Taqomaki Ira na Luvemu ena Vuku Vakalou

ERA vala tiko na yagoda e veisiga nira valuta e levu na manumanu ni mate. Ia, vinaka ga nida sucukaya mai na sotia ni yago mera itataqomaki ni nodra kabakoro na manumanu ni mate, ra qai vakabulai keda.

Era vala tale tiko ga na lotu Vakarisito ena nodra valuta na vakasama kei na itovo e sega ni vakaivolatabu, okati tale ga kina na idre e vakaleqa na bula vakayalo. (2 Korinica 11:3) Ia, ena rawa ga nida vorata na kena vakaleqai e veisiga na noda vakasama kei na lomada, ke da bucina na itataqomaki vakayalo.

Sa qai gadrevi sara vakalevu na itataqomaki oqori vei ira na luveda, vakauasivi nira sega ni sucukaya mai na itataqomaki vakayalo mera valuta kina na yalo ni vuravura. (Efeso 2:2) Nira sa tubu cake tiko na gone, e nodra itavi bibi na itubutubu mera vukei ira mera bucina na itataqomaki oqori. Ia, e yavutaki ena cava na itataqomaki oqo? E kaya na iVolatabu: “Sa solia na vuku ko Jiova; . . . sa maroroya na nodra sala na yalosavasava.” (Vosa Vakaibalebale 2:​6, 8) Io, na vuku vakalou e rawa ni taqomaki ira na gone me kua nira coriti ina vakailala cala, na veimurimuri, se na ka ni lasa tawasavasava. Era na muria vakacava na itubutubu na veidusimaki i Jiova, ra qai bucina na vuku vakalou vei ira na luvedra?

Me Bucini na Vakailala e Veitaraicake

Sa macala tu ga nira dau vinakata vakalevu na itabagone mera vakailala ga kei na nodra icaba, ia ke ra tiko wasoma vagone ena sega ni rawa nira bucina kina na vuku vakalou, ni sota ga na nodra yalowai. Sa rauta me veivakasalataki kina na iVolatabu: “A ka lialia sa vauci e lomana na gone.” (Vosa Vakaibalebale 22:15) Era vukei ira vakacava na luvedra e so na itubutubu mera vakayagataka kina na gone na vuku vakalou ena nodra digitaka na nodra ilala?

E kaya o Tomu,a e dua na tama: “Erau dau lasavi ira ga vakalevu na nodrau icaba na luve i keirau tagane, ia vakalevu ga mera dau mai veilasamaki e vale, na vanua keirau na raici ira tiko kina. Ni a dola tu ga na neirau vale, e dau nodra igadigadi na itabagone, keirau vakani ira ena neirau saga mera kila ni keirau taleitaki ira. Keirau bolea kina na kosakosa kei na maue e vale, me rawa ga ni rau marautaka na luve i keirau na nodrau veilasamaki, ia ena gauna vata oya, erau taqomaki tiko kina.”

Dua tale na veiwatini o Bera kei Meri, e tolu na luvedrau, eratou gone vinaka, ia erau kaya na veiwatini oqo ni sega ni rawarawa na tuberi ratou. Erau kaya: “A sega ni levu na itabagone ena neitou ivavakoso mera vakailala kei Joana, na luve i keirau yalewa. Vakavo ga e dua nona itokani o Susana, e goneyalewa mamarau qai yalovinaka. Ia, e dau malumalumu na nodrau lewa na nona itubutubu, oya na vanua keitou duidui toka kina. Kena ivakaraitaki, a balavu cake na gauna erau vakatara na itubutubu i Susana me lako kina ena bogi, ia keirau virikotora me lesu totolo mai o Joana. Erau vakadonuya tale ga na itubutubu i Susana me vakaisulu leleka, rogo ivakatagi veicalati, vaka kina na sara iyaloyalo e tawaveiganiti. Dua na gauna dede na nona sega ni dau duavata o Joana kei na neirau rai. Vaka me nona nanuma ni rau vinaka cake na itubutubu i Susana, ia e sa rui kaukaua na neirau lawa. Yacova na gauna a leqa kina o Susana, sa qai kidava o Joana ni ka sara ga e taqomaki koya na dei ni neirau vakatulewa. Keirau marau dina ni keirau a tudei tu ga ena ka keirau vakabauta ni yaga vua na neirau goneyalewa.”

Me vakataki Joana ga, e levu na itabagone era vakadinadinataka ni vakavukui ira ke ra qara ivakasala vei ira na nodra itubutubu me baleta na vakailala. E kaya na vosa vakaibalebale: “A daliga sa dauvakarogoca na vunau ni bula sa na dautiko vata kei ira na vuku.” (Vosa Vakaibalebale 15:31) Na vuku vakalou gona ena uqeti ira na itabagone mera vakailala vakalevu kei ira na itokani era dau veitaraicake.

