Na Cava e Vakalaiva Kina na Kalou na Veivakalolomataki?

E volatukutukutaki ena iVolatabu eso na ivakaraitaki ni nodra veivakalolomataki o ira e tu vei ira na lewa. Eda na rairai vakasamataka na nona vakalolomataki o Nepoci.a A tui tiko e Isireli o Eapi ena ikatini ni senitiuri B.S.K., qai vakalaivi Jesepeli na watina me lewa na vakamatei i Nepoci kei ratou na luvena me rawa ni taura o Eapi na loganivaini i Nepoci. (1 Tui 21:​1-16; 2 Tui 9:26) Na cava e vakatara kina na Kalou na veivakalolomataki va qori?

Meda dikeva mada e dua na vuna bibi: Na Kalou e sega ni lasu rawa. (Taito 1:2) Ia e lako vata vakacava qori kei na ivalavala tawadodonu ni veivakalolomataki? Ena ivakatekivu a vakarota na kawatamata na Kalou nira na mate ke ra talaidredre vua. A yaco dina na ka e tukuna, me tekivu ena talaidredre mai Iteni, sa tiki voli ni bula ni kawatamata na mate. E laurai na veivakalolomataki ena imatai ni tamata a mate o Epeli ni labati koya o Keni.​—Vakatekivu 2:​16, 17; 4:8.

Me tekivu mai na gauna qori, e tukuna na Vosa ni Kalou me baleta na bula ni kawatamata: “Sa lewa . . . na tamata vua na tamata tani ka sa mani ca kina.” (Dauvunau 8:9) E dina beka na vosa qori? A vakaroti ira na nona tamata na Isireli o Jiova nira na veivakalolomataki na nodra tui, ena vakavuna mera tagi vua na Isireli. (1 Samuela 8:​11-18) Na tui vuku mada ga o Solomoni a vakalolomataki ira na nona tamata ni lavaka vakasivia vei ira na ivakacavacava mera solia. (1 Tui 11:43; 12:​3, 4) Ia o ira na tui ca me vakataki Eapi e torosobu sara na nodra veivakalolomataki. Vakasamataka mada: Vakacava ke tarova na Kalou na ivalavala kece qori, e vakaraitaka beka ni dina ena ka e tukuna?

Meda nanuma tiko ni tukuna tale ga o Setani nida qarava ga na Kalou meda rawaka kina. (Jope 1:​9, 10; 2:4) Ke tarova na Kalou na veivakalolomataki kece e caka vei ira na nona tamata, ena sega beka ni vakaraitaka ni dina na ka e tukuna o Setani? Ke tarova tale ga na nodra vakalolomataki na tamata kece, ena sega beka ni beitaki ena levu tale na lasu? E levu gona era na nanuma ni rawa vua na tamata me liutaki koya ga, e sega ni gadrevi na veivuke ni Kalou. Ia e veibasai kei na ka e tukuna na Vosa ni Kalou ni sega ni rawa vua tamata me liutaki koya vakataki koya. (Jeremaia 10:23) Eda vinakata gona na veiliutaki ni Matanitu ni Kalou ni qo ga na matanitu ena muduka na veivakalolomataki.

Kena ibalebale ena vakalaiva tu ga na veivakalolomataki na Kalou? Sega. Vakasamataka e rua na ka sa cakava: Kena imatai, a vakatakila na ibalebale ni veivakalolomataki. Me kena ivakaraitaki, e tukuni vakamatata ena nona Vosa na vere ca kece e cakava o Jesepeli me baleti Nepoci. E vakatakila tale ga na iliuliu e vakavuna tiko na veika ca. (Joni 14:30; 2 Korinica 11:14) Na iliuliu qori o Setani na Tevoro. Ni vakatakilai o koya e vakavuna tiko na veika ca kei na veivakalolomataki, e vukei keda na Kalou meda vakuai keda mai na ivalavala ya. E dei kina noda inuinui ni bula tawamudu ena gauna se bera mai.

Kena ikarua, e vakadeitaka sara ga na Kalou ni na muduka na veivakalolomataki. E laurai qori ena nona vakatakila, vakataulewa, kei na nona totogitaki rau o Eapi kei Jesepeli, wili kina e levu tale era dau veivakalolomataki. Na veika e cakava ya, eda nuitaka kina na nona vosa ni yalayala ni na totogitaki ira na daucaka ca. (Same 52:​1-5) Eda nuidei tale ga ni Kalou ena vakaotia na rarawa e vu mai na veika ca e tarai ira tu era lomani koya.b Ni ratou bula yani ena parataisi e vuravura na turaga yalodina o Nepoci kei ratou na luvena, eratou na raica ni sa sega na veivakalolomataki.​—Same 37:34.