Yaco na Leqa Vakacalaka

A QITO voli e nodratou valenisili o Owen, e dua na gonetagane yabaki rua veimama. Mani kabata rawa sara na nodratou kovate ni wainimate, e dina ni rau nanuma na nona itubutubu ni na sega ni yacova rawa. Ni dolava na kovate, a dreta na matana e dua vei ira na tavaya e tu kina. E taura sara, dolava qai gunuva. A yacovi koya kina na leqa.

A tawa tu ena tavaya oya na acid se waikama, qai ka ni rarawa ni a tini mate kina o Owen. Erau luvuci ena rarawa na nona itubutubu. A mani kerea o Percy, na tama i Owen, na nona veivuke na italatala ni nona lotu. “Na cava e yacovi keirau kina na leqa oqo?” e taroga o Percy. A sauma na italatala, “E vinakata na Kalou e dua tale na agilosi lailai e lomalagi.” Ena levu ni nona lolosi, e lai votu kina ena vakasama i Percy ni oqo e tawayalololoma. A nakita dina beka na Kalou me yaco na leqa oqo? Ena yalolailai, a vakatulewataka kina o Percy me sa muduka vakadua na nona lakova na nona lotu.

Nona vakasamataka lesu tiko na ka a yaco, e taroga lo voli o Percy: ‘E se mosi voli beka ga na luvequ lomani? Au na raici koya tale beka?’

O na rairai lomatarotarotaka se cava e dau yaco nida sa mate, se da na veisotari tale beka ena dua na gauna sa bera mai kei ira na wekada lomani era sa mate tu? Na kena isau e koto ena Vosa ni Kalou, na iVolatabu. E volai vakamatata tu kina na isaunitaro veivakacegui vei ira kece era sotava na leqa vakacalaka vaka oqori. O koya e bibi sara, na iVolatabu e vakamacalataka tale ga na inuinui lagilagi e yalataka tu na Kalou​—oya na veivakaturi.

Oni kerei gona mo ni wilika na ulutaga e tarava me rabailevu kina na nomuni kila na inuinui totoka oqori.