Toro Voleka Vua na Kalou

Cata o Jiova na Veika Tawadodonu

“SA DUA na gauna sa lewa kina na tamata vua na tamata tani ka sa mani ca kina.” (Dauvunau 8:9) A volai na veivosa qori rauta na 3,000 na yabaki sa oti, e vakamacalataka sara ga vakamatata na vuravura eda bula tiko kina qo. E dau ivakarau ga ni tamata mera vakayagataka vakatani na lewa, veitalia se o cei o ira kei na vanua era bula kina. Era dau vakaduiduitaki ira na vakaloloma kei ira na dravudravua. E raica vakacava o Jiova na veika tawadodonu qori? Eda na raica na kena isau ena Isikeli 22:6, 7, 31.​—Wilika.

Ena lawa a soli vei ira na Isireli, a vakamatatataka sara ga o Jiova vei ira na veiliutaki mera kua ni vakayagataka vakatani na nodra lewa. Ena vakalougatataki ga na matanitu ke ra dau yalovinaka qai kauaitaki ira na lolovira kei na dravudravua o ira na veiliutaki. (Vakarua 27:19; 28:15, 45) Ia ena gauna i Isikeli, era vakayagataka vakatawadodonu na nodra lewa na iliuliu e Jerusalemi kei Juta. Na cava era cakava tiko?

Era vakayagataka na iliuliu “na ka era sa dui rawata [“na nodra lewa,” NW] era sa vakadavea na dra.” (Tikina 6) Na vosa “lewa” e dusia na kaukaua se veiliutaki. E tukuna e dua tale na ivakadewa: “O ira na turaga e Isireli . . . era vakayagataka nodra kaukaua mera vakadavedra.” Ena qai rawati vakacava na ivalavala dodonu ni o ira mada ga na iliuliu era vakayagataka tiko vakatani na nodra lewa ra qai vakamatei ira na sega ni cala?

E tomana o Isikeli ni sega ni beitaki ira ga na iliuliu, e beitaki ira tale ga era muria tiko na nodra ivalavala nira talaidredre ena lawa i Jiova. E kaya o Isikeli: “Era sa beca na tamadra kei na tinadra.” (Tikina 7) Nodra sega ni doka na itavi e lesia o Jiova vei ira na itubutubu, era sa vakaleqa sara ga na dei ni vuvale baleta qori e yavu ni dua na matanitu.​—Lako Yani 20:12.

O ira na tamata ca era sa qai vakacacani ira ga na vakaloloma ena kedra maliwa. Ena gauna era beca kina na Lawa, era sa vakaraitaka sara tiko ga nira sega ni doka na Lawa ni Kalou e yavutaki ena loloma a soli vei ira na Isireli. Kena ivakaraitaki, era vakaroti na Isireli ena Lawa ni Kalou mera dau kauaitaki ira era sega ni Isireli era tiko maliwai ira. (Lako Yani 22:21; 23:9; Vunau ni Soro 19:33, 34) Ia era “vakasaurarataki” ira ga na tiko vulagi.​—Tikina 7.

Era dau vakalolomataki ira tale ga na malumalumu​—na “luveniyali kei ira na yada.” (Tikina 7) Dua na ka na nona dau kauaitaka o Jiova na ka era gadreva o ira sa takali na tamadra, tinadra se na watidra. E yalataka na Kalou nira na lewai na dau vakalolomataki ira na luveniyali kei ira na yada.​—Lako Yani 22:22-24.

Na ka era cakava qori na Isireli, era talaidredre ra qai beca na Lawa ni Kalou e yavutaki ena loloma. Na cava ena qai cakava o Jiova? E yalataka: “Ka’u sa sovaraka kina vei ira na noqu cudru.” (Tikina 31) A qai yaco dina na ka a tukuna ena nona vakalaivi ira na kai Papiloni mera vakarusai Jerusalemi, qai kauti ira vakavesu na lewena ena 607 B.S.K.

Na veika e cavuta o Isikeli eda vulica kina e rua na ka me baleti Jiova kei na ka e vauca na veika tawadodonu: Kena imatai, e cata sara ga; kena ikarua, e lomani ira e sega nodra cala. E sega vakadua ni veisau na Kalou. (Malakai 3:6) E yalataka ni sa voleka ni vakaotia na veika tawadodonu kei ira era vakavuna tiko. (Vosa Vakaibalebale 2:21, 22) Vakacava mo vulica e levu tale na ka me baleta na Kalou e dau “vinakata na ka dodonu” kei na sala o rawa ni toro voleka kina vua?​—Same 37:28.

Wili iVolatabu e Vakatututaki ena Okosita:

◼ Isikeli 21-38

[Tikina bibi ena tabana e 27]

A vakamatatataka sara ga o Jiova vei ira na veiliutaki mera kua ni vakayagataka vakatani na nodra lewa