Marautaka na Veika Vinaka e Vakarautaka na iSoqosoqo i Jiova
“Keimami na vakamamautaki e na ka vinaka mai na nomuni vale.”—SAME 65:4.
1, 2. (a) Ena yaga vakacava vei ira na tamata ni Kalou na kena tara na valenisoro? (b) E vakarautaka vakacava o Tevita na kena tara na valenisoro?
O TEVITA e dua vei ira na turaga kilai levu ena matanitu makawa o Isireli e vakamacalataki ena iVolatabu vakaIperiu. Na ivakatawanisipi, daunivakatagi, parofita, qai tui tale ga oqo e dau vakararavi vakatabakidua vua na Kalou o Jiova. Ena levu ni nodrau veivolekati o Jiova kei Tevita, e gadreva sara ga kina o Tevita me tara e dua na vale ni Kalou. Na vale, se valenisoro oqori ena vakayacori kina na sokalou dina e Isireli. E kila o Tevita ni kena tara na vale oqo era na marautaka na tamata ni Kalou, nira na vakalougatataki kina. Oya na vuna e lagata kina o Tevita: “Sa kalougata na tamata ko ni sa digitaka [Jiova], ka kauta voleka mai, me tiko ga e na nomuni lomanibai: keimami na vakamamautaki e na ka vinaka mai na nomuni vale, io, na nomuni vale tabu.”—Same 65:4.
2 A sega ni vakatarai o Tevita me tara na vale i Jiova. E qai vakatarai ga vei luvena o Solomoni. E sega ni kudruvaka o Tevita na kena soli na dodonu oqo vua e dua tale, dina ga ni a nona gagadre taumada me tara. E bibi ga vua me tara na valenisoro. E tokona dina na cakacaka oqo baleta ni qai solia vei Solomoni na droini se peleni ni vale e solia vua o Jiova. E lesia e vica na udolu na Livai mera veivuke ena tara ni vale qai cautaka tale ga e dua na iwase levu ni koula kei na siliva me tara kina na valenisoro.—1 Veigauna 17:1, 4, 11, 12; 23:3-6; 28:11, 12; 29:1-5.
3. Era raica vakacava na dauveiqaravi ni Kalou na veika e vakarautaki me baleta na sokalou dina?
3 Era tokona na Isireli era yalodina na veika e vakarautaki me baleta na kena tara na vale ni Kalou mera sokalou kina. Nida dauveiqaravi ni Kalou ena gauna oqo, eda na tokona tale ga na veika e vakarautaki ena isoqosoqo i Jiova e vuravura me baleta na noda sokalou. Eda na vakaraitaka kina ni tiko vei keda na ivakarau ni rai a tu vei Tevita. Eda na sega ni dau kudruvaka na ka, ia eda na marautaka ga na veika vinaka e vakarautaka vei keda na isoqosoqo ni Kalou. Eda dau vakasamataka beka na veika vinaka e soli mai e dodonu meda vakavinavinakataka? Meda vakasamataka mada e so vei ira.
Vakavinavinakataki Ira na Veiliutaki
4, 5. (a) E vakayacora tiko vakacava na nona itavi ‘na dauveiqaravi yalodina ka vuku’? (b) Era marautaka vakacava e so na iVakadinadina na kakana vakayalo era ciqoma?
4 E dodonu meda vakavinavinakataka ‘na dauveiqaravi yalodina ka vuku’ e lesia o Jisu Karisito me lewa na veika kece e tu vua e vuravura. Na ilawalawa dauveiqaravi era lotu Vakarisito lumuti oqo, e liutaka tiko na kena vunautaki na itukutuku vinaka, e vakarautaka na veisoqoni e baleta na sokalou, qai tabaka tale ga na ivola e yavutaki ena iVolatabu ena sivia na 400 na vosa. Era lewe vica na milioni ena veiyasa i vuravura ena gauna oqo era sa marautaka tiko na ‘kakana vakayalo ena kena gauna dodonu.’ (Maciu 24:45-47, VV) E sega sara ga ni dua na vuna mera kudru kina.
