“Dou Sega ni Kila na Kena Siga se na Kena Aua”

“O koya gona, mo dou yadra tiko, ni dou sega ni kila na kena siga se na kena aua.”​—MACIU 25:13.

O NA SAUMA VAKACAVA?

Na cava eso na vuna e yaga kina na noda sega ni kila na siga kei na aua ena yaco kina na icavacava?

Era vakaraitaka vakacava na lumuti nira yadra tiko ga?

Na cava eso na sala eda rawa ni vakaraitaka kina nida sa tu vakarau ena gauna ena yaco kina na icavacava?

1-3. (a) Na ituvaki cava e vakabibitaki kina na ka meda vulica ena rua na vosa vakatautauvata i Jisu? (b) Na taro cava meda sauma?

RAITAYALOYALOTAKA mada ni kerei iko e dua na vakailesilesi vakamatanitu mo kauti koya ina dua na bose bibi. Ia ni vo toka e vica na miniti mo biubiu mo lai raici koya, o qai kila ni sega ni veirauti na waiwai ni nomu motoka. O vakatotolo sara mo lai volia eso tale na waiwai. Ni yaco yani o vakailesilesi a sega ni raici iko, mani kerea tale e dua me kauti koya ni sa sega ni rawa ni wawa. Ni o lesu yani, o qai kila ni sa gole na vakailesilesi, drau sa na sega ni lako vata. Ena tarai iko vakacava ya?

2 Qo e dua tale na ituvaki. Kaya mada ni o dua na vakailesilesi, o qai lesi ratou e tolu na tagane ena so na itavi bibi. Ni o vakamacalataka na ka o vinakata me caka, eratou tukuna sara ni ratou na cakava. Ia ni o lesu mo lai raici ratou, e rua ga erau cakava na ka o kerea. E soli iulubale o koya e sega ni cakava na itavi e lesi vua, e sega mada ga ni bau saga me cakava. Ena tarai iko vakacava qori?

3 Na ituvaki se qai vakamacalataki oti ga mai e tautauvata kei na vosa vakatautauvata i Jisu me baleta na yalewa vuku kei na yalewa lialia kei na vosa vakatautauvata ni taledi. Qori e vakaibalebaletaka tiko na iotioti ni veisiga qai vakaraitaka na vuna era na yalodina kina qai vuku eso na lumuti kei na vuna era sega ni yalodina kina eso.a (Maciu 25:1-30) A vakabibitaka o Jisu na ka meda vulica ena italanoa qori ena nona kaya: “O koya gona, mo dou yadra tiko, ni dou sega ni kila na kena siga se na kena aua.” A tukuna tiko o Jisu nira na sega ni kila na nona tisaipeli na gauna ena vakarusa kina na vuravura i Setani. (Maciu 25:13) E rawa tale ga nida muria na ivakasala qori nikua. Ena yaga vakacava na noda yadra tiko ga me vaka a uqeti keda kina o Jisu? O cei era vakaraitaka nira sa tu vakarau mera vakabulai? Na cava tale ga meda cakava meda yadra tiko ga kina?

YAGA NOMU YADRA TIKO

4. Me rawa nida ‘yadra tiko,’ na cava e sega ni bibi kina meda kila na gauna ena yaco kina na icavacava?

4 Ena vinakati ena so na cakacaka meda kila tiko na gauna, me vaka na cakacaka ena vale ni buli iyaya, noda lai raici vuniwai, se wawa basi. Ia ena so tale na cakacaka me vaka na bokoci ni kama se na veivueti ena gauna ni leqa tubukoso, na nomu vuki raica tiko na kaloko e rawa ni vakawelei iko qai yaco kina na leqa. Ena ituvaki va qori e bibi sara na noda kauaitaka ga na cakacaka mai na noda kila na gauna. Ni sa roro voleka sara mai na icavacava ni ituvaki qo, sa qai bibi ga ena gauna qo meda vakarogoya na sala e vakarautaka o Jiova me veivakabulai kina. Me rawa nida yadra tiko na lotu vaKarisito da qai cakava na ka e vinakata o Jiova, e sega ni bibi meda kila na gauna ena yaco kina na icavacava. E tiko e lima na vuna e vinaka kina meda kua ni kila na siga kei na aua ena yaco kina na icavacava.

