Me Raici Nomu Tubucake

“Dau vakayacora na veika oqo ka soli iko kina ka me ra raica kece kina na nomu tubu cake.”​—1 TIMOCI 4:​15, VV.

1. O kila vakacava ni sa dreu na vuanikau me rawa ni laukana?

VAKASAMATAKA mada na vuanikau o dau taleitaka​—na dawa, na pea, na maqo, se dua tale na vuanikau. O kila beka na gauna sa dreu kina me rawa ni laukana? E sega ni vakabekataki oqori. Na kena iboi, na rokana, kei na nomu tara e vakaraitaka ni sa qai vo ga me laukana. Sa na duatani na nomu marau ni o sa covuta. E totoka dina na kena ikanakana qai kamica! Sa wacava na nomu taleitaka.

2. E kilai vakacava ni sa matua e dua, e tara vakacava na noda veimaliwai?

² Na veika o raica o qai cakava oya e via tautauvata sara ga kei na so tale na ka e dau yacovi keda. Me kena ivakaraitaki, me vaka ga na dreu ni vuanikau, e kilai levu tale ga na gauna e sa matua kina vakayalo e dua. Eda kila ni sa matua e dua ke laurai ni yalomatua, e tiko vua na kila, e vuku, kei na so tale na itovo vaka oya. (Jope 32:​7-9) Eda marau nida veimaliwai se cakacaka vata kei ira era vakaraitaka na itovo oqori.​—Vosa Vakaibalebale 13:20.

3. Na cava e kilai me baleta na matua ni vakamacalataki ira na tamata ena nona gauna o Jisu?

³ Ena yasana adua, e rawa me sa matua vakayago e dua, ia e rawa tale ni vakaraitaka na nona ivosavosa kei na ka e cakava ni se sega ni matua vakayalo, e sega tale ga ni matua na nona vakasama. Me kena ivakaraitaki, ni tukuni ira tiko na itabatamata lakosese ena nona gauna, e kaya o Jisu Karisito: “Sa lako mai ko Jone ka dau lolo ka sega ni daugunu waini, ka ra kaya, ‘E tiko vua e dua na tevoro.’ Sa lako mai na Luve ni Tamata ka kana ka gunu, ka ra kaya, ‘Raica na tamata daukana ka daugunu waini.’” Era matua vakayago, ia e kaya o Jisu nira vakataki ira “na gone,” era sega ni matua vakayalo. E mani vakuria: “Sa dau vakadinadinataki na vuku e na we ni nona cakacaka.”​—Maciu 11:​16-​19, VV.

4. E raici votu vakacava na tubucake kei na matua?

⁴ Eda kila mai na vosa i Jisu ni kevaka mada ga e tiko vua e dua na ivakatakilakila ni matua oya na vuku, ena qai vakadinadinataki ga na matua oqori ena cakacaka e cakava se rawata. E laurai oqo ena ivakasala i Paula na yapositolo vei Timoci. Ni vakaraitaka oti na veika e dodonu me saga o Timoci, e kaya o Paula: “Dau vakayacora na veika oqo ka soli iko kina ka me ra raica kece kina na nomu tubu cake.” (1 Timoci 4:​15, VV) Io, ena ‘raici’ votu na nona tubucake e dua na lotu Vakarisito e matua. Na matua vakarisito, me vaka na caudre ni rarama, e sega ni rawa ni tabonaki se vunitaki. (Maciu 5:​14-​16) Meda raica mada oqo e rua na sala bibi e raici votu kina na tubucake kei na matua: (1) tubucake ena kila, yalomatua, kei na vuku; (2) vuataka na vua ni yalo tabu.

Lomavata Ena Vakabauta Kei na Kila

5. Na cava na ibalebale ni matua?

⁵ E levu na ivolavosa era vakamacalataka na matua me gauna sa taucoko sara tu ga kina na tubu ni dua na ka, e dua e uabula, kei na kena rawati vinaka na ituvaki se na ivakatagedegede e gadrevi. Sa matua, se dreu na vuanikau a vakamacalataki taumada, ni sa cava na kena tubu kei na kena veiveisau tiko, sa yacova tale ga na gauna e sa uasivi kina da qai taleitaka na kena irairai, na rokana, kena iboi, kei na kena ikanakana. O koya gona, na matua e vakatauvatani kei na ituvaki e vinaka vakaoti, taucoko, se uasivi sara.​—Aisea 18:5; Maciu 5:​45-​48; Jemesa 1:4.

