O Se Nanuma Tiko?

O bau wilika vinaka na itabataba ni Vale ni Vakatawa era se qai tabaki oti ga? Raica mada ke o rawa ni sauma e vica na taro qo:

Eda rawa vakacava ni bokoca na yameyame ni vosa vakalialia?

E bibi meda dikeva na lomada. Meda kua ni dau vakalewa e dua na tacida, ena vinaka meda vakasamataka na vuna eda cakava kina qori. Vakacava eda vakalewai koya me rawa ni nanumi kina nida vinaka cake? Na noda veivakalewai e rawa tale ga ni vakavuna me lai ca sara vakalevu e dua na ituvaki e sa ca rawa toka.​—15/8, tabana e 21.

E kilai vakacava ena Lawa na nona rai na Kalou me baleti ira na yalewa?

E levu na galala e soli vei ira na yalewa ni Isireli, e vakatarai tale ga mera vuli. E bibi mera rokovi ra qai dokai, me taqomaki tale ga na nodra dodonu.​—1/9, tabana e 5-7.

Na cava ena yaco ni bera na icavacava?

Ena kacivaki na “vakacegu kei na sautu!” Era na ravuti Papiloni na ka Levu na veimatanitu ra qai vakarusa. Ena ravuti na tamata ni Kalou. Ena yaco na ivalu ni Amaketoni, tarava sara na nona biu o Setani kei ira na nona timoni ena qara e sega ni vakabotona.​—15/9, tabana e 4.

E yaga vakacava vei keda na noda sega ni kila na tikinisiga ena yaco kina na icavacava?

Ena laurai kina na ivakarau dina ni lomada. E rawa nida cakava kina na ka ena vakamarautaki Jiova. Ena uqeti keda meda dau vakuai keda, eda rawa ni nuitaka kina vakalevu na Kalou kei na nona Vosa. E rawa tale ga nida vuli mai na veivakatovolei eda sotava.​—15/9, tabana e 24-25.

Eda rawa ni vakayagataka vakacava na Vakatekivu 3:19 nida veivosaki kei na dua e vakabauta na kama i eli?

E tukuni ena tikinivolatabu qori ni na suka tale ena kuvunisoso o Atama ena gauna sa mate kina, sega ni lai vakamai ena bukawaqa i eli.​—1/10, tabana e 13.

O cei e vakatakarakarataka na “vitu na kalokalo” ena liga i matau i Jisu e cavuti tiko ena Vakatakila 1:16, 20?

E vakatayaloyalotaki ira na ivakatawa lumuti ena ivavakoso, e rawa tale ga ni vakatayaloyalotaki ira na ivakatawa kece ena ivavakoso.​—15/10, tabana e 14.

Na cava e rawa ni cakava na vuvale e saumi dinau tiko?

E bibi me rau veivosakitaka vakadodonu na veiwatini na veika me baleta na dinau, me kua tale ga ni caka na veiba. Ena yaga sara ke rau vakadikeva vinaka na ituvatuva vakailavo e sa tiko rawa. Vakacava erau rawa ni vakalevutaka na ilavo e dau rawati ena vuvale se me rau vakalailaitaka na ka me saumi? E dodonu me rau vakatulewataka se dinau cava me rau na sauma e liu, de dua me rau na veivosakitaka kei koya e dodonu me rau saumi dinau kina. Ia e bibi me donu tiko nodrau rai, me rau lomavakacegu tale ga ena ilavo e sa tiko rawa. (1 Tim. 6:8)​—1/11, tabana e 19-21.

E vakaraitaka vakacava o Jisu na yalomalumalumu e cavuti ena Aisea 50:4, 5?

E tukuni ena tikinivolatabu oya ni “yame sa vakavulici rawa” ena “sega ni vakanadakuya.” E vakaraitaka o Jisu na yalomalumalumu ena nona dauvakarogoca matua na veika e vakatavulica o Tamana. E yalorawarawa o Jisu qai vinakata sara ga me vuli vei Jiova, e raica sara ga na nona yalomalumalumu na Kalou ena nona dau vosoti ira na tamata ivalavala ca.​—15/11, tabana e 11.

E vakadinadinataki vakacava na nodra yalodina na iVakadinadina i Jiova ena dua na sitaba ni ivakananumi ni Estonia?

Ena 2007 a tabaka na National Post Office e dua na sitaba me baleta na labakawa a cakava o Stalin mai Estonia. E laurai tu kina na naba 382, qo e dusia na iwiliwili ni iVakadinadina i Jiova kei na luvedra era kau ena dua na keba ena dua na vanua yawa sara e Rusia ena 1951, ra qai vakacakacakataki kina vakasaurara.​—1/12, tabana e 27-28.