5. Ena kilai vakacava na ka e tu e lomada nida sega ni kila na siga kei na aua ena yaco kina na icavacava?

5 Kena imatai, na noda sega ni kila na gauna ena yaco kina na icavacava e rawa ni kilai kina na ka dina e tu e lomada. Na noda sega ni kila tale ga qori e vakaraitaka ni dokai keda o Jiova, e solia kina na galala meda vakatulewataka meda yalodina vua. Eda sa vakanamata tu meda bula sivia na icavacava ni ituvaki qo, ia eda qaravi Jiova nida lomani koya, sega ni noda vinakata ga meda bula. (Wilika Same 37:4.) Eda marau ni vakayacora na loma ni Kalou da qai kila ni vakavulici keda meda vinaka kina. (Aisea 48:17) Eda na sega ni raica me icolacola bibi na nona ivunau.​—1 Joni 5:3.

6. Nida qaravi Jiova ena noda lomani koya, e tarai koya vakacava? Na cava na vuna?

6 Na ikarua ni vuna e yaga kina na noda sega ni kila na siga kei na aua, oya nida rawa ni cakava kina na ka ena vakamarautaki Jiova. Nida qaravi Jiova ena noda lomani koya da qai sega ni qaravi koya nida kila ni sa voleka na icavacava se meda vakaicovitaki kina, eda sa tokoni koya tiko ena nona vakadinadinataka ni lasulasu na kena meca o Setani. (Jope 2:4, 5; wilika Vosa Vakaibalebale 27:11.) Nida vakasamataka na mosi kei na rarawa e vakavuna na Tevoro, eda marau meda tokona na veiliutaki cecere i Jiova da qai cata na veiliutaki ca i Setani.

7. Na cava o nanuma kina ni yaga na nomu vakuai iko?

7 Kena ikatolu, na noda sega ni kila na gauna ena yaco kina na icavacava ena uqeti keda meda dau vakuai keda. Eso nikua era sega ni kila na Kalou era vakabauta tale ga ni na yaco na icavacava. Nira rerevaka ni rawa ni vakarusai na vuravura ena dua ga na gauna qo ena leqa tubukoso, era nanuma kina: “Meda kana ga, da gunu, nida na mate nimataka.” (1 Kor. 15:32) Ia eda sega ni rere na dauveiqaravi ni Kalou. Eda sega ni via tawasei keda meda cakava ga na veika e baleti keda. (Vkai. 18:1) Eda sega tale ga ni muri lomada, ia eda na vakayagataka wale na noda gauna, noda igu, kei na veika eda taukena meda wasea kina vei ira tale eso na itukutuku vinaka ni Matanitu ni Kalou. (Wilika Maciu 16:24.) Eda marau nida qarava na Kalou, vakabibi na noda vukei ira tale eso mera kilai koya.

8. Na ivakaraitaki vakaivolatabu cava e vakaraitaka ni bibi meda nuitaki Jiova vakatabakidua kei na nona Vosa?

8 Na ikava ni vuna e vinaka kina na noda sega ni kila na siga kei na aua, nida rawa ni nuitaki Jiova kina vakalevu da qai saga ena noda vinaka kece meda bulataka na nona Vosa. Nida ivalavala ca, e dau rawarawa sara meda nuitaki keda ga. A vakasalataki ira kece na lotu vaKarisito o Paula: “O koya gona, me qaqarauni o koya e nanuma ni sa tudei tu, de qai bale.” Era mate e 23,000 na Isireli nira talaidredre vei Jiova ena gauna era vakarau curu kina ina Vanua Yalataki. E kaya o Paula “na ka kece e yacovi ira . . . e volai tale ga me ivakasala vei keda eda bula donuya na icavacava ni veika vakavuravura.”​—1 Kor. 10:8, 11, 12.

