Valuta na Veika e Vakalatilati, Mo Rawa ni Toso!

SA YAVALA tu na idini sa vakarau tu na qia, ia e sega ga ni toso nomu motoka. Vakacava e leqa beka na motoka? E sega, e vakababa toka e dua na vatu levu ena ruku ni dua na taya e liu. Me kau laivi ga na vatu, ena qai toso na motoka.

E so tale ga era vulica na iVolatabu kei ira na iVakadinadina i Jiova e dredre nira toso vakayalo ni tu na ka e vakalatilati. Me kena ivakaraitaki, a vakarota o Jisu na “lomaocaoca e na vuku ni vuravura oqo, kei nai yau e dauveivakaisini” e “vakaruguta na vosa” ni ka dina me sega kina ni vua.​—Maciu 13:22.

E tarova na nodra toso e so na itovo sa matau vei ira kei na so tale na malumalumu. E dau taleitaka o Yutaka e dua na turaga ni Japani na itukutuku ena iVolatabu, ia nona leqa levu na veimauilavo. Sa tovolea vakavica me biuta, e sega ga ni rawa. E vakavuna me vakayalia kina na veika sa bau taukena tu, e tolu nona vale, na nodratou sa sega ni dokai koya nona vuvale, qai beci tale ga kina. Ena rawa beka ni lotu Vakarisito ke valuta rawa na leqa oqo?

Se, vakasamataki Keiko mada. Sa biuta rawa na qaravi matakau, na itovo vakasisila, kei na cakaisausau, ni vukei koya na iVolatabu. Ia, e kaya o Keiko: “Sa qai vo ga na vakatavako, na noqu leqa levu duadua. Au sa tovolea vakavica vata meu biuta, ia e sega ga ni rawa.”

Rairai so tale ga na leqa lelevu era vakalatia tiko na nomu via toso. Ia mo nanuma tiko ni o rawa ni valuta na leqa kece oqori, ke vukei iko na Kalou.

Vakasamataka mada na ivakasala i Jisu vei iratou nona tisaipeli ena nodratou sega ni vakabula rawa e dua na tagane a tauvi manumanusoni. E kaya vaka oqo o Jisu ni ratou sa guce, ia e qai rawata o koya: “Kevaka e tu vei kemudou na vakabauta e vaka na sore ni musita, dou na kaya ki na ulu-ni-vanua oqo, Lako tani kikea! ka na lako tani: a sa sega na ka ena dredre vei kemudou.” (Maciu 17:​14-​20; Marika 9:​17-​29) Io na leqa e vaka tu e dua na ulunivanua vei keda, e ka lailai sara qai ka wale vua na noda Dauveibuli kaukaua duadua.​—Vakatekivu 18:14; Marika 10:27.

Kila se Cava e Vakataotaka Nomu Toso

Ni bera ni o valuta na veika era vakataotaka nomu toso, e vinaka mo kila mada se cava soti oqori. O na kila vakacava? De rairai ena vakaraitaka vei iko e dua ena ivavakoso na ka mo cakacaka kina, e dua beka na qase se o koya e vakavulici iko. Mo kua ni beca na ivakasala vakayalololoma oqori, e vinaka mo “rogoca nai vakavuvuli, mo . . . vuku” kina. (Vosa Vakaibalebale 8:​33) So na gauna, rairai o na vakila ga vakataki iko na nomu malumalumu ena nomu vulica tiko na iVolatabu. E “bula na vosa ni Kalou, ka kaukauwa.” (Iperiu 4:​12) Nomu vakawilika na iVolatabu kei na ivola era yavutaki ena iVolatabu, ena rawa ni vakavotuya nomu vakanananu titobu, na lomamu, kei na itovo ni nomu rai. E vukei iko mo raica nomu bula kei na ivakatagedegede cecere i Jiova. Ena vakavotuya na veika e rairai vakataotaka na nomu toso vakayalo.​—Jemesa 1:​23-​25.

Taura mada, ke dau vakananuma na ka vakasisila o gonevuli ni iVolatabu. Ena nanuma beka ni sega ni ca, baleta ni se sega ni cakava e dua na cala. Ia ni toso nona vuli ena raica beka na ka e kaya na Jemesa 1:​14, 15: “Sa dauveretaki na tamata yadua, ni sa vecei koya na nona garogaro ca ka bacani koya. Ni sa qai kunekune na garogaro ca, sa vakasucuma kina nai valavala ca: a sa oti nai valavala ca, sa qai vakasucuma na mate.” E ke e sa na raica rawa o koya na ka e vakataotaka nona toso! Ena walia vakacava na leqa oqo?​—Marika 7:​21-​23.

Valuti na Veika e Vakalatilati

Rairai ena rawa ni vukei koya na gonevuli e dua na lotu Vakarisito matua me kuria nona vakadikeva na iVolatabu ena kena taurivaki na Watch Tower Publications Index.a Na ulutaga e vakatokai na “Thoughts,” (Vakasama) e rawa ni dusimaki koya e wiliwili ena so na ulutaga sa tabaki oti me baleta na mataqali vakanananu e dau vakavuna na leqa. Era kau cake mai ena veiulutaga oqo e so na tikinivolatabu era yaga sara vakalevu me vaka na Filipai 4:​8, e kaya: “A ka kecega sa dina, na ka kecega e vakaturaga, na ka kecega e dodonu, na ka kecega e savasava, na ka kecega e daulomani, na ka kecega e rogorogo vinaka; ia kevaka sa dua na ka e vinaka, se na ka e daudokai, dou nanuma na veika oqo.” Io me vakaisosomitaki na vakasama vakasisila ena vakasama savasava qai veibuli cake!

