Na iVolatabu e Uqeta na Veisau

Na cava e vakavuna me veisau e dua na marama a dau vakauta butako i vanuatani na daimani, dau butako tale ga mai vua na nona boso ni cakacaka? E vakainaki vakacava na nona bula e dua na marama a saga vakarua me vakamatei koya? E uqeti vakacava e dua me biuta na gunu vakasivia kei na vakayagataki ni wainimate gaga? Raica mada na ka eratou tukuna.

KENA ITUKUTUKU

YACA: MARGARET DEBRUYN

YABAKI: 45

VANUA: BOTSWANA

KA E KILAI KINA: DAUBUTAKO, VAKAUTA BUTAKO NA IYAYA I VANUATANI

NOQU BULA E LIU: E turaga ni Jamani o tamaqu, ia e lewenivanua ena cevaira kei Aferika (sa o Namibia nikua). O tinaqu e cavutu mai Botswana ena yavusa na Mangologa. Au a sucu ena tauni o Gobabis e Namibia.

Ena veiyabaki ni 1970 a vakacolasau vakalevu e Namibia na matanitu veiliutaki o Sauca Aferika. E vakaukauataka me muri ena veitauni kei na veikoro na lawa e vauca na veiwasei vakamatatamata. Ni rau duikaikai na noqu itubutubu, mani tukuni me rau veibiu. E kauti keitou na walu na gone o Nana, keitou lai vakaitikotiko e Ghansi, Botswana.

Au toki ena 1979 ina tauni o Lobatse, Botswana, rau susugi au e dua na veiwatini me yacova niu vakaotia noqu vuli. Oti ya, au vunivola sara ena dua na qaraji. Ena noqu tubucake tiko, au vakabauta ni sega ni kauaitaki keda na Kalou. E dodonu meda cakava na cava ga e rawa meda bula kina kei na noda vuvale, mani donu se cala.

Niu vakaitutu e vanua ni cakacaka, au dau butakoca mai vei noqu boso eso na gacagaca ni lori. Ke lako sivita ena bogi na tauni keitou tiko kina na sitimanivanua, keimami dau vodo kei ira noqu ilala qai butakoca na cava ga keimami raica. Au dau vakauta butako tale ga na daimani, koula, kei na parasa. Au vakayagataka na wainimate gaga, voravora noqu itovo, qai levu noqu itau.

Noqu butako voli mai a qai tobo ena 1993, au mani sake mai na noqu cakacaka. Era biuti au na noqu “itokani,” nira rere de ra tobo tale ga. E mositi au na ka era cakava, au nanuma kina meu kua ni nuitaka e dua tale.

VEISAUTAKI AU NA IVOLATABU: Ena 1994, au sotavi rau o Tim kei Virginia, e rau daukaulotu ni iVakadinadina i Jiova. Keitou dau veitalanoa ena noqu vanua vou ni cakacaka, rau vakavulici au ena iVolatabu ena gauna ni vakasigalevu. Ena gauna au sa nuitaki rau kina, au sa qai vakadonuya me keitou vuli e vale.

Au kidava totolo ni dodonu meu veisautaka na noqu ivakarau ni bula keu via vakamarautaka na Kalou. Kena ivakaraitaki, au vulica ena 1 Korinica 6:9, 10 ni “o ira na daudara, . . . kei ira na daubutako, kei ira na daukocokoco, kei ira na daumateni, kei ira na dauveivakasewasewani, kei ira na daukovekove, era na sega ni rawata na matanitu ni Kalou.” Au biuta yadudua na noqu itovo ca. Au muduka noqu dau butako. Sa sega niu vakailala kei ira na dauvakacaca keimami tubu vata mai. Ena veivakaukauataki tale ga i Jiova, au vakatalai ira na noqu itau.

KENA YAGA: Ena noqu sasaga vagumatua, au sa sega ni cudrucudru, se kailavaki rau na luvequ ke rau cala. (Efeso 4:31) Keitou veitalanoa ga ena sala malumu. E vakilai sara ga ena neitou vuvale na yaga ni veivosaki va qori, e vakavolekati keitou.

Era sa nuitaki au tale na noqu ilala makawa kei ira keimami tiko veitikivi. Au dina ena noqu cakacaka, au nuitaki tale ga ena iyaya e volitaki kei na ilavo. Au lomavakacegu ga ena ka e tu vei au ni levu na gauna au veivakavulici kina ena iVolatabu. E dina na ka e tukuni ena Vosa Vakaibalebale 10:22: “Na veivakalougatataki maivei Jiova sa ia na veivakavutuniyautaki, ka sa sega ni kuria ko koya e na ka rarawa.”