9. Ena vakaukauataka vakacava na noda vakabauta kei na noda veiwekani kei Jiova na veivakatovolei eda sotava?

9 Na ikalima ni vuna e vinaka kina meda kua ni kila na siga ena yaco kina na icavacava, oya ni rawa meda vuli mai na veivakatovolei eda sotava, ena vakaukauataka tale ga na noda vakabauta. (Wilika Same 119:71.) Ena ivakataotioti ni ituvaki qo ena “vakilai kina e levu na ka dredre.” (2 Tim. 3:1-5) E levu ena vuravura i Setani era cati keda, de dua eda na vakacacani ena vuku ni noda vakabauta. (Joni 15:19; 16:2) Me vaka ga na kena vakaukauataka na kaukamea na yameyame ni buka, na veivakatovolei tale ga eda sotava e rawa ni vakaukauataka na noda vakabauta. Ke da yalomalumalumu ni muria na veidusimaki i Jiova eda na sega ni yalolailai nida vakatovolei. Ia sa na qai vakavolekati keda ga vei Jiova ena sala eda sega sara ga ni bau vakasamataka.​—Jeme. 1:2-4; 4:8.

10. Na cava meda cakava meda vakila kina na toso totolo ni gauna?

10 E rawa ni totolo se berabera na toso ni gauna. Nida ogaoga tiko ga da qai sega ni vuki raica na kaloko meda kila na gauna, eda na vakila ni toso totolo na gauna. Ke da ogaoga tale ga ena cakacaka marautaki e solia vei keda o Jiova, ena vaka me totolo wale ga mai na icavacava. Qori na ka era ivakaraitaki vinaka kina e levu na lumuti. Meda veivosakitaka mada vakalekaleka na ka a yaco ni sa dabe oti vakatui o Jisu ena 1914, eda na raica kina na nodra tu vakarau eso kei na nodra vakawelewele eso tale.

LUMUTI ERA TU VAKARAU

11. Ni oti na 1914, na cava era nanuma kina eso na lumuti ni berabera na Turaga?

11 Vakasamataka tale mada na vosa vakatautauvata i Jisu me baleti ratou na yalewa vuku kei na yalewa lialia, vaka kina na vosa vakatautauvata ni taledi. Ke ratou kila na yalewa kei na dauveiqaravi ena vosa vakatautauvata qori na gauna ena yaco mai kina na tagane vou se na turaga, ena sega ni gadrevi me ratou yadra tiko. Ia ni ratou sega ni kila na gauna, ena vinakati me ratou tu vakarau. Era sa kila tu na lumuti ena vica sagavulu na yabaki sa oti ni na dua na yabaki vakairogorogo na 1914, ia era sega sara ni kila na ka ena yaco. Ni sega ni yaco na ka era namaka, era nanuma kina eso ni berabera o Jisu. A tukuna e dua na tacida tagane ena dua na gauna e muri, “Keitou nanuma sara ga e le vica ni keimami na lako i lomalagi ena imatai ni macawa ni Okotova [1914].”

12. Era vakaraitaka vakacava na lumuti nira yalodina qai vuku?

12 Vakasamataka mada na kena veivakayalolailaitaki ni sega ni yaco na icavacava me vaka e namaki voli! Kena ikuri era tusaqati na tacida ena iMatai ni iValu Levu. A voleka sara ni cegu vakadua na cakacaka vakavunau, e vaka ga era sa moce na lumuti. Ia era vakayadrati ena ka e yaco ena 1919! A mai dikeva o Jisu na valenisoro vakayalo ni Kalou. O ira na lumuti era sega ni vakadonui ena gauna qori, era sa sega ni rawa ni ‘cakacaka’ vua na Tui. (Maciu 25:16) Era vakataki ratou ga na yalewa lialia ena vosa vakatautauvata i Jisu, nira sega ni yadrava me tawa tiko ga na nodra waiwai vakayalo. Me vakataki koya na dauveiqaravi vucesa ena vosa vakatautauvata i Jisu, era sega ni yalorawarawa mera vakuai ira ena vuku ni Matanitu ni Kalou. Ia e levu na lumuti e vakasakiti na nodra yalodina, qai gu na lomadra mera qarava na nodra Turaga ena gauna dredre a yaco tu kina na ivalu.

