Marautaka Nona “Qaqa kei na lami”
ENA dua nona ivola o Carey W. Barber ena 1971, a nanuma lesu kina na imatai ni 50 na yabaki ni nona qarava voli na Kalou dina: “Totoka vakaoti na veiyabaki oya ni veiqaravi vei Jiova. Na veimaliwai kei ira nona tamata; nona taqomaki keda vei ira na dau caka ca ena vuravura i Setani; na inuinui ni qaqa kei na Lami, o Jisu Karisito; kei na ivakadinadina ni loloma i Jiova, era ivurevure taucoko ni bula nuidei kei na vakacegu e taqomaki kina na lomada qai veivakadeitaki me baleta na qaqa.”
Ni oti tale e ono na yabaki, a lesi o Brother Barber, e dua na lumuti lotu Vakarisito, me lewe ni iLawalawa Dauvakatulewa ni iVakadinadina i Jiova. E 30 taucoko na yabaki na nona veiqaravi ena tabana oya, qai rai vakanamata ina nona “qaqa kei na Lami.” A rawata dina na icovi oya ena nona yalodina tiko ga me yacova nona leqa ena Sigatabu na ika8 ni Epereli, 2007, ni sa yabaki 101.—1 Korinica 15:57, VV.
A sucu mai Igiladi ena 1905 o Carey Barber, qai papitaiso mai Winnipeg, e Kenada ena 1921. Ni oti e yabaki rua e lesi kei Norman, na nona isa ni drua, me rau lai veiqaravi e Peceli mai Brooklyn, e Niu Yoka, ena dua na sasaga vou. Era vakarau tiko ena gauna oya na tamata i Jiova mera tabaka ga na nodra ivola me vakatetei kina na itukutuku vinaka ni Matanitu ni Kalou e “veivanua kecega.” (Maciu 24:14) A cakacaka taumada o Brother Barber ena qaravi ni misini lalai ni tabaivola. Okati ena so na ka e tabaki na ivola vakalawa me baleta na kisi era lai rogoci ena Mataveilewai Cecere e Mereke. Toso na gauna sa dewa nona veiqaravi o Brother Barber ena Tabana e Qarava na Cakacaka, me raica vakatabakidua na veika e baleta na ivavakoso kei na cakacaka vakavunau e Mereke.
Ni kila vinaka na cakacaka oqori o Brother Barber, e lesi kina me ivakatawa dauveilakoyaki ena 1948, me qarava na veisoqo ni tabacakacaka kei na ivavakoso ena yasayasa vakara kei Mereke. E kaya ni taleitaka vakalevu nona cegu cagi bulabula e tautuba ena cakacaka vakavunau. E levu sara kina nona veikilai o Brother Barber kei ira na mataveitacini. Yaga sara vakalevu na totolo ni nona vakasama kei na nona gugumatua ena cakacaka vakavunau ena gauna sa sureti kina ina ika26 ni kalasi ni Watchtower Bible School of Gilead. Ena gauna ni vuli oya rau a veikilai kina kei Sydney Lee Brewer, mai Kenada, a lewe tale ga ni kalasi. Rau qai vakamau ni cava na tuvaitutu, oti ga oya rau sa sikova na ivavakoso era tu e Chicago, mai Illinois. Dua dina na itokani vinaka o Sister Barber qai vu ni veivakayaloqaqataki vei watina ena 20 na yabaki nodrau veiqaravi voli vakaivakatawa dauveilakoyaki.
O ira na veikilai kei Brother Barber, ra qai donuya nona veiqaravi voli vakaivakatawa ni tabacakacaka se tikina, se na gauna e lewe tiko kina ni iLawalawa Dauvakatulewa qai veilakoyaki voli vakacakacaka me 30 na yabaki, era na nanuma vinaka nona ivunau kei na ivakamacala veiuqeti. E vuna vinaka oqo meda marautaka kina nona sa “qaqa kei na Lami.”