KENA ITUKUTUKU

YACA: GLORIA ELIZARRARÁS DE CHOPERENA

YABAKI: 37

VANUA: MEXICO

KA E KILAI KINA: SAGA ME VAKAMATEI KOYA

NOQU BULA E LIU: Au susugi e Naucalpan, e dua na yasayasa vutuniyau ena Mexico State. Au se dau be ga mai niu se gone, au dau taleitaka tale ga na lako ina pati. Au vakatavako niu se yabaki 12, gunu ena yabaki 14, vakayagataka na wainimate gaga ena yabaki 16. Ni oti e vica tale na yabaki, au biubiu mai vale. E levu noqu itokani era lako mai na vuvale kavoro ni caka vei ira na itovo e veivakalolomataki se tau vei ira na vosa gaga. Ni tawayaga vei au na bula, au saga vakarua meu vakamatei au.

Au tekivu vakaraitaki ivukivuki niu yabaki 19. Au rawa gona ni veimaliwai kei ira ena buturara ni politiki kei na ka ni veivakamarautaki. Au vakawati, vakaluveni, ia au cakava na vakatulewa kece ena vuvale. Na vakatavako kei na gunu e sega ni cegu, vaka kina na lasa kei na marau. Au dau vosavosa ca, veiwali vakasisila, qai cudrucudru.

E va tale ga qori na nodra ivakarau ni bula na noqu itokani. Era nanuma ni tu kece vei au na ka, era sega ni kila niu galili qai sega ni vakainaki na noqu bula.

VEISAUTAKI AU NA IVOLATABU: Ena 1998, au tekivu vulica kei ira na iVakadinadina i Jiova na iVolatabu. Au vulica kina ni vakainaki na bula, ena vakalesuya mai na parataisi na Kalou o Jiova, ena vakaturi ira na mate, au rawa tale ga ni bula ena ituvaki ya ena dua na gauna mai muri.

Au vulica tale ga ni noqu talairawarawa vua na Kalou e vakaraitaka niu lomani koya. (1 Joni 5:3) E dredre toka qori ni se qai tekivu, baleta au se sega ni bau dusimaki mai vua e dua tale. Ia ni toso na gauna, au vakadinata ni sega ni rawa meu lewa tiko ga na noqu bula. (Jeremaia 10:23) Au kerei Jiova me dusimaki au, me vukei au meu moica noqu bula me salavata kei na nona ivakatagedegede, me vakavulici ratou na luvequ ena ivakarau ni bula e vinaka cake mai na kena au muria tu e liu.

E dredre dina meu veisau, ia au muria na ivakasala ena Efeso 4:22-24: “E na vuku ni valavala eliu, mo dou biuta tani kina na tamata makawa, . . . ka mo dou vakaisulu e na tamata vou, o koya sa caka me vaka na Kalou e na yalododonu kei na yalosavasava ni dina.” Na noqu biuta tani na tamata makawa e okati kina noqu biuta laivi na itovo dukadukali me vaka na vakatavako kei na vosavosa ca. E voleka ni tolu na yabaki noqu saga meu veisautaka noqu ivalavala meu rawa ni papitaiso meu dua na iVakadinadina i Jiova.

Kena ikuri, au sa raica vakabibi na noqu itavi vakaradinivale, vakatina tale ga. Au muria na ivakasala ena 1 Pita 3:1, 2: “Oi kemudou talega, na yalewa, dou vakamalumalumutaki kemudou vei ira na watimudou; me rawai ira na watidra ko ira na yalewa e na nodrai valavala, ka segai e na vunau, kevaka sa so sa sega ni talairawarawa ki na vunau; ni ra sa raica na nomudoui valavala savasava kei na nomudou rere [“vakarokoroko,” NW].”

KENA YAGA: Au vakavinavinaka vakalevu vei Jiova niu sa qai kila ni vakainaki na bula. Au vakila ni vinaka cake noqu ivalavala ni vakatauvatani e liu, na noqu susugi ratou tale ga na luvequ e vinaka cake sara mai na noqu isususu. E dau beitaki au ena so na gauna na lomaqu ena vuku ni noqu itovo e liu, ia o Jiova e kila na ka e tu e lomaqu. (1 Joni 3:19, 20) Au sega ni vakatitiqataka ni noqu muria na ivakatagedegede ena iVolatabu e taqomaki au, au lomavakacegu tale ga.

KENA ITUKUTUKU

YACA: JAILSON CORREA DE OLIVEIRA

YABAKI: 33

VANUA: BRAZIL

KA E KILAI KINA: GUNU VAKASIVIA KEI NA VAKAYAGATAKI NI WAINIMATE GAGA

NOQU BULA E LIU: Au sucu e Bagé, e dua na siti ena kedrau iyalayala o Brazil kei Uruguay, era tiko kina e rauta ni le 100,000. E ivurevure ni ilavo na teitei kei na susu bulumakau. Au susu ena dua na yasayasa dravudravua e taka levu kina na vakacaca vakailawalawa, na nodra gunu vakasivia na itabagone kei na vakayagataki ni wainimate gaga.