13. Na cava na nodra rai na lumuti ni oti na 1914? Na cava na nodra rai na lumuti nikua?

13 Ni oti na 1914, a qai vakamacalataka na Watchtower na nodra rai e levu na lumuti ena gauna ya. E tukuna nira sega ni yalolailai na lumuti e donu na nodra rai. E tomana na Watchtower: “Keimami sega ni via cakava ga na ka keimami vinakata; ena gauna keimami kila kina ni cala na neimami nanuma me baleta na Okotova, 1914, keimami marau ni sega ni veisautaka na Turaga na nona lalawa me ganiti keimami. Qori na ka keimami sega ni vinakata me yaco.” Era vinakata ga mera kila vinaka na inaki ni Kalou. O ira na lumuti nikua era vakaraitaka na yalomalumalumu vata ga qori, era vinakata tale ga mera vakayacora na loma ni Kalou. Era sega ni kaya nira uqeti vakalou, era vinakata ga mera vakayacora na cakacaka a lesia o Jisu mera cakava e vuravura. Ena gauna qo era sa vakatotomuria tiko na nodra ivakaraitaki na lotu vaKarisito e nodra inuinui na bula tawamudu e vuravura, na “isoqosoqo levu” ni ‘so tale na sipi.’​—Vkta. 7:9; Joni 10:16.

MEDA TU VAKARAU

14. Ena taqomaki keda vakacava na noda muria vinaka na ituvatuva ni veivakani vakayalo e vakarautaka na Kalou?

14 Me vakataki ira ga na lotu vaKarisito lumuti, o ira na isoqosoqo levu era yadra tiko era muria vinaka na ituvatuva ni veivakani vakayalo e vakarautaka na Kalou. Nira cakava ya, e vaka sara ga era tawana tiko ga na nodra waiwai vakayalo mai na Vosa ni Kalou kei na yalona tabu. (Wilika Same 119:130; Joni 16:13.) Qori e vakaukauataki ira qai vukei ira mera tu vakarau ni lesu mai na Karisito, era yalodina tiko ga nira vakatovolei vakaca mada ga. Kena ivakaraitaki, ena dua na nodra valeniveivesu na Nazi era vesu tu kina na mataveitacini era vakayagataka ga e dua na ilavelave ni iVolatabu. Era mani masuta me levu tale na kakana vakayalo. Oti ga vakalailai era rogoca ni sa curu tale ga yani ena valeniveivesu ya e dua na tacida, a kauta vakavuni yani e vica na itabataba vovou ni Vale ni Vakatawa ena yavana kau. A kaya o Brother Ernst Wauer, e dua na lumuti a bula mai na veivakararawataki qori: “A vukei keimami o Jiova ena dua na sala vakasakiti me keimami wiligusutaka na itukutuku veivakayaloqaqataki ena itabataba vovou qori.” Oti a qai kaya: “Nikua sa tu vakarawarawa na kakana vakayalo, vakacava eda dau vakavinavinakataka na kakana qori? Au kila ni o Jiova ena vakalougatataki ira vakalevu era nuitaki koya, era yalodina tiko ga, ra qai kana ena nona teveli.”

15, 16. A vakalougatataki vakacava na nodrau gumatua ena cakacaka vakaitalatala e dua na veiwatini? Na cava eda rawa ni vulica ena nodrau ivakaraitaki?

