Nodra Tuvaitutu na iKa132 ni Kalasi e Kiliati

Tukuna ena Doudou na ka Dina

ENA 10 Maji, 2012, a dua na siga namaki ena vanua e dau caka kina nodra vuli na iVakadinadina i Jiova e Patterson, Niu Yoka. E vica vata na udolu era soqo vata mai ra qai vakaisulu vinaka, wili kina o ira na vulagi mai na so tale na vanua mera mai tiko ena nodra tuvaitutu na ika132 ni kalasi ni Watchtower Bible School of Gilead. Levu era osota na olo e Patterson; eso tale era sarava na porokaramu mai na so tale na Peceli. Na kedra iwiliwili kece na vakarorogo e 9,042.

Dua na ka nodra nanamaki. O ira na lewe ni kalasi qo era duatani mai vei ira era vuli ena gauna sa oti baleta nira sa veiqaravi vakatabakidua rawa tu mai​—eso era veiqaravi e Peceli, painia lavotaki, ivakatawa dauveilakoyaki, se ra daukaulotu​—ia era se bera ni bau vuli e Kiliati. Na cava ena tukuni vei ira na gonevuli me vaka ni sa dede na nodra veiqaravi vakatabakidua?

Era sega ni wawa vakadede na vakarorogo mera kila na ka ena tukuni vei ira na gonevuli. A jeameni ni porokaramu o Gerrit Lösch, e dua na lewe ni iLawalawa Dauvakatulewa ni iVakadinadina i Jiova, e solia tale ga na imatai ni vunau. A taroga e dua na taro vakavure vakasama, “O Dau Doudou?” E vakamacalataka ni o ira na lotu vaKarisito era dau tutaka na ka dina, era tutaka tale ga na ivakavuvuli kece vaKarisito. Na noda tutaka na ka dina e sega ni okati ga kina na noda vakavulici ira na tamata ena ka dina, ia meda vukei ira sara ga mera lomana na ka dina.

A taroga o Brother Lösch: “Eda na kila vakacava nida sa kunea na ka dina?” E tukuna nida na sega ni vakadinadinataka mai na iwiliwili ni tamata era sa ciqoma. Dina ni sa vica vata na milioni nikua era sa ciqoma na sokalou dina, ia a vica wale ga era ciqoma ena Penitiko 33 S.K. E vakamacalataka e lima na sala eda na kila kina nida sa kunea na ka dina: (1) Eda muria tiko ga na ivakavuvuli i Jisu, (2) eda dau veilomani, (3) eda muria na ivakatagedegede savasava ni Kalou, (4) sega ni veitovaki ena veileti ni vuravura qo, kei (5) e digitaki keda na Kalou meda vakatokayacataki ena yacana.

“Talairawarawa ena Veidusimaki”

Era veinanuyaka na vakarorogo na cava ena vakarau cakava o Geoffrey Jackson, e dua na iLawalawa Dauvakatulewa, ni taura tu nona kato ni isulu ena gauna e yabe cake kina ena itutunivunau! Na ulutaga ni nona vunau “Talairawarawa ena Veidusimaki,” yavutaki ena Aisea 50:5. E dusi Jisu tiko na parofisai qori, e tukuna: “Ia ka’u a sega ni beca, ka’u a sega ni vakanadakuya.”

A uqeti ira na gonevuli o Brother Jackson mera dau kauaitaka totolo na veidusimaki i Jiova ni vakayagataka na yalona tabu, na iVolatabu, kei na nona isoqosoqo. Ena Maciu 25:14-30 e vakamacalataki kina na vosa vakatautauvata me baleta na taledi. E via tautauvata ga na taledi a soli vei ratou na tolu na bobula baleta ni vakatau ena ka eratou dui rawata. A vinakati me ratou solia nodratou vinaka kece ena kena cakacakataki. A vakacaucautaki e rua na bobula, rau qai vakatokai me rau bobula ‘vinaka qai yalodina.’ Na yalodina e sega ni vakatau ena veika e rawati, e vakatau ga ena talairawarawa kei na kena muri na veidusimaki.

