“Au Sega ni Soro! Au Sega ni Soro! Au Sega ni Soro!”
1 Oya na vosa ni dua na lotu Vakarisito yalodina a bulata na veivakararawataki mosimosi nei Itala (Holocaust), qai voqa tu vei ira e vica vata na udolu na iVakadinadina yaloqaqa—o ira na sa mate kei ira na bula—era tudei tu ga ena nodra vakabauta, dina ga ni vakararawataki ira vakaca o ira na ilawalawa i Itala. (Efeso 6:11, 13) Na italanoa veivakadrukai ni nodra tabuvakasuka kei na nodra qaqa e talanoataki tiko ena vidio veivakauqeti oqo na Jehovah’s Witnesses Stand Firm Against Nazi Assault. Eda uqeti kece ena ivavakoso meda sarava da qai veivosakitaka na ka e dui tarai keda yadua.
2 Me vakavure vakasama mada ga vei keda na veitaro oqo: (1) Na cava sara mada e vu ni nodra tabusoro na iVakadinadina i Jiova vei ira na ilawalawa i Itala? (2a) Na duidui levu cava a vure mai na nodra sega ni via cavuta na iVakadinadina na nodra vosa ni veikidavaki na ilawalawa i Itala, na cava na vuna era sega ni via cavuta kina? (2b) E lai tarai ira vakacava na vuvale iVakadinadina? (3) Era le vica na iVakadinadina era bala ina keba ni veivakararawataki, era vakatakilakilataki vakacava e kea, e vakacava na nodra itovo na Gestapo vei ira? (4) Na cava era bolea na mataveitacini? (5a) Gauna cava, ra qai vosa doudou vakacava na iVakadinadina i Jiova vei ira na ilawalawa dau veivakasaurarataki nei Itala? (5b) Na cava a qai cakava o Itala? (6) E vakabulai ira vakacava na tamata i Jiova kei ira tale na so na nodra duavata vakamataveitacini? (7)Na sere cava ni Matanitu ni Kalou (Kingdom song) a volai ena dua na keba ni veivakararawataki? (8) Na nodra ivakaraitaki cava na turaga, marama, kei ira na itabagone yalodina e uqeti iko mo yalodina tiko ga vei Jiova, se mani vakacava sara na dredre o sotava? (Raica tale ga na 1999 Yearbook, taqana 144-7.) (9) Ni o dua na iVakadinadina i Jiova, e tarai iko vakacava na vidio oqo mo kua kina ni vakavuravura?
3 Na nodra ivakaraitaki veivakauqeti ni yaloqaqa na iVakadinadina i Jiova e vakaraitaki ena vidio na Stand Firm e rawa ni vukei ira na itabagone, o ira sara tale ga era sega ni gone iVakadinadina, nira sotava na veika bibi e vauca na veicati, veimurimuri, kei na vakatulewataki ni ka e dodonu kei na ka e cala. Ke o dua na itabagone o vuli tiko ena sekeneri, vakacava mo solia vei nomu qasenivuli na vidio oqo me vakayagataka ena nona kalasi? Ni o solia vua na vidio, vakamacalataka ni lewena tiko na itukutuku makawa, ia e levu era sega ni se kila, se tukuna vua ni veika e vakaraitaki ena vidio a yaco dina qai tiko kina na ivakavuvuli dodonu meda muria.
4 Na vidio na Stand Firm e dua na iyaya ni cakacaka vinaka e vakaraitaki kina na sala e veivakaukauataki kina vakayalo na ivakavuvuli vakalou, qai vakamarautaka na Kalou na noda tudei meda cakava na ka dodonu. (1 Kor. 16:13) Vakaraitaka vei ira kece era taleitaka na ka dina.