5 Sa vica vata na yabaki na nona vakila voli mai na lomavakacegu kei na veivukei o Elfi, e dua na iVakadinadina i Jiova sa kena turaga, ni bulataka na ivakasala ni ilawalawa dauveiqaravi e tabaka ena veivola vakaivolatabu. Ena nona vakavinavinaka, e vola o Elfi: “Au na dau vakararavi tu ga ina isoqosoqo i Jiova.” Sa vicasagavulu tale ga na yabaki na nodrau veiqaravi voli mai ni Kalou o Peter kei Irmgard. E vakavinavinakataka tale ga o Irmgard na veisolisoli e dau vakarautaka “vakayalololoma na isoqosoqo i Jiova.” Era okati kina na ivola e baleti ira na ca na ituvaki ni yagodra, me vakataki ira e ca na matadra kei ira na didivara.
6, 7. (a) E liutaki tiko vakacava na nodra cakacaka na veivavakoso e vuravura? (b) Na cava era tukuna e so me baleta na isoqosoqo i Jiova e vuravura?
6 E matataka tiko na ‘dauveiqaravi yalodina’ na iLawalawa Dauvakatulewa ni iVakadinadina i Jiova, oqo e dua na ilawalawa lailai era lumuti ena yalo tabu era veiliutaki tiko mai ena nodra itikotiko liu na iVakadinadina i Jiova e Brooklyn, mai Niu Yoka. Na iLawalawa Dauvakatulewa oqo e lesi ira na dauveiqaravi i Jiova era matua ena vakatulewa mera veiqaravi ena veivalenivolavola ni tabana mera vakatawana na sivia na 98,000 na ivavakoso e veiyasa i vuravura. Era qai dau lesi na tagane era rawata na ivakatagedegede vakaivolatabu mera qase ni veivavakoso oqori qai so mera dauveiqaravi ni ivavakoso. (1 Timoci 3:1-9, 12, 13) E nodra itavi na qase mera vakatawani ira ena loloma na qelenisipi ni Kalou era qarava tiko. Eda kalougata na mai lewena na qelenisipi oqori nida vakila kina na loloma kei na duavata ‘vakaveiwekani’ lotu Vakarisito.—1 Pita 2:17; 5:2, 3.
7 Nira sega ni vosakudrukudru, e dau vakalevu ga mera vakavinavinakataka e so na nodra veituberi vakayalo na qase ni ivavakoso. Me kena ivakaraitaki, vakasamataki Birgit mada, e dua na yalewa lotu Vakarisito sa yabaki 30 vakacaca. Ni se itabagone, e coko o koya ena veimaliwai cala qai voleka sara ni vakayacora na itovo tawadodonu. Ia e qai vukei koya na nodra ivakasala vakaivolatabu na qase ni ivavakoso kei na nodra veitokoni o ira era vakabauta vata. Na cava e nanuma o Birgit ena gauna oqo? E kaya: “Au vakavinavinakataka vakalevu na noqu se lewe tiko ga ni isoqosoqo totoka i Jiova.” E kaya o Andreas, sa yabaki 17: “Oqo e isoqosoqo dina i Jiova, na isoqosoqo vinaka duadua e vuravura.” E sega li ni dodonu meda vakavinavinakataka na vinaka ni isoqosoqo i Jiova e vuravura?
Era Tamata ga o Ira na Veiliutaki
8, 9. Na cava era cakava e so era bula vata kei Tevita, e taura vakacava o Tevita na veika e yaco oya?
8 O ira na lesi mera veiliutaki ena sokalou dina era tamata ga. Era dau cala kece, qai so e tiko na nodra malumalumu era saga vakaukaua tiko mera valuta. E dodonu beka meda rarawataka oqori? Sega. E so mada ga era vakacolati ena itavi lelevu e Isireli makawa era vakayacora e so na cala bibi sara. Me kena ivakaraitaki, ni se cauravou o Tevita e kau me dau lai qiriqiri vei Tui Saula me vukea na tui me dau lomavakacegu. E muri, e qai tovolea o Saula me vakamatei Tevita, mani vakavuna me dro o Tevita.—1 Samuela 16:14-23; 18:10-12; 19:18; 20:32, 33; 22:1-5.
