Ra iTabagone​—Me Dusimaki Kemuni na Vosa ni Kalou

“Mo rawata mada na vuku, mo rawata talega na yalomatua.”—VKAI. 4:5.

1, 2. (a) A vorata vakacava o Paula na idre ni yagona ivalavala ca? (b) O na rawa vakacava ni vuku qai yalomatua?

“NIU via cakava na ka e dodonu, e tiko ga vei au na ca.” O kila o cei a cavuta na vosa oya? Io, na yapositolo o Paula. E lomani Jiova o Paula, ia e ka ni sasaga vua ena so na gauna me cakava na ka e dodonu. Na cava e tukuna me baleta na nona via cakava na ka e dodonu, ia e qai tiko ga vua na ca? A vola: “Au sa vakaloloma dina!” (Roma 7:21-24) O duavata kei na ka e tukuna o Paula? E dredre vei iko ena so na gauna mo cakava na ka e dodonu? E dau vakararawataki iko qori me vaka ga e vakila o Paula? Ke vaka kina, kua ni yalolailai. A vorata rawa o Paula na idre ni yagona ivalavala ca, o rawa ni cakava tale ga qori.

² A rawa ni vorata o Paula na idre ni yagona ivalavala ca ni a dusimaki ena “vosa dina.” (2 Tim. 1:13, 14) Qori e vakavukui koya, e vakayalomatuataki koya me vosota na dredre a sotava, me vakatulewa kina vakavinaka. E rawa tale ga ni vakavukui iko o Jiova, qai vakayalomatuataki iko. (Vkai. 4:5) E vakarautaka na ivakasala vinaka duadua ena nona Vosa na iVolatabu. (Wilika 2 Timoci 3:16, 17.) Meda raica mada qo na yaga ni nomu muria na ivakavuvuli vakaivolatabu ni o veivosaki kei rau na nomu itubutubu, ni o vakatulewataka na ivakavakayagataki ni nomu ilavo, kei na gauna o tiko taudua kina.

Ena Vuvale

3, 4. Na cava ena rairai dredre kina mo muria na nodrau lewa na nomu itubutubu, ia na cava era dau biuta kina na itubutubu na lawa me muri?

³ E dau dredre mo muria na nodrau lewa na nomu itubutubu? Na cava e va kina qori na nomu rai? De dua o vinakata me soli vakalevu vei iko na galala. E kena ivakarau ga me dau va qori na nona rai e dua ni sa tubucake tiko me uabula. Ia ni o se tiko e vale, e dodonu mo talairawarawa vei rau na nomu itubutubu.—Efeso 6:1-3.

⁴ Ena rawarawa na nomu vakarorogo vei rau nomu itubutubu ke o kila na vuna erau dau lewa kina vei iko na ka se rau biuta eso na lawa mo muria. E macala ga ni so na gauna o na duavata kei na ka e tukuna me baleti rau na nona itubutubu o Asenacaa e yabaki 18: “E vaka sara ga erau a sega ni gone ena dua na gauna. De rau vinakata meu sa gone tu ga ni rau sega ni vinakata meu tukuna na noqu nanuma se meu vakatulewa.” Me vakataki Ana, de dua o nanuma ni rau bureitaka tiko vei iko na nomu itubutubu na galala e dodonu me sa soli vei iko. Ia na vuna levu erau biuta kina na lawa mo muria, oya ni rau kauaitaki iko. Era kila tale ga na itubutubu lotu vaKarisito kece nira na saumitaro vei Jiova ena ivakarau ni nodra veisusu.—1 Tim. 5:8.

5. Ena yaga vakacava na nomu talairawarawa vei rau na nomu itubutubu?

⁵ Na nomu talairawarawa ena nodrau lewa na nomu itubutubu e vaka ga ni o saumidinau ina baqe—ke vinaka na nomu sausaumi, ena solia vakarawarawa tiko ga vei iko na baqe na dinau. Ena vakasama vata qori, e nomu dinau vei rau na nomu itubutubu na veidokai kei na talairawarawa. (Wilika Vosa Vakaibalebale 1:8.) Ke o dau talairawarawa vei rau, erau na solia vakarawarawa tale ga vei iko na galala. (Luke 16:10) Ia ke o dau beca na nodrau lawa, kua ni kurabuitaka ni rau na vakalailaitaka se rau sogota sara ga na “nomu ivolanidinau” se na galala erau solia vei iko.

