iVolatabu, dua na dautukutuku. Ia e rarawataki ni levu na mataveitacini tagane gone era se vesu tu ga e valeniveivesu ena nodra sega ni veitovaki. Era dau lomani ira na lotu Vakarisito yalodina oqo na iliuliu ni valeniveivesu, e soli kina vei ira na cakacaka e gadrevi kina na nodra daudina.

Salavata Kei na Tubu Mai Mexico

E 533,665 kece na iwiliwili levu duadua ni daukacivaka na Matanitu ni Kalou mai Mexico era volatukutukutaka nodra cakacaka vakavunau ena Okosita 2000. E sivia ni vakatolutaki na iwiliwili oya era tiko ena iVakananumi. E kaya o Robert Tracy, e liutaka na Komiti ni Tabana: “Na neimami isausau ena yabaki oqo me keimami tara e 240 na Kingdom Hall.” E kuria: “Keimami vinakata me levu tale.”

Era ivakaraitaki vinaka na itabagone ni iVakadinadina i Jiova e Mexico. E kaya e dua na bete ni lotu Katolika me baleta e dua na itabagone iVakadinadina: “Ke bau dua mada ga na noqu lewenilotu e vakataki koya oqo. Au qoroi ira ena nodra lomadei kei na nodra vakayagataka vinaka na iVolatabu. Era totaka na Kalou, ke ra mani sotava sara kina na mate.”

Yalodina ena Gauna ni Tiko Yavavala Mai Sierra Leone

E vica vata na udolu era mate, era mavoa, se ra vakaleqai vakaca sara me tekivu mai ena Epereli 1991, e kacabote kina nodra veivaluvaluti vakalewenivanua mai Sierra Leone. E kaya o Bill Cowan, e liutaka na Komiti ni Tabana: “E tarai ira sara ga na tamata na ivalu kei na dredre ni bula. Era vakarorogo vinaka ena gauna oqo o ira era sega ni dautaleitaka na noda itukutuku. E sega ni ka vou e ke meda raici ira na tamata era biubiu tu ga mai ena veisalatu ra curu sara ina loma ni Kingdom Hall, me imatai ni gauna era soqoni kina. Vakawasoma mera tarovi na mataveitacini ena salatu ena nodra kerei me tekivu na vuli iVolatabu.” E dina ni toso tiko ga na tiko yavavala e Sierra Leone, e vua tale tiko ga na cakacaka ni kena vunautaki na Matanitu ni Kalou.

Porokaramu ni Tarataravaki Vakaitamera Mai Sauca Aferika

Ena gauna mada ga oqo, e gadrevi e vica vata na udolu na Kingdom Hall ena yalava e qarava na valenivolavola ni tabana mai Sauca Aferika. Sa tara oti e vica na drau na valenisoqoni. E kaya o John Kikot, e lewe ni Komiti ni Tabana: “Sa sega tale ni gadrevi na soqoni ena valevakenani se ena ruku ni vunikau, me vaka e daucaka tu e liu, oqo sa ra soqoni na mataveitacini ena itikotiko veiganiti e vakaidabedabetaki vinaka. E dina nira tara ga vakarawarawa na Kingdom Hall kece oqo, ia era duatani duadua ena yasayasa era tiko kina ena maqosa ni kedra irairai. E laurai ena so na vanua ni tara oti ga na Kingdom Hall ena dua na yabaki e vakaruataki sara na levu ni ivavakoso ena yabaki e tarava.”

iTaba iVakadinadina Vou Mai Ukraine

Ena yabaki vakacakacaka ni 2000, e rawati ena vanua oqo na iwiliwili levu duadua ni dautukutuku, oya e 112,720. E sivia e 50,000 vei ira oqo era vulica na ka dina ni iVolatabu ena loma ga ni lima na yabaki sa oti. “Sa qai vakatubura dina o Jiova e dua na itaba iVakadinadina vou, ra qai kaukaua mera kacivaka na yacana!” e kaya o John Didur, e liutaka na Komiti ni Tabana. “Ena loma ni rua na yabaki sa oti,” e vakuria, “keimami solia kina e sivia e 50 na milioni na ivoladraudrau, oqo e tautauvata kei na iwiliwili ni lewenivanua. E veivula, me kena ivakatautauvata, era volavola mai vei keimami e rauta ni 1,000 na tataleitaki era kerea me vakarabailevutaki nodra kila.”

E So Tale na Tikina Veivakauqeti Ena Porokaramu

E dua nona ivunau veivakauqeti o Daniel Sydlik, e lewe ni iLawalawa Dauvakatulewa. Na ulutaga “Na Sala e Duidui Kina na iLawalawa Dauvakatulewa Mai na iSoqosoqo Vakalawa” e tabaki ena ivoladraudrau oqo, e yavutaki mai na ivunau momona oya.

O Theodore Jaracz, e lewe tale ga ni iLawalawa Dauvakatulewa e vosa ena ivunau vakavure vakasama, “Era Lesi Vakalou na iVakatawa Kei na Dauveiqaravi Vakaitalatala.” E dua vei ira na ulutaga e basika ena ivoladraudrau oqo e yavutaki ena nona ivunau.

O David Splane, e lewe ni iLawalawa Dauvakatulewa, a dua tale ga nona vosa veivakauqeti ena bose vakayabaki ena tikinivolatabu vakayabaki ni yabaki 2001. E yavutaki na tikinivolatabu vakayabaki ena nona vosa na yapositolo o Paula: ‘Tudei ena yalomatua kei na lomadei ena nomuni muria taucoko na loma ni Kalou.’ (Kolosa 4:​12, VV) Era nuidei na iVakadinadina i Jiova e veiyasa i vuravura mera muria na vosa oqo ena nodra vunautaka ena yalodina na itukutuku vinaka ni Matanitu ni Kalou e vuravura raraba.​—Maciu 24:14.

[iVakamacala e ra]