Noda Vakavakarau ena Soli iVoladraudrau
1. Na cava e vinaka kina meda vakarautaka e dua na vakatutu mai na noda cavuqaqataka na kena e tabaki ena Noda Cakacaka Vakaitalatala?
1 Eda na rairai taroga, ‘Na cava meda vakarautaka tale kina e dua na vakatutu ni soli ivoladraudrau, ni sa tu na kena e tabaki ena Noda Cakacaka Vakaitalatala?’ Levu era raica na yaga ni vakatutu oqo, ia se gadrevi ga na vakavakarau vinaka. Na vakatutu e ganita e dua na yalava ena rairai sega ni ganita e dua tale. Meda kua gona ni nanuma ni dodonu me lai cavuqaqataki na ka e vakatututaki. Kevaka mada ga eda vakayagataka e dua na vakatutu e tabaki, e vinaka meda tukuna ga ena noda vosa.
2. Na cava meda cakava ena ulutaga eda na vakamacalataka vei ira na itaukeinivale?
2 Digia e Dua na Ulutaga: Nida wilika oti na ivoladraudrau, meda digia sara e dua na ulutaga ena ganita na yalava, o koya beka eda taleitaka. Era na via wilika na itaukeinivale kevaka era raica ni bulabula qai vu mai lomada noda ivakamacala. De dua eda na via vakamacalataka na ulutaga era na rairai taleitaka na tiko ena yalava, ia e vinaka meda kila tale ga na vo ni ulutaga. Oqo ena rawa kina nida veisautaka na noda ivakamacala kevaka eda siqema ni ganiti itaukeinivale e dua tale na ulutaga.
3. Na ikaunivosa cava o raica ni dau laulau?
3 Taro: Oti, da vakarautaka na ikaunivosa. Oqo e bibi dina. E vinaka meda taroga e dua na taro me rawa ni vagolea na vakasama nei itaukeinivale ina ulutaga eda sa digia meda na vakamacalataka. Ena vinaka sara meda taroga na nodra nanuma. Meda kua ga ni taroga na ka era na rairai tikotikoca kina na itaukeinivale se vakavu veiba.
4. Na cava na yaga ni noda wilika e dua na tikinivolatabu ke ganita meda cakava vaka kina?
4 Wilika e Dua na Tikinivolatabu: Na iotioti ni ka meda cakava oya meda digia e dua na tikinivolatabu meda wilika vei ira na itaukeinivale ke ganita, rawa sara ga nida wilika e dua na tikinivolatabu e tiko ena ulutaga eda na vakamacalataka. Era na raica kina na itaukeinivale ni yavutaki mai na Vosa ni Kalou na ka eda tukuna. (1 Ces. 2:13) Kevaka mada ga era sega ni ciqoma na ivoladraudrau, era sa rogoca ga na ka e tukuni ena Vosa na Kalou. E so na dautukutuku era dau wilika e liu na tikinivolatabu ni bera nira taroga e dua na taro matata e vakavure vakasama vei itaukeinivale. Ia ni bera ni o wilika, taroga vua, “Au via kila se cava na nomuni nanuma ena tikinivolatabu oqo.” Ni sa wili oti, sa tukuna oti tale ga o itaukeinivale na nona nanuma, vakamuai koya sara ena dua na tikina veiuqeti ena ivoladraudrau, oti solia sara na ivoladraudrau.
5. Na cava meda nanuma tiko nida vakarautaka e dua na vakatutu?
5 E sega ni gadrevi meda cavuqaqataka sara ga na vakatutu e tabaki. Na ka ga e vinakati me rawarawa qai lekaleka na noda ivakamacala. Meda vakayagataka ga na iwalewale e rawarawa vei keda, e vuavuaivinaka tale ga. Me bulabula noda vakamacalataka na ivoladraudrau, meda kauta cake tale ga mai na veitikina bibi. Kevaka gona eda vakavakarau vinaka, ena laulau na noda solia Na Vale ni Vakatawa kei na Yadra! vei ira era “sa vakarautaki tu ki na bula tawa mudu.”—Caka. 13:48, VV.