Na ikatolu ni bobula e vakatokai me ‘ca qai vucesa,’ e “tawayaga” tale ga. Na cava nona leqa? A buluta na nona taledi. Na taledi e sega ni dua ga na sede, ia e dua na umailavo e tautauvata kei na 6,000 na dinari, na kena bibi e 20 na kilokaramu. Qori e tautauvata kei na bibi ni kato ni sulu e vakatarai vua e dua e gole e vanuatani. E ka ni sasaga toka me na bulu e dua iyaya e kena levu e vaka na kato ni isulu. Koya gona, a cakava na bobula na ka a sega ni vakaroti vua me cakava, a buluta na taledi. Ena va tale ga qori e dua na daukaulotu, ena rairai osooso​—ia ena osooso ena cava? De dua ena volavola wasoma vei ira na nona itokani se nona vuvale, vakayagataka na Internet, veimaliwai, se caka bisinisi. O koya e cakava qori ena oca sara ga ni cava e dua na siga, ia a sega ni cakava na itavi a lesi vua me cakava. A tinia o Brother Jackson: “Talairawarawa tiko ga ena veidusimaki!”

“Kua Vakadua ni Vakatitiqa”

Qori na usutu ni nona ivunau o Anthony Morris e dua na lewe ni iLawalawa Dauvakatulewa. E tukuna: “E sega vakadua ni tukuna na iVolatabu ni rau salavata na vakabauta kei na vakatitiqa. Na vakabauta e sabaya na vakatitiqa.” O Setani a rawai koya na yalewa uasivi o Ivi ni a vakavurea ena nona vakasama na vakatitiqa, e rawa tale ga ni cakava qori ena noda vakasama. E tukuna o Brother Morris: “Vakaukauataka nomu vakabauta, ena qai seavu na vakatitiqa.” A vakabibitaka na italanoa me baleti Pita, ena ‘nona taubale e delaniwai,’ ia a rere qai tekivu dromu ni “raica na bula ni cagi.” Ni dodoka yani na ligana o Jisu me tauri koya, e taroga o Jisu: “Na cava o vakatitiqa kina?” (Maciu 14:29-31) “Me vaka ni o ni daukaulotu oni na osooso ena veiqaravi vakatabakidua, levu era na qoroya na ka oni cakava tiko, e vaka ga ni o taubale tiko e delaniwai, ia ni bula na cagi kua vakadua ni vakatitiqa.”

E tomana o Brother Morris, ni so na gauna ena vaka na bula ni cagi na ituvaki dredre eda sotava, ia ena qai lai ruru ni toso na gauna. Nira sotava na ituvaki dredre, e vakayaloqaqataki ira na gonevuli mera vakasamataka na ka rau cakava o Paula kei Sailasa ena gauna rau vesu tu kina e Filipai. E tukuna na Cakacaka 16:25: “Ena lomaloma ni bogi, erau masu rau qai vakacaucautaka na Kalou ena sere o Paula kei Sailasa, era vakarogoci rau tiko na kaivesu.” Vakasamataka mada qo: Erau sega wale ga ni masu, erau lagasere tale ga. E rogo levu na nodrau lagasere nira rogoca mada ga na kaivesu. E tukuna o Brother Morris nida sega ni kenadau kece ena lagasere, ia meda kua ni madua na lagasere vakabibi ena gauna eda sotava kina na ituvaki leqataki. A qai tinia o Brother Morris ena nona wilika na vosa qo “Vosota me Yacova na iCavacava,” ena Sere naba 135 ena ivolanisere Sere Vei Jiova.

Eso Tale na iVunau Veiuqeti

“O Via Raica e Levu na Siga Vinaka?” qori na usutu ni nona vunau o Robert Luccioni, e veiqaravi tiko ena Tabana ni Volivoli. A yavutaki na usutu qori ena vosa nei Tui Tevita ena Same 34:12. E vakamacalataki ena ivunau i Brother Luccioni na ka meda cakava nida sotava na ituvaki dredre, da qai dei tiko ga ena noda veiwekani kei Jiova. E levu na ka eda rawa ni vulica mai na itukutuku ena 1 Samuela wase  30. Ni drovaki Tui Saula voli o Tevita kei ira nona tamata kei ira na nodra dui vuvale, eratou lai tu tani tu e Sikilaki. Ena gauna era vesuki ira kina na nodra vuvale na kai Amalekaiti, era beitaki Tevita na nona tamata, era via vakaviriki koya tale ga ena vatu. Na cava a qai cakava o Tevita? E sega ni yalolailai ia ‘a vakayaloqaqataki koya o Jiova na nona Kalou.’ (1 Samuela 30:6) A kerea qai muria na veidusimaki i Jiova, e sereki ira kina na kauvakavesu. E vakadeitaka vei ira na gonevuli o koya e vunau oya nira na raica e levu na siga vinaka ke ra nuitaki Jiova tale ga ra qai muria na nona veidusimaki. Era na marautaka na nodra bula ena ilesilesi dokai e lesi vei ira.

