Ena Veiliutaki e Naica na Matanitu ni Kalou?

‘TURAGA, oni na vakayacori Isireli me matanitu tale ena gauna oqo?’ (Cakacaka 1:6) Era vinakata sara ga na yapositolo mera kila na gauna ena tauyavutaka kina o Jisu na nona Matanitu. Sa oti tale e 2,000 na yabaki, eda se vinakata tiko ga meda kila: Ena veiliutaki e naica na Matanitu ni Kalou?

De dua o nanuma ni a veivosakitaka o Jisu na taro oqo baleta ni usutu sara ga ni nona vunau na Matanitu ni Kalou. E dina oqori! Vakalevu me vakamacalataka na ivakatakilakila era yaco ena loma ni dua gauna e vakatoka nona “sa tiko.” (Maciu 24:​37, NW) Nona sa tiko e sema ina tauyavu ni Matanitu Vakamesaia. Cava na ibalebale ni nona sa tiko? Meda dikeva mada e va na tikina bibi e vakaraitaki ena iVolatabu me baleta nona sa tiko na Karisito.

1. Nona tiko na Karisito, ena tekivu ni oti e dua na gauna dede sara mai na nona mate. Ena dua na italanoa e vakatauvatani koya o Jisu ina dua na turaga e “lako ki na dua na vanua yawa, me buli me tui.” (Luke 19:12) Vakayacori vakacava na vosavakatautauvata ni parofisai oya? Ena nona mate o Jisu, vakaturi qai lako ina “vanua yawa,” i lomalagi. Kaya o Jisu ena dua tale na vosavakatautauvata, ni nona lesu mai ena itutu vakatui ena “dede sara.”​​—Maciu 25:19.

E vola na yapositolo o Paula ni oti e vica na yabaki nona lako i lomalagi o Jisu: “Ko koya oqo [Jisu], ni sa vakacabora oti vakadua nai soro e dua ga e na vuku ni valavala ca, sa qai tiko sobu e na liga i matau ni Kalou; a sa . . . waraka tiko me vakayacori ko ira na nona meca mei tutu-ni-yavana.” (Iperiu 10:​12, 13) A lai wawa toka ena dua na gauna balavu o Jisu ni yaco i lomalagi. Mai cava na wawa oya ni sa vakadaberi koya o Jiova me Tui ni Matanitu Vakamesaia me vaka a yalataki. Tekivu e kea nona sa tiko na Karisito. Eda raica beka na ka vakasakiti a yaco oya?

2. Tawarairai nona sa tiko. A vakamacalataka o Jisu na ivakatakilakila ni nona sa tiko. (Maciu 24:​3, NW) Kevaka eda raica sara ga nona sa tiko, ena vinakati beka na ivakatakilakila? Kena ivakaraitaki: Kaya mada ni o tiko sara mai lomanivanua, o qai sasaga mo yaco i waitui. O na muria na ivakatakilakila era tu e gaunisala mo rawa ni yaco e kea. Ia ni o sa duri tu e baravi, o raica tu na wasaliwa, o namaka beka mo na raica e dua tale na ivakatakilakila e volai kina vakamatailelevu na vosa “Waitui”? Sega! Baleta ni o sa kila ga ni oya na waitui.

Sega ni tukuna o Jisu nida na raica e matada nona sa tiko, ia e vakamacalataka ga na ivakatakilakila eda na kila kina e dua na ka ena yaco e lomalagi. E kaya o Jisu: “[Na] matanitu ni Kalou sa sega ni yaco mai me vaka na ka e vakarairaitaki.” (Luke 17:20) Na ivakatakilakila cava ena kilai kina ni sa tiko na Karisito?

