Ena Vinaka Vakacava na Nomu Bula ena Gauna se Bera Mai?

NA CAVA mo cakava me vinaka kina na nomu bula ena gauna se bera mai? E vinaka mo vakasamataka se na tara vakacava na nomu bula ena gauna se bera mai na vakatulewa o cakava ena gauna qo.

E macala ga ni sega ni rawarawa mo vakatulewataka na ka ena yaga ena nomu bula taucoko. Na vuna? Baleta ni levu nikua era dau vinakata ga me vakayacori totolo na ka era vinakata. O na rairai liaca ni nomu muria na ivakasala ena iVolatabu ena dei kina na nomudou veiwekani vakavuvale. (Efeso 5:22-6:4) Ia ena vinakati mo vakayagataka vakalevu nomu gauna ena nomu vuvale, mo kua tale ga ni rawai ni o temaki mo kauaitaka vakasivia na nomu cakacaka kei na ka ni veivakamarautaki. Me vaka ga eso tale na ituvaki, ena vinakati mo vakatulewataka mo marau ga vakalekaleka se mo marau ena nomu bula taucoko. Na cava mo cakava mo vakatulewa vinaka kina? Qo e va na vakatutu.

1 Vakasamataka na ka e Rawa ni Yaco

Ni o vakarau vakatulewa, e bibi mo vakasamataka na ka e rawa ni yaco. E veivakasalataki na iVolatabu: “O koya sa yalomatua sa kunea na ca, ka sa vunitaki koya.” (Vosa Vakaibalebale 22:3) Ke o vakasamataka vinaka na ka e rawa ni yaco, o na sega ni cakava na ka ena rawa ni vakaleqai iko. Ia o na vakatulewa vakayalomatua ke o vakasamataka ni na yaga qori ena nomu bula taucoko.

Ena vinaka mo taroga: ‘Na cava ena laurai ena vakatulewa au cakava ni oti e dua, 10 se 20 sara na yabaki? Ena tara vakacava qori na noqu vakasama kei na noqu bula? Ena tarai ratou vakacava na noqu vuvale kei ira na noqu itokani dredre na noqu vakatulewa?’ Ia ena bibi sara mo taroga: ‘Ena marautaka na Kalou na noqu vakatulewa? Ena tara vakacava na noqu veiwekani kei koya?’ E uqeta na Kalou na volai ni iVolatabu, ena rawa gona ni vukei iko mo vakamarautaki koya qai vakasalataki iko mo kua ni sikalutu ena icori.​—Vosa Vakaibalebale 14:12; 2 Timoci 3:16.

2 Vakalewa Vinaka na ka mo Cakava

E levu era sega ni vakatulewa vakataki ira, ia era vakatotomuri ira eso tale. Ni takalevu e dua na ivakarau ni bula, e sega ni kena ibalebale ni na vinaka. Vakalewa vinaka na ka mo cakava. Raica mada na ivakaraitaki i Nanise.a E vakamacalataka: “Au vinakata me vinaka na noqu bula vakawati. Ia au na sega ni rawata qori ke sega ni veisau na noqu ivakarau ni bula. Niu se vuli ena koronivuli torocake, levu na noqu itokani era vuku. Ia e sega ni vinaka na vakatulewa era dau cakava. E veiveisau ga na nodra itau. Au vakatotomuri ira tale ga. Na ivakarau ni bula va qori e vakararawataki au vakalevu.”

A vulica sara o Nanise na iVolatabu kei ira na iVakadinadina i Jiova. A tukuna: “Au raica nira mamarau na veiwatini gone iVakadinadina i Jiova qai dei na nodra vakawati. Ni toso na gauna sa veisau na noqu itovo kei na ivakarau ni noqu bula, dina ga ni sega ni rawarawa qori.” Na cava a qai yaco? E tomana o Nanise: “Au dau vinakata meu vakawatitaka e dua au domona dina. Ni toso na gauna, au vakawatitaka sara e dua keirau lotu vata. Au kila ni rawa ga ni vinaka na noqu vakawati ena veivuke ni Kalou.”

