ULUTAGA LEVU | KE O MATE—O NA BULA TALE?
Na Cava e Yaco Nida sa Mate?
“Tolu ga na vanua au kila nida na lako kina nida sa mate: lomalagi, eli, se puregatorio. Au kila niu sega ni uasivi meu lako i lomalagi, sega tale ga niu ca sara meu lako i eli. Sega mada ni macala e vakacava tu na bula e puregatorio. Au sega tale ga ni wilika na veika qori ena iVolatabu. Au rogo italanoa tu ga.”—Lionel.
“Au vulica nida na lako kece i lomalagi nida sa mate, ia au sega ni vakabauta. Au nanuma ga ni sa itinitini ni ka kece na mate—ena sega tale ni dua na inuinui.”—Fernando.
O dau vaqaqa: ‘Na cava mada e yaco nida sa mate? Era lai vakararawataki tale tiko ena dua na vanua na wekada lomani era sa takali? Eda na raici ira tale? Eda na vakadeitaka vakacava qori?’ Dikeva na ka dina e vakavuvulitaka na iVolatabu. Meda raica sara mada qo na ivakamacala ni iVolatabu me baleta na kedra ituvaki na mate. Oti eda na qai veivosakitaka na inuinui e tukuni tu ena iVolatabu.
Na cava na kedra ituvaki na mate?
KENA ISAU VAKAIVOLATABU: “Era kila na bula tiko nira na mate, ia o ira na mate era sega sara ga ni kila e dua na ka, sa sega tale na kedra isau ni sa guilecavi na ka era dau nanumi kina. Na ka kece e cakava na ligamu mo qarava ena nomu igu taucoko, ni sega na cakacaka se na vakasama se na kilaka se na vuku ena iBulubulu o lako tiko kina.”a—Dauvunau 9:5, 10.
Nida mate eda na tini ga ina iBulubulu; qo na vanua vakaivakatakarakara e sega kina na cakacaka se kilaka. Na cava nona rai na turaga yalodina o Jope me baleta na iBulubulu? Era yali kece vua na nona iyau kei ratou na luvena ena dua ga na siga, oti qai robota na yagona na bo mosimosi. E vakamasuta na Kalou: “Moni tabonaki au ena iBulubulu [“e eli,” Catholic Douay Version], ni vunitaki au kina.” (Jope 1:13-19; 2:7; 14:13) E kila vinaka o Jope ni iBulubulu e sega ni vanua me lai kama kina, me rarawa tale kina vakalevu. Ia e raica ni na lai vakacegu toka kina.
E dua tale na sala eda rawa ni kila kina na kedra ituvaki na mate. Qo ena noda dikeva na itukutuku uqeti vakaivolatabu me baleti ratou na le walu eratou vakaturi mai na mate.—Raica na kato “Walu na Veivakaturi ena iVolatabu.”
E sega ni dua vei ratou e talanoataka ni a lai bula ena dua na vanua ni marau se rarawa. Ke ratou lai bula dina kina, macala ga ni ratou na talanoataka. Ena volaitukutukutaki tale ga ena ivola uqeti vakalou na iVolatabu me kilai. E sega ni dua na ka va qori e volaitukutukutaki. Eratou sega mada ga ni tukuna kina e dua na ka na le walu qori. Na vuna? Ni ratou a sega ni vakila e dua na ka, e vaka ga ni ratou moce lutu. Na iVolatabu tale ga e dau vakayagataka na ivakatautauvata ni moce me vakamacalataka na kedra ituvaki na mate. Kena ivakaraitaki, rau a “moce, oya ni [rau] sa mate” na turaga yalodina o Tevita kei Sitiveni.—Cakacaka 7:60; 13:36.
Na cava na nodra inuinui na mate? Era rawa ni yadra tale mai na moce qori?
a Ena iVolatabu Vakadewa ni Vuravura Vou na vosa “iBulubulu” e tautauvata kei na vosa vakaIperiu na “Seoli” kei na vosa vaKirisi “Etesi.” Eso na iVolatabu e vakayagataka na vosa “eli,” ia e sega ni vakaivolatabu na vakasama ni nodra vakararawataki ena bukawaqa na mate.