Na Yaca e Raici ena Buca

ST. MORITZ. O sa rogoca oti na yaca ni vanua oya? De dua o sa rogoca oti baleta qori e dua na otela rogo e vuravura, e tiko ena buca na Engadine e Suwitisiladi. Ia o St. Moritz e dua wale ga na vanua e vu ni nodra gade tiko yani vakalevu na tamata ena buca totoka ena veitokaitua na Alps e solegi tu ena ucacevata, qori ena cevaicake kei Suwitisiladi qai volekata na iyalayala kei Itali. E tiko tale ga e keri na Swiss National Park, na totoka ni vanua qori kei na veimataqali kau kei na manumanu era tu ekea e lagiti kina na Dauveibuli o Jiova. (Same 148:​7-​10) Ia e lagiti tale ga o koya ena dua na ivalavala vakavanua e se kune tiko ga e kea, a se tekivu sara ena lomaloma ni ika17 ni senitiuri.

Ena rairai tao na matamu ena dua na ka e raici ena veivale ena buca qo. E sega ni kurabuitaki ni laurai na yaca ni Kalou ena matanivale, me vaka na dela ni katuba e liu. Ena veisenitiuri sa oti, e dau kena ivakarau ga me ukutaki na lalaga ni vale e tuba ni volai kina eso na ka. Qori e dau boroi e lalaga, ceuti ena simede se vatu. Raica mada na itaba ni dua na vale ena koro o Bever. Qo na ivakadewa ni ka e volai toka kina: “Ena yabaki 1715. O Jiova na itekitekivu, o Jiova tale ga na itinitini. E rawa na ka kece ena veivuke ni Kalou, ke sega o koya, ena sega ni rawati e dua na ka.” Io, na ivakatakilakila makawa qori e cavuti kina vakarua na yaca ni Kalou.

Ia e dua na kena e makawa sara e laurai ena koro o Madulain. E volai kina: “Same 127. Ke sega ni tara na vale o Jiova, era na oca wale o ira era tara. Lucius Rumedius. Ena yabaki 1654.”

Na cava e vakaraitaki tu kina va qori e matanalevu ena buca qo na yaca ni Kalou? Donuya na gauna era tawase kina na lotu, a tabaki na iVolatabu ena vosa na Romansh, e vu mai na vosa vakalatina a vakayagataki tu e Engadine. Na iVolatabu a imatai sara ga ni ivola me vakadewataki ena vosa qori. Na ka era wilika ena Vosa ni Kalou a uqeti ira e levu na itaukei mera vola na yacadra ena lalaga ni nodra vale e tuba, kei na tikinivolatabu e volai tu kina na yaca ni Kalou.

Io, se volai sara na yaca ni Kalou ena veivale ena buca qo ena vica vata na senitiuri sa oti, ia me yacova mai nikua e se vakatakilai tiko ga kina qai vakalagilagi na yaca i Jiova. Era sureti tu na vulagi yani ena vanua qo kei ira era vakaitikotiko kina mera vulica e levu tale na ka me baleta na Kalou vinaka qo o Jiova nira gole ina dua tale na vale e vakatokai tale ga ena yacana​—na Kingdom Hall of Jehovah’s Witnesses e Bever.

[iTaba ni Credit Line ena tabana e 7]

© Stähli Rolf A/age fotostock