6, 7. (a) Eda kila vakacava ni vinakati ira kece na qaravi koya o Jiova mera tubucake mera matua vakayalo? (b) Na cava erau lako vata kei na matua vakayalo?

⁶ Na Kalou o Jiova e vinakati ira kece na qaravi koya mera tubucake mera matua vakayalo. Oqo na vuna e solia kina na veivuke ena ivavakoso vakarisito. E vola na yapositolo o Paula vei ira na lotu Vakarisito mai Efeso: “Sa solia eso, me rai apositolo; ka so, me ra parofita; ka so, me ra tamata dauvunau voli; ka so, me rai vakatawa kai vakavuvuli: me ra vakavinakataki kina ko ira sa lotu, me ia na cakacaka ni talatala, me vakatataki cake nai vavakoso nei Karisito: me da yaco sara koi keda kecega me da lomavata e na vakabauta, ka kila sara na Luve ni Kalou, me da tautauvata kei nai vakarau ni tamata dina [se, “matua,” NW], era sa sinai sara kei Karisito: me da kakua ni vagonegonea tiko, ka veitosoyaki ka veikauyaki e na cagi kecega ni vakavuvuli, e nai lawaki ca ni tamata, e na dauveivaqaseni sa nakiti kina na veivakacalai.”​—Efeso 4:​11-​14.

⁷ E vakamacalataka o Paula ena tikinivolatabu oqo ni inaki ni Kalou ena nona vakarautaka na veivukei ena ivavakoso oya me rawa kina vei keda kece meda ‘lomavata ena vakabauta kei na noda kila na ka dina,’ meda “tamata matua,” da qai ‘sinai ena ivakarau i Karisito.’ Oqo ena tarova na noda veikauyaki voli me vaka na gone ena veivakavuvuli lasu. Eda raica e keri na kena vinakati meda tubucake meda lotu Vakarisito matua kei na noda “lomavata e na vakabauta, ka kila sara na Luve ni Kalou.” E dodonu meda vakasamataka na vica na ka e tukuna o Paula.

8. Na cava e vinakati meda qai “lomavata” kina ena vakabauta kei na ka dina eda kila?

⁸ Kena imatai, ni vinakati meda “lomavata,” e dodonu vua na lotu Vakarisito matua me duavata kei ira era vakabauta vata ena vakabauta kei na kila. Ena sega ni usuraka me yaco ga na veika e nanuma, se me duatani na ka e vakabauta mai na iVolatabu. Sega, ena vakabauta ga na ka dina e vakaraitaka mai na Kalou o Jiova vei Luvena, o Jisu Karisito, kei “na dauveiqaravi yalo dina ka vuku.” Nida vakayagataka wasoma na kakana vakayalo e soli mai “e na kena gauna dodonu” ena ivola vakarisito, ena veisoqoni, soqo ni tabacakacaka, kei na soqo ni tikina, eda vakadeitaka kina nida “lomavata” tiko kei ira na noda itokani lotu Vakarisito ena vakabauta kei na veika eda kila.​—Maciu 24:​45, VV.

