‘Me Uqeti Kemuni na Yalo Tabu’

1. Na cava me kilai me baleta noda cakacaka vakavunau?

¹ E vinakati meda gugumatua tiko ga ena basoga kece ni noda sokalou, ‘me uqeti keda na yalo tabu’ da qai “bobula i Jiova.” (Roma 12:​11, NW) Ia e vuqa na ka e rawa ni vakaluluqataka noda gugumatua ena cakacaka vakavunau. Eda na ‘vakacaudreva vakacava me vaka na caudre ni buka’ noda gumatua ena cakacaka e vauca na Matanitu ni Kalou?​​—⁠2 Tim. 1:​6, 7, VV.

2. E veisemati vakacava na vuli vakataki keda kei na gumatua ena cakacaka vakavunau?

² Vuli Vakataki Keda: Ena kilai e dua e dau gumatua ena vunau ena nona taleitaka na lawa ni Kalou qai uqeti koya na ka dina e wilika. (Same 119:97) Nida kunea na iyau talei ni iVolatabu ena noda vuli vakataki keda, eda na uqeti qai gugumatua. Noda lomani koya e vakarautaka mai na ka dina qo kei na noda taleitaka meda wasea na itukutuku vinaka, ena uqeti keda meda vakalagilagia na Kalou da tukuna tale ga na yacana. (Iper. 13:15) Noda gumatua na vunautaka na itukutuku vinaka e vakaraitaka nida vakadinata ni yaga qai bibi na vunau.

3. E yaga vakacava ena noda cakacaka vakavunau na yalo tabu ni Kalou?

³ Masuta na Veidusimaki ni Yalo Tabu: Ena sega ni vuavuaivinaka na noda cakacaka vakavunau ena noda kaukaua ga. Eda na rawa ga ni gugumatua ena veidusimaki ni yalo tabu ni Kalou. (1 Pita 4:​11) Nida vakavolekati keda vua na iVurevure ni “kaukauwa,” eda na doudou na vunau. (Aisea 40:​26, 29-​31) Ni sotava na ituvaki dredre o Paula ena cakacaka vakavunau, a ‘vukei koya na Kalou.’ (Caka. 26:​21, 22) O koya gona meda masuta na yalo tabu i Jiova e dau veivakaukauataki, ena uqeti keda meda gumatua ena cakacaka vakavunau.​​—⁠Luke 11:​9-​13.

4. Ena yaga vakacava na gumatua, ia na cava meda nanuma tiko?

⁴ Ni vaka na bukawaqa noda gumatuataka na cakacaka vakavunau, era na uqeti na tacida mera gugumatua tale ga. (2 Kor. 9:⁠2) Era na vakarorogo na tiko ena yalava ke da gumatuataka da qai tukuna ena nuidei noda itukutuku. Ia me salavata noda gumatua kei na maqosa da qai yalomalumalumu. (Taito 3:⁠2) Eda na doka na itaukeinivale ena gauna kece da qai rokova nona vakatulewa.

5. Na veiuqeti cava meda muria?

⁵ Nida dau kacivaka na itukutuku vinaka ni Matanitu ni Kalou, me ‘uqeti keda mada ga na yalo tabu.’ Eda na rawa ga ni gugumatua nida vuli vakataki keda qai vu mai lomada noda masu vei Jiova, e dau dusimaki keda ena yalona tabu. Ena sala qo, eda na gugumatua tiko ga kina ena cakacaka vakavunau ena ‘veidusimaki ni yalo tabu, da qai vosa ena nuidei.’​​—⁠1 Ces. 1:⁠5.