6. Era na rawa ni vukei ira vakacava na gone na itubutubu mera dau talairawarawa?

⁶ E dua na sala era rawa ni vukei ira kina na gone na itubutubu mera dau talairawarawa, oya na nodra ivakaraitaki. Nira talairawarawa vei Jiova mai vu ni lomadra na itubutubu, era vakaraitaka tiko kina ni sega ni icolacola bibi na nona lawa. Qori ena vakarawarawataka na nodra raica na gone ni sega ni icolacola bibi tale ga me muri na nodra lewa na itubutubu. (1 Joni 5:3) E volai ena iVolatabu ni a solia na galala o Jiova ena so na gauna mera vakaraitaka kina nodra rai na nona dauveiqaravi. (Vkte. 18:22-32; 1 Tui 22:19-22) Vakacava oni rawa ni cakava tale ga qori ena so na gauna na itubutubu, moni solia na gauna mera vakamacala na gone ena so na ka e veivosakitaki?

7, 8. (a) Na dredre cava era dau sotava eso na gone? (b) Na cava mo nanuma tiko me yaga kina vei iko na veivakadodonutaki?

⁷ E dau dredre tale ga mera ciqoma na gone na nodra vakalelewa na itubutubu, nira nanuma ni cala. De dua o na duavata ena so na gauna kei na nona rai e dua na cauravou o Craig, a kaya: “E vaka ga na ovisa o tinaqu—e dau vaqara cala.”

⁸ Eda dau nanuma nida vakalewai tiko ke da vakadodonutaki se vunauci. Ke mani veiganiti mada ga na veivakadodonutaki, e tukuni ena iVolatabu ni dau sega ni marautaki ena gauna e tau kina. (Iper. 12:11) Na cava mo nanuma tiko me yaga kina vei iko na veivakadodonutaki? E bibi mo kua ni guilecava ni rau na vakasalataki iko na nomu itubutubu ni rau lomani iko. (Vkai. 3:12) Erau sega ni vinakata me ca na nomu itovo, mo bucina ga na itovo vinaka. De dua erau kila tiko na nodrau sega ni vakadodonutaki iko e vaka ga na nodrau vakaraitaka ni rau cati iko! (Wilika Vosa Vakaibalebale 13:24.) Nanuma tale tiko ga ni o na rawa ni vuli ena cala o vakayacora. E vinaka gona mo dau vakasamataka se na vakavukui iko vakacava na ka e tukuni ni o vakadodonutaki. “Ni sa vinaka na dauveivoli kina [vuku] ka ca na dauveivoli e na siliva, a kena tubu talega sa vinaka ka ca na kena tubu na koula dina.”—Vkai. 3:13, 14.

9. Mera kua ni vakasamataka tiko ga na gone na ka tawadodonu e nanumi ni caka, ia na cava mera cakava?

⁹ Era dau cala tale ga na itubutubu. (Jeme. 3:2) Ena dau tau vakasabalia gona na vosa ena so na gauna era veivunauci kina. Na cava e rawa ni vakavuna na nodrau cakava qori na nomu itubutubu? De dua erau lomaocaocataka tu eso na ka, se rau raica na nomu cala me ivakaraitaki ni nodrau sega ni cakava vinaka na nodrau itavi. Ke o nanuma ni tawadodonu na ka erau cakava, kua ni vakasamataka tiko ga, vakavinavinakataka ga na nodrau vinakata dina me rau vukei iko. Na nomu dau ciqoma na veivakadodonutaki ena yaga ni o sa uabula.

