Dikeva na Ka ena Rai Vakalou

E SIGA katakata na 14 Sepiteba, 2002 e Niu Yoka mai Mereke. Era mai sota ena siga oqo e Patterson Educational Center kei na itikotiko e Brooklyn kei Wallkill era lewe 6,521 era duikaikai. Era mai vakadinadinataka na nodra tuvaitutu na ika113 ni kalasi ni Watchtower Bible School of Gilead. Era cavutu mai na 14 na vanua na gonevuli, ra qai vakarautaki tiko ena loma ni lima na vula mera lai veiqaravi vakadaukaulotu ena 19 na vanua era lesi kina.

A jeameni ni porokaramu o Carey Barber, e sa volekata na yabaki 98, e lewe tale ga ni iLawalawa Dauvakatulewa ni iVakadinadina i Jiova. E vakaraitaka ni sa voleka ni 60 na yabaki na yaga ni koronivuli oqo, e vakarautaki ira e vica vata na udolu ena cakacaka vakadaukaulotu. E kaya o Brother Barber: “E dina taucoko na veika vinaka sa yaco ena vuku ni veivakavulici e vakayacori kina. E drau vakaudolu na tamata yalomalumalumu ena veiyasa i vuravura era sa yalataki ira vei Jiova, ra vakaitavi ena veiqaravi tabu ena vuku ni nodra veivuke na daukaulotu era a vuli ena koronivuli oqo.”

Ni bera nira mai vuli e Kiliati e so vei ira na gonevuli, era sa vakaraitaka rawa tu na nodra via vakalevutaka na nodra cakacaka vakaitalatala. E sivia e dua na yabaki na nodrau vulica tiko e dua na veiwatini na vosa vaka Mandarin, me rawa nira tarai kina e dua na ilawalawa mai Jaina era vakaitikotiko vata e Canada. E dua tale na veiwatini rau vulica ga vakataki rau na vosa vaka Albania, rau qai toki i Albania me rau lai vukei ira na via vulica na iVolatabu e kea. E so tale era tiko ena kalasi e Kiliati era gole mai Hungary, Guatemala, kei na Dominican Republic, era toki ena veivanua oqo ni gadrevi kina vakalevu na qasenivuli ni Vosa ni Kalou.

Ni bera nira gole ena vanua era lesi kina e Aferika, Tokalau kei Urope, Amerika e Loma, Sauca Amerika, kei na Tokalau kei Esia, era uqeti na gonevuli mera kila ni kauaitaka na Kalou na veika kece era cakava.

Dikeva na Ka ena Rai Vakalou

Ni sa cava na vosa nei Brother Barber, sa qai kacivi Maxwell Lloyd, e dua na lewe ni Komiti ni Tabana mai Mereke. E vosa ena ulutaga “Dikeva na Ka Kece ena Rai Vakalou.” E kauta cake mai o Brother Lloyd na nodrau ivakaraitaki o Tevita kei na Luve ni Kalou, o Jisu. (1 Samuela 24:6; 26:11; Luke 22:42) Ni oti nona tokaruataka vei ira na gonevuli ni na vukei ira na lima na vula era vulica tiko kina na iVolatabu mera raica na ka mai na rai vakalou, sa qai tarogi ira: “Ni o sa veivakavulici tiko ena iVolatabu ena vanua vou o sa lesi kina, o na vukei ira beka na gonevuli mera vakatulewataka na ka ena rai vakalou?” Ke ra veivakasalataki, a uqeti ira: “Kua ni kaya, ‘Na noqu nanuma, se na noqu rai . . . ’ Ia, vukei ira ga mera raica se cava na rai ni Kalou. Ke o muria oqo, o na vu ni veivakalougatataki vei ira ena vanua o lesi kina.”

E vosa tarava o Gerrit Lösch, e lewe ni iLawalawa Dauvakatulewa. E vosa ena ulutaga “Au na Tiko Vata kei Iko,” e vakaraitaka na ka e dau tukuna o Jiova vei ira nona dauveiqaravi yalodina ena vuqa na gauna, “au na tiko vata kei iko.” (Vakatekivu 26:​23, 24; 28:15; Josua 1:5; Jeremaia 1:​7, 8) Ena gauna tale ga oqo, eda rawa ni nuitaki Jiova ke da yalodina tiko ga vua. A qai dusia o Brother Lösch: “O leqataka beka ke o na kunea e dua na nomu vuli iVolatabu? Nanuma tiko ni tukuna o Jiova, ‘Au na tiko vata kei iko.’ O leqataka beka ni na sega ni veirauti na ka o na taukena? E kaya o Jiova, ‘Au na sega sara ni biuti iko, se vakalaivi iko,’ me vaka e tukuni ena Iperiu 13:5.” E tinia ni tukuna vei ira na gonevuli ni a parofisaitaka tale ga o Jisu ni na tiko vata kei ira nona imuri yalodina ena cakacaka ni veivakavulici.​—Maciu 28:20.

“O na Taqomaki Beka ena Gauna ni Rarawa?” e nona ulutaga e dua vei ira na qasenivuli e Kiliati o Lawrence Bowen. Ena vuku ni ile a vure mai Iteni, e kaya kina ni o ira kece na via qaravi Jiova vakatabakidua era na sotava na dredre, ena so na gauna era na vakararawataki sara vakaca. E uqeti ira kina na gonevuli era tuvaitutu mera muria na ivakaraitaki i Jisu, e taqomaki koya dina nona vakararavi vakatabakidua vei Jiova kei na nona ciqoma na veivakararawataki e vakatara vua o Jiova me vakadeitaka kina nona talairawarawa. (Iperiu 5:​8, 9) E rawa ni vakatauvatani o Jiova kei na dua na dausava koula, e vakayagataka ga na ivakarau donu ni katakata me kau laivi kina na duka. Io, na vakabauta e vakatovolei oti e uasivi sara mai na koula. Cava na vuna? “Ni vakabauta e vakatovolei e rawa ni vorata na ituvaki dredre cava ga,” e kaya o Brother Bowen, “e vakarautaki keda tale ga meda vosota me ‘yacova na icavacava.’”​—Maciu 24:​13, NW.