“Vakanamata ina Veigauna Vinaka ni Mataka ni sa Oti na Butobuto,” qori na usutu ni nona ivunau o Michael Burnett, e dua vei ira na dauveivakavulici e Kiliati. Ena gauna e dromu kina na siga kei na gauna e cabe kina, era dau wasea vakatolu na Isireli na nodra matayadra ena veiya va na aua. Na kena iotioti ni yadra, mai na 2 na kaloko na bogi ina 6 na kaloko ena mataka. Qori na gauna e dau butobuto qai batabata kina na vanua, e dau dredre kina na yadra. A vakananuma na daunisame na veivosa i Jiova me rawa ni yadra tiko ga ena iotioti ni gauna ni yadra. (Same 119:148) E tukuna o Brother Burnett vei ira na gonevuli: “E bibi mo ni yadra tiko ga. Oni na vakila tale ga ena so na gauna na ituvaki dredre me vaka ga e sotava na daunisame ena nona yadra ena bogi. E bibi mo tuvanaka rawa na ka mo cakava mo kua kina ni yalolailai.” A qai vakadreti ira mera tomana tiko ga na nodra vakadidike ena so na ulutaga vereverea qai titobu me rawa nira yadra tiko kina vakayalo. A vakamatatataka o Brother Burnett na veika e via vakabibitaka: “Ena veisiga, o na masuti Jiova ni o vinakata me nomu itokani. Koya gona, saga me vosa vei iko o Jiova e veisiga ni o wilika na iVolatabu. Sa voleka ni oti na butobuto kei na ituvaki dredre eda sotava tu nikua. Koya gona, tuvanaka na ka o na cakava ena veisiga nimataka, qori ena vukei iko mo vakanamata ena veigauna vinaka se bera mai.”

“Vakarautaki ena Cakacaka ni Gauna se Bera Mai,” yavutaki ena 1 Pita 5:10, qori na usutu e vosa kina o Mark Noumair, dua tale ga na dauveivakavulici e Kiliati. E taroga qo vei ira na gonevuli: “Me vaka ni oni sa kenadau ena cakacaka vakaitalatala, na cava ga oni sureti mai kina ena Watchtower Educational Center?” E sauma: “Baleta ni oni sa kenadau ena nomuni cakacaka. E levu vei ira na kenadau ena so na cakacaka era dau tara nodra livi mera lai vuli me rawa ni vakalevutaki na nodra kilaka. Ena loma ni lima na vula sa oti, e sa ‘vakaukauataki’ qai ‘vakadeitaki’ kemuni o Jiova ena nomuni vulica vagumatua na nona Vosa kei na nona isoqosoqo me rawa ni oni colata na ilesilesi bibi cava ga o ni lesi kina. Ke kaukaua na icoka ni vale ena sega ni takelo se ramusu ni taura tu na bi ni doka. Na yaga ni ka oni vulica ena laurai ena gauna oni sa na cakacaka vata kina kei ira na tacimuni vakayalo. Vakacava o na beca na ivakavuvuli vakalou ena gauna o sotava kina na ituvaki dredre, se o na dei tiko ga ena nomu muria na ka oni vulica ena Vosa ni Kalou? Na ka ga e kaukaua e rawa ni colata na ka bibi. Na kaukaua ni kau e vakatau ena kaukaua ni nodra veisemati vinaka na wa lalai ena loma ni kau. Na nomu kaukaua ena vakatau sara ga ena ka o sa vakadeitaka e lomamu. E kauti kemuni mai eke o Jiova moni vakaukauataki kina, kei na nomuni nuitaki ena itavi oni sa na vakacolati kina. Sa cakava na Kalou na nona itavi, sa neimami masu ni oni na cakava na nomuni itavi, qai laiva vua na ‘Dauveivakavulici Levu’ me vakaotia na nomuni vuli.”