9. Vakamacalataka na ibalebale ni vosa “na vakabauta” e vakayagataka o Paula ena nona ivola vei ira mai Efeso.

⁹ Kena ikarua, na vosa “na vakabauta” e sega ni vakaibalebaletaki ina veika eda dui vakabauta na lotu Vakarisito, ia e vakaibalebaletaki ga ina veika eda vakabauta kece, “na kena raraba, kei na kena balavu, kei na kena titobu, kei na kena cecere” ni vakabauta oya. (Efeso 3:​18; 4:5; Kolosa 1:​23; 2:7) E rawa vakacava me lomavata e dua na lotu Vakarisito kei ira na nona itokani era vakabauta vata ke vakadonuya ga e so na tiki ni “vakabauta”? E kena ibalebale oqo meda kua ni kila voli ga na yavu ni ivakavuvuli ni iVolatabu, se kila tu ga vakatikina na ka dina, se da sega ni kauaitaka na kena sega ni matata vei keda. Meda vakayagataka vinaka ga na isolisoli kece i Jiova ena nona isoqosoqo me rawa kina meda kila vinaka na nona Vosa. Meda saga meda kila vakalevu da qai kila vinaka sara na loma ni Kalou kei na nona inaki. E vinakati kina meda dau wilika da qai vulica na iVolatabu kei na ivola vakaivolatabu, meda masuta na veivuke kei na veidusimaki ni Kalou, meda tiko wasoma ena soqoni vakarisito, da qai vakaitavi vakalevu ena kena vunautaki na Matanitu ni Kalou kei na noda vukei ira e so mera tisaipeli.​—Vosa Vakaibalebale 2:​1-5.

10. Na cava na ibalebale ni vosa “me da yaco sara koi keda kecega” e vakayagataki ena Efeso 4:​13?

¹⁰ Kena ikatolu, ni bera ni cavuta o Paula na ka e tolu meda saga, e kaya taumada, “me da yaco sara koi keda kecega.” Me baleta na vosa “koi keda kecega,” e kaya e dua na ivola e vakamacalataka na iVolatabu ni oya “e sega ni o keda yadudua, ia o keda kece vakailawalawa.” E kena ibalebale meda dui saga meda matua me vaka ga era saga kece tiko na vo ni tacida. E kaya na Interpreter’s Bible: “Ena sega ni rawata na veika vakayalo e dua ke saga duadua tiko ga, me vaka ga na kena sega ni rawa ni matua e dua na tikiniyagoda ke sega ni tubu bulabula na yago taucoko.” E tukuna kina o Paula vei ira na lotu Vakarisito mai Efeso mera saga mera kila vinaka na vakabauta “vata kei ira kecega na tamata ni Kalou.”​—Efeso 3:​18a, VV.

11. (a a cava e sega ni okati ena tubucake vakayalo? (b) Na cava e gadrevi meda na tubucake kina?

¹¹ E macala mai na vosa i Paula ni sega ni vakatau ga na noda tubucake vakayalo ena levu ni ka eda kila. E sega ni sa matua e dua na lotu Vakarisito kevaka wale ga e veivakadrukai na ka e kila. Ia, e kaya na iVolatabu: “Na nodra sala na yalododonu sa vaka na rarama sa cila tu, sa levu cake tiko na kena rarama ka yacova na siga levu.” (Vosa Vakaibalebale 4:​18) Io, e “levu cake tiko na kena rarama” na “sala,” sega ni tamata yadua. Ke da saga meda toso vata tiko kei na nona vakararamataka se vakamatatataka tiko mai o Jiova na nona Vosa vei ira na nona tamata, eda sa tubucake tiko vakayalo. E vinakati meda toso i liu, eda rawa ni cakava kece oya.​—Same 97:11; 119:105.

Vuataka “na Vua ni Yalo Tabu”

12. Na cava e bibi kina meda vuataka na vua ni yalo tabu ena noda saga meda tubucake vakayalo?

¹² Dina ni bibi meda ‘lomavata ena vakabauta kei na kila na ka dina,’ ia e bibi tale ga meda vuataka na vua ni yalo tabu ena veibasoga ni noda bula. Baleta? Eda sa raica oti ni sega ni dau tabonaki se vunitaki na matua, ia e raici ga ena noda itovo e uqeti ira tale e so. Ia, na noda saga meda tubucake vakayalo e sega ni vakatau ga ena noda vakaraitaka ga e so na itovo vinaka. Nida tubucake vakayalo ena noda vakatara na yalo ni Kalou me lewai keda, eda na vakila na veisau ni noda ivakarau ni rai kei na ka eda cakava. E kaya na yapositolo o Paula: “Dou lako voli e na Yalo Tabu, ka dou na sega ni cakava kina na gagadre ca ni tovo vakayago.”​—Kalatia 5:​16.