9 E so tale na Isireli era dau veivakaisini. Me kena ivakaraitaki, a vakamatei Apineri na weka i Saula, o Joapi na turaganivalu i Tevita. A bukiveretaki Tevita na tamana, o Apisalomi, ena nona via taura na veiliutaki vakatui. E veretaki Tevita tale o Eitofeli, na daunivakasala nuitaki i Tevita. (2 Samuela 3:22-30; 15:1-17, 31; 16:15, 21) Ia, e sega ni cudruvaka na ka oya o Tevita me sa vakanadakuya kina na sokalou dina. E yaco ga na kena veibasai. Na veika dredre e sotava oya o Tevita e vakavuna ga me kabiti Jiova matua qai dei vinaka tiko na nona rai me vaka na gauna e dro tani kina mai vei Saula. Ena gauna oya, e lagata kina o Tevita: “Mo ni yalololoma mai vei au, na Kalou, mo ni yalololoma vei au: ni sa vakararavi vei kemuni na yaloqu: io, e ruku ni tabamuni ka’u na vakarurugi au kina, ka me oti mada na ka e veivakararawataki oqo.”—Same 57:1.
10, 11. Na cava e sotava na lotu Vakarisito o Gertrud? Na cava e kaya me baleta na nodra malumalumu o ira era vakabauta vata?
10 Eda na sega ni lomaleqataka na veivakaisini vaka oya ena isoqosoqo ni Kalou ena gauna oqo. E sega ni vakatara o Jiova se o ira na nona agilosi kei ira na ivakatawanisipi vakayalo mera tiko ena ivavakoso vakarisito na tamata ca vaka oqori. Ia eda tamata ga se tamata ivalavala ca o keda kei ira na vo ni tamata ni Kalou.
11 Sa qaravi Jiova tu mai vakadede o Gertrud. Ena gauna e se goneyalewa kina, a beitaki ni lasutaka tiko o koya me dua vei ira na dau vunautaka vakatabakidua na Matanitu ni Kalou. E taura vakacava na veibeitaki oya? E levaca beka o koya na ka e yaco oya? Sega. Ni bera toka ga na nona leqa ena 2003 ni sa yabaki 91, e kaya ena nona raica lesu na veika e sotava: “Au vulica mai na veika au sotava oya ni dina e dau cala na tamata, ia e liutaka tiko ga o Jiova na nona cakacaka, dina ga ni vakayagataki keda tiko na tamata ivalavala ca.” Ni vakila na kena tatara vua na revurevu ni nodra ivalavala ca e so na tamata ni Kalou, e dau masuti Jiova o Gertrud me vukei koya.
12. (a) Na ivakaraitaki ca cava era vakaraitaka e so na lotu Vakarisito ena imatai ni senitiuri? (b) Na cava meda kauaitaka tiko ga?
12 Me vaka nira tamata ga o ira mada ga na lotu Vakarisito era bau yalodina toka, ke cala e dua vei ira e lesi ena dua na itavi, meda kua mada ga ni ‘vosakudrukudru.’ (Filipai 2:14, VV) E rarawataki dina kevaka eda vakatotomuria na nodra ivakaraitaki ca e so ena ivavakoso vakarisito ena imatai ni senitiuri! E vakaraitaka na tisaipeli o Juta ni so na dauveivakavulici vakailasu ena nona gauna “era bese ni lewai, a ra sa vosavakacacataki ira na turaga.” O ira na daucakacala oqo era ‘dauvosakudrukudru ra qai daudidi.’ (Juta 8, 16) Meda kua mada ga ni vakatotomuri ira na dauvosakudrukudru kei ira na daudidi, ia meda kauaitaka ga na veika vivinaka e vakarautaka vei keda na ‘dauveiqaravi yalodina.’ Meda marautaka tiko ga na vinaka ni isoqosoqo i Jiova da qai cakava na veika kece nida sega ni ‘vosakudrukudru.’