Irogo kei na Veitarotarogi

E dau veiuqeti ena gauna ni tuvaitutu e Kiliati meda rogoci ira sara ga na gonevuli, qori na ka era namaka na vakarorogo ena siga ya. Ena dua na wase ni porokaramu, era vakatasuasuataka na gonevuli na ka era cakava mera vunau kina vei ira eso tale. Kena ivakaraitaki, erau wawa tiko ena rara ni waqavuka me ono na aua e dua na veiwatini mai Varanise me rau gole tiko ena vuli e Kiliati. Erau vakaliuliu me rau vosa vei rua na turaga ena valenikana ena rara ni waqavuka, erau waraka tale tiko ga na nodrau waqavuka. E tukuna e dua vei rau na turaga oya ni kai Malawi, erau mani vosa sara vua ena vosa vakaChichewa. Ena levu ni nona kurabui, a taro se rau kila vakacava na nona vosa. Erau tukuna nirau a daukaulotu tu e Malawi. Ni tukuna na kena ikarua ni kai Cameroon, e kurabui ni rau vosa tale ga vua ena vosa vakaVaranise. Dua na ka na nodrau qoroi ira na iVakadinadina i Jiova, rau mani vunau vei rau.

A vakataroga o Nicholas Ahladis, mai na Translation Services e rua na veiwatini. Dua na veiwatini erau toki mai Ositerelia me rau daukaulotu ena yasayasa e dau caka kina vakalevu na ivalu e East Timor. E dua tale na veiwatini erau biuti Korea me rau lai veiqaravi e Hong Kong. Dua na ka na nodratou nanamaki na veiwatini ruarua qori me ratou lai vakayagataka na ka eratou vulica ena vanua ratou veiqaravi kina.

Nira tara na gonevuli na nodra ivola, a matataki ira na lewe ni kalasi e dua gonevuli me wilika nodra ivola ni vakavinavinaka me baleta na ka era vakavulici kina. Sa qai tinia o Brother Lösch na porokaramu ena so na vosa vakatautauvata totoka ena nona tukuna ni ka dina e rairai totoka me vaka na drodrolagi, e ivakaruru ena vanua dravuisiga, e vaka tale ga na ikelekele ena wasawasa voravora. E tukuna: “E veivakalougatataki na noda kila na ka dina. Moni tukuna ena doudou na ka dina, qai vukei ira eso tale mera tukuna tale ga ena doudou.”

[Chart/​Mape ena tabana e 31]

VEIKA ME BALETA NA KALASI

12 vanua era cavutu mai kina

36 ivakatautauvata ni yabaki

22 ivakatautauvata ni yabaki ni papitaiso

15 ivakatautauvata ni yabaki ena cakacaka vakaitalatala vakatabakidua

[Mape]

(Raica tale na ivola)

Era lesi na lewenikalasi ina vanua e volai toka e ra:

NODRA ILESILESI NA LEWENIKALASI

BELIZE

BENIN

CAMBODIA

CAMEROON

CAPE VERDE

CÔTE D’IVOIRE

DOMINICAN REPUBLIC

EAST TIMOR

ECUADOR

GABON

GEORGIA

GUINEA

HONG KONG

LIBERIA

MADAGASCAR

MALAWI

PERU

SAMOA

SÃO TOMÉ AND PRÍNCIPE

UNITED STATES OF AMERICA

ZIMBABWE

[iYaloyalo ena tabana e 31]

Nodra Tuvaitutu na Kalasi 132 ni Watchtower Bible School of Gilead

E nabataki na iyatu me tekivu mai liu me yaco i muri, e tuvai na yaca me tekivu mai na imawi ina imatau.

(1) Iap, R.; Iap, J.; Ng, T.; Ng, P.; Laurino, F.; Laurino, B.; Won, S.; Won, S.

(2) Morales, N.; Morales, M.; Zanutto, J.; Zanutto, M.; Rumph, I.; Rumph, J.; Germain, D.; Germain, N.

(3) Atchadé, Y.; Atchadé, Y.; Thomas, C.; Thomas, E.; Estigène, C.; Estigène, P.

(4) Ehrman, D.; Ehrman, A.; Bray, J.; Bray, A.; Amorim, M.; Amorim, D.; Seo, Y.; Seo, Y.

(5) Simon, J.; Simon, C.; Seale, C.; Seale, D.; Erickson, J.; Erickson, R.

(6) McCluskey, D.; McCluskey, T.; Brown, A.; Brown, V.; Mariano, D.; Mariano, C.; Loyola, Y.; Loyola, C.

(7) Rutgers, P.; Rutgers, N.; Foucault, P.; Foucault, C.; Wunjah, J.; Wunjah, E.