Vorata na iDre ni Veimurimuri

Erau veisemati voleka sara na vakailala kei na idre ni veimurimuri. Na idre oqo e valuta e veisiga na nodra itataqomaki vakayalo na luveda. Nira dau vinakata na itabagone nodra veivakadonui na nodra icaba, e rawa sara ga ni moici ira na idre ni veimurimuri mera cakava na ka e rairai vinaka vei vuravura.​​—Vosa Vakaibalebale 29:25.

Ia, e vukei keda na iVolatabu meda nanuma tiko ni “ko vuravura sa lako tani yani, kei na kena gagadre talega.” (1 Joni 2:​17) O koya gona, mera qarauna sara na itubutubu me kua ni vakamuai luvedra na rai vakavuravura. Era na vukei ira gona vakacava na luvedra me tiko vei ira na rai vakarisito?

E kaya o Ritova: “E dau vinakata na luve i keirau yalewa me dara na isulu era tokara na vo ni itabagone. Keirau dau qai vakamacalataka vakamalua vua ni tiko na vinaka kei na ca ni veika kece e kerea me dara. So mada ga na isulu keirau vakadonuya, ia keirau dau vakamuria e dua na ivakasala keirau a rogoca ena vica vata na yabaki sa oti, ‘O koya e yalomatua ena sega ni imatai ni tamata me dara e dua na mataqali isulusulu vou, se iotioti tale ga ni tamata me biuta.’ ”

E dua tale na marama tina, o Paulini, e taurivaka e duatani na iwalewale me valuta kina na idre ni veimurimuri eratou sotava tiko na luvena. E nanuma lesu: “Au saga meu kauaitaka na ka eratou dau taleitaka na luvequ, au dau qai lai veitalanoa kei ratou ena nodratou dui rumu. Ni dede na gauna keitou dau veitalanoa tu kina, mani rawa meu moica na nodratou vakasama, au veisautaka tale ga na nodratou itovo ni rai.”

Ia me nanumi tiko ni na sega ni yali vakadua na idre ni veimurimuri. Era na rairai veimulomulo tale tiko ga na itubutubu kei ira na luvedra ena nodra sasaga me ‘vakarusai na ile vakavuravura,’ ra qai vakamua na nodra rai kei na nodra ‘vakasama [na luvedra] me talairawarawa vei Karisito.’ (2 Korinica 10:5) Ia, ke ra dau ‘masu tiko ga’ na itubutubu kei ira na luvedra, era na vakaukauataki me vakavatukana kina na sasaga oqo.​​—Roma 12:12; Same 65:2.

Na iDre Kaukaua ni Veivakamarautaki

Na ikatolu ni idre e dau dredre nodra veidusimaki kina na itubutubu, oya na ka ni veivakamarautaki. Sa macala ga nira dau taleitaka na gone na qito. O ira na sa via qase toka e dau nodra gagadre na veilasamaki. (2 Timoci 2:​22) Ia, ke sega ni vukutaki nodra vakaceguya na gone na gagadre oqori, ena rawa ni leqa kina na nodra itataqomaki vakayalo. E rua na sala e dau rawa ni yaco kina na leqa.

Kena imatai, e levu na ka ni veivakamarautaki e laurai kina na itovo lolovira ni vuravura oqo. (Efeso 4:​17-​19) Ia, e sa bau veiuqeti dina qai rairai vinaka na sala e vakarautaki mai kina. E rawa gona ni coriti ira na itabagone era rairai yalowaitaka tu na kena ca.

Kena ikarua, oya na levu ni gauna e vakayagataki ena ka ni veivakamarautaki, e rawa tale ga ni vakavuleqa oqo. E so era vakabibitaka ena nodra bula na qarai ni lasa dau qai kania e levu na gauna, e vakayagataki tale ga kina na nodra kaukaua. E veivakaroti na vosa vakaibalebale ni “sega ni vinaka mo kania vakalevu na oni.” (Vosa Vakaibalebale 25:27) Ena vaka tale ga oqori na ka ni veivakamarautaki, ke dua e vakasiviataka ena sega ni lomana me kania na kakana vakayalo, ena lai tini vucesa kina na nona vakasama. (Vosa Vakaibalebale 21:17; 24:​30-​34) Na nodra vakayagataka gona vakasivia na veika ni vuravura oqo na itabagone era na sega kina ni ‘rawata na bula dina’​​—na bula ena vuravura vou ni Kalou. (1 Timoci 6:​12, 19, VV) E ka ni bolebole dina oqo vei ira na itubutubu, ia era na valuta vakacava?