13. Na veisau cava e ivakaraitaki ni tubucake?

¹³ E cavuta tarava o Paula “na cakacaka ni i tovo vakayago” e “votu.” Ni bera ni kila na yaga ni ivakatagedegede ni Kalou e dua, a bulataka voli mai na ivakarau ni bula vakavuravura e okati kina e so na itovo e vakaraitaka o Paula: “na dauveibutakoci, na i vakarau vakasisila, na i valavala velavela, na dausoro ki na matakau, na daucaka i sausau, na dauveicati, na dauveileti, na dauveiqati ca, na daucudrucudru, na dauqara nona ga, na veisei kei na toto vakailawalawa, na vuvu, na daumateni, na daumarau vakalialia, kei na veika vaka koya.” (Kalatia 5:​19-​21, VV) Ia ni tubucake tiko vakayalo, sa na biuta tani tiko “na cakacaka ni i tovo vakayago” ni sa vuataka “na vua ni Yalo Tabu.” Na veisau e raici vua oqo e vakaraitaka ni sa tubucake tiko me lotu Vakarisito matua.​—Kalatia 5:​22, VV.

14. Vakamacalataka na matavosa “na cakacaka ni i tovo vakayago” kei “na vua ni Yalo Tabu.”

¹⁴ Meda kauaitaka na rua na matavosa “na cakacaka ni i tovo vakayago” kei “na vua ni Yalo Tabu.” Na “cakacaka” e ka e cakava e dua na tamata. E kena ibalebale ni veika e cavuta o Paula me cakacaka ni itovo vakayago e veika sara ga e nakita me cakava, se rawai koya kina na yagona ivalavala ca. (Roma 1:​24, 28; 7:​21-​25) Ena yasana adua, “na vua ni Yalo Tabu” era sega ni itovo eda rawata vakataki keda, ia eda rawata ga ni vukei keda na yalo ni Kalou. Me vaka ga ni na vua na vunikau e qaravi vinaka, eda na vuataka tale ga na vua ni yalo tabu ke sega ni dua na ka e tarova na kena cakacaka vei keda na yalo tabu.​—Same 1:​1-3.

15. Na cava e bibi kina meda vuataka “na vua ni Yalo Tabu” kece?

¹⁵ Me vakasamataki tale ga na nona vakayagataka o Paula na vosa na “vua” me kovuti ira na itovo vinaka e cavuta.a E sega ni vuataka na yalo tabu na duidui vua se itovo meda qai digitaka ga na kena eda vinakata. Na itovo kece e cavuta o Paula​—na loloma, na reki, na vakacegu, na vosota vakadede, na yalomalua, na yalololoma, na vakabauta, na yalomalumalumu, kei na ivalavala malua, e vinakati kece me qai rawati kina na itovo vou vakarisito. (Efeso 4:​24; Kolosa 3:​10) Ena vuku ni keda ituvaki ena rairai vakilai levu vei keda e so ga na itovo oqo, ia e bibi meda bulataka na itovo kece e cavuta o Paula. Nida cakava oqori, eda sa vakaitovotaki keda tiko ena ivalavala i Karisito.​—1 Pita 2:​12, 21.

16. Na cava me inaki ni noda saga na lotu Vakarisito meda matua, ena rawati vakacava?

¹⁶ Nida saga na lotu Vakarisito meda matua, eda vulica mai na vosa i Paula ni sega ni noda inaki wale ga me levu na ka eda kila, se meda vakaitovotaki keda wale ga ena so na ivalavala vinaka. Ia meda vakalaiva me cakacaka ina noda bula na yalo tabu ni Kalou. Na levu ga ni noda vakatara na yalo ni Kalou me lewa na veika eda vakasamataka kei na veika eda cakava, na levu tale ga ni noda matua vakayalo. Eda na rawata vakacava oqo? Meda vakatara na yalo ni Kalou me lewa na lomada kei na noda vakasama. E vinakati kina meda dau tiko wasoma ena soqoni vakarisito da qai vakaitavi tale ga kina. Meda vulica wasoma tale ga na Vosa ni Kalou da qai vakasamataka, meda vakayagataka na kena ivakavuvuli me lewa na veika eda vinakata kei na noda vakatulewa, vaka kina na noda ivalavala vei ira tale e so. Ena qai raici votu kina na noda tubucake.

