Cava Era Sega Kina ni Vakasama Vakayalomatua e Levu?
“NA CAVA mada e leqa vua? E sega ni dodonu me cakava,” e kaya e dua na turaga. Ni se kidacalataka tu ga na ka e yaco, e tavali e dua tale qai kudruvaka, “Ena sega ni cakava ke vakayagataka nona vakasama.” O sa bau rogoca ni dua e kaya oqori? Na cava sara mada na kena ibalebale ni tukuni meda vakasama vakayalomatua?
Sa macala tu ga na kena ibalebale, oya ni dodonu meda dau vakayagataka noda vakasama. Levu era vakanuinui vei ira tale e so mera vakatulewa vei ira. Era vakalaiva na tabana ni itukutuku, nodra itokani, se na veika e ciqomi raraba me lewa na veika era cakava.
E levu nikua era sega ni dau vakasama vakayalomatua, e kaya kina e dua na dauvakadidike, ‘E macala vakasigalevu ni vuqa era sega ni dau vakasama vakayalomatua.’ Ena rawati mada vakacava? Na cava na kena yaga?
Ena Rawati Vakacava?
E dina ni taura na gauna, vakasama, kei na sasaga vagumatua me rawa kina ni dua e vakatulewa vakavinaka, e sega ni kena ibalebale oqo ni sega ni rawa nida vakasama vakayalomatua. Dikeva mada e tolu na ka ena vukei keda meda vakasama kina vakayalomatua.
Vulica na iVolatabu, muria na kena ivakasala. E vakayagataki ena iVolatabu na vosa e totoka vakaoti qai matata vakasigalevu, e ivukevuke uasivi me rawati kina na vuku kei na yalomatua. (Efeso 1:8) Kena ivakaraitaki, na yapositolo o Paula a vakasalataki ira na tacina lotu Vakarisito: “A ka kecega sa dina, na ka kecega e vakaturaga, na ka kecega e dodonu, na ka kecega e savasava, na ka kecega e daulomani, na ka kecega e rogorogo vinaka; ia kevaka sa dua na ka e vinaka, se na ka e daudokai, dou nanuma na veika oqo.” (Filipai 4:8) Kevaka eda muria vakavoleka na ivakasala oqo, eda na dau vakatulewa vakavinaka da qai yalomatua tale ga.
Vuli ena veika e sotavi. E kaya e dua na dauniserekali ni Suwitisiladi, ni vakatauvatana na vakasama vakayalomatua kei na veika e sotavi: “Na vakasama vakayalomatua . . . e rawati ena veika e sotavi kei na [raiyawa].” Sa rauta me tukuni ni o “koya sa yalowai sa vakabauta na vosa kecega: ia na tamata yalomatua sa daulewa vakavinaka na nonai lakolako.” (Vosa Vakaibalebale 14:15) Na vakasama vakayalomatua ena rawati mai na veika e raici, na vuli tara, kei na veika e sotavi. Na toso tale ga ni gauna e rawa nida vuli kina meda vakavinakataka na ka eda cakava. Ia, na noda vuli mai na ka eda lekata e gadrevi kina na yalomalua kei na yalomalumalumu. Na kena laurai vei ira na tamata ena iotioti ni veisiga oqo na viavialevu, daubole, kei na yalolevu, e vakaraitaka ni sega ni vakayagataki vakayalomatua na vakasama.—2 Timoci 3:1-5.
Digitaka vakavuku noda ilala. Na noda ilala tale ga e vakatau kina na noda rawata se sega na vuku kei na vakasama vakayalomatua. E kaya na Vosa Vakaibalebale 13:20: “Ena vuku mai ko koya sa malele vata kei ira na vuku: ia ko koya era veitokani vata kei na lialia ena rusa.” E sega ni dodonu meda ciqoma na ivakarau ni nodra vakasama se nodra nanuma o ira era talaidredre vua na Kalou ra qai vakalecalecava na nona Vosa. E tukuna na Vosa Vakaibalebale 17:12: “E vinaka vua na tamata ni rau sota kaya na pera sa kovei na luvena, ka ca vua ni rau sota kaya na lialia ni sa lialia mai.”
Na Cava na Kena Yaga?
E yaga meda bucina meda dau vakasama vakayalomatua. E talei kina na bula qai sega ni vakalusi gauna. Ena vakalailaitaka na oca e vakilai ena kena caka vakaveitalia na ka. O ira era sega ni dau vakatulewa vinaka era dau vakadredretaka na nodra bula. E kaya na iVolatabu: “A nodra cakacaka na lialia sa vakaocataki ira yadua.” (Dauvunau 10:15) O ira vaka oqo era na rairai sasaga vakaukaua ra qai oca vakalevu; ia era sega ni rawata e dua na ka yaga.
Na iVolatabu e vutucoqa kina na ivakasala yaga me baleta na savasava, sala ni veivosaki, gugumatua, vosoti ni bula dravudravua, kei na so tale na ka e vauca na bula. Le milioni era vakadinadinataka ni nodra rawaka se sega e vakatau ena ivakarau ni nodra muria na ivakavuvuli vakavuku ena iVolatabu.
Na noda vakasama vakayalomatua eda na vakarabailevutaka kina na veika eda cakava, eda na sega ni muria wale tiko ga na ivakasala se ivakavuvuli sa tu rawa. Eda vakayacora vinaka kina na noda itavi. Ia, e sega ni kena ibalebale oya nida na sega ni via vuli. E kaya na Vosa Vakaibalebale 1:5: “Ena vakarorogo na lomavuku, ka na tubu cake kina na nona vuku.” Meda vulica tale ga meda vakadikeva na veika eda vulica, meda kila se cava e vakabibitaki kina. Ena vukei keda oqo meda ‘ivalavala vakavuku.’—Vosa Vakaibalebale 28:26.
Na noda vakasama vakayalomatua e salavata kei na noda vakadinata ni vakaiyalayala na ka eda rawata. Eda na via qarava beka e levu na itavi, ia e dodonu meda vakatulewa vakayalomatua da qai cakava na veika ga eda rawata. E kaya vei keda na yapositolo o Paula, meda ‘vakaogai keda tiko ga ena cakacaka ni Turaga.’ (1 Korinica 15:58, VV) Ia na ivakasala oqori e dodonu me vakasamataki vata kei na ivakavuvuli ena Dauvunau 9:4: “Sa vinaka na koli sa bula ka ca na laioni sa mate.” Na noda qarauna na noda bula nida qaravi Jiova ena vakadedetaka na noda bula, toso tale tiko ga kina na noda qaravi koya. Nida vakasama vakayalomatua eda na lewa vinaka kina na ka ga e dodonu meda caka, nida sa cakava oti eda na lomavakacegu kina. Io, e yaga vakalevu na noda dau vakasama vakayalomatua.
[iYaloyalo ena tabana e 14]
E vutucoqa ena iVolatabu na ivakasala yaga
[iYaloyalo ena tabana e 15]
Na veika eda raica, noda vuli tara, kei na veika eda sotava eda rawa ni vakasama kina vakayalomatua