10. Na cava ena vakarawarawataka na nomu ciqoma na nodrau lewa kei na nodrau veivakadodonutaki na nomu itubutubu?

¹⁰ O vinakata mo ciqoma rawarawa na nodrau lewa kei na nodrau veivakadodonutaki na nomu itubutubu? Ke vaka kina, e bibi mo vakavinakataka na iwalewale ni nomu dau veivosaki kei rau. O rawa ni cakava vakacava qori? Na imatai ni ka mo cakava, oya mo dau vakarorogo. E tukuna na iVolatabu: ‘Mo totolo ni vakarorogo, mo berabera ni vosa, berabera na cudru.’ (Jeme. 1:19) Kua ni dau totolo mo vakaiulubaletaka na nomu cala, ia lewa vinaka na lomamu, rogoca na ka erau via tukuna na nomu itubutubu. Vakasamataka na ka e tukuni, sega ni kena itautau. Oti, qai vakaraitaka vei rau ni o ciqoma na ka erau tukuna ena nomu vakadinata ena veidokai ni o cala dina. Ni o cakava qori, erau na lomavakacegu ni o rogoca na ka erau tukuna. Ia vakacava ke o via vakamacala ena ka o vakadodonutaki kina? E ka vakayalomatua ena levu na gauna mo ‘tarova na gusumu’ me yacova ni o sa cakava na ka erau vinakata na nomu itubutubu. (Vkai. 10:19) Ni rau raica ni o vakarorogo vei rau, erau na yalorawarawa tale ga me rau rogoci iko. Qori e ka vakayalomatua mo cakava, ena vakaraitaka tale ga ni dusimaki iko na Vosa ni Kalou.

iVakavakayagataki ni Nomu iLavo

11, 12. (a) E veiuqeti vakacava na iVolatabu me baleta na ilavo, na cava na vuna? (b) Erau rawa ni vukei iko vakacava na nomu itubutubu ena ivakavakayagataki ni nomu ilavo?

¹¹ E tukuna na iVolatabu: “Sai vakaruru nai lavo.” Ia e tukuni ena tikinivolatabu vata ga qori ni talei cake na vuku mai na ilavo. (Dauv. 7:12) E uqeti keda na Vosa ni Kalou me donu na noda rai me baleta na ilavo, meda kua ga ni lomana. Na cava mo kua kina ni lomana na ilavo? Vakasamataka mada na ivakatautauvata qo: Na isele gata e nona iyaya ni cakacaka yaga e dua e kenadau ena vakasaqa. Ia e rawa ni veivakamavoataki na isele vata ga qori ke sakasaka qai sega ni qaqarauni o koya e vakayagataka tiko. E va tale ga qori na ilavo, ena yaga ke vakayagataki vakavuku. Ia o ira na “qara na bula vutuniyau,” era dau yawaki ira sara ga na nodra itokani kei na wekadra, ra tagutuva tale ga na nodra veiwekani kei na Kalou. Qori na vuna e tukuni kina nira sualaka na yagodra taucoko “ena levu na mosi.”—Wilika 1 Timoci 6:9, 10.

¹² O na vulica vakacava mo vakayagataka vakavuku na ilavo? Kere ivakasala vei rau na nomu itubutubu ena sala mo tuva kina na nomu ilavo. A vola o Solomoni: “Ena vakarorogo na lomavuku, ka na tubu cake kina na nona vuku; Ia na tamata daukila ka, ena rawata nai vakavuvuli vuku.” (Vkai. 1:5) E dua na goneyalewa o Anna, a kerea me rau vukei koya na nona itubutubu. E tukuna: “E vakavulici au o tamaqu me dua na noqu ituvatuva ni vakayagataki ilavo, meu tuvanaka matau na ivakavakayagataki ni noqu ilavo kei na kena ivolatukutuku.” A vakavulici Anna tale ga o tinana ena so na lesoni yaga. E kaya o Anna: “E vakaraitaka vei au na yaga ni noqu dau vakatauvatana na isau ni iyaya, au qai volivoli.” E yaga vakacava qori vei Anna? E tukuna: “Au sa rawa ni vakayagataka vakavuku na noqu ilavo. Niu lewa vinaka na kena ivakavakayagataki, au galala kina mai na dinau vakaveitalia qai vakacegu na noqu vakasama.”