Ni toso nona vakadidike, ena sega ni vakabekataki ni na raica tale o gonevuli e so na ivakavuvuli vakaivolatabu ena vukei koya me vakalailaitaka nona leqa. Me kena ivakaraitaki na Vosa Vakaibalebale 6:​27 kei na Maciu 5:​28 e vakarota meda kua ni vakania noda vakasama ena ka vakasisila. E kaya ena nona masu na daunisame: “Mo ni tarova na mataqu me’u kakua ni raica na ka lasu.” (Same 119:37) E sega ni rauta meda wilika wale ga na iVolatabu. “A lomana na yalododonu sa daunanuma na ka,” e kaya na vuku. (Vosa Vakaibalebale 15:28) E sega ni rauta me vakasamataki wale ga se cava na ivakaro ni Kalou, me vakasamataki tale ga se cava na vuna e tauca kina na ivakaro oya, ena qai raica rawa e ke o gonevuli ni yalomatua qai vakainaki na sala i Jiova.

Kena iotioti ga ena vinakati me torovi Jiova ena masu me valuta rawa kina na veika e vakavuna tiko nona sega ni toso. Na Kalou ga e kila vinaka na keda ibulicaki, eda dukadukali, eda buli tale ga ena kuvuniqele. (Same 103:14) Noda kere veivuke vua na Kalou ena masu kei na noda saga vagumatua meda kua ni vakananuma na ka vakasisila, ena yaga sara vakalevu, ena savasava kina qai galala noda lewaeloma.​—Iperiu 9:​14.

Kua ni Soro

Na malumalumu cava ga o saga tiko vakaukaua mo biuta, mo nanuma tiko ni dau yaco ga na gauna mo lesuva tale. E dau vakavuna na nuiqawaqawa kei na yalolailai, me vaka ga e dau yaco. Ia nanuma tiko na veivosa ena Kalatia 6:9: “Me da kakua ni ceguoca e na caka vinaka, ni da na tamusuka e na kena yabaki, kevaka eda sa sega ni oca.” O rau mada ga na dauveiqaravi yalodina ni Kalou o Tevita kei Pita e tarai rau vakabibi na nodrau bale. Ia erau sega ga ni soro. Rau ciqoma na ivakasala ena yalomalumalumu, rau veisautaki rau, qai duatani sara na nodrau yalogu ni qarava na Kalou. (Vosa Vakaibalebale 24:16) Dina ni cala na ka e cakava o Tevita, ia e vakatokai koya o Jiova me “tamata sa vaka na lomaqu, ko koya ena cakava kecega na noqu lewa.” (Cakacaka 13:22) O Pita tale ga e qai vakadinadinataka ni dua dina na duruvesi ena ivavakoso vakarisito.

Vuqa tale ga edaidai era marau nira sa valuta rawa e levu na ka e vakalatilati ina nodra toso. O Yutaka, e sa cavuti oti mai, e qai vakadonuya me vulica na iVolatabu. E kaya: “Au vakila ni vukei au o Jiova ena noqu ikalawa kece meu valuta na leqa ni veimauilavo ena noqu vinakata meu toso. Sa dua na ka noqu marautaka na dina ni vosa i Jisu, oya ena rawa ni toso na ‘ulu-ni-vanua’ ke tiko na vakabauta.” Mani yaco o Yutaka me dua na dauveiqaravi vakaitalatala ena nona ivavakoso.

Vakacava o Keiko, na dau utuboko? A vakatura na tacida yalewa erau vuli tiko kei na marama oqo me vakawilika na veiulutaga ena Yadra! me baleta ira na bobula tu ena tavako. A vakabira o Keiko ena nona motoka na veivosa ena 2 Korinica 7:​1, ena nona vinakata me kua ni guilecava ni dodonu me savasava tiko ga ena mata i Jiova. Ia e se sega ga ni rawa me biuta na vakatavako. “Sa dua na ka na noqu nuiqawaqawa,” e kaya o Keiko ena nona vakananuma lesu tale. “Au tarogi au, na cava sara mada au vinakata, au vinakata meu qaravi Jiova se o Setani?” Ni sa vakadeitaka ni via qaravi Jiova, sa qai gumatua ena masu ena nona kere veivuke. E kaya: “Au kurabui tale, baleta au nanuma ga ni na dredre noqu biuta na vakatavako. Na ka wale ga au veivutunitaka na noqu sega ni biuta makawa.”

O na tauca tale ga na vuana ke o valuta na veika e vakalatilati tiko ena nomu toso. Na levu ga ni nomu veisautaka nomu vakasama, nomu gagadre, nomu ivosavosa, kei na ka o cakava, me salavata kei na ivakatagedegede e virikotora na iVolatabu, na levu tale ga ni nomu dokai iko kei na nomu nuidei. Era na seraka ra qai vakayaloqaqataki na tacimu vakayalo tagane kei na yalewa, kei ira na lewe ni nomu vuvale ena nodra veimaliwai kei iko. Na ka e bibi duadua, sa na qai titobu sara na nomudrau veiwekani kei na Kalou o Jiova. E yalataka na Kalou ni na ‘kauta tani mai na nodra sala na nona tamata na ka era tarabe kina’ mera dro tani kina mai na lewa i Setani. (Aisea 57:14) O na rawa tale ga ni nuitaka ni na vakalougatataka vakalevu o Jiova na nomu sasaga, mo valuta na veika e vakalatia na nomu toso vakayalo.

[iVakamacala e ra]

[iYaloyalo ena tabana e 28]

E yalataka o Jisu ni rawa ni vagalalataki na leqa e vaka tu na ulunivanua ena vuku ga ni vakabauta

[iYaloyalo ena tabana e 30]

Noda vakawilika na iVolatabu ena vakaukauataka noda sasaga meda valuta na malumalumu vakayalo