Vakavinavinakataka na iLoloma Uasivi ni Kalou
1. Na cava eda vakavinavinakataki Jiova kina?
1 E levu na ‘iloloma vinaka’ e vakarautaka o Jiova, ia na kena e uasivi duadua nona soli Luvena me ivoli. (Jeme. 1:17) Eda rawata kina e levu na veivakalougatataki, e vosoti tale ga kina noda ivalavala ca. (Efeso 1:7) Qori na vuna eda dau vakavinavinaka kina. Eda dau vakasamataka vakatitobu na iloloma talei qo ena gauna ni iVakananumi.
2. Nida vakavinavinakataka na ivoli, na cava eda rawa ni cakava yadudua se vakavuvale?
2 Vakavinavinakataka Vakavuvale na iVoli: Mo dou vakavinavinakataka vakavuvale na ivoli, e rawa sara ga ni dou veivosakitaka na veika me baleta na ivoli ena yakavi ni Sokalou Vakavuvale, ni bera na iVakananumi ena 30 Maji. E rawa tale ga ni dou wilika qai veivosakitaka na tikinivolatabu ni iVakananumi. Meda vakasamataka yadudua na yaga ni ivoli ena noda bula, noda rai me baleti Jiova, noda rai baleti keda, ira tale eso, kei na noda veisiga mai muri. E yaga tale ga meda vakatovotovotaka na rua na sere vou ni iVakananumi, na sere naba 8 kei na 109.—Same 77:12.
3. Eda na vakaraitaka vakacava noda vakavinavinaka?
3 Vakaraitaka Noda Vakavinavinaka: Noda vakavinavinakataka na ivoli ena uqeti keda meda tukuna vei ira tale eso na veika me baleti Jiova kei na nona loloma uasivi ena nona talai Luvena mai. (Same 145:2-7) Eso na vuvale era vakaraitaka nodra vakavinavinaka ena nodra lalawataka me painia veivuke e dua ena vula o Maji, Epereli kei na Me. Ke sega ni rawa qori, e rawa beka nida “volia na gauna” me vakalevutaki kina noda cakacaka vakavunau? (Efeso 5:16) Ena uqeti keda tale ga noda vakavinavinaka meda sureti ira tale eso mera tomani keda ena iVakananumi. (Vkta. 22:17) O rawa ni vola sara ga qo na yacadra o na sureta, ira na tataleitaki, vuli iVolatabu, ira na wekamu, ira oni cakacaka vata, se tiko veitikivi, qai saga mo vakaitavi sara vakalevu ena veisureti lavotaki ni iVakananumi.
4. Eda na vakayagataka vinaka vakacava na gauna ni iVakananumi?
4 Na iVakananumi e gauna vinaka ni noda vakavinavinakataka na iloloma uasivi e vakarautaka o Jiova. Meda vakayagataka mada ga na gauna qori ena noda vakavinavinakataka vakalevu na ivoli kei na ‘itukutuku talei kei Karisito e sega ni katumi rawa.’—Efeso 3:8.