13. O rawa ni lewai iko vinaka vakacava ni o vakayagataki ilavo?

¹³ Ena totolo na nomu bini dinau ke o dau raica ga na ka o volia sara, se o vakayagataka na ilavo mo vakadrukai ira kina na nomu itokani. Na cava o rawa ni cakava me kua kina ni yaco qori? E bibi mo lewai iko vinaka ni o vakayagataki ilavo. Qo na ka e dau cakava o Ellena e yabaki 20 vakacaca, e kaya: “Niu gade kei ira na noqu itokani, au dau lalawa rawa, au cakacakataka tale ga na levu ni ilavo meu vakayagataka. . . . Au raica tale ga ni vinaka meu lai volivoli ga kei ira na noqu itokani era sega ni dau vakasabusabu, ia ra dau vakatauvatana na isau ni iyaya ra qai sega ni volia na imatai ga ni ka era raica.”

14. Na cava mo qarauna kina “na kaukaua ni veitemaki ni iyau”?

¹⁴ Erau yaga ena noda bula na rawa ilavo kei na kena vakayagataki. Ia e tukuna o Jisu nira na vakila ga na marau dina o ira era “kila nira gadreva na Kalou.” (Maciu 5:3) A veivakasalataki tale ga ni “kaukaua ni veitemaki ni iyau” e rawa ni vakawelea e dua me sega ni kauaitaka kina na nona qarava na Kalou. (Mari. 4:19) E bibi gona me dusimaki iko na Vosa ni Kalou, qai donu tiko ga na nomu rai me baleta na ilavo!

Ni o Tiko Taudua

15. Na gauna cava ena rairai vakatovolei vakalevu duadua kina na nomu yalodina vua na Kalou?

¹⁵ Na gauna cava o nanuma ni na vakatovolei vakalevu duadua kina na nomu yalodina vua na Kalou—ni o tiko kei ira tale na so se ni o tiko taudua? Ni o tiko e koronivuli se vanua ni cakacaka, ena rairai toka sara e cake na nomu qaqarauni, o yadrava vinaka tale ga na veika e rawa ni vakaleqai iko vakayalo. Ia ni o vakacegu toka o qai sega soti ni qaqarauni, ena rawarawa sara ni vakatovolei ena gauna oya na nomu muria na ivakatagedegede ni itovo savasava.

16. Na cava mo saga kina mo talairawarawa vei Jiova ni o tiko taudua mada ga?

¹⁶ Na cava mo talairawarawa kina vei Jiova ni o tiko taudua mada ga? Nanuma tiko qo: O rawa ni vakararawataki Jiova, o rawa tale ga ni vakamarautaka na lomana. (Vkte. 6:5, 6; Vkai. 27:11) E dau tarai Jiova na ka o cakava baleta ‘e kauaitaki iko.’ (1 Pita 5:7) E vinakata mo vakarorogo vua me nomu kina na vinaka. (Aisea 48:17, 18) Era vakararawataki Jiova eso na nona dauveiqaravi e Isireli makawa nira talaidredre ina nona ivakaro. (Same 78:40, 41) Ia o Jiova e taleitaka vakalevu na parofita o Taniela, oya na vuna e vakatokai koya kina na agilosi me “tamata daulomani.” (Tani. 10:11) Na cava na vuna? A yalodina tiko ga vua na Kalou ni tiko taudua mada ga, sega ni gauna ga era raici koya tiko kina eso tale.—Wilika Taniela 6:10.