“A Vosa Dredre Oqo”
13. Era ciqoma vakacava e so na ivakavuvuli i Jisu Karisito?
13 E so era veileti kei ira na vakaitavi ena ivavakoso ena imatai ni senitiuri, e so tale ga era vosakudrukudrutaka na ivakavuvuli i Jisu. Me vaka e volai ena Joni 6:48-69, e kaya o Jisu: “O koya sa kania na lewequ, ka gunuva na noqu dra, sa rawata na bula tawa mudu.” Nira rogoca na vosa oqo, “era lewe vuqa vei ira na nona tisaipeli . . . era . . . kaya, A vosa dredre oqo: ko cei sa vakabauta rawa?” E kila o Jisu “ni ra sa vosakudrukudru na nona tisaipeli e na ka oqo.” Oqo e vakavuna mera “suka tani kina e le vuqa vei ira na nona tisaipeli, a ra sa sega tale ni lako vata kaya.” Ia era sega ni vosakudrukudru kece na tisaipeli. Rogoca na ka e yaco ni tarogi iratou na 12 na yapositolo o Jisu: “Dou sa via lako tani talega koi kemudou?” E sauma na yapositolo o Pita: “Kemuni na Turaga, keitou na lako vei cei? sa tu ga vei kemuni na vosa ni bula tawa mudu: ia keitou sa vakabauta ka kila, ni sai Kemuni na Karisito, na Luve ni Kalou bula.”
14, 15. (a) Na cava era vosakudrukudrutaka kina e so na ivakavuvuli vakarisito? (b) Na cava eda vulica vei Emanuel?
14 Ena noda gauna oqo e dua na iwase lailai sara ni tamata ni Kalou era vosakudrukudrutaka e so na ivakavuvuli vakarisito. Oqo e vakavuna mera kudruvaka kina na isoqosoqo i Jiova e vuravura. Na cava e vakavuna na nodra kudru? E dau vu vakalevu ena nodra sega ni kila vinaka na ivakarau ni nona cakacaka na Kalou. E dau vakatakila vakamalua na Dauveibuli vei ira na nona tamata na veika dina. O koya gona, e rawa ni veisau na veika eda vakabauta mai na iVolatabu. Na iwase levu ni tamata i Jiova era dau marautaka na veiveisau vaka oqori. Ia era lewe vica wale sara era vakaraitaka nira “yalododonu vakalevu” ra qai cata na veisau. (Dauvunau 7:16) E rawa ni vu tale ga mai na nodra dokadoka kei na nodra dau vinakata mera muria ga na lomadra. Se mani cava e vuna, e rerevaki sara na vosakudrukudru baleta ni rawa ni kauti keda lesu ina vuravura kei na kena ivalavala.
15 Me kena ivakaraitaki, o Emanuel a iVakadinadina, ia e qai vakacala e so na ka e wilika ena ivola e vakarautaka ‘na dauveiqaravi yalodina ka vuku.’ (Maciu 24:45, VV) E sega tale ni via wilika na ivola ni isoqosoqo qai tukuna vei ira na qase ni nona ivavakoso ni sa sega ni vinakata me iVakadinadina i Jiova. Ia, ni oti ga e dua na gauna lekaleka e qai vakila o Emanuel ni dodonu tu ga na veika e vakavuvulitaka tiko na isoqosoqo i Jiova. E veitaratara tale kei ira na iVakadinadina, tusanaka na cala e cakava, qai vakalesui mai me iVakadinadina i Jiova tale. Sa duatani na nona marau.
16. Na cava ena vukei keda meda kua ni vakatitiqataka e so na ivakavuvuli vakarisito?
16 Vakacava kevaka eda nanuma meda vosakudrukudru baleta nida vakatitiqataka e so na ivakavuvuli era vakabauta na tamata i Jiova? Meda kua ni yalototolo. De ena qai tabaka mai na ‘dauveiqaravi yalodina’ e dua na ka ena sauma na noda vakatataro se na ka eda vakatitiqataka oya. E ka vakavuku meda qara na nodra veivuke na qase ni ivavakoso. (Juta 22, 23) Noda dau masu, vuli vakataki keda, kei na noda veimaliwai kei ira eda vakabauta vata era kaukaua vakayalo ena vukei keda meda sega ni vakatitiqa, ena vakadeitaka tale ga meda dau vakabauta tiko na veika dina mai na iVolatabu eda vulica vua e vakayagataka tiko o Jiova me vakamacalataka na nona vosa.
