“Na Vosa e Vosataki Taudonu”
1 E ka beka ni bolebole na nomu wasea vei ira na tani na itukutuku ni bula? E dodonu beka mo tukuna e dua na ka e kilakilai dredre mo vakadrukai ira kina na vakarogoci iko tiko? Ni talai iratou nona tisaipeli o Jisu, e kaya vei iratou: “Ia ni dou sa lako tiko, mo dou vunau, ka kaya, Sa voleka mai na matanitu vakalomalagi.” (Maciu 10:7) E sega ni dredre na itukutuku oya qai rawarawa na kena tukuni. E vaka tale ga kina edaidai.
2 So na gauna ena gadrevi ga e vica na vosa me tekivu kina na veivosaki. Ni sotava na matanivanua ni Iciopea o Filipi, e tarogi koya: “O sa kila na ka ko sa wilika, se segai?” (Caka. 8:30) E yaga dina na veivosaki oya ena vuku ni “vosa e vosataki taudonu”!—Vkai. 25:11, NW.
3 O rawa ni vakayagataka na iwalewale vata oya ena nomu cakacaka vakaitalatala. Ena sala cava? Ena nomu dauveiraiyaki mo raica na veika era tu tikivi iko, qai digitaka na vosa veiganiti mo tauca. E rawa tale ga ni o taro, qai rogoca na kena isau.
4 So ga na Taro Rawarawa: Me tekivutaki na veivosaki, e rawa ni o taroga oqo:
◼ “Oni dau cavuta na Masu ni Turaga (se, Tama i Keimami) ena nomuni lotu?” (Maciu 6:9, 10) Tukuna e dua na qaqana, qai kaya: “Era taroga e so, ‘O cei na yaca ni Kalou e tukuna o Jisu me vakarokorokotaki?’ So tale era taroga, ‘Na Matanitu cava e kaya o Jisu meda masuta?’ Oni lomavakacegu ena isaunitaro e dau tukuni vei kemuni?”
◼ “Oni bau liaca tu se: ‘Cava sara mada na inaki ni bula?’” Vakamacalataka ni bibi eke na noda kila na Kalou.—Dauv. 12:13; Joni 17:3.
◼ “Oni bau kila tu ni na oti vakadua na mate?” Wilika na Aisea 25:8 kei na Vakatakila 21:4 me vakadeitaka na nomu isaunitaro.
◼ “E tiko beka e dua na iwali rawarawa ni tiko yavavala ena vuravura?” Tukuna ni Kalou e vakavulici keda meda ‘lomana na kai noda.’—Maciu 22:39.
◼ “Ena rusa beka na noda vuravura ena dua na siga?” Vakamacalataka na vosa ni yalayala ena iVolatabu ni na tu ga na vuravura me tawamudu.—Same 104:5.
5 Me rawarawa, tukuna vakadodonu, qai tukuna tale ga vakayalovinaka na itukutuku vinaka. Ena vakalougatataka o Jiova na nomu sasaga ke o wasea e dua mada ga “na vosa” ni ka dina vei ira na tani.