17. Na taro cava mo taroga ni o digia na ka ni veivakamarautaki?

¹⁷ Mo rawa ni yalodina tiko ga vua na Kalou ni o tiko taudua, e bibi me vakavulici na nomu “vakasama . . . me vakaduiduitaka na ka e donu mai na ka e cala,” mo qai “vakayagataka” na nomu vakasama ni o cakava na ka o kila ni dodonu. (Iper. 5:14) Me kena ivakaraitaki, ni o digia na ivakatagi mo rogoca, iyaloyalo mo sarava, se na ka mo raica ena internet, qo eso na idusidusi yaga mo digia kina na ka vinaka, o cata na ka ca. E vinaka mo taroga eso na taro qo: ‘Keu wilika, sarava se rogoca qo, au na uqeti kina meu dau yalololoma, seu na marautaka kina ‘na nona sotava e dua na ca’?’ (Vkai. 17:5) ‘Ena vakarawarawataka na noqu “vinakata na ka vinaka” se na vakadredretaka na noqu “cata na ka ca”?’ (Emosi 5:15) Na ka o dau vakabibitaka ena kilai ena ka o cakava ni o tiko taudua.—Luke 6:45.

18. Na cava mo cakava ke o cakava lo tiko e dua na ka e cala, na cava na vuna?

¹⁸ Na cava mo cakava ke o cakava lo tiko e dua na ka o kila ni cala? Nanuma tiko, “o koya sa ubia na nonai valavala ca ena sega ni tamata yaco: Ia ko koya sa vakatusa ka biuta ena lomani.” (Vkai. 28:13) Ena ka vakalialia dina ke o cakava tiko ga na ka ca, o qai “vakararawataka na yalo tabu ni Kalou”! (Efeso 4:30) E dodonu mo vakatusa vua na Kalou na nomu cala, vakaraitaka tale ga vei rau na nomu itubutubu. Ena yaga dina na nomu cakava qori. O ira tale ga na “qase ni ivavakoso” era rawa ni veivuke vakalevu. E tukuna na tisaipeli o Jemesa: “Mera masulaki koya [e cala], ra qai lumuti koya ena waiwai ena yaca i Jiova. Na masu ni vakabauta ena vakabulai koya e tauvimate, ena vakaukauataki koya o Jiova. Ke valavala ca ena vosoti.” (Jeme. 5:14, 15) E macala ga ni o na madua kina vakalailai, o na vakila tale ga na ca ni ka o cakava. Ia ke o doudou ni kere veivuke, o na sega ni sotava e levu tale na leqa, o qai lomavakacegu ni na savasava tale na nomu lewaeloma.—Same 32:1-5.

Vakamarautaka na Loma i Jiova

19, 20. Na cava e vinakata o Jiova, ia na cava mo cakava?

¹⁹ E “Kalou mamarau” o Jiova, e vinakata tale ga mo marau. (1 Tim. 1:11) E kauaitaki iko dina. Ke sega ni dua tale e kauai ena nomu sasaga mo cakava na ka vinaka, o Jiova e kauai. E luvawale e matana na ka kece. Ia na nona raica na ka kece e sega ni kena ibalebale ni via vaqara cala, e via tokoni iko ga ena nomu sasaga mo caka vinaka. “Ni sa veiraiyaki na mata i Jiova e vuravura taucoko, me totaki ira vakaidina sa dodonu na lomadra vua.”—2 Vei. 16:9.

²⁰ Mo yalorawarawa mada ga me dusimaki iko na Vosa ni Kalou, o qai muria sara na kena ivakasala. Qori ena vakavukui iko qai vakayalomatuataki iko mo walia na leqa o sotava, mo vakatulewa vinaka tale ga ena nomu bula. Ni o cakava qori, o na vakamarautaki rau na nomu itubutubu vaka kina o Jiova, o na marautaka tale ga na nomu bula.

[iVakamacala e ra]

O na Sauma Vakacava?

• Na cava mera cakava na itabagone mera ciqoma rawarawa kina na nodra lewa kei na nodra veivakadodonutaki na itubutubu ra qai vakila na kena yaga?

• Na cava me donu tiko ga kina na rai me baleta na ilavo?

• O na yalodina tiko ga vakacava vei Jiova ni o tiko taudua?

[iYaloyalo ena tabana e 6]

O na yalodina tiko ga vua na Kalou ni o tiko taudua?