Vakavulica na Luvemu

Digia o Josaia me Cakava na ka Dodonu

O NANUMA ni dredre meda cakava na ka dodonu?a​—Ke o sauma na io, era duavata kei iko e levu. E dredre tale ga vei ira na uabula ena so na gauna mera cakava na ka era kila ni dodonu me caka. Meda dikeva mada na vuna e dredre kina vei Josaia me cakava na ka dodonu. O kilai koya?—

O Josaia na luvei Emoni, e dua na tui kei Juta, a se qai yabaki 16 ena gauna a sucu kina o Josaia. Me vakataki Tui Manasa ga na tamana, a torosobu na ivakarau i Emoni. A dua na dauveiliutaki ca ena dua na gauna balavu o Manasa. Yaco na gauna mera vesuki koya na kai Asiria, lai vesu sara vakayawa i Papiloni. Ena gauna a vesu tiko kina, e kerea nona veivosoti o Jiova, mani rogoci nona kerekere.

Ena gauna e sereki kina o Manasa, a lesu i Jerusalemi me veiliutaki tale vakatui. A sega ni lokuyara me vakadodonutaka na ka ca a dau cakava tu e liu, a veiuqeti tale ga mera qaravi Jiova na tamata. Ena rairai vakararawataki koya ni sega ni muria na nona ivakaraitaki vinaka na luvena o Emoni. Na gauna tale ga qo sa sucu kina o Josaia. E sega ni vakamacalataka na iVolatabu na levu ni gauna rau dau veitalanoa kina o Manasa kei na makubuna. O nanuma ni na rairai vukei Josaia o Manasa me qaravi Jiova?—⁠

E mate o Manasa ni sa qai yabaki ono o Josaia, yaco me tui na tamai Josaia o Emoni. A rua ga na yabaki na nona veiliutaki o Emoni ni bera nodra vakamatei koya nona dauveiqaravi. O koya gona, a tui kei Juta o Josaia ni se qai yabaki walu. (2 Veigauna, wase 33) Na cava o nanuma ni a qai yaco? A digia beka o Josaia me muria na ivakaraitaki ca nei tamana o Emoni, se na ivakaraitaki vinaka nei Manasa na tukana?—

E dina ni gone o Josaia, e vakadeitaka ga me qaravi Jiova. O koya gona, e dau muri ira na lomani Jiova, sega ni o ira na itokani nei tamana. Se qai yabaki walu o Josaia, ia e kila deivaki ni dodonu me vakarogoci ira era lomana na Kalou. (2 Veigauna 34:1, 2) O na taleitaka mo kilai ira na vakasalataki Josaia kei na ka era ivakaraitaki vinaka kina vua?—

E dua vei ira na uqeti Josaia o Sefanaia na parofita. E wekai Josaia, de rairai a lako mai na yatukawa i tamai Manasa, ya na tui vinaka o Esekaia. O Sefanaia a vola na ivola e vakayacani vua ena itekivu ni nona veiliutaki vakatui o Josaia. A veivakaroti o Sefanaia ina leqa ena yacovi ira na sega ni cakava na ka dodonu. E kena irairai ni a talairawarawa o Josaia ina ivakaro qori.

E dua tale na ivakaraitaki vinaka o Jeremaia, de o sa na rairai rogoci koya oti ena dua na gauna. Na vanua e rau susugi kina o Jeremaia kei Josaia e sega soti ni veiyawaki. A uqeti Jeremaia o Jiova me vola na ivola e vakayacani vua. Ni mate ena buca ni valu o Josaia, a vola o Jeremaia e dua na sere ni lolosi ena vuku ni nona lomabibi. (2 Veigauna 35:25) Sa wacava na nodrau dau veivakayaloqaqataki me rau yalodina tiko ga vei Jiova!

Na cava o rawa ni vulica me baleti Josaia?​— Ke sega ni qaravi Jiova tale ga o tamamu, e tiko tale beka e dua ena rawa ni tuberi iko mo kila na Kalou? Rairai o tinamu, nomu tutu se bubu, se dua tale na wekamu. Se dua tale e qaravi Jiova tiko e vakadonuya o tinamu mo drau vulica vata na iVolatabu.

Se mani cava e yaco, ni se gone o Josaia a sa yalomatuataka me vakaitokani ga kei ira na qaravi Jiova. Me va mada ga ya na nomu digia mo cakava na ka dodonu!

[iVakamacala e ra]

Taro:

○ O cei na tamai Josaia kei na tukana, erau tamata vakacava?

○ E vakaraitaka vakacava na tukai Josaia na nona veivutuni?

○ O cei na yacadrau na rua na parofita e rau ivakaraitaki vinaka vei Josaia, na cava e bibi kina na mataqali itokani va qori?

[iYaloyalo ena tabana e 25]

Erau vukei Josaia vakacava o Sefanaia kei Jeremaia me cakava na ka dodonu?