Me Tiko Vei Keda na Rai Dodonu
17, 18. Nida sega ni vosakudrukudru, na rai cava me tu vei keda, ena vuku ni cava?
17 Dina nida tamata ivalavala ca da qai rawa ni cala, ia e so era dau kudruvaka na ka e sega so ni bibi. (Vakatekivu 8:21; Roma 5:12) Kevaka e dau noda ivalavala meda dau vosakudrukudru, oqo ena rawa ni vakaleqa na noda veiwekani kei na Kalou o Jiova. E dodonu gona meda qarauna meda kua ni dau vosakudrukudru.
18 Meda kua gona ni kudruvaka na veika e vakayacori ena ivavakoso, ia me tu ga vei keda na rai dodonu da qai ogaoga tiko ga, mamarau, veidokai, me veiraurau noda rai, da qai kaukaua tiko ga ena vakabauta. (1 Korinica 15:58; Taito 2:1-5) E lewa tiko o Jiova na veika kece ena nona isoqosoqo, e kila tiko o Jisu na veika kece e yaco tiko ena veivavakoso, me vaka ga ena imatai ni senitiuri. (Vakatakila 1:10, 11) Dau waraka ga na Kalou kei Karisito, na Ulu ni ivavakoso. Ena so na gauna e rawa nira vakayagataki na ivakatawa mera vakadodonutaka e so na ka e gadrevi.—Same 43:5; Kolosa 1:18; Taito 1:5.
19. Me yacova na gauna e liutaka kina na kawatamata na Matanitu ni Kalou, na cava meda kauaitaka tiko?
19 Sa voleka ni oti na ituvaki ca kei vuravura oqo, sa na qai liutaka na kawatamata na Matanitu i koya na Mesaia. Me yacova na gauna oya, e rui bibi vei keda yadudua me tiko vei keda na rai dodonu! Oqo ena vukei keda meda dau kauai cake ena veika vinaka era cakava tiko o ira eda vakabauta vata, da qai kua ni kauaitaka na nodra malumalumu. Eda na marau tale ga kevaka eda kauaitaka tiko ga na nodra itovo vinaka. Me kua ni vakaleqai keda na vosakudrukudru, meda na saga tiko ga meda kaukaua vakayalo.
20. Na veivakalougatataki cava eda na marautaka kevaka e tiko vei keda na rai dodonu?
20 Na rai dodonu tale ga ena vukei keda meda nanuma tiko na veivakalougatataki eda marautaka tiko nida lewena na isoqosoqo i Jiova e vuravura. Oqo ga na isoqosoqo e yalodina tiko vua e lewa na lomalagi kei vuravura. Na cava o nanuma me baleta na ka oya kei na itavi dokai ni nomu sokalou rawa vua na Kalou dina duadua o Jiova? Mo vakataki Tevita mada ga, o koya e lagata: “Oi kemuni sa daurogoca na masu, ena toro mai vei kemuni na tamata kecega. Sa kalougata na tamata ko ni sa digitaka, ka kauta voleka mai, me tiko ga e na nomuni lomanibai: keimami na vakamamautaki e na ka vinaka mai na nomuni vale, io, na nomuni vale tabu.”—Same 65:2, 4.
O se Nanuma Tiko?
• Na cava meda vakavinavinakataki ira kina na veiliutaki tiko ena ivavakoso?
• Meda raica vakacava na nodra cala na tacida era veiliutaki tiko?
• Meda raica vakacava na veiveisau ni noda kila na ibalebale ni iVolatabu?
• Na cava ena vukei keda meda kua ni vakatitiqa?
[iYaloyalo ena tabana e 20]
E solia vei Solomoni o Tevita na peleni ni valenisoro qai tokona tale ga na sokalou dina
[iYaloyalo ena tabana e 23]
Era marau na qase ni ivavakoso mera veivuke vakayalo