Na Cava Meda Kilai Koya Kina na Meca i Karisito?
“Dou a rogoca ni na lako mai ko koya na meca i Karisito,” a uqeti vakalou na yapositolo me vola ena gauna makawa sara. (1 Joni 2:18) E vakavure vakasama dina na veivosa oqo! Sa vica vata mai na senitiuri na nodra vaqaqa voli na tamata se cava na kena ibalebale. O cei na meca i Karisito? Ena lako mai ni naica? Na cava ena cakava ni sa na tokatu?
ENA veitabagauna, e dua na ka na kedra lewe levu o ira era beitaki nira meca i Karisito. Ena dua na gauna sara e liu, o ira era vakatokai mera “meca i Karisito” era okati kina na Jiu, na tui tabu, vaka kina o ira na empara ni Roma. Kena ivakaraitaki na ka a yaco vei Empara Frederick II (1194-1250), ena nona a bese ni tokona e dua na ivalu vakalotu. Mani vakatokai Frederick o Tui Tabu Gregory IX me meca i Karisito, qai vakasivoi koya tani mai na lotu. Ia, a sega ni yala ga e kea, ni o koya a sosomitaki Gregory, o Innocent IV, a se baci vakasivoi Frederick tale. A sauma o Frederick na ka e caka vua oya, ena nona vakatokai Innocent na tui tabu me meca i Karisito.
Vei ira kece na vola na iVolatabu, na yapositolo ga o Joni e cavuta na vosa na “meca i Karisito.” Na matavosa oqo e kune vakalima ena rua na nona ivola, e vakaibalebaletaki vua e dua se sivia. E koto ena kato ena tabana e tarava na kena veitikinivolatabu. Matata gona ena tikinivolatabu kece oqori ni o koya na meca i Karisito e daulasulasu, dauveivakacalai, qai saga tiko ena nona igu taucoko me vakarusa na nona veiwekani voleka e dua kei Karisito, vaka kina na Kalou. Sa rauta me uqeti ira vaka oqo na nona itokani lotu Vakarisito na yapositolo: “Oi kemudou sa lomani, kakua ni vakadinata na yalo [“vosa uqeti,” NW] kecega, ia dou vakatovolei ira na yalo [“vosa uqeti”] se ra yalo [“vosa uqeti”] mai vua na Kalou, se segai: ni ra sa lewe vuqa na parofita vakailasu era sa lako voli yani e vuravura.”—1 Joni 4:1.
A veivakaroti tale ga o Jisu mera qarauni na dauveivakacalai, se parofita vakailasu, ena nona kaya: “Era sa lako mai vei kemudou ka vakaisulu vaka na sipi, a ra sa wolifa daukata e lomadra. Dou na kilai ira e na vuadra [se, ena ka era cakava].” (Maciu 7:15, 16) A vakaroti ira tale tiko beka ga na nona imuri o Jisu mera qarauni ira mai na meca i Karisito vakaivakatakarakara? Meda dikeva mada na sala eda na kilai koya kina na dauveivakacalai torosobu oqo.