E taroga e dua vei ira na qasenivuli e Kiliati o Mark Noumair: “O na Taleitaki Beka?” E yavutaki nona ulutaga ena 1 Samuela 2:​26, e vakamacalataki Samuela ni “sa vinakati koya ko Jiova, kei ira talega na tamata.” Ni oti nona tukuna na ivakaraitaki i Samuela, e kaya o Brother Noumair, e sivia e tini na yabaki nona cakacaka tu vakaulotu mai Aferika: “Ke o yalodina tiko ga ena cakacaka sa lesi iko kina na Kalou, ena taleitaki iko tale ga na Kalou. E solia vei kemuni na ilesilesi talei vakadaukaulotu.” Sa qai uqeti ira na lewenikalasi era tuvaitutu oqo o Brother Noumair mera raica na nodra ilesilesi me itavi tabu e solia vei ira na Kalou, me tiko tale ga vei ira na rai vakalou nira veiqaravi tiko vakadaukaulotu.

Ena loma ni gauna era vuli tiko kina, era vakayagataka e levu na gauna vinaka ena loma ni macawa mera wasea yani vei ira na tiko ena yasayasa oya na ‘cakacaka veivakurabuitaki ni Kalou’ me vaka e volai ena iVolatabu. (Cakacaka 2:​11) E rawa kina vei ira mera tukuna na veika oqo ena tini na veimataqali vosa. E dua tale ga na qasenivuli e Kiliati o Wallace Liverance, e vakatarogi ira e so na gonevuli ni vosa ena ulutaga “‘Na Cakacaka Veivakurabuitaki ni Kalou’ e Veiuqeti ena Cakacaka.” E dusia: “Na yalo tabu e vakauqeti ira na tiko ena tabavale e cake ena siga ni Penitiko mera tukuna na ‘cakacaka veivakurabuitaki ni Kalou.’ Na yalo tabu vata ga oya e cakacaka tiko vei ira kece nona dauveiqaravi yalodina ena gauna oqo.” Na ka oqo e uqeti ira e so mera vulica e so tale na vosa me rawa nira vakarabailevutaka kina nodra vunau.

iVakasala Yaga me Dikevi na Ka ena Rai Vakalou

Ni oti oya, erau vakataroga sara o Gary Breaux kei William Young, erau lewenivuvale e Peceli e Mereke, e so na lewe ni komiti ni valenitabana ena so na vanua era veiqaravi tiko kina na daukaulotu, kei na dua na veiwatini e 41 na yabaki nodrau cakacaka vakaulotu. E dua na ka e laurai oya ni: “O ira na sega ni dau vinakata e levu na ka era dau dede ena nodra ilesilesi. Era raica ga vakabibi na vuna era talai kina. Era kila ni nodra itavi mera lai vunautaka na itukutuku vinaka mera qai vukei ira na tamata mera mai kilai Jiova.”

E mai tinia na vosa e dua tale na lewe ni iLawalawa Dauvakatulewa o David Splane ena ulutaga “O Sega ni Lako Vakayawa!” Cava beka e vakaibalebaletaka, ni o ira na 46 era tuvaitutu oqo era lesi ina veiyasa i vuravura? E vakamacalataka: “Se mani yasa i vuravura cava o tiko kina, o na se tiko ga ena vale ni Kalou kevaka o yalodina tiko.” Io, se mani vanua cava ga e tiko kina e dua na lotu Vakarisito yalodina, e sa veiqaravi tiko ena dua na taba ni valenisoro se vale vakayalo ni Kalou, a tauyavu ni papitaiso o Jisu ena imatai ni senitiuri. (Iperiu 9:9) E veivakacegui dina vei ira na tiko ena siga oya nira kila ni o Jiova e voleka vei ira era qaravi koya tiko ena yalodina e vuravura! Me vaka nona kauai o Jiova ena gauna a tiko voli kina e vuravura o Jisu, e vaka tale ga oya nona kauaitaki keda kei na noda veiqaravi vua, se mani vanua cava ga eda tiko kina. Eda veivolekati vakaveitacini nida sokalou, eda voleka tale ga vei Jiova kei Jisu.

Ni kacivaki oti na vakanuinui vinaka mai na veiyasa i vuravura, na kacivaki ni nodra ilesilesi, kei na wiliki ni nodra ivola na lewenikalasi ena nodra vakavinavinakataka na veivakavulici e caka vei ira e Kiliati, sa qai mai tinia vinaka na jeameni na porokaramu. E uqeti ira na daukaulotu vou mera tomana tiko ga nodra cakacaka vinaka, ra qai marautaka nodra veiqaravi vei Jiova.​—Filipai 3:1.

[Kato ena tabana e 23]

VEIKA ME BALETA NA KALASI

Vanua era cavutu mai kina: 14

Vanua era lesi kina: 19

Levu ni gonevuli: 46

iVakatautauvata ni nodra yabaki: 35.0

iVakatautauvata ni yabaki ena dina: 17.2

iVakatautauvata ni yabaki ena cakacaka vakaitalatala vakatabakidua: 13.7

[iYaloyalo ena tabana e 24]

Nodra Tuvaitutu na Kalasi 113 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi me gole ina imatau.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.