3. Kilai nona sa tiko, ena veileqa e tarai vuravura. A kaya o Jisu, ni nona sa tiko na Tui vakalomalagi ena vakatakilakilataki ena ivalu, dausiga, uneune, mate ca, kei na caka ca. (Maciu 24:​7-​12; Luke 21:​10, 11) O cei e vakavuna na rarawa kece oqo? E vakamacalataka na iVolatabu ni o Setani “na turaga ni vuravura oqo,” e cudru vakalevu ni kila sa lekaleka nona gauna ena nona sa tiko na Tui o Karisito. (Joni 12:31; Vakatakila 12:​9, 12) Levu sara na ivakadinadina eda raica ena nona cudru vakalevu o Setani kei na nona sa tiko o Karisito. Vakauasivi na ka a yaco ena 1914, era kila na daunitukutuku makawa ni yaco kina na veisau levu e tara na vuravura taucoko.

De dua e itukutuku rogorogo ca oya, ia e sega ni vaka kina. E ivakadinadina ga ni sa veiliutaki tiko mai lomalagi ena gauna oqo na nona Matanitu na Mesaia. Sega ni dede sa na lewa mai na vuravura taucoko. Eda na kila vakacava na Matanitu oqo, me rawa nida ciqoma na kena veiliutaki da qai vakarurugi kina?

4. Vunautaki na itukutuku vinaka e vuravura raraba. Vakatauvatana o Jisu nona sa tiko kei “na gauna i Noa.”a (Maciu 24:​37-​39, VV) Sega wale ga ni taya na waqa o Noa, a “dauvunautaka [tale ga] nai valavala dodonu.” (2 Pita 2:5) A vakaroti ira ena gauna oya, ni sa voleka ni vakatauca na Kalou na nona lewa. Kaya o Jisu ni gauna sa tiko kina, o ira nona imuri era na vunau tale ga. E parofisaitaka: “Ena vunautaki mada e vuravura taucoko nai tukutuku-vinaka oqo kei na matanitu, mei vakadinadina ki na veivanua kecega; sa na qai yaco emuri nai vakataotioti.”​​—Maciu 24:14.

Eda raica ena ulutaga sa oti, ni Matanitu ni Kalou ena vakarusa na matanitu kece e vuravura. E vunautaki gona na itukutuku vinaka me kilai kina na ka sa vakarau vakayacora na matanitu vakalomalagi. Gauna vinaka tale ga meda vakamalumalumu kina ina Matanitu oya, me rawa nida bulata na veivakarusai sa voleka. Na taro bibi, Cava o na cakava?

O na Marautaka na iTukutuku Vinaka ni Matanitu ni Kalou?

Sega ni vakatauvatani rawa na inuinui e koto ena itukutuku a vunautaka o Jisu. Ni oti na talaidredre mai Iteni ena vica na udolu na yabaki sa oti, a nakita na Kalou o Jiova me vakaduria e dua na matanitu me vakadodonutaka na ka e yaco oya, me vakalesui keda na kawatamata ina bula tawamudu ena parataisi e vuravura. Sega li ni vakavumarau noda kila ni sa veiliutaki tiko mai lomalagi ena gauna oqo na matanitu a se yalataki makawa tu mai? Oqo e dua dina na Matanitu, e sega ni dua ga na ivakavuvuli e tawakilai se vatavatairalago!

Gauna oqo sa veiliutaki tiko na Tui e digitaka na Kalou ena kedra maliwa na nona meca. (Same 110:2) Ena vuravura ca oqo e yawaka na Kalou, sa vakayacora tiko na Mesaia na ka e vinakata o Tamana, ena nodra qarai o ira era vinakata mera kila na Kalou ra qai qaravi koya “vakayalo ka vakaidina.” (Joni 4:​24) Se matatamata cava eda cavutu mai kina, noda yabaki ni bula kei noda isususu, e rawa nida nuitaka na bula tawamudu ena ruku ni veiliutaki ni Matanitu ni Kalou. (Cakacaka 10:​34, 35, VV) Mo ni ciqoma mada ga na veisureti totoka oqo. Mo ni vulica sara ga ena gauna oqo na veika e baleta na Matanitu ni Kalou, me rawa ni oni bula ena ruku ni veiliutaki dodonu ena tawamudu!​​—1 Joni 2:​17.

[iVakamacala e ra]

[iYaloyalo ena tabana e 8]

Na itukutuku ca eda rogoca e veisiga e vakaraitaka ni sa voleka na veika vinaka

[Credit Line]

Antiaircraft gun: U.S. Army photo