15 Era ogaoga tale tiko ga ena cakacaka ni Turaga na so tale na sipi ena nodra tokoni ira na taci Karisito. (Maciu 25:40) Era sega ni vakataki koya na dauveiqaravi ca qai vucesa ena vosa vakatautauvata i Jisu, ia era tu vakarau mera vakuai ira ra qai gumatua ena kena vakaliuci na cakacaka e vauca na Matanitu ni Kalou. Kena ivakaraitaki, ni rau kerei me rau lai veiqaravi ena yalava ni vosa vakaJaina mai Kenya o Jon kei na watina o Masako, sa tu rawa na ka erau a lalawataka me rau cakava. Ia ni rau vakasamataka vinaka na kedrau ituvaki rau qai masulaka, rau vakatulewataka me rau sa na toki i Kenya.

16 A vakalougatataki vakalevu na nodrau sasaga. Erau kaya, “E totoka na cakacaka vakaitalatala ena vanua ya.” E vitu na nodrau vuli iVolatabu, e levu tale na veika marautaki erau sotava. Erau tomana, “Keirau vakavinavinakataki Jiova e veisiga ni biuti keirau e kea.” E levu tale ga na tacida e laurai ena nodra vakatulewa nira via vakaitavi vakalevu ena cakacaka ni Kalou me yacova na icavacava. Vakasamataki ira mada na vica vata na udolu na sa vuli oti mai Kiliati ra qai veiqaravi vakadaukaulotu. O rawa ni vulica e levu tale na ka me baleta na cakacaka vakadaukaulotu ena Vale ni Vakatawa ni 15 Okotova, 2001, na kena ulutaga, “Ra Solia na Nodra Vinaka Taucoko!” Ni o wilika ena ulutaga qori na ka era dau cakava ena dua na siga na daukaulotu, vakasamataka na sala o rawa ni vakalevutaka kina na nomu veiqaravi me vakalagilagi kina na Kalou, o na marau tale ga kina vakalevu.

MO YADRA TIKO GA

17. Na cava eda kalougata kina nida sega ni kila na siga kei na aua ena cava kina na ituvaki qo?

17 Eda kalougata dina nida sega ni kila na siga kei na aua ena cava kina na ituvaki qo. E sega sara ga ni vakararawataki keda qori, ia sa qai vakavolekati keda ga vei Jiova na Tamada dauloloma na noda ogaoga tiko ga ni vakayacora na lomana. Nida kauaitaka tiko ga vakabibi na cakacaka e solia vei keda o Jisu meda vakayacora, da qai sega ni vakawelei, eda marau vakalevu nida qaravi Jiova.​—Luke 9:62.

18. Na cava e bibi kina me dei tiko ga na noda vakabauta?

18 Sa voleka sara na siga ni veilewai ni Kalou. Eda sega ni via vakararawataki Jiova se o Jisu. Erau sa lesia vei keda na ilesilesi dokai ena iotioti ni veisiga qo. Eda marautaka dina na nodrau nuitaki keda!​—Wilika 1 Timoci 1:12.

19. Eda na vakaraitaka vakacava nida sa tu vakarau?

19 Se da mani nuitaka na bula i lomalagi se na Parataisi e vuravura, meda vakadeitaka mada ga meda yalodina tiko ga ena itavi vaKalou e lesi vei keda, na noda vunau kei na noda veivakatisaipelitaki. Eda se sega tiko ga ni kila na siga kei na aua ena yaco mai kina na siga i Jiova. Vakacava e gadrevi dina meda kila? Eda rawa ga ni vakarautaki keda vinaka da qai tu vakarau ena kena yaco mai na siga qori. (Maciu 24:36, 44) Ke da nuitaki Jiova vakatabakidua da qai vakaliuca na nona Matanitu ena sega ni matewale na noda vakanuinui.​—Roma 10:11.

[iVakamacala e ra]

[iYaloyalo ena tabana e 23]

[iYaloyalo ena tabana e 26]

Ke mani dredre vakacava na ituvaki, meda qara ga na kakana vakayalo

[iYaloyalo ena tabana e 27]

Ena tasiri na gauna nida ogaoga voli ena cakacaka vaKarisito