Ena gauna au biu vuli kina, au tekivu gunu, vakatavako, kana mariwana, dau rogoca tale ga na ivakatagi karakaravisa. Au sega ni vakabauta na Kalou, au nanuma ni veika rarawa kei na leqa e yaco tu e vuravura e vakadinadinataka ni sega ni bula tiko na Kalou.

Au dau qiri qita, vola sere tale ga, e uqeti au vakalevu na veika au wilika ena Vakatakila. E sega ni toso vinaka sara noqu mataqiriqiri me vaka au namaka, au mani vakayagataka wasoma na wainimate gaga. Keu mate niu vakayagataka vakasivia, e sega sara ga ni dua na ka vei au. Era mate tale ga va ya e levu na dau lagasere au dau raici ira cake nira vaka na kalou.

Au dau kere ilavo vei noqu bubu a susugi au me isau ni wainimate gaga. Ni tarogi au me ilavo ni cava, au dau lasutaki koya. E ikuri ni leqa na noqu goleva na vakatevoro. Au galeleta na cakaiba niu nanuma ena vakavinakataka na noqu vola sere.

VEISAUTAKI AU NA IVOLATABU: Ena gauna au vuli iVolatabu kina kei ira na iVakadinadina i Jiova, qai tiko ena nodra soqoni, e veisau noqu rai kei na noqu itovo. Au taleitaka na bula, au via marau tale ga. Na ivakarau ni rai vou qo e uqeti au meu kotiva na uluqu balavu au a vakatubura tu me ivakaraitaki ni noqu sega ni lomavakacegu kei na noqu dau be. Ia keu via vakamarautaka na Kalou, e dodonu meu muduka na gunu vakasivia, vakayagataki ni wainimate gaga, kei na vakatavako. E dodonu tale ga meu veisautaka na ivakatagi au rogoca.

Ena imatai ni gauna au tiko kina ena nodra soqoni na iVakadinadina i Jiova, e dreta na mataqu na tikinivolatabu e kabi tu e lalaga. E yavutaki ena Vosa Vakaibalebale 3:5, 6, e kaya: “Mo vakararavi vei Jiova e na vu ni yalomu: ka mo kakua ni vakararavi ki na nomu yalomatua: mo vakarogotaka vua na nomu sala kecega, ia ena vakadodonutaka na nomui lakolako ko koya.” Keu vakadonuya, e vakadeitaka na tikinivolatabu ya ni na vukei au o Jiova meu vakavinakataka noqu ivakarau ni bula.

Ia e sega ni rawarawa noqu veisautaka na ivakarau ni bula sa matau vei au kei na noqu biuta na veika au bobula tu kina. E vaka ga e musu e dua na ligaqu. (Maciu 18:8, 9) Niu kila ena sega ni rawa niu cakava vakalalai na veisau e gadrevi, au mani biuti ira kece ga ena dua na gauna. Au muduka tale ga na noqu lakova na vanua se ilala au na rawa ni bacani tale kina ena noqu ivakarau ni bula makawa qai rawa ni veivakaleqai.

Au sakitaka na veisau au cakava e veisiga, au guilecava na veika e dau veivakayalolailaitaki. Au dau vakasamataka ni ka dokai dina meu savasava vakayago, vakayalo tale ga vei Jiova, qai vinaka na noqu itovo. E rogoca o Jiova na noqu masu me vukei au meu kua ni nanuma lesu na noqu itovo makawa, meu vakanamata ga ina gauna se bera mai. Au dau sikalutu tale ena so na gauna. Ia au dau cikevi noqu qasenivuli me keirau vuli iVolatabu ga, keu mani gunu sivia tu mai na bogi ena so na gauna.

E vakaibalebale na veika au vulica ena iVolatabu me baleta na Kalou, e kauaitaki keda yadua, ena vakarusai lotu lasu, e tokona tale tiko ga nikua na cakacaka vakavunau e vuravura raraba. (Maciu 7:21-23; 24:14; 1 Pita 5:6, 7) E veisemati vinaka tale ga na veika au vulica. Niu via vakavinavinakataka vua na Kalou na veika e cakava ena vukuqu, au vakatulewataka kina meu yalataka vua na noqu bula.

KENA YAGA: Sa qai vakainaki na noqu bula. (Dauvunau 12:13) E liu au se kerekere vei ratou na wekaqu, ia qo au sa vukei ratou. Au tukuna vei buqu na veika vinaka au vulica mai na iVolatabu, sa yalataki koya tale ga vei Jiova. Era cakava tale ga qori e vica vata na lewe ni noqu vuvale kei na dua na lewe ni noqu mataqiriqiri makawa.

Au sa vakawati, e dua tale ga na iwase levu ni neirau gauna vakaveiwatini e vakayagataki ena nodra vukei eso tale mera vulica na iVolatabu. Au kila niu vakalougatataki vakalevu ena noqu ‘vakararavi vei Jiova mai vu ni lomaqu.’’

[Tikina bibi ena tabana e 29]

“Au taleitaka na bula, au via marau tale ga”