E kaya o Iva Mere, e tolu na luvena yalewa: “Keirau vinakata vakaveiwatini me ratou marautaka na gone na ka ni veivakalasai e yaga. Levu gona na gauna keitou lai vakatakakana vata sara ga vakavuvale, so tale ga na gauna ratou dau vakailala kina kei ira era itabavata ena ivavakoso. Ia, keirau raica me veiraurau ga na ka ni veivakalasai keitou lakova. Keirau dau vakatauvatana ina ivakalomavinaka​​—e kamikamica, ia e ikuri ga ni ka e laukana. Ratou vulica tale ga na gone me ratou dau cakacaka e vale, e koronivuli, vaka kina ena loma ni ivavakoso.”

Rau a saga e dua tale na veiwatini, o Tomu kei Ruci, me rau vakarautaka sara ga na ka ni veivakamarautaki. Rau kaya: “Keitou dau lalawataka me neitou siga vakavuvale na siga Vakarauwai. Keitou dau lai cakacaka vakavunau ena mataka, ni oti na vakasigalevu keitou dau lai sisili e wai, qai tini ena dua na ivakayakavi totoka.”

E laurai ena nodra ivakamacala na itubutubu oqori, nira dau veiraurautaka na ka ni veivakamarautaki e yaga, ra qai raica me koto ga ena kena ikotokoto dodonu ena nodra bula vakarisito.​​—Dauvunau 3:4; Filipai 4:5.

Nuitaki Jiova

E macala ni na vakayabaki na kena sagai tiko me bucini na itataqomaki vakayalo. Sega gona ni rawa me vakasauri ga sa ra kila na gone na vuku vakalou, me vakarawarawataka nodra vakararavi vua na Tamadra vakalomalagi. Ia, e dodonu vei ira na itubutubu mera kua ni cegu na “vakavulici ira [na gone] e na vunau kei nai vakavuvuli ni Turaga [o Jiova].” (Efeso 6:4) Na vuna mera vakavulici tiko ga kina na gone ena “[i]vakavuvuli ni Turaga,” oya mera bucina na rai vakalou. Era na cakava vakacava oqo na itubutubu?

Na vulici wasoma ni iVolatabu e tiki bibi ni nona bula vinaka e dua na vuvale. Na vuli vaka oqo e dau ‘tadola kina na matadra na gone mera raica na ka veivakurabuitaki e tu ena lawa ni Kalou.’ (Same 119:18) E vukei ratou na luvena o Devo, me ratou toro volekati Jiova ni dau vakabibitaka na vuli vakavuvale. E kaya: “Au dau vakavakarau vinaka sara ga ina vuli. Niu dau vakekeli ena ivola vakaivolatabu e rawarawa sara noqu vakamacalataki ira na tamata era volai tu ena iVolatabu, me vaka ga era bula dina tu. Au dau uqeti iratou na gone me ratou raica na veika eratou tautauvata kina kei ira na tamata yalodina ena gauna oya. Na ka oqori e matata tiko ga kina vei ratou na ka e vakamarautaki Jiova.”

Dua na gauna vinaka tale ga ni veivakavulici na gauna tawalokuci e dau basika mai. E uqeti ira na itubutubu o Mosese mera tukuna vei ira na luvedra na vosa i Jiova ‘nira tiko e vale, ra lako voli e gaunisala, nira moce, vaka kina nodra duri cake.’ (Vakarua 6:7) E vakamacalataka e dua na tama: “Ena gadrevi toka e dua na iwase ni gauna me rawa kina vei luvequ me talaucaka na lomana, kei na nona rai. Ia, na gauna keirau taubale tiko kina se keirau cakacaka vata tiko, sa qai dau talaucaka mai vakamalua na ka e tiko e lomana. Dau yaga sara ga vei keirau ruarua na veitalanoa vaka oqori.”

Na nodra masu tale ga na itubutubu e dau tarai ira sara ga na luvedra. Dau uqeti ira na gone mera “vakabauta ni . . . bula ko . . . [Jiova],” nira rogoci ira na itubutubu nira masuta nona veivuke kei na nona veivosoti ena yalomalumalumu. (Iperiu 11:6) Era dau vakabibitaka na masu vakavuvale na itubutubu era tuberi ira vakavinaka na luvedra, qai okati ena masu vaka oqori na veika e vauca na nodra vuli na gone kei na ka era nuiqawaqawataka tu. E kaya e dua na tama, ni dau masu vata kei ratou na gone o tinadratou ni bera ni ratou lai vuli.​​—Same 62:8; 112:7.