Tubucake me Vakalagilagi Kina na Kalou

17. Erau lako vata vakacava na tubucake kei na nona vakalagilagi na Tamada vakalomalagi?

¹⁷ Ni raici noda tubucake e vakalagilagi qai vakacaucautaki ga kina na Tamada vakalomalagi o Jiova, baleta ni vukei keda meda matua vakayalo. Eda sega ni vakalagilagi kina o keda. Ena bogi ni bera nona mate o Jisu, e kaya vei iratou na nona tisaipeli: “E na vakalagilagi ko Tamaqu e na nomudou vua vakalevu, ka dou sa na qai yaco kina mo dou noqu tisaipeli.” (Joni 15:​8, VV) Era vakalagilagi Jiova na tisaipeli nira vuataka na vua ni yalo tabu kei na vua ni Matanitu ni Kalou ena nodra cakacaka vakaitalatala.​—Cakacaka 11:​4, 18; 13:48.

18. (a) Na tatamusuki cava e marautaki tiko ena gauna oqo? (b) E ka ni bolebole vakacava na tatamusuki oqo?

¹⁸ O Jiova e vakalougatataki ira tiko na nona tamata ena veiyasa i vuravura ena gauna oqo nira vakaitavi ena tatamusuki vakayalo. Sa oti oqo e vica na yabaki na nodra yalataki ira vei Jiova ra qai papitaiso tiko e veiyabaki e rauta na le 300,000 na tisaipeli vou. Oqo eda marautaka dina, e sega ni vakabekataki ni vakamarautaka tale ga na loma i Jiova. (Vosa Vakaibalebale 27:11) Ia, me rawa ni vakamarautaki Jiova tiko ga qai vakacaucautaki koya tale ga, e vinakati vei ira na tisaipeli vou mera “ia tiko nai valavala sa vinaka vua [na Karisito]: dou tauyavutaki ka tara cake vua, ka vakataudeitaki e na nomudou vakabauta.” (Kolosa 2:​6, 7) Era bolei kina na tamata ni Kalou ena rua na ka. Ke o se qai papitaiso vou ga, e rawa beka “mo soli iko . . . ka me ra raica kece kina na nomu tubu cake”? Ena yasana adua, ke sa dede na nomu tiko ena dina, o rawa beka ni vakacolati iko ena itavi ni nodra vukei vakayalo na tisaipeli vou? E vinakati gona meda sasagataka kece meda torocake meda matua.​—Filipai 3:​16; Iperiu 6:1.

19. Na itavi dokai kei na veivakalougatataki cava eda na vakila ke raici na noda tubucake?

¹⁹ Eda na vakalougatataki vakalevu ke da saga vakaukaua me raici na noda tubucake. Vakasamataka na vosa ni veivakayaloqaqataki i Paula ni oti nona uqeti Timoci me tubucake: “Vakaraici iko vinaka, kei nai vakavuvuli; tu dei kina: ni ko sa kitaka vakaoqo ko na vakabulai iko, kei ira talega era sa rogoci iko.” (1 Timoci 4:​16) Ke da saga vakaukaua me raici na noda tubucake, eda na bau vakaitavi tale ga ena itavi dokai ni noda vakalagilagia na yaca ni Kalou da qai marautaka na nona veivakalougatataki.

[iVakamacala e ra]

O se Nanuma Tiko?

• E raici rawa vakacava na matua vakayalo?

• Na kila kei na yalomatua vakacava e ivakaraitaki ni matua?

• E vakaraitaka vakacava na tubucake vakayalo na ‘vuataki ni vua ni yalo tabu’?

• Na cava e bolei keda ena noda saga tiko meda torocake meda matua?

[iYaloyalo ena tabana e 13]

E raici votu ni sa dreu se matua e dua na ka

[iYaloyalo ena tabana e 15]

Eda na tubucake vakayalo ke da toso vata tiko kei na ka dina sa kilai

[iYaloyalo ena tabana e 17]

E vukei keda na masu meda vuataka “na vua ni Yalo Tabu”