E Rawa Beka Nida Kilai Koya na Kalou?

“Sai Koya Oqo na Bula Tawa Mudu, me ra Kilai Kemuni na Kalou Dina Duaduaga.”​—Joni 17:3.

“A KA vakaidina na kena titobu ni nona vutu ni vuku kei na nona yalomatua [“kilaka,” NW] na Kalou!” e kaya na yapositolo o Paula. E tomana tale: “Sa sega ni kilai rawa na nona lewa, a sa sega ni kune na nonai valavala!” (Roma 11:33) Nida dikeva na veivosa oqori, e dodonu beka meda nanuma ni na sega ni rawa vua na tamata me kila na vuku kei na kilaka me baleta na Kalou, me sega kina ni rawa nida kilai koya na Kalou kei na nona inaki?

E so na vuku ena veika vakalotu, era vakabauta na vakanananu oqori, oya ni sega ni rawa nida kilai koya na Kalou. Me vakamacalataka na vakasama oqori, e kaya kina na ivola na Encyclopedia of Religion: “Na Kalou e uasivita na ka kece e rawa ni kilai me baleti koya. . . . Na Kalou e sega ni rawa ni vakayacani se vakamacalataki, ni oqori ena yalani . . . koya. Na Kalou e tawavakaiyalayala. . . . Eda na sega gona ni kilai koya rawa baleta e sega ga ni rawa ni kilai.”a

E kaya na ivola na Newsweek, ni levu vei ira era bula ena veivanua torocake era sa malele ina “dua na mataqali vakabauta vou,” e vakavuvulitaki kina ni “sega ni dua na ivakavuvuli e rawa ni vakatokai me ka dina.”

Ia, e levu era lomatarotarotaka voli na inaki ni nodra bula. Vakauasivi na nodra raica na leqa mosimosi e sotavi ena vuku ni bula dravudravua, tauvimate, kei na itovo voravora. Bau vakararawataki ira tale ga na kena sega ni dau dei e dua na ka ena noda bula. De ra na vinakata mera kila na isau ni nodra taro, ia ke sega nira kunea na kena isau, era na rairai tinia kina ni sega ga na kena isau. Yaco sara me levu vei ira oqori era bese ni lai lotu, ra mani tini vaqara ga vakataki ira na sala mera torova kina na Kalou. Ia, e so vei ira era sa sega tale ga ni vakabauta ni bula tiko na Kalou.

Na Rai ni iVolatabu

O ira era bau vakabauta toka na iVolatabu ra qai rawa ni ciqoma tale ga ni o Jisu Karisito na nona daunivosa na Kalou, era na rairai taleitaka mera na kila na rai ni iVolatabu. De dua o na nanuma na vosa i Jisu me baleta e rua na gaunisala, e dua e ‘lalaga qai rabailevu e basika ina rusa’ ia na kena ikarua e ‘qiqo qai rabalailai e basika ina bula.’ E vakamacalataka tale ga o Jisu na sala o rawa ni kilai ira kina era lako tiko ena rua na sala oqo, ena nona kaya: “Dou na kilai ira e na vuadra.” Na vua cava beka oqo? Era sega ni kilai mai na ka era tukuna, ia mai na ka ga era cakava. E kaya vakamatata o Jisu: “Ena sega ni curu ki na matanitu vakalomalagi ko ira kecega sa kaya vei au, Turaga, Turaga; ko koya ga sa cakava na loma i Tamaqu sa tiko mai lomalagi.” Sega ni rauta meda cavuta wale tu ga nida vakabauta na Kalou. Ena dodonu meda cakava sara ga na lomana. Ia, me rawa oqori, ena gadrevi meda kila taumada na loma ni Kalou.​​—Maciu 7:​13-​23.

O Jisu e tukuna vakamatata ni rawa sara ga vua na tamata me kilai koya na Kalou. E kaya: “Sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.” (Joni 17:3) Macala gona ni rawa nida kila na vuku kei na kilaka e vakatakila mai na Kalou, kevaka eda saga vagumatua. Ia, vei ira era cakava oqori, ena solia na Kalou vei ira na bula tawamudu. Sa na dua dina na sasaga yaga.

[iVakamacala e ra]

[iYaloyalo ena tabana e 4]

A kaya o Jisu ni sala rabailailai e basika ina bula