“Kakua ni Ceguoca e na Caka Vinaka”

Sega ni dua na itubutubu me sa dodonu tu ga na ka kece e cakava, so gona na gauna era na veivutunitaka na sala era a walia beka kina e dua na ituvaki. Ia, e uqeti keda na iVolatabu meda sasaga tiko ga, meda kua ni “ceguoca e na caka vinaka.”​​—Kalatia 6:9.

So na itubutubu era dau nanuma mera sa soro koso ena so na gauna, baleta nira sa sega sara ga ni kila se cava tale mera cakava vei ira na luvedra. E rawarawa sara me iulubale na nodra sa bau duidui dina ga na itabagone nikua, ra qai dreve. Ia, nira vakatauvatani kei ira na itaba ena gauna e liu, se tautauvata vinaka tiko ga na malumalumu kei na veitemaki era sikalutu kina, dina beka ni sa toka sara e cake na idre ca nikua. A saga gona e dua na tama me vosa sara vakamalua vei luvena tagane ni oti toka ga nona vakadodonutaki koya. E kaya: “Na ka o via cakava tiko oqori au a dau via cakava sara ga ena gauna au se vakataki iko kina.” Na ka ga mera nanuma na itabagone, oya ni o ira na itubutubu era na rairai sega ni kila vinaka e so na ka me vaka beka na kompiuta era sa matai tu kina na gone nikua, ia era buta vinaka ga na itubutubu ena ka kece e dau malele kina na lomadra na gone.​​—Maciu 26:41; 2 Korinica 2:​11.

De dua e so na gone era sega ni ciqoma na nodra veidusimaki na itubutubu, ra be tale ga nira vunauci. Ia, ena gadrevi kina nodra yalovosovoso na itubutubu. Dina nira na be toka mada na gone, se ra talaidredre tu ena dua na gauna, ia e laurai ni levu ga vei ira era dau qai vakarorogo e muri. (Vosa Vakaibalebale 22:6; 23:​22-​25) E kaya o Maciu, e dua na cauravou lotu Vakarisito e sa veiqaravi tiko oqo ena dua na valenivolavola ni tabana ni iVakadinadina i Jiova: “Niu se itabagone, au nanuma ni sega ni vinaka na nodrau dau vakatabuya vei au e so na ka na noqu itubutubu. Au dau vakasamataka, ke sa rawa ni vakadonuya e dua na ka na nodra itubutubu noqu ilala, na cava ga e dredre kina vei rau noqu qase? Au dau rarawataka sara ga ena so na gauna ni rau totogitaki au meu kua ni lai vakatasosoko ena noqu bavelo​​—e dua na ka au dau taleitaka vakalevu. Ia, niu rai lesu au raica ni yaga dina qai dodonu vinaka na nodrau veivakavulici noqu itubutubu. Au vakavinavinaka kina vakalevu ni rau dusimaki au ena kena gauna veiganiti.”

E dina taucoko oqori​​—so na gauna era na donuya na luveda na vanua e sega soti ni vinaka vakayalo, ia era se rawa tiko ga ni tubu cake mera lotu Vakarisito vinaka. Me vaka ga e yalataka na iVolatabu, e nodra itataqomaki vakayalo na vuku vakalou. “Ni na qai curuma na lomamu na vuku, ka sa kamikamica mai ki na yalomu na daukila ka; ena qai maroroi iko na lomavuku, ka vakatawai iko na yalomatua: me vakabulai iko mai na sala ni tamata ca.”​​—Vosa Vakaibalebale 2:​10-​12.

E sega ni itavi rawarawa na nona tiko bibi na marama tina ena loma ni ciwa na vula. E vaka kina na 20 tale na yabaki e tarava, ni na so na gauna ni marau kei na rarawa. Ia, me vaka nira lomani ira na luvedra na itubutubu lotu Vakarisito, era na saga mera taqomaki ira ena nodra vakayagataka na vuku vakalou. Na nodra rai na itubutubu me baleti ira na luvedra e tautauvata kei na rai ni yapositolo, sa kena turaga, o Joni: “E sega tale ni dua na ka me’u rekitaka vakalevu cake mai na ka oqo: me’u rogoca ni ra sa muria tiko ga na dina ko ira na luvequ.”​​—3 Joni 4, VV.

[iVakamacala e ra]

[iYaloyalo ena tabana e 24]

“Ni a dola tu ga na neirau vale, e dau nodra igadigadi na itabagone”

[iYaloyalo ena tabana e 25]

Dau kauaitaka na ka era taleitaka na luvemu

[iYaloyalo ena tabana e 26]

“Au dau vakavakarau vinaka sara ga ina vuli”