3 Vakasama Vinaka Qai Vakatulewa

Ena sega ni lekaleka na nomu rai ke matata tiko na ka o vakanamata kina ena gauna se bera mai, kei na ka o lalawataka mo cakava me rawa kina qori. (Vosa Vakaibalebale 21:5) Kua ni vakasamataka ga na yabaki ni bula eda dau yacova na tamata, me 70 ga se 80. Ia raitayaloyalotaka ni o rawa ni marau me tawamudu me vaka e tukuni ena iVolatabu.

E tukuna na iVolatabu ni vakarautaka na Kalou na isoro ni veivoli i Karisito Jisu meda rawata kina na bula tawamudu. (Maciu 20:28; Roma 6:23) E yalataka na Kalou ni sa vakarau vakayacori na nona inaki taumada me baleta na kawatamata kei na vuravura. Ena gauna e vakavoui kina na vuravura, era na rawa ni bula tawamudu kina o ira era lomana na Kalou. (Same 37:11; Vakatakila 21:3-5) O rawa ni marautaka tale ga qori ke sega ni lekaleka na nomu rai.

4 Sasagataka na ka o Vinakata

Na cava mo cakava mo marautaka kina na veika e yalataki tu me baleta na gauna se bera mai? Vulica mada e liu na veika me baleta na Kalou. (Joni 17:3) O na vakabauta dei ni na yaco na veika e yalataka na Kalou ena veigauna se bera mai ni o vulica na ka dina ena iVolatabu. Na vakabauta va qori ena vakaukauataki iko mo cakava na veiveisau e gadrevi me vakadonui iko kina na Kalou.

Raica mada na ivakaraitaki i Mitieli. E tukuna: “Au dau gunu sivia, au vakayagataka tale ga na wainimategaga niu se qai yabaki 12. Au lewe tu ni dua na ilala, au nanuma tale ga niu na sega ni yacova na yabaki 30. Niu cudru qai rarawa, au saga kina vakavica meu vakamatei au. Au vakanuinui tu ni na levu tale na ka vinaka ena yaco ena noqu bula, ia au sega ni kunea qori.” Ni se vuli tiko o Mitieli, a tekivu vulica na iVolatabu kei ira na iVakadinadina i Jiova e dua na nona itokani ena ilala e lewena tiko. A vakadonuya tale ga o Mitieli me vulica na iVolatabu.

Na ka e vulica ena iVolatabu o Mitieli e veisautaka na nona rai me baleta na veigauna se bera mai. “Au vulica ni na parataisi tale na vuravura ena gauna se bera mai, eda na bula vakacegu qai sega ni lomaocaoca. Qori na ka au vakanamata tu kina. Au saga sara meu veitokani vinaka kei Jiova. Ia e sega ni dau rawarawa na noqu vakamarautaki koya. Niu tekivu vulica mada ga na iVolatabu, au mateni vakavica, au moce vata tale ga kei na dua na yalewa.”

A rawa vakacava ni valuta o Mitieli na veika dredre a sotava qai veisautaka na nona ivakarau ni bula? E tukuna: “A veiuqeti o koya e vakavulici au ena iVolatabu meu wilika e veisiga na iVolatabu, meu veimaliwai tale ga kei ira era via vakamarautaka na Kalou. Au liaca nira se vakamuai au tiko ga na noqu ilala. Au mani muduka na noqu vakailala kei ira, dina ga ni keimami dau veivolekati.”

A vakasamataka o Mitieli na isausau lalai kei na ka me vakaliuca, qori me vukei koya ena nona rawata na isausau lelevu me vaka na nona veisautaka na nona bula me salavata kei na ivakatagedegede ni Kalou. O rawa ni cakava tale ga qori. Vola na isausau o na via sauva ena loma ni dua na gauna kei na ka mo cakava mo rawata kina. Tukuna na nomu isausau vei ira era na tokoni iko qai kerea mera veivuke ena nomu dikeva na veika o sa rawata.

Qo sara ga na gauna mo vulica kina na veika me baleta na Kalou qai muria na nona veidusimaki. Saga tale ga mo lomana vakalevu na Kalou kei na nona Vosa, na iVolatabu. E tukuna na Vosa ni Kalou me baleti koya e muria na kena ivakavuvuli: “Na ka kecega sa cakava ko koya ena yaco.”​—Same 1:1-3.

[iVakamacala e ra]